˗Kwa ˈto ˈˈkiö ˗nu ˗bha ˈwɔnzuan ˈˈpiʋ̈

1-2. (1) Kwaa ˈˈkiö ˗nu kwa ˗bhokopiʋ̈dhɛ ˈnën ˗tɔ ˗mën? (2) Kwaa˗ ˗nu kwa ˗bhɔkwëëdhɛ ˈnën ˗tɔ ˗mën?

KWA ˗bha ˗kë Zoova ˗bha ˈˈsɛgümɛn ˗nu ˈka ˗sü ˗ya ˗kë ˈö ˈkwa ˗da ˗a ˗bha ˈkɔdhigümɛn ˗nu ˈwo˗ ˗dhɔkëmɛn ˗nu ˈka bhë ˗an ˈˈpiʋ̈. ˈWo ˈnën ˈwo ˗tɔ kwa ꞊dhegblü ˗nu ˈwo ˈˈkpɔnŋtaadhɛ ˗todhʋ̈sü ˈgü waa ˈˈkiö ˗nu ˈˈmliɲɔn ꞊va. (Dan. 7:​9, 10) ˈKwa kwa ˗zota ˈˈkiö ˗nu ˗wɔn ˈgü, kwa˗ ˗yö ꞊dhɛ kwaa˗ ˗nu ˈkwaa do. ˗A ˈwɔnzuan do ˈnën ˗tɔ ˗Zlan ˗yö ˈˈkiö ˗nu ˗da ˈö˗ yi ˗yö ꞊gwëë pinŋdhö ˈö ꞊kun kwa ˗da. (Job 38:​4, 7) ˗An ˈˈpii ˗yö ˈˈgbɩɩ˗ ˈö ˗ʒiö ˗a ˈka kwa ˗ta. ˗An ˗bha ˈˈslʋ̈ʋ̈slʋ̈dhɛ waa ˗an ˗bha kpɛnŋdhödhɛ ˗wo ˗ʒiö kwa ˗bha ˗ta ˈpö, ˈyö sü ꞊dhɛ ˈwɔn yaa kë ˗dhii ˗yö kwa ˗bha.—Luk. 9:26.

² ˈKö ˗kë ꞊dhɛ kwaa ˈˈkiö ˗nu kwa ˗bhokopiʋ̈dhɛ ˗yö ꞊va, kwa˗ ˈwɔn ˗dɔ ꞊dhɛ kwa ˗bhɔkwëëdhɛ ˗yö ꞊va ˈpö. ˗A ˈwɔnzuan do ꞊nɛn: ꞊Dhɛ ˈˈkiö ˗nu ˈdhö, kwa ꞊mɔɔn˗ ˗bha ˈkwa ˈto Zoova ˗bha ˈˈklʋʋsë ˗nu ˈˈpiʋ̈. ˗Potaadhe ˗yö kwa ˗gɔ ˈpö ꞊dhɛ ˈˈkiö ˗nu ˈdhö kö ˈkwa ˈwɔn ˗nu kë. ˈˈKiö ˗nu ˈtɔ waa yö ˗nu ˈwo ˗an ˗kë ˗wo ˗dhö. ˗Kɔ do ˈö bhë ˈyö ˈkwa˗ ˈka. ꞊Dhɛ ˈˈkiö ˗nu ˈdhö, kwa˗ ˈˈpiʋ̈ kö ˈkwa kwa ˗Damɛn ˗dhɔkë.—1 Piɛ. 1:12.

3. ˗Gleŋ ˗mɛɛn ˗nu ˈkwa ꞊mɔɔn˗ ˗bha ˈkwa ˗an ˈsü ˈˈkiö ˗nu ˗bha?

³ ˈDhɛ ˗kë ꞊dhɛ kwaa ˈˈkiö ˗nu kwa ˗bhɔkwëëdhɛ ˗yö ˗dhö bhë, ˗an ˗bha ˈwɔnzuan ˗nu ꞊mɔɔn˗ ˗bha ˈwo kwa ˗takun, ˈwo ˗gleŋ ˗sɛŋbɔ ˗nu ˗da kwa ˗bha. Kwa ˗dho ˈˈkiö ˗nu ˗bha ˗dekëtɩtɩsü, mɛnbhɩɩdhe ˗nu ˗dhɔ, ˈwɔn ˈˈgbɩɩ˗ ˗nu ˗kun wo ˗bha ˗sü waa ˈgüdɔgbɩɩsü kö ˗wo ˗zlanwokɔdhi kë ˈˈslʋ̈ʋ̈slʋ̈ ˗an yö ˈwɔn ˗gɔ ˈö yö ˗a ˈgü, kö ˗kɔ ˈö ˈkwa dho ˈto ˗a ˈka ˗an ˗bha ˈwɔnzuan ˈˈpiʋ̈ ˈkwa˗ yö ˈpö.

