꞊Klaŋ ˈˈgblʋ̈gblʋ̈ këmɛn ˗nu ˗wa nu ˈˈkpɔnŋtaadhɛ ˈgüshiʋ̈sü ˈˈtʋ̈ŋ ˈka ˈˈdhiʋ̈: ˈMën Biblö ˗ya pö?

˗Kwɛ 2023 Zanvie 24 ˈka, ꞊klaŋ ˈˈgblʋ̈gblʋ̈ këmɛn ˗nu ˗wo ˈˈkpɔnŋtaadhɛ ˈgüshiʋ̈sü ˗ɲɔɔn ˈˈdhiʋ̈. a ˗Wa ˗pö ꞊dhɛ ˈˈkpɔnŋtaadhɛ ˈgüshiʋ̈sü ˈˈlɛlɛ ɛɛnˈˈ ˈˈtʋ̈ŋ ˈyaa ꞊gblɛɛn ˈzü. ˗Ya ˈto ˈˈtɩtɩ ꞊dedewo kö ˗yö yö gbeŋ ꞊minŋdii ˗bha.

• «‹ˈMɔnŋtrö ˈö ˈkpɔnŋtaadhɛ ˈgüshiʋ̈sü ˈˈlɛlɛ ˈdhö˗ ˗ta› bhë ˗ya ˗zɔn ꞊dhɛ ˈˈkpɔnŋtaadhɛ ˗ya dɔ ˈya˗. ˗Tɛɛdhooʒiaando ˈka, ꞊klaŋ ˈˈgblʋ̈gblʋ̈ këmɛn ˗nu ˗wa ˗ɲɔɔn ˈˈdhiʋ̈ ˗gblü ˈö ˗gɔn ˗ni ˈgü Uklɛnö, ˈbɔnŋbö nikleɛ ˗nu waa ˈˈtʋ̈ŋ ˗bha ˗slëë ˈgü ˗sü ˗nu ˗wɔn ˈgü.»—AFP International Text Wire.

• «꞊Klaŋ ˈˈgblʋ̈gblʋ̈ këmɛn ˗nu ˗wa ˗pö ꞊dhɛ ˗wa ˗dhɛga ‹ˈmɔnŋtrö ˈö ˈkpɔnŋtaadhɛ ˈgüshiʋ̈sü ˈˈlɛlɛ ˈdhö˗ ˗ta› bhë ˗a ˗ta, ˗wa ˗yö ꞊dhɛ ˗ya ˈto sekɔndö 90 kö ˈˈkpɔnŋtaadhɛ ˈgü ˗yö shiʋ̈ˈˈ. Mɛnbhɩɩdhe ˗nu ˗wa ꞊ɲɔɔn ꞊dedewo Aamagedɔn ˈˈsɔɔ.»—ABC News.

• «꞊Klaŋ ˈˈgblʋ̈gblʋ̈ këmɛn ˗nu ˈö ˈwo go ˈˈsɛ ꞊gban ˈgü, ˗an kpönën ˈbha ˗ya ˗pö ꞊dhɛ ˗ya ˈto ˈˈtɩtɩ ꞊dedewo kö mɛnbhɩɩdhe ˗nu woo ꞊dede ˗wo wo ˗de ˈgüshiʋ̈.»—The Guardian.

Mɛnbhɩɩdhe ˗nu waa ˈˈsɛ ˈö ˈkwa˗ ˗ta yö, ˗an ˈgüshiʋ̈sü ˗ya yö ˈklöö˗ ˗ee? ˈWɔn ˗nu ˈö ˈwo ˗dho kë ˗dhɛkpaɔ dhiʋ̈ˈˈ ˈgü, ˗an dua ˗mü kö ˗wo ˈˈsuʋ̈ ˗da kwa ˈgü ˗ee? ˗Mën ˈö Biblö ˗ya pö?

