˗KA ˗YA KA ˈˈYAAN!

˗Zlanwo ˗nu waa ˗gblü ˈö Üklɛnö: ˈMën ˈö Biblö ˗ya pö ˈö ˗gban ˗a ˗bha?

˗Bhö ˈwɔn ˈbha ˗nu ˈwo ˗gban ˗zlanwogɔdhiʋ̈mɛn ˈkpii˗ ˗nu waa ˗gblü ˈö Üklɛnö ˗an ˗bha, ˗an ga:

«Rusimɛn ˗nu ˗bha ˗zlanwo ˈwo˗ Ɔɔtodɔsö ˗kë bhë, ˗a ˗gɔdhiʋ̈mɛn Patriashö Kirilö ˈyii˗ pö ꞊dhɛ sɔ ˈö Rusi ˗bha ˈˈsɔdha ˗nu ˗wa wo Üklɛnömɛn ˗nu ˗ta bhë, ˗wa ˗kë ˈya˗. [...] ˗A ˗bha ˗zlanwogümɛn ˗nu ˗wo ꞊suasuawo ˗nu ˈwo ˗gban Üklɛnö ˗dhɛ ˗bha ˗a ˗pɛn ˗ni ˈgü ˗kplawo. ꞊Suawo ˗nu ˈwo bhë Putinö ˗bɔ ˗an ˗ta ˈö˗ pö ˗gblü ˈwo˗ gɔn ˗ni ˈgü Üklɛnö bhë, ˗yö ˗së.»—˗Kwɛ 2022 Masö ˈˈsu 7, EUobserver.
«Patriashö Kirilö [...] ˗ya ˗zɔn ˗sü ˈka ö ꞊faan ˈka ꞊dhɛ ˗sɔ ˈö Rusi ˗bha ˈˈsɔdha ˗nu ˗wa wo Üklɛnömɛn ˗nu ˗ta bhë ˗wa ˗kë ˗së. ˗Ya ˗pö ꞊dhɛ ˗gblü ˈö bhë ˈkozë ˈwɔn yaa ˈka ˗sü ꞊dede ˗mü.»—˗Kwɛ 2022 Masö ˈˈsu 8, AP News.
«Üklɛnömɛn ˗nu ˗de ˈpö ˗an ˗bha ˗zlanwo Ɔɔtodɔsö do ˈö bhë, ˗a ˗gɔdhiʋ̈mɛn ˈwo˗ ˗dhɛ Metropolitö Epifanö ˈö Kiɛvö bhë, ˗yö ˈdhuëë˗ ˗kpɔ ˗a ˗bha ˈˈsɛgümɛn ˗nu ˗bha ˗Tɛɛdhooyi ˈka ˈö˗ pö ˗an ˗dhɛ ꞊dhɛ ˗wo ‹ˈkozë Rusi ˗bha ˈˈsɔdha ˗nu ˈwo sɔ ˗an ˗ta bhë, ˗an ˈka.› [...] ˗Ya ˗pö ˈpö ꞊dhɛ Rusi ˗bha ˈˈsɔdha ˗nu zë ˗sü ˈyaa ˈwɔn yaa ˈka.»—˗Kwɛ 2022 Masö ˈˈsu 16, Jerusalem Post.
«Yi [Üklɛnömɛn ˗nu ˗bha ˗zlanwo ˗nu ˗lokotasü waa˗ ˗kɔlokota ˗nu (UCCRO)] yi ˗kɔ ˗yö kwa ˗bha ˈˈsɔdha ˗nu waa mɛn ˈˈpɛpɛ ˈwo kwa ˗takozë ˗ni ˈgü bhë ˗an ˗gɔ. Yi ˈdhuëë˗ ˗kpɔ mɛn ˈˈpɛpɛ ˈwo wo ˈgü dɔ ˗ni ˈgü ˈˈgbɩɩ˗ kö ˗wo ˈko zë kwa ˈyɔɔ˗ ˗nu ˈka kë ˈˈdhʋ̈ kö ˈwa ˈdho Üklɛnö ˗dhɛ ˈsü bhë ˗an ˗bha, ˈö yi ˗bhɛɛ ˗an ˗bhaa ˈka.»—˗Kwɛ 2022 Fevlie ˈˈsu 24, UCCROa ˗mɛn ˗nu ˗wo.

Ü ü ˗bhaa ˗pö ˗a ˈgü mü ꞊dhɛ? ˗Zlanwo ˗nu ˈö ˗an ˈgümɛn ˗nu ˈwo˗ pö ˗wo ˗ʒiö Yesu Klito ꞊keŋ˗ bhë, ˗an dua ˗mü kö ˗wo mɛn ˗nu ꞊faan ˈmën ˗gblü gɔn ˗sü ˗bha ˗ee? ˈMën Biblö ˗ya pö ˈö ˗gban ˗a ˗bha?