ˈˈKIÖ ˗NU ˗WO WO ˗DE ˗SÜ ˈˈTƖTƖ

4. (1) ˈˈKiö ˗nu ˗wo wo ˗de ˗sü ˈˈtɩtɩ ˗kɔ ˗kë ꞊dhɛ? (2) ˈYö ˈmën ˗kë ˈwo˗ ˗kë ˈˈdhʋ̈? (Psaume 89:7)

⁴ ˈˈKiö ˗nu ˗wo wo ˗de ˗sü ˈˈtɩtɩ. ˈKö ˗kë ꞊dhɛ ˗wo ˈwɔn ꞊va ˗dɔ ˈö ˗an ˈˈpii ˈdhö ˈˈgbɩɩ˗, ˈwo ꞊kpɔɔsü, ˗wo ˗to Zoova ˗bha ˗dhioo ˗nu ˈˈpiʋ̈. (Ps. 103:20) Yö ˈö Zoova ˗ya dɔ ˗an ˗kɔ ˈka ˗wa kë ˗ni ˈgü, ˈwaa wo ˗de ˗gɔn ɛɛnˈˈ ˈwaa˗ kë kö mɛn ˗nu ˈˈɲan ˗yö bɔ wo ˗ta. Pë ˈˈpɛpɛ ˈö Zoova ˗ya pö ˗an ˗dhɛ ˗wa kë bhë ˗wa kë ˗ni ˈgü, kö ˗kë ꞊ʒianwo ꞊dhɛ mɛn ˗nu ˈwaa ˗an ˈtɔ dɔ, ˗yö ˗kë ˗an ˗dhɛ ˗së.a (ˈWun. 32:​24, 29; 2 Rois 19:35) ˈTɔbhɔdhe ˈö Zoova dua ˈka ˈwaa˗ ˈˈpiʋ̈ kö mɛn ˗nu ˗wa nu wo ˗dhɛ. ˈMën ˗kë ˈö ˈˈkiö ˗nu ˗wo wo ˗de sü ˈˈtɩtɩ ˈˈdhʋ̈? ˈYö sü ꞊dhɛ Zoova ˗dhɔ ˗yö ˗an ˗kë, ˈwo˗ ꞊bhlëë ˗ya ꞊dedewo.—Psaume 89:7 ˗wo pö.

5. ˈˈKiö do ˈö kun Zan dɔɔˈˈ ˗ni ˈgü bhë, ˗ya ˗zɔn ꞊dhɛ ˈö ö ˗de ˗sü ˈˈtɩtɩ ˗kɔ ˗kë ꞊dhɛ? (Kpɔɔˈˈ ˈzü pë ˈˈbin ˗bha.)

⁵ ˗Kwɛzlan do ˈö˗ ˗zɔn ꞊dhɛ ˈˈkiö ˗nu ˗wo wo ˗de ˗sü ˈˈtɩtɩ, ˗kwaa ˗ga. ˗Kwɛ 96 K.Y. ˈgü, ˈˈkiö do ˈö ˈkwaa˗ ˈtɔ dɔ ˗yö ˗wɔnmɛnkunwɔn ˗nu ˗zɔn bɔmɛn Zan ˗dhɛ. (Dhɛ. 1:1) ˈDhɛ Zan ˗yö ˗kpan pë ˗nu ˈwo ˈˈdhʋ̈ ˗an ˗bha, ˈmën ˗kë? ˗Yö ˗kun ˗a ˈˈpiʋ̈ kö ˈö ˈˈkiö ˈö bhë ˗a ˗dhɔkë. ˈˈKɛɛ ˗a ˈˈkiö ˗yö ˗to mü ˈö˗ ˗kɔ kun ˗a ˗kë ˈˈdhʋ̈ ˗sü ˈka, ˈö˗ pö: «I ˗dɩ ˈkun! ˈMɛ ˈö bhii˗ kë˗ ˗dhɛ ˈˈdhʋ̈ ˗a ˗mɛ ˈyaa ˗mü ma ˗zë n ˈka. Bhi ˈdhö, ma ˈdhö, mɛ ˈˈpɛpɛ ˈwo i dheebhang ˗nu ˈka [ . . . ] ˈdhö, mɛ ꞊gban kwa [˗Zlan] ꞊në ˗gɔ, ˗bhö ˗a yö ꞊në˗ ˗dhɔ kë!» (Dhɛ. 19:10) ˈˈKiö ˈö bhë ˗yö ˈö ˗de ˗sü ˈˈtɩtɩ ꞊dedewo. ˈYaa kun ˗a ˈˈpiʋ̈ kö ˗wo ö ˈtɔ bhɔ. ˗Yö ˗to mü ꞊ʒiaan ˈö Zan wë bɔ Zoova ˗Zlan ˈˈpiʋ̈. ˈˈKɛɛ ˗yö ˈti ö ˗de ˈsü ˗tiaandhö Zan ˗bha ˈpö. ˈKö ˗kë ꞊dhɛ ˗yö Zoova ˗dhɔkë ˈˈtʋ̈ŋ ꞊gblɛɛn ˈˈpiʋ̈ ˈö˗ ˈˈpii ˈdhö ˈˈgbɩɩ˗ Zan ˗bha, ˗yö ˈö ˗de ˗kë ˈˈtɩtɩ ˈö Zan ˗dhɛ ö yökëyoo. ˈDhɛ kun Zan dɔɔˈˈ ˗ni ˈgü, ˗yö pë ˈˈpɛpɛ ˗kë ˈö ˈwɔn ꞊blɛɛ ˗a ˗dhɛ ˗dhɔŋsü ˈka. ˈYaa za ˈgü ꞊dhɛ ˈˈkiö ˗yö kun ˗a ˈwɔn dɔ ˗ni ˈgü ꞊dhɛ pë ˗nu ˈö Zan ˗yö ˗kpan ˗an ˗bha bhë ˈnën ˗an ˗wɔn ˈgü ˈö kun ˗a ˈˈpiʋ̈ kö ˈö ꞊bhlëë ˗ya ö ˗bha.