ˈWɔn ˈö ˈˈɲan ˈto ˗ni ˈgü kwa ˗gɔ ˗dhɛkpaɔ dhiʋ̈ˈˈ ˈgü

Biblö ˗ya ˗pö ꞊dhɛ «ˈˈsɛ ˈgü ˈyii ˈdho shiʋ̈ˈˈ toŋtoŋdhö», ˗ya ˈgo mü ˈzü mɛn ˗nu ˗dho «[ˈ]to ˗a ˗ta yi ꞊gban ˈˈpɛpɛ ˈka.» (Ecclésiaste 1:4; Psaume 37:29) ˗Dhɛ ˈö ˈˈdhʋ̈, mɛnbhɩɩdhe ˗nu ˈwii ˈdho ꞊mɔɔn˗ ˗bha kö ˗wo ˈˈsɛ ˈgü shiʋ̈ˈˈ ɛɛnˈˈ kö ˗wa kë kö mɛn ˈbha ˈyaa ˈdho ꞊mɔɔn ˗kë ˗a ˗ta ˗sü ˗bha.

ˈˈKɛɛ ˈkö ˗kë ˈˈdhʋ̈, Biblö ˗yö ˈˈkpɔnŋtaadhɛ ɲën ˈˈtʋ̈ŋ ˈbha ˗wɔn ˗blɛɛ. ˗A ˈwɔnzuan ˈö ˈdhö ˈyö ˈtɔ ˗ya ˗pö ꞊dhɛ «ˈkpongtaadhɛ ˗yö ziö ˗na.»—1 Zan 2:17, NTBL.

• ˈPë Biblö ˗ya ˗dhɛ ˈˈkpɔnŋtaadhɛ ɲën ˈˈtʋ̈ŋ, ˈbha˗ pö ˈü ˈbha ˈgüman, ˗bhö ˈwɔn ˗gɔ « La fin du monde est-elle proche ? Qu’est-ce que l’apocalypse ? » ˗wo pö.

• ˈPë Biblö ˗ya pö ˈö ˗gban ˈwɔn ˗nu ˈwo ˗dho kë ˈˈkpɔnŋ ꞊taa waa ˗an ˗kë ˈˈtʋ̈ŋ ˗bha, ˈbha˗ pö ˈü˗ dɔ, ˗bhö ˈwɔn ˗gɔ « Quand la fin du monde viendra-t-elle ? » ˗wo pö.

Kwa ˈgü ˈyaa ˈdho ga

Biblö ꞊mɔɔn˗ ˗bha ˈö kwa ˗takun ˈö ˈwɔn ˈˈgbɩɩ˗ ˗nu ˈö ˈwo kë ˗ni ˈgü ˈˈkpɔnŋ ꞊taa yö ˈwaa kwa ˈgü ga. ˗Kɔ ˗kë ꞊dhɛ?

• ˗Dhioo ˗së ˗nu ˗wo Biblö ˈgü. (2 Timote 3:16, 17) ˗A ˈwɔnzuan ꞊nɛɛn: ˗Bhö ˈwɔn ˗gɔ « Comment ne pas vous laisser submerger par l’inquiétude » ˗wo pö kö ˗kɔ ˈö Biblö ˈö ꞊mɔɔn˗ ˗bha ˈö ü ˗takun ˗a ˈka kö ü ˈgü ˈyaa ˈdho ga ˈwɔn ˈˈgbɩɩ˗ ˈgü, ˈü˗ ˗dɔ.

• Biblö ˗yö ˗dhɛkpaɔ dhiʋ̈ˈˈ ˗së ꞊dede ˗wɔn ˗blɛɛ. (Wlɔmö 15:4) ˗Yö ˈwɔn ˗nu ˈö ˗an kë ˈˈtʋ̈ŋ ˈyaa ꞊gblɛɛn waa˗ ˗dhɛ ˗nu ˈö ˈwo dho kë ˗dhɛkpaɔ dhiʋ̈ˈˈ ˈgü ˗an ˗wɔn ˗blɛɛ ˈkpakpadhö. ˗Yö kwa ˗takun ˈö ˈwɔn ˗nu ˈwo kë ˗ni ˈgü ꞊dɛɛ ˈˈkpɔnŋ ꞊taa bhë, ˈwaa kwa ˈgü ga.

ˈBha˗ pö ˈwɔn ˗së ˈö Biblö ˈö ꞊mɔɔn˗ ˗bha ˈö˗ ˗kë ü ˗dhɛ ˈü˗ dɔ, yi˗ ˗dhɛ ü ˗gɔ kö ˈü Biblö draansü ˈö mɛn ˈbha dho ü ˗takun ˗a ˗bha ˗a ˈgüdan ˗sü zübho.