˗Zlanwo ˗nu ˗bha wo ˗kɔ ˗da ˗gblü ˈgü ˗sü: ˗A ˈgodhɛ

˗Kwɛzlan ˗nu ˗wa ˗zɔn ꞊dhɛ ˗zlanwo ˗nu ˗wa pö ꞊shiöŋ ꞊dhɛ ˗dho ˗gblü ˈˈpiʋ̈ ˗sü ˈyaa ˈya˗, ˗a ˗gɔn ˗sü ˗yö ˗së ˈˈkɛɛ ˈsa wo do ˈwo bhë ˗wa ˗pö ꞊dhɛ ˗dhikodhɛ ˈnën ˈwo˗ ꞊keŋ˗. Zoova ˗bha ꞊Gbɛkiö ˗nu ˗wo mɛn ˗nu ˗takun ˗a yi ꞊ya ꞊gwëë kö ˗wa ˈwɔn dɔ ꞊dhɛ ˗zlanwo ˗nu ˈwo ˈˈdhʋ̈ ˗an ˈˈgblʋ̈ʋ̈dhɛ ꞊gblɛɛn. ˈPë ˈö yi ˗bha ˈsëëdhɛ ˗nu ˈwo˗ pö ˗a ˈwɔnzuan ˈbhaa ˗nu ꞊nɛn:

« Les croisades : une “illusion tragique” » ˗ya ˗zɔn ꞊dhɛ Wlɔmömɛn ˗nu ˗bha eglizö Katolikö ˗kɔ ˗yö mɛn ˗nu ꞊va ꞊dede ˈwo ˗an zë ˗Zlan waa Klito ˗an ˈtɔ ˈgü bhë, ˗a ˈgü.
« L’Église catholique en Afrique » ˗ya ˗zɔn ꞊dhɛ ˗zlanwo ˗nu ˈwii ꞊mɔɔn˗ ˗bha kö ˗wo ˗gblü ˈö ˗da ˗wo ˗nu ꞊zinŋ ˈgü waa mɛn zë ˗sü ˗nu ˈduaannu.
ˈWɔn ˗gɔ ˗nu « La religion est-elle responsable ? », « Le rôle de la religion dans les guerres » waa « La religion prend parti » ˗wa ˗zɔn ꞊dhɛ eglizö Katolikö, Ɔɔtodɔsö waa Plotɛstan ˗nu ˗wo wo zü ˗bɔ ꞊kanŋ ꞊gban ꞊plɛ ˈka ˗gblü ꞊vadhɛ ˈgü.

Kletiɛn ˗nu dua ˗mü kö ˗wo wo ˗kɔ ˗da ˗gblü ˈgü ˗ee?

ˈPë Yesu ˗ya pö: «I këyɔɔ ˗dhɔ˗yö i kë ꞊dhɛ ˗kɔˈö i ˗dɩ ˗dhɔ˗yö i ˗dɩ kë˗ ˈka bha˗ ˈdhö.» (Matiö 22:39) «Ka ˈyaɔ˗ ˗nu ˗dhɔ ˗yö ka kë»—Matiö 5:44-47.

˗Bhö ü ˗zota: ˗Zlanwo ˈbha ꞊mɔɔn˗ ˗bha ˈö˗ pö ˗yö Yesu ˗bha ˈtɔŋ˗ ˗nu ˈwo bhë ˗an ˗kun ˈˈkɛɛ kö ˗ya ˈgümɛn ˗nu ꞊faan ˗dɔ mɛn ˈˈwɛɛ ˗nu zë ˗sü ˗bha ˗gblü ˈˈpiʋ̈ ˗ee? ˈÜ˗ ˈˈpiʋ̈ ˈü˗ ˗yɔ dɔ, ˗bhö ˈwɔn ˗gɔ ˗nu « Les vrais chrétiens et la guerre » waa « Est-il possible d’aimer ses ennemis ? » ˗wo pö.

