Kwa ˈˈdhiʋʒiöwomɛn ˗nu ꞊plɛ ˗dɛɛ
˗KWƐ 2024 Ɔtɔblö 5 ˈgü, ˗wo nɔɔn˗ ˗detasü do ˗wo ˗pö kwa ˗bha ˗kwɛ ˗bha ˗bhɔkwëë ˗ta ˈwo˗ pö ꞊dhɛ kwa ꞊dhegblü Ʒodi Ʒödɛlö waa Zakɔbö Lanfö ˗wa kë Zoova ˗bha ꞊Gbɛkiö ˗nu ˈˈdhiʋ̈ʒiöwomɛn ˗nu ˈka. ˗Kɔ ˈwo˗ ˗bha ꞊plɛ, ˗wo ˗ya Zoova ˗bha yökë ˗sü ˗bha ˗a yi ˗ya ꞊gwëë.
Ʒodi Ʒödɛlö waa ö ˗bha dhebɔ Damarisö.
Kwa ꞊dhegblü Ʒödɛlö ˗yö ˗bhɔ Misudhi, Zeta Zuni ˈö˗ ˗mɛn ˗nu ˗wa ˗to gagade ˈgü. Waa ö ˗bha ˈkɔdhigümɛn ˗nu ˗wo ˗kun ˗dhɛ ˈö Zoova ˗dhɔkëmɛn ˗nu ˈwaa˗ ˗bha ꞊va ˗a ˈgü. ˗A ˗wɔn ˈgü, kwa ꞊dhegblü ˗nu ˗wo ˗go ˈˈsɛ ˈˈwɛɛ ˗nu ˈgü ˈwo nu ˗an ˗takun ˗zlanwopösü ˗bha, ˈö waa˗ mɛn ꞊vadhɛ ˈwo wo ˈko dɔ. ˗An ˗bha ˗dhɔ waa ˗an ˗kɔ ˗bha ˗kë ˈwɔn do ˗bha ˗sü ˗wo ˗pa ˗a zuʋ̈ˈˈ ˈka ꞊dedewo. ˗Yö ˗bɔ ˈˈyi ꞊bhaa kö ˗yö ꞊kun ˈnën ˈˈtɩtɩ ˈka, ˗kwɛ 1983 Ɔtɔblö 15 ˈgü. ˗Zlanwopösü ˗dhɔ ˗kun ˗a kë ˗ni ˈgü. ˗A ˗wɔn ˈgü ˗dhɛ ˈö ɲën ꞊klaŋ ˗bha, ˗yö ˗kë ˈˈtʋ̈ŋ ꞊gban ˈgü ˗yödhiʋ̈ ˈka ˗kwɛ 1989 Sɛtanblö ˈˈsu ˈgü.
Kö ˗yö ꞊kun wlüünën ˈka, ˗an ˗mɛn ˗nu ˗wo waa ö ꞊dhegblüdhe ˗an ˗sü ˈwo dho ˗wo Betɛdhö. ˈWɔn ˈö bhë ˗yö ˈnën ˗nu ˗blü ˈwo˗ ˗ya wo ˗zo ˈˈpiʋ̈ ꞊dhɛ wo ˗dho yökë Betɛdhö. Pë ꞊dede ˈwo˗ ˗kë yö ˗mü. Kwa ꞊dhegblü Ʒödɛlö ˗yö ˗nu Betɛdhö ˈö Wɔkilö ˗a ˈgü ˗kwɛ 1990 Sɛtanblö ˈˈsu ˈgü. ˗Dhɛ ˗blɛɛsü ˈö yökë ˗a ˗bha ˈyö ˗tɔ kwa ˗bha ˗dhɛ ˗kun ˗së ˗dhɛ waa kwa ˈˈdhɛkë ˗dhɛ ˈgü.
ˈˈTʋ̈ŋ ˈö ˈˈdhʋ̈ ˗a ˈgü ˗zlanwokɔdhi ˗nu ˈwo kun ˗an ˈˈsuee mü ˈwo Ɛspaɲɔlö ˗wo pö ˗an ˈgü bhë, ˗an ˗bhawɔn ˗kun kwa ꞊dhegblü gɔɔn˗ ˗nu ˗bha. ˗A ˗wɔn ˈgü, kwa ꞊dhegblü Ʒödɛlö ˗yö ˗dho ˗a do ˈgü ˈö ˗ya Ɛspaɲɔlö ˗wo draanˈˈ ˗sü ˗bha. ˗A yi ˈti ꞊gwëë ˈö ˗kpan kwa ꞊dhegblüdhe do ˈwo˗ ˗dhɛ Damarisö ˈö kun ˗yödhiʋ̈ ˈka ˈˈpian ˈö bhë ˈgü, ˗a ˗bha. ˗Wö ˗dho ꞊taabha ˈwo wo ˈko sü ˈwo ˗ya yökë ˗sü ˗bha Betɛdhö.
