ˈˈWo ˗dɔ ˗ni ˈgü ꞊dedewo ˗dhɛ ꞊gban ˈgü: ˈMën Biblö ˗ya pö?

˗Kwɛ 2022 Ʒue ˈˈsu ˈgü, mɛn ˗nu ˗wa ˗bɛnzë ˈö ˈwo˗ pö ꞊dhɛ ˈˈwo ꞊dede dɔ ˗ni ˈgü ˈˈkpɔnŋtaadhɛ ˗todhʋ̈sü ˈgü:

• «ˈˈSu dosɛnŋ ˈö yö ˗a ˈgü, Shinö ˗gɔmɛn ˈˈgblʋ̈gblʋ̈ ˗nu ˗wo wo ˗bha ˈˈsɛgümɛn ˗nu ˗kpɔɔ ˗gɛnɲan ˈka ꞊plɛ ꞊dhɛ ˈˈwo dɔ ˗sü ˈö ˗dho kë ˗an ˗bha ˈˈkwipö ˈö ꞊mɔɔn ˈˈkwipö 70 ˗bha bhë ˗a ˈgü, ˗yö ˗dho kë ˈya˗.»—˗Kwɛ 2022 Ʒue 25, CNN Wire Service.

• «ˈˈWo dɔ ˗kɔ yaa ˈö dɔ ˗ni ˈgü Edhɔpö ˗dhɛ ꞊gban ˈgü bhë ˗yö ˈˈshiʋ̈ ˗ziisü ˗nu ˗da ˗ni ˈgü ˈpö ˈˈblüdhɛ ˗nu ˈka ˈˈsɛ ꞊vadhɛ ˈgü.»—˗Kwɛ 2022 Ʒue 17, The Guardian.

• «˗Tɛɛdhoowayi ˈka, ˈˈwo ˈö dɔ Zeta zuni ˗bha ˈˈkwipö ꞊vadhɛ ˈgü bhë, ˗a suu ˈyii dɔ mü do. ˗A ˈˈwo ˈö ˈˈdhʋ̈, ˗yö ˈdho ˗ni ˈgü dɔ ˗sü ˈka ˈˈsɛ ˈö bhë ˗a ˈˈpian ˗dhɛ ˈö ˈɲënŋ˗ ˗wo ʒiaan ˈka, ˗a ˗dhɛ ˈö ˈˈshiaŋ˗ ˗ʒian waa ˈɲënŋ˗ ˗pö ˗ʒian ˈka ˗an ˈgü ˈpö.»—˗Kwɛ 2022 Ʒue 24, The New York Times.

ˈWɔn ˗nu ˈwo ˈˈdhʋ̈ ˗an ˗gɛn ˈnën ˗tɔ ˗mën? Mɛn ˗dho ꞊mɔɔn ˈzü ˗tosɛta kë ˗sü ˗bha ˈˈsɛ ˗ta ˗ee? ˈMën Biblö ˗ya ˗pö?

Biblö ˗ya ˗to ˈˈdhiʋ̈ ˈö˗ pö ꞊dhɛ ˈˈwo ˗dho dɔ ˗ee?

꞊Ii. ˈˈWo dɔ ˗sü ˈö ꞊dɛɛ yö bhë, ˗yö ˗bɛ pë ˈö Biblö ˗ya pö ˈö ˗gban kwa ˗bha ˈˈtʋ̈ŋ ˗bha, ˗a ˗bha. ˗A ˈwɔnzuan ꞊nɛn: Yesu ˗ya ˗to ˈˈdhiʋ̈ ˈö˗ pö ꞊dhɛ kwa ˗dho ˗kpan «ˈˈdhabhliwɔn ˗nu ˈö ꞊ya kë ˈö ˈˈsuʋ̈ ˗da mɛ ˈgü» ɛɛnˈˈ «ˈsiö ˗kan mɛ ˈgluu ˗pë waa˗ ꞊duakëpë» ˗nu ˗bha. (Dhukö 21:11; NTBL) ˈˈWo dɔ ˗kɔ suu ˈö kë ˗ni ˈgü ˈˈtʋ̈ŋ yö ˗a ˈgü bhë ˗ya ˈˈsuʋ̈ ˗da mɛn ꞊va ˈgü. ˗Wo ˈˈsuʋ̈ ˗ni ˈgü kö mɛnbhɩɩdhe këwɔn ˗nu ˈwa ˈdho ˈˈsɛ shiʋ̈ˈˈ.

