Wlüünën ˗nu ꞊vadhɛ ˗gɔ ˈgü ˗dɔ ˗ni ˈgü ˗gbɔudhö: ˈMën Biblö ˗ya pö?

˗Kwɛ 2023 ˗Tɛɛdhooyi Fevlie 13 ˈka, ˗dhɛ ˈkpii˗ ˈö Zeta zuni ˈö˗ ˗bha yö ˗yö ˗gban ˈˈyua ˗wɔn ˗bha, ˈö ˈwo˗ ˗dhɛ (Centers for Disease Control and Prevention) bhë, ˗a ˈgümɛn ˗nu ˗wo ˈwɔn ˈbha ˗blɛɛ ˈö ˗gban wlüünën ˗nu ˈö ˗an ˗gɔ ˈgü ˈdhö dɔ ˗ni ˈgü ˗gbɔudhö ˈˈsɛ bhë˗ ˈgü, ˗an ˗bha. ˗Wa ˗pö ꞊dhɛ ꞊klaŋnën ˗nu ˈwo kolɛʒö ˗an 100 ˗ta, mɛn ˗nu ˈwo ʒiö mɛn 40 ˗ta ˈnën ˗wëë ꞊dede ˗yö bɔ ˗an ˗ta ˈˈtʋ̈ŋ ꞊gblɛɛn ˈˈpiʋ̈.

Pë ˈö ꞊dhɔtrɔɔ˗ dhebɔ ˈwo˗ ˗dhɛ Katelinö Etie, ˈö ˗kë yökëdhɛ ˈö bhë ˗a ˈˈpian ˗dhɛ ˈö ˗gban wlüünën ˗nu waa ꞊klaŋnën ˗nu ˗bha ˗a ˗gɔmɛn ˈka, ˈö˗ pö yö ꞊nɛɛn: «˗Kwɛ ˗kɔŋ do ˈwo ʒiö yö ˗an ˈgü, wlüünën ˗nu ꞊vadhɛ ˗gɔ ˈgü ˗dɔ ˗gbɔudhö. ˈˈKɛɛ ˈˈtʋ̈ŋ yö˗ ˈgü, ˈwɔn ˗dhɛ ˈö ˈyi˗ ˈsuan bho ˗ni ˈgü ˈyö ˈtɔ˗ ˈnëndhiëŋnën ˗nu ꞊vadhɛ ꞊dede ˈnën ˗an ˗gɔ ˈgü ˈdhö dɔ ˗ni ˈgü ˗gbɔudhö, ˈyö ˈwo˗ ˈˈpiʋ̈ ˗ʒiaanwo kö ˗wo wo ˗de zë.»

ˈSëëdhɛ ˈwo˗ ˗bɛnzë ˈwɔn bhë ˗a ˗bha, ˗ya ˗pö:

˗Wa ˈnëndhiëŋnën 10 ˈsü, ˗wo ˈˈgbɩɩdhɛ ˗wɔ ˗sü ˈka ˗a mɛn 1 ˗ta kö ˗wo wɔ ˗a ˈˈpiʋ̈. ꞊Dhɔtrɔɔ˗ dhebɔ Etie ˗ya ˗pö ˈwɔn bhë˗ ˈˈgblʋʋ ˈˈpiʋ̈ ꞊dhɛ: «ˈˈSuʋ̈ ˗da mɛn ˈgü ˗wɔn ꞊dede ˗mü. ˈYö ˗tɔ ꞊dhɛ ˈnëndhiëŋnën 10 ˗ta, ˗a ˈbha ꞊ya kë kö ˗wa wɔ ˈsaadhö ˗a mɛn do ˈˈpiʋ̈ ˈˈgbɩɩdhɛ ˈka.»
˗Wa ˈnëndhiëŋnën 3 ˈsü, ˗a mɛn 1 kë˗ ˈˈpiʋ̈ kö ˗yö ö ˗de zë.
˗Wa ˈnëndhiëŋnën 5 ˈsü, ˗a mɛn 3 ˈnën ˗wëë ꞊dede ˗yö bɔ ˗an ˗ta ˈˈtʋ̈ŋ ꞊gblɛɛn ˈˈpiʋ̈.

