De ˗nu ˈwo ˗tɔ yi ˈˈDhiʋ̈ʒiöwomɛn ˗nu?

˗Kwɛ këŋ do ˗blɛɛsü ˈgü, ‘Yesu ˗bha bɔmɛ ˗nu ˈwo ˗kë [Zedhizadhɛmö] waa˗ mɛ zii ˗nu’ ˈnën ˈwo kun ˈˈɲɔn ˗a troo ˗nu ꞊gban ˈˈpɛpɛ ˈˈdhiʋ̈ʒiöwomɛn ˗nu ˈka, ˈyö ˗tɔ ꞊dhɛ ˈwo ˈnën ˈwo kun ˈwɔn ˈˈgblʋ̈gblʋ̈ ˗nu ˗bhokoo kë ˗ni ˈgü. ˗An kpö ˗kun ˈˈtɩtɩ. (Këwɔn ˗nu 15:2) ˗Wa pö ˈwo ˗da ˈwɔn ˈbha ˗ʒiaan ˗ta, ˗an ˗wo ˗yö ˗kë do, ˈyö ˗tɔ ꞊dhɛ ˗wo ˗dhɛga Biblö ˈgü ˗be, ˈö ˗wo wo ꞊kwaa ˗Zlan ˗bha ˗zuu ˗zü kö ˗yö ˈˈdhiʋ̈ ˈsü ˗an ˈka. (Këwɔn ˗nu 15:25) Pë do bhë ˈnën yi ˈˈDhiʋ̈ʒiowomɛn ˗nu ˗wa kë ˈpö ꞊dɛɛ.

Kletiɛn ˗nu ˈö ˗Zlan ˗yö ˗bɔ ˗an ˗ta kö ö dhɔɔbhaawɔn ˗yö kë, wo ˗mü. ˈˈƝɔn ˗a troo ˗nu ˈwo yi ˈˈDhiʋ̈ʒiowomɛn ˗nu ˈka bhë, ˗Zlan ˗Wo ˗dhɔ ˗yö ˗an ˗kë ꞊dedewo. ꞊Ya ˈgo mü ˈzü ˈwɔn ˗nu ˈwo ˗gban ˗Zlan ˗wɔn ˗bha, ˗wo dɔ ˗an ˈˈɲan bhɔ ˗dhɛ ˈka. ˗Wo ˗dho wo ˈkwëëdhö ˈˈdhoogɔ ꞊gban ˈˈpɛpɛ ˈka kö ˗wo Zoova ˗bha ꞊Gbɛkiö ˗nu ˈwo ˈˈsɛ ˗todhʋ̈sü ˈgü, ˗an ˗bhawɔn ˗ga. ˗Wo ˗bɔ ˈsëëdhɛ waa ˗maankëmɛn ˗nu ˗ta ˗yö ˈwo ˗dhioo ˗nu ˈwo go Biblö ˈgü, ˗an dɔ yi ˗ta ꞊dhɛ ˗kɔ ˈö kun ˗a ˈka ˗kwɛ këŋ do ˗blɛɛsü ˈgü bhë, ˗a ˈdhö. ˗A kë ˈˈdhʋ̈ ˗sü ˗yö ˗Zlan ˗dhɔkëmɛn ˗nu ˗bha ˈwɔn ˗kë ˗kɔ ˗nu waa ˗an ˗wo ˗kë do. (Këwɔn ˗nu 16:4, 5) Yi ˈˈDhiʋ̈ʒiöwomɛn ˗nu ˗wo yi ꞊faan ˈmën ˗zlanwopösü ˗bha. ˗Wo wo ˗zokë ˗zuugü ˗bhöpë baasü ˈˈpiʋ̈. ˗Wo ˈnën ˈwo wo ˗zokë ˈpö mɛn ˗ya ˗sü ˈö ˗zlanwokɔdhi ˗nu ˈgü bhë, ˗a ˈˈpiʋ̈.

Kletiɛn ˗nu ˈö ˗Zlan ˗bha ˗zuu ˗yö ˗dhiʋ̈sü ˗an ˈka. Yi ˈˈDhiʋ̈ʒiöwomɛn ˗nu ˗wo Zoova, mɛn ˈö pë ꞊gban ˈˈpɛpɛ ˗gɔ ˗ta, waa Yesu, ˈö ˗zlanwɔkɔdhigümɛn ꞊gban ˗gɔ ˈˈdhiʋ̈ bhë, ˗an ˈˈgblʋʋ mɛɛnˈˈ. (1 Kodhɛngtö 11:3; Efɛzö 5:23) ˈWaa wo ˗de ˈsü ꞊dhɛ ˗Zlan ˗dhɔkëmɛn ˗nu ˗gɔdhiʋ̈mɛn ˗nu ˈdhö. Waa ˈˈɲɔn ˗a troo ˗dhɛ ˗nu ˈwo ˈto, “˗dhɛ ˈsaadhö ˈö ˈbhlanë bhë ˈö dho ˗a ˗bha, ˗wo ˗ziö ˗a ˈpiö.” (˗Dhɛkpaɔ dhiaˈˈ ˈsëëdhɛ 14:4) ˈKwa bhɛɛˈˈ kwa ˈˈDhiʋ̈ʒiöwomɛn ˗nu ˗bhaa ˈka, ˗yö kë ˗an ˗dhɛ ˗së ꞊dedewo.

• ˗Kwɛ këŋ do ˗blɛɛsü ˈgü, ˗de ˗nu ˈwo kun Kletiɛn ˗nu ˈˈdhiʋ̈ʒiowomɛn ˗nu ˈka?

• Kwa ˈˈDhiʋ̈ʒiowomɛn ˗nu ˗wo ˗Zlan ˈˈgblʋʋ mɛɛnˈˈ ˗kɔ ˗kë ꞊dhɛ ꞊dɛɛ?