˗Bhö ˗a kë kö Yesu ˗bha ˈˈsaa˗ ˗yö ˈwɔn ˗së kë ü ˗dhɛ

˗Kwɛ ˈˈpɛpɛ ˈka, Zoova ˗bha ꞊Gbɛkiö ˗nu waa mɛn ˈˈmliɲɔn ꞊va ˗wo ˗dho wo ˈkwëëdhö ˈˈkpɔnŋtaadhɛ ˗todhʋ̈sü ˈgü, ˈö ˈwo Yesu ˗bha ga ˗zo ˗bo ˈwlaan˗ ˗kë ꞊dhɛ ˗kɔ ˈö˗ pö ˗wa kë ˗a ˈka bhë, ˗a ˈdhö. (Dhukö 22:19) ˈWlaan˗ ˈö bhë ˗yö kwa ˗takun kö ö ˗bha ˗tosɛta nu ˈö Yesu ˗ya wo mɛnbhɩɩdhe ˗nu kwa ˗wɔn ˈgü bhë, ˈkwa˗ ꞊bhlëë dɔ. ˗Kɔ ˈö˗ ˗bha ˈˈsaa˗ ˈö ˈˈdhʋ̈ ˈö ˗yɛ ˗a ˈka kwa ˗bha ˗tosɛta ˈö ꞊dɛɛ waa˗ ˈdhɛ dho kë ˗dhɛkpaɔ dhiʋ̈ˈˈ ˈgü ˗an ˗bha, ˗ya ˗zɔn ˈpö.—Zan 3:16.

ˈKö ˗kë ꞊dhɛ ˗zo ˗bo ˈwlaan˗ ˗dhɛ ˈö ˗kë ˗kwɛ ˈö yö ˗a ˈka ü ˗kë ˗a ˗ta ɛɛnˈˈ ü ˈti nu, ü ꞊mɔɔn˗ ˗bha ˈü˗ kë kö Yesu ˗bha ˈˈsaa˗ ˗yö ˈwɔn ˗së kë ü ˗dhɛ. ˗Kɔ ˗kë ꞊dhɛ? Yesu ˗yö pë ˗wɔngbɩɩsü ꞊plɛ ˈö kwa dua ˈdhö ˗mü ˈkwa ˗an kë, ˗an ˗zɔn:

1. 1. ˗Zlan waa Yesu ˗an dɔ ˗sü draanˈˈ. Yesu ˗yö ˗bhɛɛ ö Dë ˈö dhaŋ˗ ˈgü ˗a ˗dhɛ ˈö˗ pö: ‹꞊Sii ˈö ˈyaa yën bha˗ ˗nu ˗a ˗nu ˗dhɛ ˗kɔ ˈö ˈdhö, yö ˗mü ꞊dhɛ kö ˈmɛ ˈwo ˈˈdhʋ̈ bha ˗wo bhi ˈö ˈi ˗kë ˗Zlan dosɛng ˈö ˈdhö ˗a ˈka bha bhi ꞊në i dɔ, kö ˗wo man Yesu Klisi ˗mɛ ˈi n bɔ bha n dɔ ˈpö.›—Zan 17:3.

2. 2. Pë ˗nu ˈü ˗an ꞊draan ˗an ˗ya ꞊bhlëë ˈgü. Yesu ˗ya ˗zɔn ꞊dhɛ kwa dua ˗mü kö ˈkwa ö ˗bha ꞊klaŋwo ˗nu ˗ya ꞊bhlëë ˈgü kwa ˗bha ˗tosɛta ˈgü. ˗A ˈwɔnzuan ˈnën ˗tɔ ˗a ˗bha dhiaŋ ˈö˗ zë ˗tɔn ꞊troo bhë ˗a ˈˈdhiʋ̈tadhɛ ˈgü, ˗yö mɛn ˗nu ꞊faanmën kö ˗wo ö «˗wʋ ˗ya ˈklɔɔ˗ ˈˈdhiʋ̈, ˗wo ˗tosɛa kë˗ ˗bha.» (Dhukö 6:46-48) ˗Dhɛkpaɔyi do ˈbhaa ˈka ˈzü, ˗ya ˗pö: «ˈMa˗ pö ka ˗dhɛ ˈka˗ dɔ. ꞊Ya kë ꞊dhɛ ˈka˗ ˈgü ˗wɔn ˗zë kë, ka ˗bha ˗dho kë ˗së.»—Zan 13:17.

Ü˗ ˈˈpiʋ̈ kö ˈwɔn ˗nu ˈwo ˗gban ˗Zlan waa Yesu ˗an ˗bha ˈü˗ ˈbhaa ˗nu draanˈˈ ˗ee? ˗Kɔ ˈü dho ˈwɔn ˗nu ˈwo ˈˈdhʋ̈ ˗an ˗ya ˗a ˈka ꞊bhlëë ˈgü ü˗ ˈˈpiʋ̈ ˈü˗ dɔ ˗ee? Pë ˗nu ˈwo dho ü ˗takun ˗a ˈbhaa ˗nu ꞊nɛn:

Biblö ꞊klaŋ

Yi Biblö ˗draan mɛn ˗nu ˈˈpiʋ̈ ˈˈwɛɛwɛ, ˈö ˈyi˗ ˗kë ꞊dhɛ ˈˈdoodɔ ˈko ˈˈpiʋ̈ ˗sü ˈdhö. ˗A ˗kë ˈˈdhʋ̈ ˗sü ˗yö mɛn ꞊vadhɛ ˗takun ˈö ˈpë Biblö ˗ya pö ˈwo˗ dɔ, ˈö ˈwo˗ ˗ya ꞊bhlëë ˈgü wo ˗bha ˗tosɛta ˈgü.