˗Kwɛ 2005 ˈgü, ˗wo ˗go Betɛdhö ˈwo dho wo ˗zokë wo ˗mɛn ˗nu ˈˈpiʋ̈. ˈˈTʋ̈ŋ ˈö ˈˈdhʋ̈ ˗a ˈgü, ˗wo ˗kë ˈˈtʋ̈ŋ ꞊gban ˈgü ˗yödhiʋ̈ ˈka. Kwa ꞊dhegblü Ʒödɛlö ˗yö ˗kë ꞊klaŋgɔmɛn ˈka ˗yödhiʋ̈ ˗nu ˗bha ꞊klaŋkɔɔdhö, ˈö go mü ˈö ö ˗kɔ ˗da kwa ˈˈdhɛkësü ˈwɔnyëë˗ ˗nu waa ˈkɔ dɔ ˗sü ˈwɔnyëë˗ ˗nu ˗an ˗dhɛ.
˗Kwɛ 2013 ˈgü, ˗wo kwa ꞊dhegblü Ʒödɛlö waa ö ˗bha dhebɔ ˗an ˗bɔ Betɛdhö ˈö Wɔɔwikö ˗a ˈgü kö ˗wo wo ˗kɔ ˗da kwa ˗bha ˈkɔ dɔ ˗sü ˗dhɛ. ˈÖ go ˈˈtʋ̈ŋ ˈö bhë ˗a ˗bha, ˗wo yökë Patɛsɔnö waa Wɔkilö. Kwa ꞊dhegblü Ʒödɛlö ˗yö ö ˗kɔ ˗da ˗Zlanwo ˈkɔ dɔsü ꞊bidhoŋ ˗nu ˈwo Betɛdhö ˗dhɛ ˈö ˈdhö ˗a ˈgü bhë ˗a ˗dhɛ, ˈö ö ˗zokë ˈzü kwa ˈˈdhɛkësü ˈˈpiʋ̈. ˗Kwɛ 2023 Masö ˈˈsu ˈgü, ˗wa ˗ya kö ˗yö kë ˗Zlan ˗bha yö ˈwɔnyëë˗ ˗nu ˗takunmɛn do ˈka. Kwa ꞊dhegblü ˗ya ö ˗zota yö ꞊suu ˈˈpɛpɛ ˈwo˗ dɔ ö ˗kɔ ˈka bhë ˗a ˈgü, ˗ya ˗pö: «˗Wa yö ˗dɛɛ ˗nu dɔ kwa ˗kɔ ˈka, ˈˈtʋ̈ŋ ˈbhaa ˗nu ˈka ˈpë ˈkwa dho ˗a kë ˈkwaa dɔ. ˈˈTʋ̈ŋ ꞊suu ˗nu ˈwo ˈˈdhʋ̈ ˗a ˈgü ˈyö ˈkwa˗ yö ꞊dhɛ kwa dua ˗mü kö ˈkwa kwa ˗zoyö Zoova ˗dhɛ, ˗a ˗gɛn ˗mü ꞊dhɛ yö dosɛnŋ ˈnën ꞊mɔɔn˗ ˗bha kö ˗yö kwa ˗takun yö ˈˈpɛpɛ ˈwo˗ dɔ kwa ˗kɔ ˈka, ˗a kë ˗sü ˗bha.»
Zakɔbö Lanfö waa ö ˗bha dhebɔ Inga
Kwa ꞊dhegblü Lanfö ˗yö ˗bhɔ Kalifɔɔni, Zeta zuni. Kö ˗yö ꞊kun ˈnën ˈka, ˗a dhe ˗kɔ ˗yö ˗zɔɔ ˗zlanwopösü ˈka. ˈˈKɛɛ ˈkö ˗kë ˈˈdhʋ̈ ˗a dhe ˗ya ꞊klaŋkë ˗kplawo gagade ˗nu ˈwo Biblö ˈgü bhë ˗an ˈka. ˗Kwɛ ˈˈpɛpɛ ˈka, ˗yö ˗dho ˈö ˗wo ö ˈˈnan ˈö kun ˗klu ˗sü ˈka Zoova ˗bha bhë ˗a ˗dhɛ ˈpö. ˗A ˈˈnan ˗ya ˗takun ˈö Biblö draansü ˗dhɔ ˗da ˗a ˈgü ˈö ˈdhɛ ˗kwɛ ˗kë 13 ˈö ˗we ˗a ˗bha kö ˈö Biblö draanˈˈ. ˗Yö ˗to ˈˈtɩtɩ ˈö bɔ ˈˈyi ꞊bhaa ˗kwɛ 1992 Sɛtanblö 27 ˈgü. ˈWɔn ˗së ˈbhaa ˗yö ˗kun mü. ˗A dhe ˗yö ˗ya ˗zlanwopösü waa ˗dho ˗bhɔkwëë ˗nu ˗ta ˗sü ˗bha ˈzü ˈö ꞊taabha ˗a dë waa ˗a ꞊dhegblü ˗nu ˈwo bɔ ˈˈyi ꞊bhaa.