6. Kwa ˗dho ˈto ˈˈkiö ˗nu ˗bha ˗desütɩtɩsü ˈwɔnzuan ˈˈpiʋ̈ ˗kɔ ˗kë ꞊dhɛ?

⁶ Kwa ˗dho ˈto ˈˈkiö ˗nu ˗bha ˗desütɩtɩsü ˈwɔnzuan ˈˈpiʋ̈ ˗kɔ ˗kë ꞊dhɛ? Kwa ˗de ˈpö, pë ˗nu ˈkwa ˗an kë ˗ni ˈgü Zoova ˗bha yö ˈgü bhë, kwa dua ˈyaa ˗mü kö ˈkwa kwa ˗de ˗gɔn ɛɛnˈˈ ˈkwa ˗mɛn ˗nu ˈˈɲan bɔ kwa ˗ta, ˗an ˗wɔn ˈgü. (1 Ko. 4:7) ˗Ya ˈgo mü, ˈkö ˗kë ꞊dhɛ kwa Zoova ˗dhɔkë ˗ni ˈgü ˗a yi ˗ya ꞊gwëë ɛɛnˈˈ yö ˈbha ˗nu ˗wo kwa ˗kɔ ˗ta, ˈkwa ˗dho zë ˗a ˗wɔn ˗dhɛ kö ˈkwa kë kwa ˗de ˈgü ˗tiaandhö mɛn ˈˈwɛɛ ˗nu ˗bha. Yö ˗nu ˗wo kë ˗ni ˈgü ꞊va kwa ˗kɔ ˗ta Zoova ˗bha ˗kɔlokota ˈgü, kwa dua ˗mü ꞊ʒiaan kö ˈkwa kwa ˗de ˈsü ˈˈtɩtɩ ˗an ˗wɔn ˈgü. (Luk. 9:48) ꞊Dhɛ ˈˈkiö ˗nu ˈdhö, kwa˗ ˈˈpiʋ̈ kö ˈkwa yökë mɛn ˈˈwɛɛ ˗nu ˗dhɛ. ˈˈKɛɛ ˈkwaa˗ ˈˈpiʋ̈ kö ˈkwa ˗an ˈˈɲan bɔ kwa ˗ta.

7. ˈKwa˗ pö ˈkwa ˗dhioo dɔ mɛn ˈbha ˗ta ɛɛnˈˈ ˈkwa˗ dɔɔˈˈ, ˗kɔ ˗mɛɛn ˈkwa dho ˗a ˗zɔn ˗a ˈka ꞊dhɛ kwa kwa ˗de ˗sü ˈˈtɩtɩ?

⁷ ˈKwa˗ pö ˈkwa ˗dhioo dɔ kwa ꞊dhegblü ˈbha ɛɛnˈˈ kwa ˗bha ˈnën ˗ta, kwa dua ˗mü kö ˈkwa˗ ˗zɔn ꞊dhɛ kwa kwa ˗de ˗sü ˈˈtɩtɩ. ˈˈTʋ̈ŋ ˈbha ˗nu ˈka, kwa ꞊mɔɔn˗ ˗bha ˈkwa ˗dhioo dɔ mɛn ˗ta vɛɛdhö. ˈˈKɛɛ ꞊dhɛ ˈˈkiö ˈö Zan ꞊dɔɔ bhë ˗a ˈdhö, kwa dua ˗mü ˈkwa ˗dhioo dɔ ˗kɔ ˗së kë kö ˈkwa ˗dho ˗a ˗mɛn ˈgü ga. Kwa ˈti˗ pö kwa ˗de ˗dhɛ ꞊dhɛ kwa ˗tiaandhö mɛn ˈˈwɛɛ ˗nu ˗bha, ˗yö ˗dho kwa ˗takun kö ˗dhioo ˈö go Biblö ˈgü ˈkwa˗ dɔ ˗an ˗ta ˗an ꞊bhlëë waa ˗dhɔkaadhe ˈgü.—Kol. 4:6.