ˈPë Yesu ˗ya pö: «Ma ˗gblüdëdhɛ ˈyaa ˈˈkpʋng ꞊taa yö. ꞊Ya kë ˈnu ꞊dhɛ ma ˗gblüdëdhɛ ˗yö ˈˈkpʋng ꞊taa yö kö ma gwëëzë ˗nu ˗dho n ta ˗gblü gɔɔn ˈnu ˈö [mɛn ˗nu] ˗kɔ ˈyaa ꞊mɔɔ n ˗bha.» (Zan 18:36) «Mɛ ˈˈʋʋ mɛ ˈö dho ˗piö ˈsi mɛ ˈˈpiʋ̈, ˗a ˗mɛ ˗dho ˈto ˗piö ꞊në˗ ˗gɔ.»—Matiö 26:47-52.

˗Bhö ü˗zota: ꞊Ya kë ꞊dhɛ Kletiɛn ˗nu dua ˈyaa ˗mü kö ˗wo ˗gblü gɔn kö ˗wo wo ˗kɔ kpa Yesu ˗ta, ˗an dua ˗mü kö ˗wo ˗gblü gɔn ˈwɔn ˈˈwɛɛ ˗wɔn ˈgü ˗ee? ˗Bhö ˈwɔn ˗gɔ « Peut-on concilier guerre et christianisme ? » ˗wo pö kö ˗kɔ ˈö Kletiɛn ˗blɛɛsü ˗nu ˗wo to ˗a ˈka Yesu ˗bha ˈwɔnzuan waa˗ ˗bha ꞊klaŋwo ˗nu ˈˈpiʋ̈ kö ˈü˗ dɔ.

ˈMën ˗dho kë ˗zlanwo ˗nu ˈwo˗ pö ˗gblü gɔn ˗sü ˗yö ˗së bhë, ˗an ˈka?

Biblö ˗ya ˗pö ꞊dhɛ ˗Zlan ˗dho ˗a pö ˈyaa ˗zlanwo ˗nu ˈwo˗ pö ꞊dhɛ wo Yesu ˗bhaa ˈka ˈˈkɛɛ kö ˈwaa to ˗a ˗bha ꞊klaŋwo ˗nu ˈˈpiʋ̈ bhë, ˗an dɔ.—Matiö 7:21-23; Titö 1:16.

˗Dhɛkpaɔ dhiaˈˈ ˗bha ˈsëëdhɛ ˗ya ˗zɔn ꞊dhɛ ˗Zlan ˈˈɲan ˈˈdhiʋ̈ ˗zlanwo ˗nu ˈwo bhë, wo ꞊nën ˈwo «mɛ ˈˈpɛpɛ ˈwo˗ ˗nu zë» bhë, ˗an zë. (˗Dhɛkpaɔ dhiaˈˈ ˈsëëdhɛ 18:21, 24) ˈPë ˗kë ˈö˗ pö ˈˈdhʋ̈ ˈbha˗ pö ˈü˗ dɔ, ˗bhö ˈwɔn ˗gɔ « Qu’est-ce que Babylone la Grande ? » ˗wo pö.
Yesu ˗ya ˗pö ꞊dhɛ ˗zlanwo ˗nu ˈö ˗Zlan dho ˗a pö ˈyaa ˗an dɔ bhë, ˗an ˈgü ˗dho shiʋ̈ˈˈ ˗an këwɔn yaa ˗nu ˗wɔn ˈgü, ꞊dhɛ ˗kɔ ˈö ˈˈdhü ˈö˗ bhɛ ˈyaa ˗së ˈö˗ «ˈˈkan ꞊në ˈwo dho˗ wo ˈyö ˈwo˗ ˗zuö pɛng ˈgü» bhë ˗a ˈdhö. (Matiö 7:15-20) ˗Bhö ˈwɔn ˗gɔ « La fin de la fausse religion est proche ! » ˗wo pö kö ˗kɔ ˈö ˗zlanwo ˗nu bhë ˗an ˈgü ˗dho shiʋ̈ˈˈ ˗a ˈka ˈü˗ dɔ.

