Züdɔdhɛ

Biblö ˈˈɲan ˗nu ˈwo ˗dho kletiɛn ˗nu kwa ˗takun ˗dho ˗a kë ˈö Biblö ˈˈɲan waa˗ ˗kwɛzlan ˗nu ˈwo ˗dho kwa ˗takun kö ˈkwa bɔ ˈwɔn ˈˈgbɩɩ˗ ˗nu ˈgü zuʋ̈saadhɛ ˈka, ˈkwa ˗an ꞊slɔɔ ˈˈvaandhö. ˗Yö ˗dho kwa ˗takun ˈpö kö Biblö ˈˈɲan ꞊dede ˗nu ˈwo dho mɛn ˈˈwɛɛ ˗nu ꞊faan ˈmën, ˈö ˈwo ˗dho ˗an ˗takun kö ˗wo ˗da ˈwɔn ˗nu ˈwo ˗dho Zoova ˈtɔ bhɔ ˗an ˗ʒian ˗ta, ˈkwa ˗kpan ˗an ˗bha. ˈWɔn ˗gɔ ˈö kwa ˗bhawɔn ˈdhö˗ ˗bha, ˗kwaa mɛɛnˈˈ dosɛnŋ kö ˈkwa kwa ꞊kwaa dhɛɛˈˈ ˗nu waa ˗to mɛn ˈˈtʋʋdhö ˗wɔn ˗nu ˈwo go Biblö ˗bha ˗kwɛzlan ˗nu ˈgü ˗an ˗zü kö ˗wo ˈˈdhiʋ̈sü kwa ˈka. (Kpɔɔˈˈ ˈkɔnën «Kwa ˗dho pë ˗nu mɛɛnˈˈ ˈsëëdhɛ ˈö yö ˗a ˈgü ˗kɔ ˗kë ꞊dhɛ?» ˗bha.) Kwa ˗dho ˗kpan Biblö ˈˈɲan ˗nu ˈwo ˗dho ˗gleŋ ˗së ˗da kwa ˗bha, ˈö ˈwo kwa ˗zogban ˗an ˗bha. Kwa ˗dho ˗kpan ˈpö Biblö ˈˈɲan ˗sɛŋbɔ ˗nu ˗bha kö ˈkwa ˗an ˗zɔn mɛn ˈˈwɛɛ ˗nu ˗dhɛ. Biblö ˈˈɲan ˗nu bhë ˗dho ˗an ꞊faan dɔ, ˈö ˗an ˗takun wo ˗bha ˈwɔn ˈˈgbɩɩ˗ ˗nu bun ˗sü ˗bha.

Kwa ˗dho pë ˗nu mɛɛnˈˈ ˈsëëdhɛ ˈö yö ˗a ˈgü ˗kɔ ˗kë ꞊dhɛ?

ˈKwa˗ pö ˈkwa ˗kpan ˈwɔn ˗gɔ ˈbha ˗bha, kwa ꞊mɔɔn˗ ˗bha ˈkwa bɔ pë ˗mɛɛn ˗a ˈka ˈkɔnën ˗ta, ɛɛnˈˈ ˈkwa ˗dhɛga ˈsëëdhɛ bhë ˗a ˗kɔ ˈˈpian ˗nu ˗bhüöö ˈgü ˈdɔɔndhö. Biblö ˈˈɲan ˗nu ˈwo ˗dho kletiɛn ˗nu kwa ˗takun ˗kɔ ˈˈpian ˗nu ˗wo ˈˈsɔɔplɛ: ˈWɔn ˈˈgbɩɩ˗ ˗nu, Mɛn ˈˈta ˗kɔ, ˗Zlanwokɔdhi, Kwa ˗bha ˗tosɛta, ˈKɔdhi, ˗Zlan ˗wɔn, waa ˈˈKlʋʋsë ˗nu. ˈWɔn ˗gɔ ˈö kwa ˗bhawɔn ˈdhö˗ ˗bha ˗yö ꞊mɔɔn˗ ˗bha ˈö ˗kë ˗a ˗kɔ ˈˈpian ˗nu bhë, ˗a do ˈgü. ˗Kwa kwa ˗kɔ ˈˈyɛ ˗a ˗kɔ ˈˈpian ˗dhɛ ˈö ˈwɔn ˗gɔ ˈkwa˗ mɛɛnˈˈ ˗ni ˈgü ˈö ꞊mɔɔn˗ ˗bha ˈö ˗kë ˗a ˈgü ˗a ˗bha, kö ˈkwa˗ ˈwɔn ˗gɔ ˗nu ʒiö ˈkwa kwa ˗bhaa mɛɛnˈˈ. ˈˈKɛɛ ꞊ya kë ꞊dhɛ ˗a ˗kɔ ˈˈpian ˗dhɛ ˈö kwa ˗bha ˈwɔn ˗gɔ ˈdhö˗ ˈgü ˈkwaa˗ dɔ, ˗kwa kwa ˗kɔ ˈˈyɛ ˗A ꞊gban ˗bha kö ˈkwa ˈwɔn ˗gɔ ˗nu ʒiö ˈkwa kwa ˗bhaa mɛɛnˈˈ ˗an ˈgü. Kwa ˗dho ˗kpan ˈwɔn ˗gɔ ˈsɛnsɛn˗ tii ꞊dede ˈbha ˗nu ˗bha ˈwɔn ˗gɔ ꞊gban ˈˈpɛpɛ ꞊wlöö. ˗A ˈbha ˗nu ˗wo ˗wo ˗bhüöö ˈˈkpaan ˗nu ˈka, ˈö˗ ˈˈwɛɛ ˈbha ˗nu ˈwo dhɛɛˈˈ ˗nu ˈka. ˈKwa Biblö ˈˈɲan ˗nu ˈwo tii ꞊dede ˗nu ˈka ˈwɔn ˗gɔ ˗nu ꞊wlöö ˗an ˗wo pö ˗ni ˈgü, ˗kwa kwa ˗zota ˗së ˈka ˗kɔ ˈö ˈwo ˗gban ˗a ˈka ˗wo ˗bhüöö ˗nu ˈö ˈwo bhë ˗an ˗bha ɛɛnˈˈ ˈö ˗wo dhɛɛˈˈ ˗nu bhë ˗an ˗yɔ bɔ, ˗an ˈgü. ˈˈTʋ̈ŋ ˈbha ˗nu ˈka ˗wo ˈwɔn ˗gɔ do ˗pɛ ˈkoo ˈˈpian ꞊va ˈgü kö ˗yö kwa ˗takun pë ˈö ˈkwa˗ mɛɛnˈˈ ˗ni ˈgü ˗a ꞊slɔɔ ˗sü ˗bha ˈˈvaandhö. ˈˈTʋ̈ŋ ˈbha ˗nu ˈka ˈzü «Kpɔɔˈˈ ˈzü» Biblö ˈˈɲan ˗nu ˗bha ˗dho kë ˗a ˈwɔn ˗gɔ ˗nu ˈgü. ˗A ˈˈpian ˈö bhë ˗yö Biblö ˈˈɲan ˈˈwɛɛ ˈbha ˗nu ˈwo ˗gban ˈwɔn ˗gɔ bhë ˗a ˗bha, ˗an nu. ˈˈTʋ̈ŋ ꞊vadhɛ ˈka ˈpö, kwa ˗dho ˗kpan «˗Kwɛzlan ˗nu ˈwo Biblö ˈgü ˈwo ꞊mɔɔn˗ ˗bha ˈwo kwa ˗takun» ˗an ˗bha. ꞊Ya ˈgo mü ˗wo ˗bhüöö ˈbha ˗yö ˈwɔn ga ˈö go Biblö ˈˈɲan ˈwo˗ ˗wɔn ꞊blɛɛ ˗a ˈgü, ˗a ˗zɔn. Biblö ˈˈɲan ˈö bhë ˈkwa˗ ˗wo pö ˗ni ˈgü, ˗kwa kwa ˈˈtʋ̈ŋ kë ˗wo ˗bhüöö ˈö bhë ˗a ˈgü kö ˗yö ˈˈdhiʋ̈sü kwa ˗bha ˗zotadhe ˈka.