MƐNBHƖƖDHE ˗NU ˗DHƆ ˗YÖ ˈˈKIÖ ˗NU ˗KË

8. (1) ˈKwa ˗dhɛ ˗ga Lukö 15:10 ˈgü, ˗kɔ ˗mɛɛn ˈö ˈˈkiö ˗nu ˗wa ˗zɔn ˗a ˈka ꞊dhɛ mɛnbhɩɩdhe ˗dhɔ ˗yö ˗wo ˗kë? (2) ˈˈKiö ˗nu ˗wo kwa ˗takun ˗kɔ ˗kë ꞊dhɛ ˗zlanwopösü ˗bha? (Kpɔɔˈˈ ˈzü bhë, ˗a ˗bha.)

⁸ ˈWɔn ˗nu ˈwo ˗gban kwa ˗bha bhë ˈˈkiö ˗nu ˗wo wo ˈˈtʋ̈ŋ ˗kë ˗an ˈgü, ˈyö sü ꞊dhɛ kwa ˗dhɔ ˗yö ˗an ˗kë. ˈWɔnyaakëmɛn ˗ya ˈgo ö ˗bha ꞊sɔnŋ yaa ˈgü ˗ya ö ꞊yɛɛ˗ kë Zoova ˈˈpiʋ̈ ɛɛnˈˈ mɛn ˈbha ˗ya ö ˗bha ˗tosɛta bho ˈˈgblʋʋ ˗ya nu gagade ˈgü, ˗an zuʋ̈ˈˈ ˈˈgblü ˗yö ˗dhi. (Lukö 15:10 ˗wö pö.) ˈˈKiö ˗nu ˗wo wo ˗de ˗nu ˈzü ˗zlanwopösü ˗dhɛ ꞊dedewo. (Dhɛ. 14:6) ˈKö ˗kë ꞊dhɛ ˈwaa ˗zlanwopö mɛn ˗nu ˗dhɛ vɛɛdhö, ˗wo ꞊mɔɔn˗ ˗bha ˈwo kwa ˗blü kö mɛn ˈbha ˈö˗ ˈˈpiʋ̈ kö ˈö Zoova dɔ, ˈkwa˗ ˗takun. ˈˈKɛɛ ˈkwaa ꞊mɔɔn˗ ˗bha kö ˈkwa˗ pö ꞊dedewo ꞊dhɛ mɛn ˈˈpɛpɛ ˈö ˈkwa ˗an ˗takun bhë, ˈˈkiö ˗nu ˈnën ˈwo yö kwa ˗dhɛ ˈˈdhiʋ̈. Zoova ꞊mɔɔn˗ ˗bha ˈzü ˈö bɔ pë ˈˈwɛɛ ˈbha ˗nu ˗ta. ˗A do ˈnën ˗tɔ ˗a ˗bha ˗zuu ˈˈslʋ̈ʋ̈slʋ̈. ˗Yö ꞊mɔɔn˗ ˗bha ˈö mɛn ˗nu ˗takun kö ˗wo ö dɔ, ɛɛnˈˈ ˈzü ˈö ˈˈdhiʋ̈sü ö ˗dhɔkëmɛn ˗nu ˈka kö ˗wo ˈdho mɛn ˗nu ˈˈpiʋ̈. (Këw. 16:​6, 7) ˗Yö ˗bɔ ˈˈkiö ˗nu ˗ta ˈö yö ꞊va ˗kë. ˈDhɛ ˈˈdhʋ̈ kwa nɔɔn˗ ˗së pö ˗ni ˈgü, ˈˈkiö ˗nu ˗wo kwa ˈˈpiʋ̈ kö ˈwo kwa ˗takun.—Kpɔɔˈˈ ˈkɔnën «Zoova ˗yö ˗an ˗bha bhɛɛwo ˗nu ˗daakë» ˗bha.b