ˈWɔn ˈwo˗ ꞊blɛɛ bhë, ˗yö ˗wëësü ꞊dedewo. ˈYö ˗tɔ ꞊dhɛ ꞊waa˗ pö wlüünëndhɛ kö ˗wo ˗we zuʋ̈gblüdhi ˈˈtʋ̈ŋ ꞊dede ˈnën˗ ˈka. ˗Dhɛ ˈö ˈˈdhʋ̈, ˈmën ˈö ˗dho wlüünën ˗nu ˗takun kö zuʋ̈dhiʋ̈tɛɛ ˗nu ˈwo bɔ ˗ni ˈgü ˗an ˈgü ꞊dɛɛ yö bhë, ˗wo ˈto ˗a ˈˈgbɩɩ˗ ˈka ˗an ˗ta? ˈMën Biblö ˗ya pö?

Biblö ꞊mɔɔn˗ ˗bha ꞊dedewo ˈö wlüünën ˗nu ˗takun

ˈˈTʋ̈ŋ ˈˈgbɩɩ˗ ˈö ˈkwa bɔ ˗ni ˈgü ˗a ˈgü ꞊dɛɛ yö bhë, Biblö ˗ya ˗wɔn ˗blɛɛ ˈˈpuu ˈka. ˗Ya ˗dhɛ «ˈwɔn ˈˈgbɩɩ˗» ˈˈtʋ̈ŋ. (2 Timote 3:1-5) ˈKö ˗kë ˈˈdhʋ̈, ˗dhioo ˗sɛŋbɔ ˗nu ꞊dede ˗wo Biblö ˈgü. ˗A ˗dhioo ˗nu ˈwo ˈˈdhʋ̈, ˗wo wlüünën ˗nu ˈwo ꞊mɔɔn mɛn ˈˈmliɲɔn ꞊va ˗bha ˗an ˗takun ˗ni ˈgü kö ˗wo ˗mɔɔn ˗bɔ ˈwɔn ˈˈgbɩɩ˗ ˗nu ˈwo bhë, ˗an ˈgü ˗sü ˗bha. ˗Bhö ˈwɔn ˗gɔ ˗nu ˈwo yö, ˗an ˗ga. ˗Wo ˗gban Biblö ˗ta.

Pë ˈö ˗dho wlüünën ˗nu ˈwo˗ ˈˈpiʋ̈ kö ˗wo wo ˗de zë ˗an ˗takun

Pë ˈö ˗dho wlüünën ˗nu ˈö ˗an ˗gɔ ˈgü ˗ya dɔ ˗gbɔudhö ɛɛnˈˈ ˈö ˗wëë ˗ya bɔ ˗an ˗ta ˗an ˗takun

Comment faire face à la dépression ?
Comment arrêter d’être pessimiste ?
Comment faire face à l’inquiétude ?
Comment contrôler mes émotions ?
Triste ou optimiste ? (le tableau s’anime)

Pë ˈö ˗dho wlüünën ˗nu ˈwo ˈˈwɩ mɛɛnˈˈ ˗ni ˈgü ˗an ˗bha, ˗an ˗takun

Que faire si je suis harcelé ?
Que faire si je suis victime de harcèlement en ligne ?
Mets un harceleur K.-O. sans utiliser les poings ! (le tableau s’anime)

Pë ˈö ˗dho wlüünën ˗nu ˈö ˈwo˗ ˈˈpiʋ̈ kö ˗wo wɔ ˗an ˈˈpiʋ̈ ˈˈgbɩɩdhɛ ˈka ˗an ˗takun

Biblö ꞊mɔɔn˗ ˗bha ꞊dedewo ˈö ˈnënmɛn ˗nu ˗takun

˗Dhioo ˗sɛŋbɔ ˗nu ˈwo ˗dho ˈnënmɛn ˗nu ˗takun kö ˗wo ꞊mɔɔn wo ˗bha wlüünën ˗nu ˗takun ˗sü ˗bha, ˗wo Biblö ˈgü. ˗Bhö ˈwɔn ˗gɔ ˗nu ˈwo yö, ˗an ˗ga. ˗Wo ˗gban Biblö ˗ta.