Rusimɛn ˗nu ˗wa ˈsɔ Üklɛnö ˗dhɛ ˗ta

˗Kwɛ 2022 Fevlie ˈˈsu 24 dhiapiʋ̈ ˈka, ˈyö Rusi ˗bha ˈˈsɔdha ˗nu ˗wo sɔ Üklɛnömɛn ˗nu ˗ta ˈˈkɛɛ kö ˈˈsɛkɔɔnmɛn ꞊vadhɛ ˗wa ˗pö ˈwa ˈdho ˗a kë ˈˈdhʋ̈. ˗Gblü ˈwo˗ ˈˈpiʋ̈ kö ˗wa ˗gɔn bhë ˗dho ˈˈyɛ ˗kɔ ˗kë ꞊dhɛ ˈˈkpɔnŋtaadhɛ ˗todhʋ̈sü ˗bha? Pë ˈö ONU ˗gɔdhiʋ̈mɛn do ˈwo˗ ˗dhɛ Antonio Guterɛsö ˗ya pö ˈö˗ yi ˈyii ꞊gwëë ꞊köŋ, yö ꞊nɛɛn. ˗Ya ˗pö: «ˈYa yi ˗zota, yi˗ ˗yö ꞊dhɛ ˗gblü ˈö bhë ˗dho mɛnbhɩɩdhe ˗nu ˗da saanˈˈ ˈgü ˈö ˗dhikodhɛ ˈtɔŋ˗ ˗nu ˈwo ˈˈsɛ ˗nu ˈwo Ödhɔpö waa˗ ˗dhɛ ˗nu ˈwo ˈˈkpɔnŋtaadhɛ ˗todhʋ̈sü ˈgü ˗an ꞊zinŋ ˈgü bhë, ˗a shiʋ̈ˈˈ ꞊dedewo.»

Biblö ˗ya ˗pö ˈwɔn suu ˗nu ˈwo bhë ˗an ˗gɛn ˈnën ˗tɔ ˗mën?

• Yesu ˗yö ˈˈtʋ̈ŋ ˈbha ˈö «ˈˈsɛgɔ ˈbha˗ ˗dho ˈˈwlü ˈö ˗pö ˈˈsɛgɔ ˈbha ˗ta ˈö ˈwo ˗gblü gɔɔn, ˈö ˗gblüdë ˈbha ˗yö ꞊wlü ˈö dho ˈö ˗gblü ˗da ˗gblüdë ˈbha ˗ta» ˗a ˗to ˈˈdhiʋ̈ ˈö˗ ˗wɔn ꞊blɛɛ. (Matiö 24:7) ˗Bhö ˈwɔn ˗gɔ « Quel est le signe des ‹derniers jours› ? » ˗wo pö kö ˗kɔ ˈö Biblö ˗ya ˗zɔn ˈka ꞊dhɛ ˗gblü ˗nu ˈwo kë ˗ni ˈgü ˈˈtʋ̈ŋ yö˗ ˈgü bhë ˗wa ˗zɔn ꞊dhɛ pë ˈö Yesu ˗ya pö ˈnën kë ˗ni ˈgü, kö ˈü˗ yö.

• ˗Dhɛkpaɔ dhiaˈˈ ˈsëëdhɛ ˗yö ˗gblü ˗zɔn mɛn ˈbha ˈö ˗ya ˗sü ˈka «꞊soo ˗zaɔndhö» do ˗ta, ˈö ˈwo˗ gba ˗sü ˈka «˗gblü ˗da ˗faan ˈka kö ˗ya ˗da ˈˈkpʋng ꞊taa, kö mɛ ˈˈbhɩɩ˗ ˗nu ˗wo wo ˈko zë» ˗a ˈka. (˗Dhɛkpaɔ dhiaˈˈ ˈsëëdhɛ 6:4) ˗Bhö ˈwɔn ˗gɔ « Les cavaliers de l’Apocalypse : qui sont˗ils ? » ˗wo pö kö ˗kɔ ˈö Biblö ˈˈɲan bhë ˈö ˗gban ˗a ˈka ˗gblü ˗nu ˈwo ꞊dɛɛ ˗an ˗bha, ˈü˗ yö.