9. Kwa ˗dho ˈto ˈˈkiö ˗nu ˗bha ˗dhɔ ˈwɔnzuan ˈˈpiʋ̈ ˗kɔ ˗kë ꞊dhɛ?

⁹ Kwa ˗dho ˈto ˈˈkiö ˗nu ˗bha ˈwɔnzuan ˈˈpiʋ̈ ˈkwa ˗dhɔ ˗zɔn mɛnbhɩɩdhe ˗nu ˗dhɛ ˗kɔ ˗kë ꞊dhɛ? ˈKwa˗ man ꞊dhɛ mɛn ˈbha ˗ya ö ꞊yɛɛ˗ kë Zoova ˈˈpiʋ̈, kwa zuʋ̈ˈˈ ˈˈgblü ˗yö ˗dhi ˈpö ꞊dhɛ ˈˈkiö ˗nu ˈdhö. ˗Kwa pë ˈˈpɛpɛ kë kö kwa ꞊dhegblü ˗ya ˈwɔn dɔ ꞊dhɛ ö ˗dhɔ ˗yö kwa ˗kë, ˈö kwa zuʋ̈ˈˈ gblü ˈdhö dhi ˗sü ˈka ˗a ˗bha Zoova ˗dhɔkë ˗sü ˗wɔn ˈgü ˈzü. (Luk. 15:​4-7; 2 Ko. 2:​6-8) Kwa ꞊mɔɔn˗ ˗bha ˈkwa ˈto ˈˈkiö ˗nu ˗bha ˈwɔnzuan ˈˈpiʋ̈ ˈkwa kwa ˈgü dɔ ˈˈgbɩɩ˗ kö ˈkwa ˗zlanwopö. (Eccl. 11:6) ˈˈKiö ˗nu ˗wo kwa ˗takun ˗ni ˈgü kö ˈkwa nɔɔn˗ ˗së pö, ˗yö ˗dho kë ˗së ˈpö kö ˈkwa kwa ꞊dhegblü ˗nu ˗takun ˗zlanwopösü ˗bha. ˗A ˈwɔnzuan ˈnën ˗tɔ mɛn ˈbha ˈö Zoova ˗bha ꞊Gbɛkiö ˈka ˈö˗ yi ˈti ꞊gwëë ꞊köŋ bhë, kwa ꞊mɔɔn˗ ˗bha ˈkwa˗ ˗takun ˗zlanwopösü ˗bha. Kwa ꞊mɔɔn˗ ˗bha ˈpö kö kwa ꞊dhegblü ˗nu ˈö ˗wa kë zii ɛɛnˈˈ ˈwo ꞊niɔɔnmɛn ˗nu ˈka, ˈkwa ˗an ˗takun ˗zlanwopösü ˗bha.

10. ˗Gleŋ ˗mɛɛn ˈkwa˗ sü Sadha ˗bha?

¹⁰ ˈWɔn ˗nu ˈwo kwa ˗ta ˗an ˗wɔn ˈgü, yö ˗nu ˈkwa˗ ˈˈpiʋ̈ ˗be kö ˈkwa ˗an kë Zoova ˗dhɛ kwa ˗kɔ ˈyaa ꞊mɔɔn˗ ˗bha ˈzü ꞊wɛ? Kwa ꞊mɔɔn˗ ˗bha ˈkwa ˗zlanwopö ˈˈkiö ˗nu ˈˈpiʋ̈ ˗kɔ ˈˈwɛɛ ˈgü. Kwa ꞊dhegblüdhe do ˈwo˗ ˗dhɛ Sadhac ˈö Ɛndö, ˗kwaa ˗bha ˈwɔnzuan ˗ga. ˗Dhɛ ˈö ˗kë ˗yödhiʋ̈ ˈka ˗kwɛ 20 ˈˈpiʋ̈, ˈˈyua ˗ya ˗kun ˈö ˈyaa kun ˗mɔn ˗ni ˈgü ˗a ˗bha kö ˈö luuˈˈ ˈˈshia˗. ˗A ˗wɔn ˈgü, ˗yö ˗kë ö ˗de ˈgü ˈya˗ ꞊dedewo. ˈˈKɛɛ ˗takundhe ˈö kwa ꞊dhegblü ˗nu ˗wa nu ˗a ˗dhɛ waa ˗a ˗bha Biblö ˗draan ö ˗de ˈˈpiʋ̈ ˗sü ˗wa ˗kë ˈö ˈwɔn yö ˗kɔ ˗së ˗yö ˗kë Sadha ˗gɔ. ˈKö ˗kë ˈˈdhʋ̈, ˗a dua ˗mü kö ˗yö ö ˗bha ˗zlanwopö ˗kɔ ˗bɛ ˈwɔn ˈö kun ˗a ˗ta bhë ˗a ˗bha. ˈDhɛ ˗kë ꞊dhɛ ˈyaa kun ˗mɔn ˗ni ˈgü ˗a ˗bha kö ˈö ˈˈɲaannu ˈö ˈsëëdhɛ bɔ mɛn ˗nu ˗dhɛ bhë, ˗yö ˗zlanwopö telefɔnö ˈka. ˗Ya ˈgo mü, ˗yö ˗womɛndhɛsü ꞊dɛɛ ˗kë telefɔnö ˈka, ˈö bɔ ˗a ˗ta ˈzü ˈö mɛn ꞊dɛɛ ˗nu ꞊slɔɔ. ˈWɔn ˗së ˗mɛɛn ˈö go ˗a ˈgü? ˗Dhɛ ˈö ˈˈsu ˈbha ˗yö ˗ʒiö, ˗a ˗bha ꞊klaŋnën ˗nu ˗wo ˗da 70 ˈgü. Sadha ˗kɔ ˈti ˗mɔn ˗an ꞊gban ꞊klaŋkë Biblö ˈka ˗sü ˗bha. ˗A ˗wɔn ˈgü, ˗ya mɛn ˈbha ˗nu ˗nu kwa ꞊dhegblü ˗nu ˗dhɛ. ꞊Dɛɛ, ˗a ˗bha Biblö ꞊klaŋnën ꞊vadhɛ ˗wo ˗nu ˗bhɔkwëë ˗nu ˗ta. Kwa ꞊dhegblü ˗nu ˈwo pë ˈˈpɛpɛ kë ˗ni ˈgü kö ˈwo ˗zlanwopö bhë, yökë ˗an ˈˈpiʋ̈ ˗sü ˗yö ˈˈkiö ˗nu zuʋ̈ˈˈ ˈˈgblü ˗dhi ꞊dedewo.

