˗KA ˗YA KA ˈˈYAAN!
Mɛn ˗nu ˗zë buu ˈka ˗sü ˈö ˈˈkpɔnŋtaadhɛ ˗todhʋ̈sü ˈgü ˗ya kë ˗wɔnmɛnkunwɔn ˈka: ˈMën Biblö ˗ya pö?
˗Kwɛ 2022 Ʒue ˈˈsu ˈgü, mɛn ˗nu ˗zë buu ˈka ˗sü ˈö˗ ˗wɔn mɛn kun ˗wo ˗kë ˈˈkpɔnŋtaadhɛ ˗todhʋ̈sü ˈgü:
«Ʒapɔnmɛn ˗nu ˗bha ˈˈsɛkɔɔmɛn ˈkpii˗ do [˗an ˗bha plemie ministrö zii ˈwo˗ ˗dhɛ Shinzo Abe] ˈö mɛn ˗nu ˗wa dɔ ˗së ˈka bhë, ˗a zë ˈö ˈwo˗ wo buu ˈka bhë ˗yö ˗vin ꞊dedewo ˗an ˗bha ˈˈsɛ ˗bha. ˈYö ˗a ˗wɔn ˗yö mɛn ˗nu ˗kun ꞊dedewo ˈˈkpɔnŋtaadhɛ ˗todhʋ̈sü ˈgü, ˈyö ˗tɔ ꞊dhɛ ˈˈsɛ ˈö bhë ˈwaa mɛn zë buu ˈka mü ˈˈdhʋ̈ ꞊plɛ ꞊plɛ. ꞊Ya ˈgo mü ˈzü ˗an ˗bha ˈtɔŋ˗ ˈö ˗gban buu ˗wɔn ˗bha bhë ˗yö ˈˈgbɩkɩgbɩkɩ.»—˗Kwɛ 2022 Ʒue 10, The Japan Times.
«˗Dhɛ ˈö gɔndënën ˈbha ˗yö mɛn ˗yaaga zë buu ˈka Kopenagö ˗bha ˈˈdhookwëëdhɛ do ˈgü, ˗a ˗wɔn ꞊dede Danemakömɛn ˗kun.»—˗Kwɛ 2022 Ʒue 4, Reuters.
«Aflikö di Sidö: Mɛn kpö ˈbha ˗yö buu ˗da Soweto ˗bha yɔmüdhɛ do ˈgü ˈö ˈwo mɛn 15 zë.»—˗Kwɛ 2022 Ʒue 10, The Guardian.
«Mɛn ˗nu ˈö ˈwo ˗Ʒiö mɛn 220 ˗ta ˈnën mɛn ˗nu ˈwo ˗an zë buu ˈka Zeta zuni, Ʒue 4 waa˗ ꞊glooyi ˗nu ˈka.»—˗Kwɛ 2022 Ʒue 5, CBS News.
ˈˈVaanvandhɛ suu ˗nu ˈö ˈwo ˈˈdhʋ̈ bhë ˗wo ꞊mɔɔn˗ ˗bha ˈö ˈwo ɲën yi do ˈka ˗ee? ˈMën Biblö ˗ya pö?
ˈˈVaanvandhɛ ˗dho ɲën
ˈˈTʋ̈ŋ ˈkwa˗ ˈgü yö Biblö ˗ya ˗pö «ˈˈkpʋngtaadhɛ yën ˈˈtʋ̈ŋ» ˗mü. ˗Ya ˗pö ˗a ˈˈtʋ̈ŋ ˈö ˈˈdhʋ̈ ˗a ˈgü mɛn ˗nu ˈˈgblü˗ ˗dho kë ˈya˗, ˗wo ˗dho ˈwɔn yaa kë ˈö ˈwo kë ˈˈdhiʋ̈˗ ꞊dhɛ ˈˈblü wü ˈdhö. (2 Timote 3:1, 3) ˈWɔn ˈˈvaanvan ˗nu ˈwo ˗an ˗kë ˗ni ˈgü bhë ˗wa ˗kë ˈö mɛn ˗nu ˗wo ˗tosɛta ˗kë ˈˈsuʋ̈ ˗ta. (Dhukö 21:11) ˈˈKɛɛ ˈkö ˗kë ˈˈdhʋ̈ Biblö ˗ya ˈˈplüün ˗bho ˈö˗ pö ꞊dhɛ ˈˈtʋ̈ŋ ˈbha ˗dho ˗wo ˈö ˈˈvaanvandhɛ ˗yö ɲën. ˗Ya ˗pö «mɛn ˗nu ˗dho kë ˗dhɛ ˈö ˗yadeflëëgüsü ˈdhö mü, ˈkɔ ˗së waa ˈˈtɛɛpadhɛ ˗së ꞊dede ˗nu ˈgü.» (Isaïe 32:18) ˈˈVaanvandhɛ ˗dho ɲën ˗kɔ ˗kë ꞊dhɛ?
