Mɛn -ya ga -yö -dho ˈˈmɛn?

Ü -bha mɛn -wɔngbɩɩsü -ya ˈgo ü -bha -ee? ˈWɔn ˈˈdhiʋ̈- suu ˈö bhë -ya kë, mɛn ꞊vadhɛ ˗wo wo -de dhɛɛˈˈ -kpɔ ˈwo- pö: «Mɛn -ya ga -yö -dho ˈˈmɛn? N -man mɛn -nu ˈwo go n -bha a -dho -kpan -an -bha yi ˈbhaa ˈka -ee?» Dhɛɛˈˈ -nu ˈwo bhë -an -yɔ -nu ˈwo Biblö ˈgü ˈö ˈwo mɛn -zogban, kwa -dho -an yö ˈwɔn -gɔ ˈö yö waa- ˈdhɛ ˈö dɔ -a ˈˈpiʋ̈ -an ˈgü.

1. Mɛn -ya ga -yö -dho ˈˈmɛn?

Yesu -yö ga -zɔn yi ꞊gblɛɛn ˈka. Yi waa ga -wo do -kɔ -kë ꞊dhɛ? Mɛn ˈö yi ꞊gblɛɛn zë -ni ˈgü, ˈwɔn ˈö kë -ni ˈgü -a -züzü ˈyaa- dɔ. -Kɔ do ˈö bhë -a ˈka, ˈmɛn -ya ga, ˈyaa saanˈˈ ɛɛnˈˈ ˈyaa pë ˈˈdhiʋ̈ ˈˈpɛpɛ ˈwo -kë -a ˈˈwɛɛ ˈbhaa ˈwɔn dɔ. Biblö -ya -pö: «Mɛn -nu ˈö ꞊wa ga ˈwaa pë ˈbha ˈwɔn dɔ.»—Ecclésiaste 9:5 -wo pö.

2. Gagade ˈö -gban ga -bha -a dɔ -sü -yö kwa -takun -kɔ -kë ꞊dhɛ?

Mɛn ꞊vadhɛ -wo -suʋ̈ ga -gɔ, ˈö ˈwo -suʋ̈ -ʒiaanwo mɛn -nu ˈö -wa ga -an -gɔ. ˈˈKɛɛ pë ˈö Biblö -ya pö ˈö -gban ga -bha -yö kwa zuʋ̈ˈˈ -kë -saa. Yesu -ya -pö: ‹Tɛanwɔn bha -yö -dho ka gba -ya -dɩ ˈflëë- ˈgü -sü ˈka.› (Zan 8:32) -Zlanwo ꞊vadhɛ ˈgümɛn -nu -wa -pö kwa ˈnii- ˈö ˈyaa ga -yö -dhö, ˈö ˈkwa ga ˈö go kwa ˈgü ˈö dho -dhɛ ˈˈwɛɛ ˈgü. ˈˈKɛɛ Biblö yö ˈti- pö ˈˈdhʋ̈. Mɛn -nu ˈö -wa ga ˈwaa saanˈˈ -ni ˈgü -dhɛ ˈbhaa ˈgü ɛɛnˈˈ ˈwaa ˈwɔn ˈˈwɛɛ ˈbha ˈwɔn dɔ. -A -wɔn ˈgü, ˈwaa ꞊mɔɔn- -bha kö -wo pë yaa kë kwa ˈka. -Dhɛ ˈö ˈˈdhʋ̈ -a -dhɛ ˈyaa- -bha kö ˈkwa ˈˈsuʋ̈ -an -gɔ, kö ˈkwa -an zuʋ̈ˈˈ ˗kë -saa -wɔn -nu kë, kö ˈkwa -an gba ɛɛnˈˈ kö ˈkwa bhɛɛˈˈ -an -bha ˈka.

Mɛn ˈbhaa -nu -wa -pö waa mɛn -nu ˈö -wa ga wo ˈwɔn -blɛɛ. ˈˈKɛɛ gagade ˈyaa -mü. Kwa- ˗yö ꞊dhɛ mɛn -nu ˈö -wa ga «ˈwaa ˈwɔn ˈbhaa ˈwɔn dɔ.» Mɛn -nu ˈö -an -bha ˈgü waa mɛn -nu ˈö -wa ga wo ˈwɔn -blɛɛ bhë, mɛn ꞊dede ˈö waa- -nu ˈwo ˈwɔn ꞊blɛɛ ˈyö ˈwo -tɔ -zuu yaa -nu. -Zuu yaa -nu ˗wo wo -de -kë ꞊dhɛ mɛn -nu ˈwo ga -an ˈdhö. Gagade ˈö -gban ga -bha, -a dɔ -sü -dho kwa -takun -zuu yaa -nu -gɔ. Zoova ˈyaa- ˈˈpiʋ̈ kö ˈkwa ˈwɔn blɛɛˈˈ mɛn -nu ˈö -wa ga -an -dhɛ. -Ya ˈwɔn -dɔ ꞊dhɛ kö kwaa -zuu yaa -nu ˈkwa ˈwɔn blɛɛˈˈ, -wo -dho pë yaa kë kwa ˈka.—Deutéronome 18:10-12 ˗an -wo pö.