• Daniel ˗bha ˈsëëdhɛ ˗be ˗ya ˗to ˈˈdhiʋ̈ ˈö˗ pö ꞊dhɛ ˗dhinaan ˗dho kë «˗gblüdë ˈö ˈˈdhuŋ ꞊ʒiaan» waa «˗gblüdë ˈö ˈˈshiaŋ ꞊ʒiaan» ˗an ꞊zinŋ ˈgü. (Daniel 11:25-45) Bhö video ˗Une prophétie qui s’accomplit : Daniel chapitre 11 ˗ga kö ˈpë ˗kë ˈkwa ꞊mɔɔn˗ ˗bha ˈkwa˗ pö ꞊dhɛ Rusi waa ˈˈsɛ ˗nu ˈwo bɔ ˗a ˈka ˈnën ˈwo ˗tɔ ˗gblüdë ˈö ˈˈdhuŋ ꞊ʒiaan, ˈü˗ yö.a

• ˗Dhɛkpaɔ dhiaˈˈ ˈsëëdhɛ ˗yö «˗glu ˈö dho kë ˗Zlan ˈpiigbeezë ˗bha yi ꞊va ˈka» bhë ˗a ˗wɔn ˗blɛɛ ˈpö. (˗Dhɛkpaɔ dhiaˈˈ ˈsëëdhɛ 16:14, 16, NTBL) ˈˈKɛɛ ˗gblü ˈö bhë, ˈyaa ˗gblü ˈö dho kë ˈˈsɛgɔ ˗nu ꞊zinŋ ˈgü ˗a ˈka ꞊dhɛ ˗kɔ ˈö ˈkwa ˈˈɲan ˈdhö ˗a ˗bha ꞊dɛɛ ˗a ˈdhö. ˗Bhö ˈwɔn ˗gɔ « Qu’est-ce que la bataille d’Armaguédon ? » ˗wo pö kö ˈwɔn ˈö ˗gban ˗gblü ˈö bhë ˗a ˗bha, ˈü˗ ˈbha dɔ.

ˈMën ˗kë ˈkwa ꞊mɔɔn˗ ˗bha ˈkwa kwa ˗zoyö ˗dhɛkpaɔ dhiʋ̈ˈˈ ˗së ˗dhɛ?

• Biblö ˗ya ˗pö ˗Zlan ˗dho «˗gblü ɲën ˈˈsɛ ˗todhʋ̈sü ˗ta.» (Psaume 46:9) ˗Bhö ˈwɔn ˗gɔ «Une espérance réelle pour des jours meilleurs » ˗wo pö kö ˗dhɛkpaɔ dhiʋ̈ˈˈ ˗së ˈö ˗Zlan ˈö˗ ˈˈplüün bho ˗sü ˈka kwa ˗dhɛ ˈü˗ dɔ.

• Yesu ˗ya ˗pö ö ˗bha gwëëˈˈ ˗nu ˗wo bhɛɛˈˈ kö ˗Zlan ˗bha ˗Gblüdëdhɛ ˗yö nu. (Matiö 6:9, 10) ˗Zlan ˗bha ˗Gblüdëdhɛ ˈnën ˗tɔ mɛnkɔɔnsü ˈö dhaŋ˗ ˈgü, ˈö ˗dho ˗a kë kö ˗Zlan dhɔɔbhaawɔn ˗yö kë ˈˈkpɔnŋ ꞊taa. ˈSa ˗Zlan dhɔɔbhaawɔn do ˈnën ˗tɔ kö ˈˈsɛ ˗todhʋ̈sü ˗yö ˈwaannu. ˈWɔn ˗së ˈö ˗Zlan ˗bha ˗Gblüdëdhɛ ˗dho ˗a kë ü ˗dhɛ ˈü˗ ˈˈpiʋ̈ ˈü˗ dɔ, ˗bhö video ˗Mën ˈö ˗tɔ ˗Zlan ˗bha ˗Gblüdëdhɛ? ˗ga.

Zoova ˗bha ꞊Gbɛkiö ˗nu ˈwo ʒiö mɛn 129. 000 ˗ta ˈnën ˈwo Üklɛnö. ꞊Dhɛ Yesu waa Zoova ˗bha ꞊Gbɛkiö ˗nu ˈwo ˈˈkpɔnŋtaadhɛ ˗todhʋ̈sü ˈgü ˗an ˈdhö, ˈwaa wo ˗kɔ ˗da ˈˈsɛkɔɔwɔn ˗nu ˈgü. ꞊Ya ˈgo mü ˈzü ˈwaa ˗gblü gɔn. (Zan 18:36) Zoova ˗bha ꞊Gbɛkiö ˗nu ˗wo «ˈwɔn ˗taɔng ˗së ˈö ˗gban ˗Zlan ˗bha ˗gblüdëdhɛ ˗wɔn ˗bha» ˗a ˗dhiaŋ ˗zë ˈˈsɛ ꞊gban ˈˈpɛpɛ ˈgü, ˗a pö ˗sü ˈka ꞊dhɛ ˗Zlan ˗bha ˗Gblüdëdhɛ dosɛnŋ ꞊nën ˗dho ˈwɔn ˈˈgbɩɩ˗ ˗nu ˈwo ˈˈkpɔnŋ ꞊taa waa ˗gblü ˗nu ɲën. (Matiö 24:14) ˈÜ˗ ˈˈpiʋ̈ kö nɔɔn˗ ˗së ˈö Biblö ˈgü bhë ˈü˗ ˈbhaa ˈgüman, ü ꞊mɔɔn˗ ˗bha ˈü yö yi ˗bha.