Zakɔbö waa Ezau ˗wo ˗dhikodhɛ kë ˗ni ˈgü

Zoova ˗ya ˗pö Zakɔbö ˗dhɛ ꞊dhɛ ö ˗dho ˗a ˗takpa ꞊dhɛ ˗kɔ ˈö Ablaamö waa Izaakö ˗an ˗takpa ˗a ˈka bhë, ˗a ˈdhö. Zakɔbö ˗yö ˗dho ˈö ˗ya Alan ˈö dhe ˗sü mü ˈö˗ bha ˈkɔdhi ˗yö ˗kë ˈkpii˗, ˈö ˗kë ꞊nɔɔnmɛn ˈka.

Zoova ˗ya ˗pö Zakɔbö ˗dhɛ: ‹˗Bhö ü yɛɛkë ˈü ˈdho ü ˗bha ˈˈsɛ ˈgü.› Zakɔbö waa ö ˗bha ˈkɔɔmɛn ˗nu ˈwo ˗ya ˈˈta ꞊gblɛɛn ˈkpɔ ˗sü ˗bha kö ˈwo wo yɛɛkë. ˈDhɛ ˈwo kun ˈdho ˗ni ˈgü, ˈyö˗ ˗bha yökëmɛn ˈbha ˗nu ˗wa pö ˗a ˗dhɛ: ‹Ü ꞊dhegblü Ezau ˗yö nu ˗ni ˈgü ü ˈˈdhiʋ̈ ˗gɔ gɔɔn˗ ˗nu 400 ˈka!› ˈˈSuʋ̈ ˗yö ˗da Zakɔbö ˈgü ˈyö ˗tɔ ꞊dhɛ ˈyaa kun ˗a ˈˈpiʋ̈ kö Ezau ˗yö pë ˈˈdhiʋ̈˗ kë yö waa ö ˗bha ˈkɔdhigümɛn ˗nu ˈka. ˗A ˗wɔn ˈgü, ˗ya ˗pö Zoova ˗dhɛ: ‹˗Bhö dɔ ˈˈgbɩɩ˗ kö ˈü n dha n ꞊dhegblü ˗gɔ.› ˗A ˗dhɛkpaɔyi ˈö dɔ˗ ˈˈpiʋ̈ ˗a ˈka, ˈyö Zakɔbö ˗yö gbɔɔdhe ꞊va bɔ Ezau ˗dhɛ, ˈˈbhlaa ˗nu, ˗bho ˗nu, ˗du ˗nu, ꞊ɲɔɔnmian ˗nu waa ꞊soofëŋ ˗nu ˈka.

ˈDhɛ Zakɔbö ˈö kun ö do ˈka ˗yö ˗kpan ˈˈkië do ˗bha, ˈyö waa ˈˈkië ˈö bhë ˈwo ˗ya ꞊gɔɔn sü ˗bha. ˗Wo ꞊gɔɔn ˈö yö˗ ˈka dhiapiʋ̈ ˗bha. Pë ˈˈdhiʋ̈˗ ˗yö ˗kë Zakɔbö ˈka, ˈˈkɛɛ yö ˈti ö ꞊kwaa ˈˈkië ˈö bhë ˗a ˗zü. ˈDhɛ ˗kë ˈˈdhʋ̈, ˈyö ˈˈkië ˈö bhë ˗ya pö ˗a ˗dhɛ: ‹˗Bhö ü ꞊kwaa n ˗zü ˈa ˈdho.› ˈYö Zakɔbö ˗ya pö ˗a ˗dhɛ: ‹˗Abin, ˗bhö ˈdhuëë˗ ˈkpɔ n ˗bha ꞊köŋ.›

ˈDhɛ ˗kë ˈˈdhʋ̈, ˈyö ˈˈkië bhë ˗yö ˈdhuëë˗ kpɔ Zakɔbö ˗bha. ˗Dhɛ ˈö go mü, ˈyö Zakɔbö ˗ya ˈwɔn dɔ ꞊taabha ꞊dhɛ Zoova ˈti dho ö ꞊kwaa Ezau ˗zü kö ˗yö pë ˈˈdhiʋ̈˗ kë ö ˈka.

˗Dhɛ ˈö ˗dhɛ ˗yö kpɔɔ, ˈyö Zakɔbö ˗yö ˗kpan ö ꞊dhegblü ˗bha kö waa mɛn 400 ˗wo nu ˗ni ˈgü. ˈYö Zakɔbö ˗yö bɔ ö ˗bha ˈkɔɔmɛn ˗nu ꞊gban ˈˈdhiʋ̈, ˈö ꞊ɲɔɔn ö ꞊dhegblü ˗bha ˈö yö ö kpɔn ˈgü ˗gɛnɲan ˈka 7. Ezau ˗de ˈpö ˗yö ˗bialö ˈö dho Zakɔbö ˈˈpiʋ̈ ˈö wü ˗a ˗bha. ꞊Dhegblüzë ˗nu ꞊plɛ ˈwo bhë, ˗wo ˈˈgbʋ ˗bɔ wo ˈkwëë˗, ˈwo ˗dhikodhɛ ˗kë. Ü ˗bha ˈka, ˗kɔ ö Zakɔbö ˗yö ˈwɔn ˗nu ˗baa ˗a ˈka bhë Zoova ˗yö ˗kë ö ˗de ˈgü ꞊dhɛ?

꞊Taabha Ezau ˗yö ö yɛɛkë ö ꞊plöö ˈyö Zakɔbö ˗zë ˈö dho ö ˗bha ˈˈta ˈka ˈˈdhiʋ̈. Zakɔbö gbö ˗nu ˗kun 12. ˗An ˈtɔ ꞊nɛn: Dhubɛn, Simeɔn, Levi, Zuda, Dan, Nɛfutali, Gadö, Azɛ, Isakaa, Zabulɔn, Zozɛfö waa Bɛnʒamɛn. Zoova ˗yö ˗bɔ Zozɛfö ˗ta kö ˈö ö ˗bha ˈˈsɛgümɛn ˗nu dha. ˗Kɔ ˈö˗ kë˗ ˈka ü˗ ˗dɔ ˗ee? Kwa dho ˗a yö ˗kwɛzlan ˈö dɔ ˗a ˗dhɛ ˈö yö ˗a ˈˈpiʋ̈ ˗a ˈgü.