ˈSëëdhɛ ˈö Pɔdhö ˗ya bɔ Wlɔmö ˗mɛn ˗nu ˗dhɛ

13 ˗A ˗dhɛ ˗ya ˗bha kö mɛn ꞊gban ˈˈpɛpɛ ˗wo wo ˗gɔ ˈdho ˈˈshia˗ mɛn ˗nu ˈö ˗wogbinŋdhɛ ˈdhö ˗an ˗gɔ* ˗an ˗dhɛ. ˗A ˗gɛn ˗mü ꞊dhɛ mɛn ˈbhaa ˈkö ˗wogbinŋdhɛ dho kë ˗a ˗gɔ kö ˗Zlan ˈti ˈˈwɩ ˗a ˗bha ˈyaa ˈdhö. ˗Zlan ˈnën ˗we ˗a ˗bha ˈö mɛn ˗nu ˈö ˗wogbinŋdhɛ ˈdhö ˗an ˗gɔ bhë ˈwo ˗kë ˗duɛɛ ˈwo˗ ˗bha bhë ˗a ˈgü. 2 Yö ˈnën ˈö˗ ˗wɔn ˈgü, mɛn ˈˈoo ˗mɛn ˈö ˗gban ˗an ˗bha mɛnkɔɔnsü ˗gɔ, kö ˗ya ˗gban ˈwɔn kë ˗kɔ ˈö ˗Zlan ˗ya ˗ya ˗a ˗gɔ. ˈYö mɛn ˈö ˗gban ˈwɔn kë ˗kɔ ˈö ˗Zlan ˗ya ˗ya ˗a ˗gɔ, za ˗dho ˗a ˈkun. 3 ˗A ˗gɛn ˗mü ꞊dhɛ ˗gɔmɛn ˗nu ˈwo bhë, ˗suʋ̈ ˗an ˗gɔ ˗mɛn ˗nu ˗mü ˗an ˈka. ˈˈKɛɛ ˈmɛn ˈö ˈwɔn ˗së ˗kë ˈyaa ˈnën ˈö ˗suʋ̈ ˗an ˗gɔ, mɛn ˈö ˈwɔn yaa ˗kë ˈyö ˗suʋ̈ ˗an ˗gɔ. ˗Ya kë ꞊dhɛ ˈbhaa˗ ˈˈpiʋ̈ kö ˈü ˈˈsuʋ̈ mɛn ˗nu ˈö ˗wogbinŋdhɛ ˈdhö ˗an ˗gɔ bhë ˗an ˗gɔ, ˗bhö ˈwɔn ˗së kë ˗kplawo. ˈBha˗ kë ˈˈdhʋ̈, ˗wo ˗dho ü ˈˈnuɛ bho ˗a ˗wɔn ˈgü. 4 ˗A ˗gɛn ˗mü ꞊dhɛ ˗Zlan ˗bha yökëmɛn ˗nu ˗mü ˗an ˈka ü ˗bha ˈwɔn ˗së ˗wɔn ˈgü. ˈˈKɛɛ ˗ya kë ꞊dhɛ ü ˈwɔn yaa kë ˗ni ˈgü, kö ˗bhö ˈˈsuʋ̈ ˗an ˗gɔ, ˈyö sü ꞊dhɛ ˗blaan ˗dhaa ˈö ˗an ˗gɔ bhë, ˈyaa ˗an ˗gɔ ˈˈwɛɛwɛ. ˗Zlan ˗bha yökëmɛn ˗nu ˈö ˈwo ˈwɔn bho mɛn ˗nu ˈwo ˈwɔn yaa kë ˗ni ˈgü ˗an ˈgü yö ˗mü ˗an ˈka.

5 ˈDhɛ ˈö ˈˈdhʋ̈, ˗a ˗dhɛ ˗ya ˗bha ꞊dedewo kö ˈka ka ˗gɔ ˈdho ˗an ˗dhɛ ˈˈshia˗ kö ˈwaa ˗dho ˈwɔn bho ka ˈgü, ˈˈkɛɛ ˗yö kë ˈˈdhʋ̈ kö ka zuʋ̈ˈˈ ˈyaa ˗dho za dɔ ka ˗bha ˈpö. 6 Yö ˈnën ˈö˗ ˗wɔn ˈgü ˈö ˈka ˈniin˗ ꞊sɔnŋ bho ˗an ˗gɔ. ˗A ˗gɛn ˗mü ꞊dhɛ ˗Zlan ˗bha yökëmɛn ˗nu ˗mü ˗an ˈka kö ˈwɔn ˗së ˗yö kë mɛn ꞊gban ˗dhɛ ˗kplawo. 7 Pë ˈö mɛn ˈö ˈdhö ˗a ꞊duaa ˈka, ˗kaa nu ˗a ˗dhɛ.* Mɛn ˈö ˈniin˗ ꞊sɔnŋ ꞊suu ˈˈoo ˗su ˗dhɛ ka ˗gɔ, ˗kaa nu ˗a ˗dhɛ. Mɛn ˈö˗ ˈˈpiʋ̈ ˈka ˈˈsuʋ̈ ö ˗gɔ, ˗ka ˈˈsuʋ̈ ˗a ˗gɔ. Mɛn ˈö˗ ˈˈpiʋ̈ ˈka ö ꞊bhlëë ˗ya, ˗kaa ꞊bhlëë ˗ya.