Kö ˗yö ꞊kun wlüünën ˈka, kwa ꞊dhegblü Lanfö ˗ya ˗yö ꞊dhɛ ˗yödhiʋ ˗nu zuʋ̈ˈˈ ˈˈgblü ˗kun dhi ˗sü ˈka. ˗A ˗wɔn ˈgü ˈdhɛ ɲën ꞊klaŋ ˗bha, ˗yö ˗kë ˈpö ˗yödhiʋ ˈka ˗kwɛ 1995 Sɛtanblö ˈˈsu ˈgü. ˗Kwɛ 2000 ˈgü, ˗yö ˗dho Ekwatëë ˈdhɛ ˗zlanwopömɛn ˗nu ˈwaa kun mü ꞊va ˗a ˈgü. ˈDhɛ bhë ˗a ˈgü ˗yö ˗kpan kwa ꞊dhegblüdhe do ˈwo˗ ˗dhɛ Inga ˈö go Kanada ˈö kun ˗yödhiʋ ˈka ˈpö ˗a ˗bha , ˈö waa˗ ˗nu ˈwo wo ˈkosü. ꞊Taabha, ˗wo ˗ya ˗zlanwopösü ˗bha Ekwatëë ˈˈkwipö do ˈö ˗zlanwopömɛn kpö ˈdɛdɛ kun mü ˗a ˈgü. ꞊Dɛɛ, ˗a ˗zlanwokɔdhi ˗yö pa ˗sü ˈka.
ˈDhɛ ˈˈtʋ̈ŋ ˗nu ˗wo ˗ʒiö, kwa ꞊dhegblü Lanfö waa ö ˗bha dhebɔ ˗wo ˗kë ˗yödhiʋ̈ ˗detasü ˈka ˈö ꞊taabha ˈzü ˈwo ˗kë ˈˈpian do ˈˈpiʋ̈ ˗maankëmɛn ˈka. ˗Kwɛ 2011 ˈgü, ˗wo ˗dho Gadhaadö ꞊klaŋkɔdhi 132 ˗bha ˗naan ˈˈdhiʋ̈. ˈDhɛ ˈwo wo ˗bha ˈsëëdhɛ ꞊slɔɔ, ˗wo yö ꞊suu ꞊va ˗kë ˈˈsɛ ˗nu ˈgü ˈˈkpɔnŋ ꞊taa. ˗A ˈbhaa ˗nu ˗kë yökë Betɛdhö ˗sü, bɔmɛn ˗dhɛ waa ˗maankëmɛn ˗dhɛ ˈka. Kwa ꞊dhegblü Lanfö ˗yö ˗kë ꞊klaŋgɔmɛn ˈka ˗Gblüdëdhɛ ˗nɔɔnpömɛn ˗nu ˗bha ꞊klaŋ ˈˈdhiʋ̈.
Kolona virisö ˗wɔn ˈgü, kwa ꞊dhegblü Lanfö waa ö ˗bha dhebɔ ˗wo wo ꞊yɛɛ˗ ˗kë Zeta zuni. ˗Wo ˗an ˗dhɛ Betɛdhö ˈö Wɔkilö ˗a ˈgü ˈö ˈwo kwa ꞊dhegblü Lanfö ˗kian kö ˗yö yökë ˗Zlan ˗bha yö ˈwɔnyëë˗ ˗nu ˈˈpiʋ̈. ꞊Taabha ˈzü, ˗wo ˗an ˗bɔ Betɛdhö ˈö Ekwatëë bhë ˗a ˈgü ˈö ˗kë ˗a ˈwɔnyëë˗ do ˈka. ˗Kwɛ 2023 ˈgü, ˗wo ˗an ˗bɔ ˈzü Wɔɔwikö. ˗Kwɛ 2024 Zanvie ˈˈsü ˈgü, ˗wo kwa ꞊dhegblü ˗kë ˗Zlan ˗bha yö ˈwɔnyëë˗ ˗nu ˗takunmɛn do ˈka. ˗Ya ö ˗zota yö ˗nu ˈwo kun dɔ ˗sü ˈka ˗a ˗kɔ ˈka bhë ˗an ˈgü, ˗ya ˗pö: «ˈDhɛ ˈkwa yökë ˗a ˗bha ˈyaa ˈnën ˗kë ˈö kwa ˗bha yö ˗yö ˗kë ö ˗de ˗ta, ˈˈkɛɛ mɛn ˗nu ˈö kwaa˗ ˗nu ˈkwa yökë kwa ˈkwëë˗ bhë wo ˗mü.»
Yö ˈˈgbɩɩ˗ ˈö kwa ꞊dhegblü ˗nu ˗wa ˗kë bhë ˗a ˈˈyi ˗yö ˗kan kwa ˗dhɛ ˈö ˈkwa «꞊bhlëë ˗ya ˗nu ˗bha» ˗a ˗wɔn ˈgü.—Flp. 2:29.