ˈˈKIÖ ˗NU ˗WO ˈWƆN ˈˈGBƖƖ˗ ˗NU ˗KUN WO ˗BHA

11. ˈˈKiö ˗nu ˈwo ˗klu Zoova ˗bha bhë ˗wa ˗zɔn ꞊dhɛ wo ˈwɔn ˈˈgbɩɩ˗ ˗kun wo ˗bha ꞊dedewo ˗kɔ ˗kë ꞊dhɛ?

¹¹ ˈˈKiö ˗nu ˗wo ˈwɔn ˈˈgbɩɩ˗ ˗kun ö ˗bha ˗sü ˈwɔnzuan ˗së ˈka. ˗Kwɛ ˈˈgblü ꞊va ˈˈpiʋ̈, ˗wo ˈwɔn ˗nu ˈö ˈwaa kpɛnŋdhö waa ˈwɔn yaa ˗nu ˗an ˗kun wo ˗bha. ˗Wo Sɔtraan waa ˈˈkiö ꞊vadhɛ ˈö waa˗ ˗nu ˈwo Zoova ˗dhɔkë ˗wo ˈkwëë˗ bhë ˗an ˗yö kö ˗wa ˗gban ˗a ˗gɔ. (ˈWun. 3:1; 6:​1, 2; Zud. 6) Biblö ˗yö ˈˈkiö do ˈö ˗klu ˗Zlan ˗bha waa ˗zuu yaa ˈˈpiigbɩɩsü do ˗an ˗bha ˈkozësü ˗wɔn ˗blɛɛ. (Dan. 10:13) ˈÖ bhɔ ˈˈdhʋ̈ ꞊kwɛŋzü, mɛn ˗nu ˈwo ˗wɩ Zoova ˗dhɔkësü ˗bha ˈö ˈˈkiö ˗nu ˗wo ˗kpan ˗an ˗bha ˈwaa ꞊va. ˈKö ˗kë ˈˈdhʋ̈, ˈˈkiö ˗nu ˗wo Zoova ˗dhɔkë wo ꞊sɔbhɛɛ ˈka zuʋ̈gblüdhi ˈgü. ˗Wa ˈwɔn ˗dɔ ꞊dhɛ ˗Zlan ˗dho ˈwɔn ˗nu ˈö ˈwaa kpɛnŋdhö bhë ˗an ꞊gban bho ˈˈshia˗ ö ˈˈtʋ̈ŋ ˗së ˗bha.

12. ˈMën dho kwa ˗takun kö ˈkwa ˈwɔn ˈˈgbɩɩ˗ ˗nu ˈkun kwa ˗bha?

¹² Kwa ˗dho ˈto ˈˈkiö ˗nu ˗bha ˈwɔn ˈˈgbɩɩ˗ ˗kun wo ˗bha ˗sü ˈwɔnzuan ˈˈpiʋ̈ ˗kɔ ˗kë ꞊dhɛ? ꞊Dhɛ ˈˈkiö ˗nu ˈdhö, ˈwɔn ˗nu ˈö ˈwaa kpɛnŋdhö ɛɛnˈˈ mɛn ˗nu ˈwo ˗gban kwa ˗gɔ, kwa ˗kpan ˗an ˗bha. ˈˈKɛɛ ˗yö ga ˗sü ˈka kwa ˈgü ˈpö ꞊dhɛ Zoova ˗dho ˈwɔn yaa ˈˈpɛpɛ bho ˈˈshia˗ ö ˈˈtʋ̈ŋ ˗së ˗bha. ˗A ˗wɔn ˈgü, «kwa ˈgü ˈya ˈdho ga ˈwɔn ˗së kë ˗sü ˈka» ꞊dhɛ ˈˈkiö ˗nu ˈdhö. (Ga. 6:9) ˗Ya ˈgo mü, ˗Zlan ˗ya ˗pö kwa ˗dhɛ ꞊dhɛ ö ˗dho kwa ˗takun kö ˈkwa ˈwɔn ˈˈgbɩɩ˗ ˗nu ˈkun kwa ˗bha. (1 Ko. 10:13) ˗Kwaa pö Zoova ˗dhɛ ꞊dhɛ ˗yö kwa gba ö ˗bha ˗zuu ˈˈslʋ̈ʋ̈slʋ̈ ˈö dho kwa zuʋ̈ˈˈ kë ˗saa, kö ˗yö kwa zuʋ̈ˈˈ ˈˈgblü dhi bhë ˗a ˈka. (Ga. 5:22; Kol. 1:11) ˈˈKɛɛ mɛn ˗nu ˗wa ˗gban kwa ˗gɔ, ˈmën ˈkwa dho ˗a kë? ˈˈSuʋ̈ ˈya ˗dho kwa kë, ˗kwa ˈdhaŋ˗ bho Zoova ˈˈdhiʋ̈ ˈyö sü ꞊dhɛ ˗yö ˗dho kwa ˗takun ˗kplawo ˈö kwa ˈgü ˗yö ˗kë ˈˈgbɩɩ˗.—Ebl. 13:6.