• ˗Bhö ˈdho ˗a ˈˈpian ˈdhɛ ˗kë «Biblö draansü ˈö mɛn ˈbha dho ü ˗takun ˗a ˗bha» ˈka bhë ˗a ˗ta, kö ˈwɔn ˈö ˗gban ˗a ˗bha ˈü˗ ˈbhaa dɔ.

• ˗Bhö video ˈö˗ ˗gɔ ˗kë Ü ˈˈnuɛ ˗we Biblö draansü ˗bha ˗sü ˗bha! ˈka bhë ˗a ˗ga, kö ˗kɔ ˈö Zoova ˗bha ꞊Gbɛkiö ˗nu ˗wo Biblö ꞊draan ˗a ˈka mɛn ˗nu ˈˈpiʋ̈, ˈü˗ yö.

Zoova ˗bha ꞊Gbɛkiö ˗nu ˗bha ˗bhɔkwëë ˗nu

ˈˈDhoogɔ ˈˈpɛpɛ ˈgü, Zoova ˗bha ꞊Gbɛkiö ˗nu yi ˗dho yi ˈkwëëdhö ˗gɛnɲan ˈka ꞊plɛ yi ˗bha ˗bhɔkwëëkëgükɔ ˗nu ˈgü. ˗Bhɔkwëë ˗nu ˈwo ˈˈdhʋ̈ ˗an ˗ta, yi ˈˈdoodɔ Biblö ˗ta, ˈö ˗kɔ ˈyi dho ˗a ˗bha ꞊klaŋwo ˗nu ˗ya ˗a ˈka ꞊bhlëë ˈgü yi ˗bha ˗tosɛta ˈgü, ˈyi˗ ꞊draan.

˗A ˗bhɔkwëë ˗nu ˈˈkwɛɛ ˈˈpʋ ˗sü ˈka mɛn ꞊gban ˗gɔ. Mɛn ˗nu ˈö ˈwaa Zoova ˗bha ꞊Gbɛkiö ˈka ˗wo ˗nu ˗a ˗ta. Ü ꞊mɔɔn˗ ˗bha ˈü dho ˗bhɔkwëëkëgükɔ ˈgü ɛɛnˈˈ ˈü ˗kë video ˈˈdhiʋ̈. ˗Yö ˗dho ˈsü ˗dhɛ ˈö ˈü˗ ˗bha, ˗a ˗bha.

• ˗Bhö video ˈö˗ ˗gɔ ˗kë ˗Mën ˈwo˗ ˗kë ˗Bhɔkwëëkëgükɔ ˗nu ˈgü? ˈka bhë ˗a ˗ga, kö pë ˗nu ˈyi ˗an ˗kë yi ˗bha ˗bhɔkwëë ˗nu ˗ta, ˈü ˗an blɛɛnŋˈˈ ˗ga.

• ˗Bhɔkwëë këdhɛ ˈö ü ˈˈsuee ˗a mɛɛnˈˈ ˈˈpian ˈö ˗kë «Zoova ˗bha ꞊Gbɛkiö ˗nu ˗bha ˗bhɔkwëë ˗nu» ˈka bhë ˗a ˗ta.

ˈWɔn ˗gɔ ˗nu waa video ˗nu ˈwo ɛntɛnɛtö ˗ta

ˈWɔn ˗gɔ ˗nu waa video ˗nu ꞊va ˈwo ꞊mɔɔn˗ ˗bha ˗wo ü ˗takun kö ˈü Yesu ˗bha ꞊klaŋwo ˗nu waa˗ ˗bha ˈˈsaa˗ ꞊bhlëë dɔ, ˗wo ɛntɛnɛtö ˈˈnimlɔn ˈö yö ˗a ˗ta.

˗A ˈwɔnzuan ꞊nɛn: ˗Kɔ ˈö Yesu dosɛnŋ ˗bha ga ꞊mɔɔn˗ ˗bha ˈö ˈwɔn ˗së ˗kë ˗a ˈka mɛn ˈˈmliɲɔn ꞊va ˗dhɛ ˈbha˗ pö ˈü˗ dɔ, ˗bhö ˈwɔn ˗gɔ ˗nu ˈwo ˗kë «Yesu ˗yö kwa ˗dha ˗kɔ ˗kë ꞊dhɛ?» waa « Pourquoi Jésus a-​t-​il souffert ? Pourquoi est-​il mort ? » ˈka bhë, ˗an ˗wo pö. Ɛɛnˈˈ ˈzü ˗bhö video ˈö ˗gɔ ˗kë ˗Mën ˈö ˗kë ˈö Yesu ˗yö ga? ˈka bhë ˗a ˗ga.