Biblö ˈˈɲan ˈˈpɛpɛ ˈö ˈwo ˗gban ˈwɔn ˗gɔ do ˈbha ˗bha ˈwaa ˈsëëdhɛ ˗be ˈö yö, ˗a ˈgü. ˈˈKɛɛ ˈkwa Biblö ˈˈɲan ˗së ˈbha mɛɛnˈˈ ˗ni ˈgü, kwa ꞊mɔɔn˗ ˗bha ˈkwa˗ mɛɛnˈˈ ˗sü züdɔ ˗a ˈgü. (Pr 2:1-6) ˈKwa˗ pö ˈkwa˗ ˈˈpiʋ̈ ˈpɔn, kwa ꞊mɔɔn˗ ˗bha ˈkwa bɔ La Bible. Traduction du monde nouveau ˗bha Biblö ˈˈɲan ˗nu ˈö ˈwo ˈˈgënŋta waa˗ ˗bha ˈpë ꞊draan ˗a ˗zoto ˗a ˈˈpiʋ̈ ˗wɔn ˗nu ˗ta. ˗Kwa bɔ ˈpö Guide de recherche pour les Témoins de Jéhovah ɛɛnˈˈ Index des publications des Témoins de Jéhovah ˗ta kö ˈkwa Biblö ˈˈɲan ˗nu ˗gɛn man ˗së ˈka ɛɛnˈˈ kö ˈkwa ˗an ˗bɛ ˈwɔn ˗nu ˗bha ˗kɔ ˗së dɔ. ˗Kwa ˈsëëdhɛ ˗nu ˈö kwa ˗bha ˗kɔlokota ˗yö ˗an yö ˈˈkpɛnŋ ˗dɛɛ ˈgü ˗an ˗ga kö ꞊ya kë ꞊dhɛ kwa ˗bha Biblö ˈˈɲan ˈbha ˈgüman ˗kɔ ˈö ꞊tun ˗së kö ˈkwa˗ ˈwɔn dɔ.

Kö Biblö ˈˈɲan ˗nu ˈwo ˗dho kletiɛn ˗nu kwa ˗takun ˗ya kë kö ꞊kpɔɔdhɛ, ˈwɔndɔdhe waa ˈwɔn ˈgüman ˗kɔ ˈö ˗Zlan ˗Wo ˈsëëdhɛ ˈˈslʋ̈ʋ̈slʋ̈ bhë˗ ˈgü ˗wo kë kwa ˗gɔ bhë, ˈaa ˗yö kë! ˈSëëdhɛ ˗be ˈö yö ˈkwa˗ draanˈˈ ˗ni ˈgü, kwa ˗dho ˗a yö ꞊dhɛ «˗Zlan ˗wʋ bha pë ˈˈyaandhe ˗mü, ˈˈsɩ ˗ya ˗dhɛ.»—Eb 4:12.