Zoova ˗bha ꞊Gbɛkiö ˗nu ˈwo wo ˗de ˗ta

˗Yö ˗kë Rusi, Üklɛnö ɛɛnˈˈ ˈˈsɛ ˈˈʋʋ ˗sɛ ˈgü, Zoova ˗bha ꞊Gbɛkiö ˗nu ˈwaa wo ˗kɔ ˗da ˈˈsɛkɔɔwɔn ˗nu waa ˗gblü ˗nu ˈgü ꞊dhɛ ˗kɔ ˈö Yesu ˗ya pö˗ ˈka bhë, ˗a ˈdhö. ˗A ˗wɔn ˈgü, yi ˗kɔ ˈyaa ˗gblü ˈö gɔn ˗ni ˈgü Üklɛnö bhë ˗a ˈgü ɛɛnˈˈ yi ˗kɔ ˈyaa˗ gɔ. ˈYö yi ˗kɔ ˈyaa˗ ˈˈwɛɛwɛ ˈbha ˈgü. ꞊Dhɛ ˈö ˗kë ꞊dhɛ ˗yö yi ˈˈpiʋ̈ kö ˈyi ˈˈta ˈsü Biblö ˗bha ˈtɔŋ˗ ˗nu ˗ta bhë, mɛn ˗nu ˗wo yi ꞊dhegblü ˈbhaa ˗nu ˗wëëdhɛ ˗bho ˗a ˗wɔn ˈgü. (Zan 15:19, 20; 2 Timote 3:12) ˗A ˈwɔnzuan ꞊nɛn: Rusi ˗bha ˈˈsɛgɔdhiʋ̈mɛn ˗nu ˗wa Zoova ˗bha ꞊Gbɛkiö ꞊va ꞊dede ˗zuö ˗kaso ˈgü, ˈyö ˗wa pë ˈˈdhiʋ̈˗ kë ˗an ˈˈwɛɛ ˈbha ˗nu ˈka. ˗Wa wo ˗kɔ yö yi ˗bha ˗Zlan ˗dhɔkëgükɔ ˈbha ˗nu ˗ta. ˈBha˗ pö ˈü˗ ˈbha ˈgüman, ˗bhö ˈdho www.jw-russia.org ˗ta.

˗Bhö minitö ˗yiishiö video ˈö˗ ˗gɔ ˗kë Les Témoins de Jéhovah d’Irkoutsk restent fidèles malgré des perquisitions brutales ˈka bhë ˗a ˗ga kö ˗kɔ ˈö ˈwo Zoova ˗bha ꞊Gbɛkiö ˗nu ˈwo Rusi ˗an ˈˈklʋʋbhɔ ˗ni ˈgü ˗a ˈka, ˈü˗ yö.
Mɛn ˗nu ˗wa ˈwɔn ˗dɔ ˗a yi ꞊ya ꞊gwëë ꞊dhɛ Zoova ˗bha ꞊Gbɛkiö ˗nu ˈwaa wo ˗kɔ ˗da ˈˈsɛkɔɔwɔn ˗nu ˈgü. ˗Bhö video ˗Wo ˗to ˗klu ˗sü ˈka ˗Zlan ˗bha ˈˈklʋʋbhɔdhe ˗nu ˈgü ˗ga kö ˗kɔ ˈwo ˈto ˗klu ˗sü ˈka ˗Zlan ˗bha ˈˈkɛɛ kö ˗wo ˗an ˈˈklʋʋ bhɔ ˗ni ˈgü Nazi, ˈˈLüman ˈˈsɛ waa Iniɔn Sovietikö ˈgü, ˈü˗ yö.

Dɔ ˈˈgbɩɩ˗ ˗bhö ˈdho yi ˗bha ɛntɛnɛtö ˈˈnimlɔn ˗ta kö ˈwɔn ˗nu ˈwo ˗gban yi ˗bha ˗zoyödhe waa pë ˗nu ˈö ˗Zlan dho ˗an kë ˗dhɛkpaɔ dhiʋ̈ˈˈ ˈgü ˗an ˗bha, ˈü ˗ dɔ. ˗A pë ˗nu ˈwo ˈˈdhʋ̈ ˗a ˈbha ˈnën kë ꞊dhɛ ˗gblü ˈyi ˈdho kë ˈzü ˗a ˈdhö. (Isaïe 2:4; Jérémie 29:11) ˈÜ˗ ˈˈpiʋ̈ ˈü ˈwɔn ˈˈwɛɛ ˈbha ˗nu ˈgüman, ü ꞊mɔɔn˗ ˗bha ˈü yö yi ˗bha.

Foto ˗sü ˗an ˗gɔ ˗mɛn ˗nu, ˈö go mɛn ˗kɔ yaa ˈgü ˈö dho mɛn ˗kɔ ˗së ˈgü: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a ˗Zlanwo 15 ˈö ˈwo ˈdho eglizö Ɔɔtodɔsö, Glɛkö waa Wlɔmɛn ˗nu ˗bha eglizö Katolikö, Plotɛstan waa Evanʒelikö ˗nu ˗tɔ ˈgü ꞊nën ˈwo UCCRO, ɛɛnˈˈ Üklɛnömɛn ˗nu ˗bha ˗zlanwo ˗nu ˗lokotasü waa˗ ˗kɔlokota ˗nu ˈgü. Zuifö ˗nu ˗bha ˗zlanwo waa ˈˈmɔɔn˗ ˗nu ˗wa ˈgü ˈpö.