8 Mɛn ˈbhaa ˗bha ˈˈpɔ ˈyaa ˗dho kë ka ˗bha kö yö ˈti kë ka ˗dhɔ ˗bha ka ˈko ˗nu kë ˗sü ˈka. ˗A ˗gɛn ˗mü ꞊dhɛ mɛn ˈö˗ ˗yayoo ˗dhɔ ˗ya ˗kë, kö pë ˈö ˈtɔŋ˗ ˗ya pö ꞊yaa˗ kë ˈkpakpadhö. 9 ˈYö sü ꞊dhɛ ˗a pö ˈö ˈtɔŋ˗ ˗ya wo: «Ü dua ˈyaa ˗mü kö ˈü ü ˗bha dhebɔ ɛɛnˈˈ ü ꞊gɔn ˈto ˈü niënŋˈˈ, ü dua ˈyaa ˗mü kö ˈü mɛn zë, ü dua ˈyaa ˗mü kö ˈü ꞊kwaan, ü dua ˈyaa ˗mü kö ü zuʋ̈ˈˈ ˗yö bhɔ mɛn ˗nu ˗bha pë ˗bha» bhë, waa ˈtɔŋ˗ ˈˈpɛpɛ ˈwo to ˗an ˗gɔ ˈö ˈdhö yö ˗mü ˈtɔŋ˗ dosɛnŋ ˈö yö ˗a ˈka: «Ü dua ˗mü kö ü ˗yayoo ˗dhɔ ˗yö ü kë ꞊dhɛ ü ˗de ˈdhö.» 10 ˗Dhɔ ˈyaa ˈwɔn yaa kë mɛn ˈˈwɛɛ ˗nu ˈka. Mɛn ˈö ˗dhɔ ˈdhö˗ ˈgü kö ˗ya ˈtɔŋ˗ ˈgüwɔn ꞊gban kë.

11 Ka dua ˗mü ˈka˗ kë ˈˈdhʋ̈, ˈyö sü ꞊dhɛ ˈˈtʋ̈ŋ ˈö ˈkwa˗ ˈgü yö ka ꞊dede ka˗ ˗dɔ. ˈˈTʋ̈ŋ ˈö ka dua ˈdhö ˗mü kö ˈka ˈgo ˗a ˈka yi ˈgü, kö ˈka ˗ya ka ˈˈɲaan, yö ˈnën ˈö ˗ya ˗wo ˈsaadhö bhë. ˗A ˗gɛn ˗mü ꞊dhɛ ˈˈtʋ̈ŋ ˈö yö ˗a ˈgü kwa ˗bha dhasü ˗ya yö ꞊klöö˗ ˗ya ʒiö ˗a ˈka ˈˈtʋ̈ŋ ˈö ˈkwa ˗kë ˗a ˈka ˗zo ˗yö Yesu ˗dhɛ ˗mɛn ˗nu ˈka bhë ˗a ˗ta. 12 ˈKwa ʒiö gbeŋ ꞊zinŋ ˈgü, ˗a ˈˈtʋ̈ŋ ˈyaa ꞊gblɛɛn ˈzü kö ˗dhɛ ˗yö ꞊kpɔɔ. ˈDhɛ ˈö ˈˈdhʋ̈, ˗kwa kwa ˗kɔ bho ˗dhɛtiidhɛ ˈgüwɔn ˗nu ˈgü, kö ˈkwa ˗dhɛpuudhɛ ˗bha ˗gblü ˗gɔn ˗a ˈka ˗kwɛɛ ˗nu ˈsü. 13 Kwa ˗bha ˗tosɛta kë ˗kɔ ˗yö kë ˗së ꞊dhɛ ˗kɔ ˈö mɛn ˗yö ˈwɔn ˗nu ˗kë ˗a ˈka ˈɲënŋ˗ ˈgü ˗a ˈdhö. ˗Kwa ˈˈkan ˈwlaan˗ kë ˗sü ˈö ˈwo˗ ˗ʒiö ꞊gɔɔ waa we ˈˈdudu mü ˗sü, ˈˈɲangüyaa kë ˗sü, ˈwɔn yaa kë ˗sü ˈö ˈˈɲaan˗ ˈˈgbɩɩ˗ ˈka, ˈˈdhinaan kë ˗sü waa ꞊druɛɛ˗ ˗an ˗bha. 14 ˗Kwa ˈto Dëmɛn Yesu Klito ˗bha ˈwɔnzuan ˈˈpiʋ̈.* ˈKwaa ˗dho kwa bun dhɔɔbhaawɔn ˗nu kë ˗sü ˗yökodhiʋ̈ kë ˈzü.