3. ˈKwa ga -mën ˈö ˈkwa -kë -a ˈka?

Mɛn -ya ga pë ˈö -kë -a ˈka, mɛn -nu -wo ˈyaa- ˈgü do ˈˈkpɔnŋtaadhɛ -todhʋ̈sü ˈgü. ˈˈKɛɛ ˈpë ˈwo- pö ˈö -gban ga -bha, -an ꞊gban ˈwaa gagade ˈka.

• Mɛn -nu ˈwo ü -züzü, -mën ˈwo- pö ˈö -gban mɛn -nu ˈö -wa ga -an -bha?

VIDEO: ˈKwa ga -mën ˈö ˈkwa -kë -a ˈka? (-A ˈˈklu) (1:19)

-Ka Ecclésiaste 3:20 -wo pö, kö ˈka dhɛɛˈˈ -nu ˈwo yö -an -yɔ mɛɛnˈˈ:

• Biblö ˈˈɲan ˈö bhë -ya -pö mɛn -ya ga -mën ˈö -kë -a ˈka?

• ˈKwa ga pë ˈbhaa -yö -go kwa ˈgü ˈö dho -dhɛ ˈˈwɛɛ ˈgü -ee?

ˈDhɛ Yesu ˈˈtɔŋdë Dhazaa -wɔn -yö -kë, pë ˈö -kë -a bha ga ˈgü Yesu -ya -blɛɛ. -Ka Zan 11:11-14 -an -wo pö. Ka- -wo pö -ni ˈgü, -ka ka ˈˈtʋ̈ŋ kë pë ˈö Yesu -ya pö ˈö -gban Dhazaa -bha ga -bha -a ˈgü. ˈKa ka bo kö ˈka dhɛɛˈˈ -nu ˈwo yö -an -yɔ mɛɛnˈˈ:

• Yesu -yö ga -zɔn -mën ˈka?

• ˈWɔnzuan ˈö bhë -mën ˈö- -zɔn ü -dhɛ ˈö -gban mɛn -nu ˈö -wa ga -an -bha?

• Pë ˈö Biblö -ya pö ˈö ˗gban ga -bha bhë, ü- -yö -kɔ -kë ꞊dhɛ?

4. Gagade ˈö -gban ga -bha -a dɔ -sü -yö kwa -bho ˈˈgan ˈgü.

Gagade ˈö -gban ga -bha kö ˈkwa- dɔ, kwa ˈti ˗dho ˈˈsuʋ̈˗ mɛn -nu ˈö -wa ga -an -gɔ. -Ka Ecclésiaste 9:10 -wo pö, kö ˈka dhɛɛˈˈ ˈö yö -a -yɔ mɛɛnˈˈ:

• Mɛn -nu ˈö -wa ga -wo ꞊mɔɔn- -bha ˈwo ˈwɔn yaa -kë kwa ˈka -ee?

Gagade ˈö Biblö ˈgü -a dɔ -sü -yö kwa -takun ˈpö ˈö ˈkwaa mɛn -nu ˈö -wa ga -an gba ɛɛnˈˈ ˈö ˈkwaa -an zuʋ̈ˈˈ -kë -saa -wɔn -nu kë. -Ka Isaïe 8:19 waa -Dhɛkpaɔ dhiaˈˈ ˈsëëdhɛ 4:11 -wo pö, kö ˈka dhɛɛˈˈ ˈö yö -a -yɔ mɛɛnˈˈ:

• Ü -bha ˈgü mɛn ˗nu ˈö -wa ga, mɛn ˈö -an -dhɔkë ɛɛnˈˈ ˈö -takundhe -dhɛ -an -gɔ, Zoova -ya -yö -kɔ -kë ꞊dhɛ?