Mɛn ˈbha ˈyii ˈdho ꞊mɔɔn˗ ˗bha ˈzü kö ˗yö ˈto ˈˈsɛ ˗ta ˗ee?

˗Abin, mɛn ˗nu ˗dho ꞊mɔɔn˗ ˗bha. ˗Zlan ˗yö ˈˈsɛ ˗da kö mɛnbhɩɩdhe ˗nu kë ˗a ˗ta ˗toëpö ˈka. (Psaume 115:16; Ecclésiaste 1:4) ˈYii ˈdho ö ꞊kwaa mɛnbhɩɩdhe ˗nu ˗zü kö ˗wa shiʋ̈ˈˈ. Yö ˈnën ˈö dho ‹ˈwɔn bho ˈˈsɛ see˗ ˗mɛ ˗nu ˈgü ɛɛnˈˈ ˗an ˈgü shiʋ̈ˈˈ› ꞊dhɛ ˗kɔ ˈö˗ ˈˈplüün bho ˗a ˈdhö.—˗Dhɛkpaɔ dhiaˈˈ ˈsëëdhɛ 11:18.

ˈWɔn ˗nu ˈö ˗Zlan ˈö ˗an to ˈˈdhiʋ̈ ˈö ˗an ˈˈplüün bho ˈö ˈwo ˗gban ˈˈsɛ ˗bha, ˗kwaa ꞊plɛ ˗ga:

• «Pë ˗nu ˗dho bhɔ ˈˈyɛɛtadhɛ waa ˗dhɛ ˈˈkpɛɛdhɛ ˗nu ˈgü. ˈˈYɛɛtadhɛ ˗dho kë ˗së ˈö ˈˈbin ˗ya ꞊dhɛ saflan ˈdhö.» (Isaïe 35:1) ˗Zlan ˈyii ˈdho ö ꞊kwaa ˈˈsɛ ˗zü kö ˗yö kë ˈˈyɛɛtadhɛ ˈka, ˗abin. ˗Yö ˗dho ˗a ˈˈpian ˗dhɛ ˈö ˗ya shiʋ̈ˈˈ bhë, ˗a baaˈˈ.

• «Ü ˗dho ü ˗zokë ˈˈsɛ ˈˈpiʋ̈. Ü ˗dho ˗a kë ˈö pë ˗yö ˗dhi ˗a ˗ta ꞊dedewo ˈö ˗kë ˗së.» (Psaume 65:9) ˗Zlan ˗dho ˗a kë ˈö kwa ˗bha ˈˈsɛ ˗yö ˗kë ꞊bhɔɔ ˈˈsɛ ˈka.

˗Kɔ ˈö ˈˈtʋ̈ŋ ˗bha ˗slëë ˗a ˈgü ˗sü ˈö pë ˈö Biblö ˗ya to ˈˈdhiʋ̈ ˈö˗ ꞊blɛɛ ˗a ˗yökodhiʋ̈ ˗a ˈka, ˈwɔn ˈö ˗gban ˗a ˗bha ˈü˗ ˈˈpiʋ̈ ˈü˗ ˈbha ˈgüman, ˗bhö ˈwɔn ˗gɔ « Les changements climatiques et notre avenir : qu’en dit la Bible ? » ˗wo pö.

˗A pö ˈö Biblö ˗ya ˗wo ꞊dhɛ pë ꞊gban ˗dho ke ˗dɛɛ ˈˈsɛ ˗ta bhë, ˈwɔn ˈö ˗gban ˗bha ˈü˗ ˈˈpiʋ̈ ˈü˗ ˈbha ˈgüman, ˗bhö ˈwɔn ˗gɔ « Qui sauvera la terre ? » ˗wo pö.