ˈˈKIÖ ˗NU ˗WO ˗ZLANWOKƆDHI ˗KË ˈˈSLƲ̈Ʋ̈SLƲ̈

13. Yö ˗detasü ˗mɛɛn ˈö ˈˈkiö ˗nu ˗kɔ ˈka ˈˈtʋ̈ŋ ˗totaabhasü ˈö yö ˗a ˈgü? (Matiö 13:​47-49)

¹³ ˈˈTʋ̈ŋ ˗totaabhasü ˈö yö ˗a ˈgü, Zoova ˗yö yö ˗detasü dɔ ˗sü ˈka ˈˈkiö ˗nu ˗kɔ ˈka. (Matiö 13:​47-49 ˗wo pö.) Mɛn ˈˈmliɲɔn ꞊va ˈwo go ˈˈkpɔnŋtaadhɛ ˗todhʋ̈sü ˈgü bhë, ˗wo ˗wɩ ˗nɔɔn ˗së ˗bha. ˗A mɛn ˈbha ˗nu ˗wo pë ˈˈpɛpɛ ˗kë kö ˈwo kë kletiɛn ꞊dede ˗nu ˈka. ˈˈKɛɛ ˈyö˗ mɛn ˈbha ˗nu ˗de ˈpö ˈwaa ˈˈwɩ ˗a ˗bha. Zoova ˗ya ˗pö ˈˈkiö ˗nu ˗dhɛ ꞊dhɛ ˗wo «ˈwɔnyaakëmɛn ˗nu waa ˈwɔnsëkëmɛn ˗nu bho ˈko ˈˈpiʋ̈.» ˗A ˗gɛn ˈnen ˗tɔ ˗an dua ˗mü kö ˗wo ˗zlanwokɔdhi kë ˈˈslʋ̈ʋ̈slʋ̈. ˈˈKɛɛ ˗a ˗gɛn ˈyaa ˈnën ˗tɔ ꞊dhɛ ˗wa mɛn ˈbha bho kwa ˈˈpiʋ̈ ˈwɔn suu ˈˈoo ˗su ˗wɔn ˈgü, ˗yö ˈti ˗dho ö ꞊yɛɛ˗ kë ˈzü ɛɛnˈˈ ˈwɔn ˈˈgbɩɩ˗ ˈbha ˈti ˗dho ˗da kwa ˗bha ˗zlanwokɔdhi ˈgü. ˈKö ˗kë ˈˈdhʋ̈, ˗yö ga kwa ˈgü ꞊dhɛ ˈˈkiö ˗nu ˗wo yö ˈˈgbɩɩ˗ kë ˗ni ˈgü kö kwa ˗bha ˗zlanwokɔdhi ˗yö ˈto ˈˈslʋ̈ʋ̈slʋ̈.

14-15. Kwa ˗dho ˈto ˈˈkiö ˗nu ˗bha ˈwɔnzuan ˈˈpiʋ̈ ˗kɔ ˗kë ꞊dhɛ kö ˈkwa kwa ˗bha ˗zlanwokɔdhi kë ˈˈslʋ̈ʋ̈slʋ̈? (Kpɔɔˈˈ ˈzü pë ˈˈbin ˗nu ˗bha.)