˗Zlan ˗dho ˈwɔnyaakëmɛn ˗nu bho ˈˈshia˗ ˈö buu ꞊gban ˈˈpɛpɛ ˗shiö.
«ˈWɔnyaakëmɛn ˗nu ˗zë, ˗wo ˗dho ˈgo ˈˈshia˗.»—Proverbes 2:22.
«[˗Zlan] ˗ya ˗gblü ɲën ˈˈsɛ ˗todhʋ̈sü ˗ta. ˗Yö ˈˈseega waa ˈdünënga ˗nu yɛɛˈˈ ˗ni ˈgü, ˈö ˗gblü ˗gɔn ˗a ˈka ˗gɔ ˗nu ˈˈgʋ̈ ˗ni ˈgü ˈˈwo ˈgü.»—Psaume 46:9.
˗Zlan ˗dho mɛn ˗nu ꞊klaŋ kë kö ˗wo kë dhɔŋsü kë ˈˈdhʋ̈ ˈˈvaanvandhɛ ˗yö ɲën.
«ˈWii ˈdho ˈwɔn yaa ɛɛnˈˈ pë ˈˈdhiʋ̈˗ suu ˈˈʋʋ ˗su ˈbha kë ˈzü man ˗tɔn ˈˈslʋ̈ʋ̈slʋ̈ ˗ta. ˈYö ˗tɔ ꞊dhɛ ˈwɔndɔdhe ˈö ˗gban Zoova ˗bha bhë ˗dho ˈˈsɛtadhɛ pa ꞊dhɛ ˗kɔ ˈö ˈˈyi ˗yö ꞊weeyi ˗pa ˗a ˈka bhë ˗a ˈdhö.»—Isaïe 11:9.
˗Zlan ˗yö mɛn ˗nu ꞊klaŋ kë ˗ni ˈgü ˗ʒiaanwo ˈˈtʋ̈ŋ yö˗ ˈgü ˈˈkpɔnŋtaadhɛ ˗todhʋ̈sü ˈgü kö ˗wo ˈˈkan ˈˈvaanvandhɛ waa buu ˗nu ˗bha, ˈgo mü ˈzü kö ˗wo wo «˗bha ˗blaan ˗dhaa ˗nu ˈˈgla ˈˈkö ˗nu ˈgü, [kö ˗wo] wo ˗bha ˈdünënga ˗nu [ˈˈ]gla ˗mlü ˗kan ˗a ˈka ˗dhaa ˗nu ˈgü.»—Michée 4:3.
ˈWɔn ˈö ˗gban ˈˈkpɔnŋtaadhɛ ˈö ˈˈsuʋ̈wɔn ˈyii ˈdho kë mü ˈzü ˈö Biblö ˗ya ˗wɔn ꞊blɛɛ bhë ˗a ˗bha, ˈü˗ ˈˈpiʋ̈ ˈü˗ ˈbha ˈgüman, ˗bhö ˈwɔn ˗gɔ « Affranchis de la peur : est-ce possible ? » ˗wo pö.
ˈWɔn ˈö ˗gban pë ˈö ˗dho ˈˈvaanvandhɛ bho ˈˈshia˗ ˗tokpa ˈka ˗a ˗bha, ˈü˗ ˈˈpiʋ̈ ˈü˗ ˈbha ˈgüman, ˗bhö ˈwɔn ˗gɔ « Enfin la paix sur la terre ! » ˗wo pö.