5. Gagade ˈö -gban ga -bha -a dɔ -sü -yö kwa zuʋ̈ˈˈ -kë -saa.

-Wa -pö mɛn ꞊vadhɛ -dhɛ ꞊dhɛ -wa ga, -Zlan -dho -an ˈˈklʋʋbhɔ -an -bha ˈwɔn yaa ˈö ˈwo- -kë -a -wɔn ˈgü. ˈˈKɛɛ -a ˈwɔn dɔ -sü ˈö ꞊dhɛ mɛn -nu ˈö -wa ga, -a mɛn -dee -ʒiaan ˈwo ˈwɔn yaa -kë -Zlan ˈyaa -an ˈˈklʋʋbhɔ bhë, -yö kwa zuʋ̈ˈˈ -kë -saa. -Ka Wlɔmö 6:7 -wo pö, kö ˈka dhɛɛˈˈ ˈö yö -a -yɔ mɛɛnˈˈ:

• Biblö ˈˈɲan ˈö bhë -ya -pö mɛn -ya ga kö -ya ö -bha ˈwɔn yaa ˈˈpɔ bho. -Dhɛ ˈö ˈˈdhʋ̈ ü -bha ˈgü, -wo -dho mɛn -nu ˈö -wa ga -an ˈˈklʋʋbhɔ ˈzü ˈwɔn yaa ˈwo- -kë -a -wɔn ˈgü -ee?

Kö ˈkwa Zoova dɔ -së ˈka, kwa -dho -a ˈwɔn dɔ ꞊dedewo ꞊dhɛ ˈyaa ꞊mɔɔn˗ -bha toŋtoŋdhö kö -yö mɛn -nu ˈö -wa ga -an ˈˈklʋʋbhɔ. -Ka Deutéronome 32:4 waa 1 Zan 4:8 -wo pö, kö ˈka dhɛɛˈˈ -nu ˈwo yö -an -yɔ mɛɛnˈˈ:

• Kö ˈkwa kwa -zota -Zlan -bha ˈˈklʋʋsë -nu ˈö Biblö ˈˈɲan -nu bhë ˈwo -an -zɔn bhë -an ˈgü, -Zlan ꞊mɔɔn- -bha kö -yö mɛn -nu ˈö -wa ga -an ˈˈklʋʋbhɔ -ee?

• Ü -bha ˈgü, gagade ˈö -gban ga -bha -a dɔ -sü -yö kwa zuʋ̈ˈˈ -kë -saa -ee? ˈMën -kë ˈü- pö ˈˈdhʋ̈?

-A ˈDHƐ TO KWA ˈˈƝAAN

Mɛn -ya ga kö -a -bha -tosɛta -ya ɲën. Mɛn -nu ˈö -wa ga ˈwaa saanˈˈ ˈsü -ni ˈgü -dhɛ ˈbhaa ˈgü ɛɛnˈˈ ˈwaa ꞊mɔɔn- -bha kö -wo pë yaa kë mɛn -nu ˈwo ˈbhɩɩ- -an ˈka.

-Zobuödhe

• ˈKwa ga -mën ˈö ˈkwa -kë -a ˈka?

• Gagade ˈö -gban ga -bha -a dɔ -sü -yö kwa -takun -kɔ -kë ꞊dhɛ?

• ˈMën -kë ˈö gagade ˈö -gban ga -bha -a dɔ -sü -yö kwa zuʋ̈ˈˈ -kë -saa?

-AN -GA ˈPÖ

-Wo kpö ˈö ˈwo- ꞊dhiëëta ˈö -kë «ˈnii-» ˈka bhë, -a -gɛn ꞊dede ˈö Biblö ˈgü -a -ga.

«-Mën ˈö -tɔ ˈnii-?» (ˈWɔn -gɔ ˈö jw.org -ta)

-Zlan -yö ˈwɔnyaakëmɛn -nu ˈˈklʋʋbhɔ ˈˈwo ˈgü -ee? -A -yɔ -ga.

ˈˈWo ˈgüdhɛ ˈö -Zlan -yö mɛn ˈˈklʋʋbhɔ mü -yö -dhö ꞊dedewo ˗ee? (3:07)

Kwa dua -mü kö ˈkwa ˈˈsuʋ̈ mɛn -nu ˈö -wa ga -an -gɔ -ee?

Mɛn -nu ˈö ꞊wa ga, -an -zuu—꞊Mɔɔn- -bha ˈwo ü -takun ɛɛnˈˈ ˈwo pë yaa -kë ü ˈka -ee? Mɛn -zuu -dhö ꞊dedewo -ee? (ˈsëëdhɛ -be ˈnën)

ˈDhɛ ˈö gɔndë do -yö gagade ˈö -gban mɛn -nu ˈö -wa ga -an -bha -a dɔ, -ya zuʋ̈ˈˈ -kë -saa. -Kɔ ˈö -kë -a ˈka -a -ga.

«Dhɛɛˈˈ ˈˈgblʋ̈gblʋ̈ -nu ˈa -an kpɔ n -de -gɔ, -an -yɔ -nu ˈö Biblö -ya bɔ ˈˈpuu ˈka bhë, -a ˈˈdhia -yö -mën n ˈgü ꞊dedewo.» (-Kwɛ 2015 Fevlie 1 -bha ˈˈGlaadhiʋ̈ -tɔn)