¹⁴ Kwa ˗dho ˈto ˈˈkiö ˗nu ˗bha ˗zlanwokɔdhi ˗kë ˈˈslʋ̈ʋ̈slʋ̈ ˗sü ˈwɔnzuan ˈˈpiʋ̈ ˗kɔ ˗kë ꞊dhɛ? Kwa ˗dho ˗a kë ˈˈdhʋ̈ ˗zlanwokɔdhigümɛn ˗nu ˗takun ˗sü ˈka kö ˗an ˈˈtakɔ waa ˗an ˗bha ˗Zlan ˗dhɔkë ˗kɔ ˗wo kë ˈˈslʋ̈ʋ̈slʋ̈. ˈKwa˗ pö ˗yö kë ˈˈdhʋ̈, kwa dua ˗mü kö ˈkwa kwa ˗zokë kwa zuʋ̈ga ˈˈpiʋ̈ ˗nënŋ mɛn yaa ˗bha ˗sü waa pë ˗nu ˈwo dho ˗dhii ˗ya kwa ˗bha, ˗an ˗gɔ. (Ps. 101:3) Kwa dua ˗mü ˈzü kö ˈkwa kwa ꞊dhegblü ˗nu ˗takun ˗wo ˈto ˗klu ˗sü ˈka Zoova ˗bha. ˗A ˈwɔnzuan do ꞊nɛn: ˈKwa˗ man ꞊dhɛ kwa ꞊dhegblü do ˗ya ˈwɔn yaa ꞊gbɔɔnsü kë, ˈmën ˈkwa dho ˗a kë? ˈDhɛ ˗kë ꞊dhɛ ˗a ˗dhɔ ˗yö kwa ˗kë bhë, kwa dua ˗mü kö ˈkwa˗ pö ˗a ˗dhɛ ˗ya blɛɛˈˈ mɛn zii ˗nu ˗dhɛ. ˗Yö ˈti ˈˈwɩ ˗a ˗kë ˈˈdhʋ̈ ˗sü ˗bha, kwa ꞊dede ˗kwaa blɛɛˈˈ mɛn zii ˗nu ˗dhɛ. Kwa˗ ˈˈpiʋ̈ kö kwa ꞊dhegblü ˈö ˈwɔn yaa ˗kë bhë, waa Zoova ˗an ˗bha ˈˈtɔŋdhɛ ˗yö kë ˗së ˈˈvaandhö.—Zak. 5:​14, 15.

¹⁵ ˗A ˗wëëwɔn ˈö mü ˈyö ˗tɔ mɛn ˈbha ˗nu ˈwo ˈwɔn yaa ꞊gbɔɔnsü ˗kë, ˗wo ˗an ˗bho kwa ˈˈpiʋ̈. ˗Kwa ‹˗naan ˗da› mɛn suu ˗nu ˈwo ˈˈdhʋ̈ kwaa˗ ˗nu ˈkwa ꞊zinŋgü.d (1 Ko. 5:​9-13) ˈTɔŋ˗ ˈö bhë ˗yö kwa ˗takun ˈö kwa ˗bha ˗zlanwokɔdhi ˗yö to ˈˈslʋ̈ʋ̈slʋ̈. ˗Ya ˈgo mü, ˈkwa ˈˈkan mɛn ˗nu ˈö ꞊waa ˗an ˗bho kwa ˈˈpiʋ̈ ˗an ˗bha, kö ˈkwa˗ ˗zɔn ˗an ˗dhɛ ꞊dhɛ ˗an ˗dhɔ ˗yö kwa ˗kë. ˗Yö ꞊mɔɔn˗ ˗bha ˈö ˗an ˗blü ˈwo˗ ˈwɔn dɔ ꞊dhɛ wo dua ˗mü kö ˗wo wo ꞊yɛɛ˗ kë Zoova ˈˈpiʋ̈. ꞊Waa˗ kë ˈˈdhʋ̈, Zoova waa ö ˗bha ˈˈkiö ˗nu ˗an zuʋ̈ˈˈ ˈˈgblü ˗yö ˗dhi, ˈö kwa ˗de ˈpö kwa zuʋ̈ˈˈ ꞊nii ˗yö ˗da.—Luk. 15:7.

16. Kwa ˗dho kwa ˈgü dɔ ˈˈgbɩɩ˗ kö ˈkwa ˈto ˈˈkiö ˗nu ˗bha ˈwɔnzuan ˈˈpiʋ̈ ˗kɔ ˗kë ꞊dhɛ?

¹⁶ ˗A kë ˗sü kö ˈwɔn ˈö ˗gban ˈˈkiö ˗nu ˗bha Zoova ˗ya blɛɛˈˈ kwa ˗dhɛ, kö kwaa˗ ˗nu kwa yökë kwa ˈkwëë˗ bhë ꞊bhlëëwɔn ˈkpii˗ ꞊dede ˗mü kwa ˗bha ˈka. ˈDhɛ ˈˈdhʋ̈, kwa ˈto ˗an ˗bha ˈˈklʋ̈ʋ̈së ˗nu ˈˈpiʋ̈. ˈˈKlʋ̈ʋ̈së ˗nu ˈwo ˈˈdhʋ̈ ˈnën ˈwo ˗tɔ ˗desütɩtɩsü, mɛnbhɩɩdhe ˗nu ˗dhɔ, ˈwɔn ˈˈgbɩɩ˗ ˗kun ö ˗bha ˗sü waa ˗zlanwokɔdhi ˗kë ˈˈslʋ̈ʋ̈slʋ̈ ˗sü. ˈKwa ˈto ˈˈkiö ˗nu ˗bha ˈwɔnzuan ˈˈpiʋ̈, kwa ˗de ˈpö kwa ˗dho kë Zoova ˗bha ˈkɔdhigümɛn ˗nu ˈwo˗ ˗dhɔkë ˗toëpö ˈka ˗an ˈˈpiʋ̈.