˗Kwa yö kë kwa ˈˈkwëë ˈˈyasa ˗nu ˈwo ˗wo ꞊va pö ˈmü ˗an ˈgü

Mɛn ˗nu ˗wa ˈwɔn ˗taɔŋ ˗së ˈö ˗gban ˗Zlan ˗bha ˗Gblüdëdhɛ ˗bha ˗a man ˗an ˗de ˗wo ˈgü, ˗wo wo ˈˈtʋ ˗to ˗a ˗bha. ˗A ˈbha ꞊ya kë kö yö ˈnën˗ ˗wɔn ˈgü ˈyö Zoova ˗ya ˗kë ˈö «Zuifö ˗nu ˈwo Zedhizadhɛmö ˈplöö, waa˗ mɛ ˈdhɛ ˗nu ˈwo go ˈˈsɛ ˈˈpɛpɛ ꞊gban ˈgü,» ˈwo nu wo ˈˈtʋ ˈto ˈwɔn ˗taɔŋ ˗së ˗bha ˗an «˗dɩ ˗wʋ ˗nu ˈgü ˈdo ˈdo ˈka» Paŋtökɔtö ˈö ˗kë ˗kwɛ 33 K.Y. ˈka bhë ˗a yi ˈka, ˈkö ꞊dee ˗wo Eblö waa Glɛkö ˗wo ˗nu ˗pö. (Kë 2:5, 8) ꞊Dɛɛ ˈpö, ˗dhɛ ˗nu ˈö mɛn ˗nu ˈwo ˗wo ꞊va pö mü ˗a ˈgü, ˗zlanwokɔdhi ˗nu ˈwo ˗bhɔkwëë ˗kë ˗wo suu do do ˈgü ˈmü, ˗an ˗bha ˗zlanwopödhɛ ꞊mɔɔn˗ ˗bha ˈö ˗kë do. ˗Zlanwopömɛn ˗nu ˈwo ˗zlanwokɔdhi ˗nu bhë ˗an ˈgü, ˗wo ˗dho yö kë wo ˈˈkwëë ˗kɔ ˗kë ꞊dhɛ kö ˗wo ˗zlanwopö mɛn ˈö ˈdho ˗a ˗dhɛ, kö ˈwa ˈdho ˗zlanwopö ˗dhɛ do ˈgü ˈko ˗ta ꞊va kö˗ ˗wɔn ˗yö ꞊shiö ˈkɔdhigümɛn ˗nu ˗dhɛ?

• 

  ˗Ka kpan ka ˈko ˗bha (Pr 15:22): ˗Zlanwopö yö ˗bha ˈwɔnyëë ˗nu dua ˗mü kö ˗wo ˗kpan wo ˈko ˗bha kö ˗kɔ ˈwo ˗dho yö ˗kë ˗a ˈka ˗së ˈka ˗dhɛ ˗nu bhë ˗an ˈgü ˗wa ˗wɔn blɛɛˈˈ. ꞊Ya kë ꞊dhɛ ˗an ˗bha ˈˈyasa ˗naan ˗yö ˗dhö, ˗zlanwokɔdhigümɛn ˗nu ˈwo ˗zlanwopö ˗wo ˈˈwɛɛ ˗nu ˈgü, ˈka ꞊löö ˗an ˗wopömɛn ˗nu ˗bha ˈkɔ ˗ta ˗yö ˗dho kë ˗an ˗dhɛ ˗së. ˈˈKɛɛ ꞊ya kë ꞊dhɛ ˈwaa ꞊mɔɔn˗ ˗bha kö ˗wo ˗zlanwopö ˗an ˗bha ˈˈyasa ꞊gban ˈgü, ˗wo ꞊mɔɔn˗ ˗bha ˈwo˗ pö ka ˗dhɛ ꞊dhɛ ˈka bɔ ˈkɔ ꞊gban ˈgü kö mɛn ˗nu ˈwo ˈˈwɩ ˗zlanwo ˗bha bhë, ˈka˗ ˗an ˈtɔ nu ˗an ˗dhɛ. (od˗F 93 § 37) Ɛɛnˈˈ ˈzü ˗wo ꞊mɔɔn˗ ˗bha ˈwo˗ pö ka ˗dhɛ ˈka ˗an ˗takun kö mɛn ˗nu ˈwo ˗an ˗wo pö ˈka ˗an mɛɛnˈˈ kö ˈka ˗an ˈtɔ waa ˗an ˗bha ˈˈnimlɔn ˗nu bɔ ˗an ˗bha ˗zlanwokɔdhi ˗dhɛ. (km˗F 7/12 5, ˈkɔnën) ˗Yö ˗së kö ˗yö ˈto kwa ˈˈɲaan ˈpö ꞊dhɛ ˈkɔ ˈbha ˗nu ˈgü mɛn ˗nu ˗wo ˗wo suu do do pö ˗an ˈgü. Pë ˈˈpɛpɛ ˈkwa ˗dho ˗a kë kö ˈkwa ˗zlanwopö ˈˈyasa ˗nu ˈwo ˈˈdhʋ̈ ˗an ˈgü, ˗a dua ˈyaa ˗mü kö ˗yö ˈˈsɛgɔdhiʋ̈mɛn ˗nu ˗bha ˈtɔŋ˗ ˈbha ꞊lögü.

• 

  ˗Kwa yö kë kwa ˈˈkwëë (Ef 4:16): Pë ˈˈpɛpɛ ˈö ˗zlanwopö ˗yö ˗bha ˈwɔnyëë ˗dho ˗a pö kwa ˗dhɛ, ˗kwa kwa ˈˈtʋ ˈto ˗a ˗bha ˗së ˈka. Kwa Biblö ˗zɔn ˗ni ˈgü mɛn ˈbha ˗dhɛ ˗a dhɔɔbhaa ˗wo ˈö kwa ˗bha ˗zlanwokɔdhi ˈyaa ˗zlanwopö ˗a ˈgü, ˗a ˈgü ˗ee? ꞊Ya kë ꞊dhɛ ˈkwa˗ nu ˗zlanwokɔdhi ˗dhɛ ˈö˗ ˈgümɛn ˗nu ˗wo ˗wo bhë ˗a pö ˗a mɛn do ˗dhɛ, ˗a ˗gɛn ˗dho ˈdho ˈˈdhiʋ̈ ˈˈvaandhö.

• 

  ˗Kwa kwa ˗de baaˈˈ (Pr 15:28; 16:1): ꞊Ya kë ꞊dhɛ mɛn ˈbha ˈyaa kwa ˗wo pö, ˗kwa kwa ˈgü dɔ ˈˈgbɩɩ˗ kö ˈkwa ˈwɔn ˗taɔŋ ˗së pö ˗a ˗dhɛ. ˗Wo nu ˈö mɛn ˗nu ˈwo ˗an pö kwa ˗bha ˈˈyasa ˈgü, kwa ꞊mɔɔn˗ ˗bha ˈkwa kwa ˗zota ˗an ˈgü, ˈyö ˈkwa ˗an ˗bha Biblö waa ˗an ˗bha video ˗nu sü kwa ˗bha telefɔnö ɛɛnˈˈ tablɛtö ˗ta. Kwa ꞊mɔɔn˗ ˗bha ˈkwa bɔ ˈpö JW Language app ˗ta ˈö ˈkwa mɛn ꞊tua bho ˗kɔ ꞊draan ˗wo ˗nu bhë, ˗an ˈgü.