Zakɔbö ˗yö ˈˈkɛnŋpë ˗slɔɔ

˗Dhɛ ˈö Izaakö ˗kwɛ ˗yö ˗kë 40, ˈö Dhebeka sü dhe ˈka. Dhebeka ˗dhɔ ˗kun ˗a kë ˗ni ˈgü ꞊dedewo. ˈDhɛ ˈö ˈˈtʋ̈ŋ ˈbha ˗yö ˗ʒiö, ˗wo ˈnën ꞊plɛ ˗kpɔ. ˗A ˈnën ˗nu ˈwo bhë ˗wo ˗kun ˗flɛɛn ˗nu ˈka.

˗Wo ˗kun ˗a mɛn ˗blɛɛsü ˗dhɛ ˗ni ˈgü Ezau, ˈyö ˈwo˗ mɛn ꞊plɛ ˗naan ˗dhɛ Zakɔbö. Ezau ˈyaa kun ˈto ˗ni ˈgü ˈˈkwɛɛnŋdhö. ˗Yö ˗kun ˈˈblükëmɛn ˗tiaandhö ꞊dede ˈka. ˈˈKɛɛ Zakɔbö ˗zë, ˗to ˈˈkwɛnŋdhö ˗dhɔ ˗kun ˗a kë ˗ni ˈgü.

˗A ˈˈtʋ̈ŋ ˈö bhë ˗a ˈka, ˈnëndë ˗ya ga, ˗a ˗bha ˈnën ˗blɛɛsü ˈnën ˈkɛnŋpë ꞊vadhɛ ꞊slɔɔ. ˗Ya ˈˈkan ˗a ˗dhɛ ˗nu ˈwo bhë ˗an ˗bha, Izaakö ˗bha ˈkɔdhigümɛn ˗nu ˗bha ˈkɛnŋpë ˈbha ˗kun ˗dhö. ˈKɛnŋpë ˈö ˈˈdhʋ̈ ˈnën˗ ˗tɔ Zoova ˗bha ˗bɔ ˈnëngɔɔn˗ ˗blɛɛsü ˗ta ˗sü kö pë ˈö˗ ˈˈplüün bho Ablaamö ˗dhɛ bhë, ˗ya ˈgüwɔn kë. Pë ˗nu ˈö Zoova ˗yö ˗an ˈˈplüün bho bhë, ˗a ꞊bhlëë ˈyaa kun Ezau ˗gɔ. ˈˈKɛɛ Zakɔbö ˗zë, ˗yö ˗kun ꞊bhlëë ˗ya ˗ni ˈgü ˗a ˗bha ꞊dedewo.

˗Dhɛkpaɔyi do ˈka, Ezau ˗yö ˗gloo ˈˈblü kë ˗sü ˗bha. ˈDhɛ nu ˈˈkwɛnŋdhö kö˗ ˈgü ˗ya ga, kö Zakɔbö ˗yö ˗bhöpë ˗së do ˈbha kpa ˗ni ˈgü. ˈYö˗ pö ˗a ˗dhɛ: ‹Din yöö n zë, ˗bhö ü ˗bha ˈˈtʋʋ ˗zɔɔndhö ˈö yö ˗a ˈnën ˈbha nu n ˗dhɛ.› ˈYö Zakɔbö ˗ya pö: ‹ˈMan ˈˈwɩ˗ ˗bha,ˈˈkɛɛ ˗bhö ü ˗wo ˗bhö n ˗dhɛ ꞊dhɛ ü ˗dho ü ˗bha ˈkɛnŋpë nu n ˗dhɛ.› ˈYö Ezau ˗ya pö: ‹N ˗bhawɔn ˈyaa ˈkɛnŋpë ˗bha, ˗a ˈsü, pë ˈa˗ ˈˈpiʋ̈ ˈyö ˗tɔ ˗bhöpë.› Ü ˗bha ˈgü, Ezau ˗ya ˗kë ˗së ˗ee? ˗Abin toŋtoŋdhö. Ezau ˗yö ö ˗kwaa pë ꞊bhlëësü ˗zü ˗bhöpë ˗wɔn ˈgü.

ˈDhɛ Izaakö ˗yö ˗kë zii, ˈö ˈdhuëë˗ ˗kpɔ ö gbö ˗blɛɛsü ˗bha ˈˈtüŋ ˗yö ˗wo, ˈyö Dhebeka ˗yö Zakɔbö ˗takun kö ˗wo ˈdhuëë˗ ˈkpɔ ˗a ˗bha. ˈDhɛ Ezau ˗yö ˈwɔn ˈö bhë ˗a man, ˈyö˗ ˈˈslö ꞊mɛɛn kö ˈö ö ꞊dhegblü zë. ˈˈKɛɛ ˈdhɛ ˗kë ꞊dhɛ Izaakö waa Dhebeka ˗wo ˗kun ˗a ˈˈpiʋ̈ kö ˈwo Zakɔbö ˗takpa bhë, ˗wa ˗pö ˗a ˗dhɛ: ‹˗Bhö ˈdho ü dhe ꞊dhegblü Dhaban ˈˈpiʋ̈ ˈü ˈto mü kö ü ꞊dhegblü Ezau zuʋ̈ˈˈ ˗yö kë ˗saa.› Zakɔbö ˗yö ˈwɔn ˗man ö ˗mɛn ˗nu ˗ta ˈö ꞊duëë kö ˈö dha.›