Zoova zuʋ̈ˈˈ ˗yö ˗saa Ʒonasö ˈˈpiʋ̈

Asidhi ˈˈkwipö do ˈwo˗ ˗dhɛ Ninivö bhë, ˗a ˈgümɛn ˗nu ˈˈgblü ˗kun ˈya˗ ꞊dedewo. Zoova ˗ya ˗pö Ʒonasö ˗dhɛ ˗yö ˈdho Ninivö kö ˗ya pö ˗an ˗dhɛ ˗wo wo ˈˈtakɔ bho ˈˈgblʋʋ. ˈˈKɛɛ Ʒonasö ˗yö ˗duëë ˈö dho ʒiaan ˈˈwɛɛ ˈka. ˗Yö ˗da ˈˈyitagɔ do ˈö kun ˈdho ˗ni ˈgü Tasisö ˗a ˈgü.

ˈDhɛ ˈwo kun ꞊weeyi ˗ta, ˈyö ˈˈtɛɛ ˈˈgbɩɩ˗ ˗yö ˗ya ʒiö ˗sü ˗bha ˈyö ˈˈsuʋ̈ ˗yö ˗da ˈˈyitagɔ ˈgümɛn ˗nu bhë ˗an ˈgü. ˈYö ˈwo ˗ya bhɛɛsü ˗bha wo ˗bha ˗zlan ˗nu ˗dhɛ, ˈwo˗ pö: ‹ˈMën ˗kë ˈö ˈˈtɛɛ ˈˈgbɩɩ˗ suu ˈö ˈˈdhʋ̈ ˈö ʒiö?› ˈYö Ʒonasö ˗ya pö ˗an ˗dhɛ: ‹Man ˈnën n ˗wɔn ˈgü ˈö ˈˈtɛɛ ˈˈgbɩɩ˗ ˗yö ˗ʒiö. ˗Duëë ˈnën ˈa˗ wo ˗ni ˈgü ˈyö ˗tɔ ꞊dhɛ pë Zoova ˗ya pö ˈa˗ kë bhë ˈman ˗kɔ ˗a ˈka. ˗Ka n ˗zuö ˈˈyi ꞊bhaa kö ˈˈtɛɛ ˈˈgbɩɩ˗ bhë ˗yö ˈduannu.› ˈˈYitagɔ ˈgümɛn ˗nu bhë, ˈwaa kun ˗a ˈˈpiʋ̈ kö ˗wa ˗zuö ˈˈyi ꞊bhaa, ˈˈkɛɛ ˗ya ˗pö ˗wa ˗zuö mü ˈˈgbɩɩdhɛ ˈka. ˈDhɛ ˈwo˗ ˗zuö ˈˈyi ꞊bhaa ˈyö ˈˈtɛɛ ˗yö ˈduaanu.

Ʒonasö ˗ya ˗ga ˗be ꞊dhɛ ö dho ga. ˗Dhɛ ˈö kun ˈdho ˗ni ˈgü ˈˈyi ꞊löö, ˈyö ꞊bhɛɛ Zoova ˗dhɛ. Zoova ˗yö ˈyuö˗ ˈkpii˗ do ˗bɔ ˈö Ʒonasö ꞊mënŋ, ˈˈkɛɛ yö ˈti˗ zë. Ʒonasö ˗yö ˗to ˈyuö˗ bhë ˗a ˈˈgblʋ̈ʋ̈ ˈö ꞊bhɛɛ ˈö˗ pö: ‹Zoova a dho ˈwɔnman ü ˗ta ˗kplawo.› Zoova ˗yö ö ˗kɔ ˗kpa Ʒonasö ˗ta ˈyuö˗ bhë ˗a ˈˈgblʋ̈ʋ̈ ˗dhɛkpɔayi ˗yaaga ˈˈpiʋ̈. ˈDhɛ go mü, Zoova ˗ya ˗pö ˈyuö˗ bhë ˗a ˗dhɛ ˗yö ˗pe Ʒonasö ˈka ˈˈyi ˈˈkpɔnŋ ˈˈdhiʋ̈.

Zoova ˗yö Ʒonasö ˗dha. ˗Ya ˗kë ˈˈdhʋ̈ kö ˗a ˗bha ˗dho Ninivö ˗wɔn ˗ya bo ˗ee? ˗Abin! Zoova ˗ya pö Ʒonasö ˗dhɛ ˈzü ˗dɛɛwo ˗yö ˈdho mü. ˗Yö ˗to mü ˈö ˈwɔnman ˗a ˗ta. ˗Yö ˗dho Ninivö ˈö˗ pö ˗a ˈgümɛn ˗nu ˈö ˗an ˈˈgblü kun ˈya˗ bhë ˗an ˗dhɛ: ‹˗Dhɛkpaɔyi 40 ˈnën˗ ˗ya ˈto kö ˈˈkwipö ˈö yö ˗a ˈgü ˗yö shiʋ̈ˈˈ.› ˈDhɛ pö ˈˈdhʋ̈, ˗wɔnmɛnkunwɔn do ˈbha ˗yö ˗kë: Ninivömɛn ˗nu ˗wo wo ˈˈtʋ ˗to ˗a ˗wo ˗bha ˈwo wo ˈˈtakɔ ˗nu bho ˈˈgblʋʋ. ˗An ˗bha ˗gblüdë ˗ya ˗pö ˗an ˗dhɛ: ‹˗Kwa bhɛɛˈˈ ˗Zlan ˗dhɛ ˈkwa ˈgo kwa ˗bha ˈwɔn yaa ˗nu ˈgü. ˗A ˈbha ˗ya kë yö ˈti dho kwa ˈgüshiʋ̈. ˈDhɛ Zoova ˗ya yö ꞊dhɛ ˗wa ˈgo wo ˗bha ꞊sɔnŋ yaa ˗nu ˈgü bhë, yö ˈti ˗an ˈgüshiʋ̈.›

ˈWɔn ˗yö ˗shiö Ʒonasö ˗dhɛ ˈyö ˗tɔ ꞊dhɛ Zoova yö ˈti ˈˈkwipö ˈö bhë˗ ˈgüshiʋ̈. ˗Bhö ü ˗zota. Zoova ˗yö ö zuʋ̈ˈˈ ˗kë ˗saa Ʒonasö ˈˈpiʋ̈, ˈö˗ ˗wëë ˗ya ˗kë. ˈˈKɛɛ Ʒonasö ˗zë, Ninivömɛn ˗nu ˗wëë yö ˈti ˗a kë. ˗Yö ˗go ˈˈkwipö bhë˗ ˈgü, ˈö dho ˗ya ˈˈdhü do ˈbha dhɔŋ ꞊löö kö ˈwɔn ˗ya ꞊shiö ˗a ˗dhɛ. ˗Dhɛ ˈö ˈˈdhü ˈö bhë ˗yö ga, ˈwɔn ˗yö ˗shiö ˗a ˗dhɛ ˈzü ꞊dedewo. ˈYö Zoova ˗ya pö ˗a ˗dhɛ: ‹ˈˈDhü ˈö ga bhë ˈyii ˗dhi ü ˗dhɛ. ˗Kɔ do bhë˗ ˈka Ninivömɛn ˗nu ˗bha ga ˗sü ˈyii dho ˗kë n ˗dhɛ ˗së. ˈPë ˗kë ˈö wo ˈti ga ˈyö bhë. ˗Gleŋ ˗mɛɛn ˈö go ˗a ˈgü? Ninivömɛn ˗nu ꞊bhlëë ˗yö ꞊va ˈö ˗ʒiö ˗a ˈka ˈˈdhü ˈö bhë ˗a ˗ta.