ˈˈSɛgɔ ˗nu ˗wa ˈdho wo ˈkwëëdhö ˗wo ꞊mɔɔn˗ ˗bha ˈwo˗ ˗kë ˈö ˈˈtʋ̈ŋ ˗bha ꞊slëë˗ ˈgü ˗sü ˈyaa pë shiʋ̈ˈˈ ˗ee?: ˈMën Biblö ˗ya pö?

Nashiɔn zuni ˗nu ˗bha ˗bhɔkwëë ˈkpii˗ ˈwo ˗kë ˈö ˗gban ˈˈtʋ̈ŋ ˗bha bhë (COP27) ˗yö ˗ɲën ˗kwɛ 2022 Novanblö 20 ˈka. ˈKö ˗kë ꞊dhɛ ˗an ˗wo ˗yö ꞊mɔɔn kö ˗wo ˈˈsɛgɔ ˗nu ˈö ˈˈtʋ̈ŋ ˗bha ꞊slëë˗ ˈgü ˗sü ˈö ˗an ꞊sëë bho ˗ni ˈgü ˗an ˗takun ˈwëëga ˈka, mɛn ꞊vadhɛ ˗wa ˈwɔn dɔ ꞊dhɛ ˗a kë ˈˈdhʋ̈ ˗sü ˈyaa ˈnën ˈö dho ˈwɔn bhë ˗a ˈˈɲan bhɔ ꞊dedewo.

• Pë ˈö Antonio Guterɛsö ˈö ˗kë ONU ˗bha ˈsëëdhɛ ˗bɛnzëmɛn ˈkpii˗ ˈka ˈö˗ pö ˗kwɛ 2022 Novanblö 19 ˈka, yö ꞊nɛɛn: «˗A kë ˗sü kö ˈkwa ˈwëëga bho kö ˈˈsɛ ˗nu ˈö ˈˈtʋ̈ŋ ˗bha ꞊slëë˗ ˈgü ˗sü ˈö saanˈˈ ˗wɔ ˗ni ˈgü ˗an ˗ta, ˈkwa ˗an ˗takun bhë, ˗yö n ˈgü ˗së. ˈˈKɛɛ ˗a kë ˈˈdhʋ̈ ˗sü ˈyaa ꞊mɔɔn ˈyö ˗tɔ kwa ˗bha ˈˈsɛ ꞊mɔɔn˗ ˗bha ‹ˈö ꞊shiö ˈpapadhö ˈˈtʋ̈ŋ ꞊gban ˈka.›»

• Pë ˈö Madhi Robinsɔnö ˈö ˗kë Iilandö ˗bha ˈˈsɛgɔdhiʋ̈mɛn zii waa Nashiɔn zuni ˗bha yökëdhɛ ˈˈpian ˈö ˗gban mɛnbhɩɩdhe dua ˗bha ˗a ˗gɔmɛn ˈkpii˗ zii ˈka ˈö˗ pö ˗kwɛ 2022 Novanblö 20 ˈka, yö ꞊nɛɛn: «ˈˈTʋ̈ŋ ˗bha ꞊slëë˗ ˈgü ˗sü ꞊mɔɔn˗ ˗bha ˈö˗ ˗kë ˈö ˈˈsɛ ˗yö ꞊shiö ˈˈtʋ̈ŋ ꞊gban ˈˈpɛpɛ ˈka.»

ˈWɔn ˈö ˗gban ˈˈkpɔnŋtaadhɛ ˗bha ˗dhɛkpaɔ dhiʋ̈ˈˈ ˗bha, ˗a zuʋ̈dhiʋ̈tɛɛ ꞊dede ˗yö wlüünën ˗nu ˗bha. ˗Dhɛ ˈö ˈˈdhʋ̈ ˈˈsɛgɔ ˗nu ˗wa ˈdho wo ˈkwëëdhö ˗wo ꞊mɔɔn˗ ˗bha ˈwo˗ ˗kë ˈö ˈˈtʋ̈ŋ ˗bha ꞊slëë˗ ˈgü ˗sü ˈyaa pë shiʋ̈ˈˈ ꞊dhɛ ˗kɔ ˈö ˈwo˗ ˈˈplüün bho ˗a ˈka bhë, ˗a ˈdhö ˗ee? ˈMën Biblö ˗ya pö?

ˈˈSɛgɔ ˗nu ˗wa ˈdho wo ˈkwëëdhö ˗an ˗kɔ ˗dho ꞊mɔɔn ˈwɔn bhë ˗a ˈˈɲan bhɔ ˗sü ˗bha ˗ee?

ˈKö ˗kë ꞊dhɛ ˈˈsɛgɔ ˗nu ꞊mɔɔn˗ ˗bha ˈö ˈwo ˈwɔn ˈbhaa ˗nu ˗kë kö ˈwo ˈwɔn ˈö ˗gban ˈˈtʋ̈ŋ ˗bha ꞊slëë˗ ˈgü ˗sü ˗bha ˗a ˈbha ˈˈɲan bhɔ, Biblö ˗ya ˗zɔn ꞊dhɛ ˗an ˗kɔ ˈyii ˈdho ꞊mɔɔn ˗an ꞊gban ˈˈpɛpɛ ˈˈɲan bhɔ ˗sü ˗bha. ˈPë ˗kë ˈö ˈwaa ꞊mɔɔn˗ ˗bha, ˗a ˗gɛn ꞊plɛ ꞊nɛɛn:

• «Pë ˈö ˗ya klʋŋˈˈ, ˈwaa ꞊mɔɔn˗ ˗bha kö ˗wa dɔɔˈˈ ɛɛnˈˈ dɔ ꞊zinŋ ˈgü.»—Ecclésiaste 1:15.

  ˗A ˗gɛn ꞊nɛɛn: ˈˈSɛgɔdhiʋ̈mɛn ˗nu ˈwaa ꞊mɔɔn˗ ˗bha kö ˈwo ˈwɔn ꞊gban ˈˈpɛpɛ ˈˈɲan bhɔ ˈyö ˗tɔ ˗Zlan ˈyii mɛnbhɩɩdhe ˗nu ˗da kö ˗wo ˈˈdhiʋ̈sü wo ˗de ˈka. (Jérémie 10:23) ˈKö ˗kë ꞊dhɛ ˈˈsɛgɔ ˗nu ˗wo ˗dho wo ˈkwëë˗ ɛɛnˈˈ ˗wo pë ˈˈpɛpɛ ˗kë, ˈwii ˈdho ꞊mɔɔn˗ ˗bha toŋtoŋdhö kö ˗wo ˈwɔn ˈˈgbɩɩ˗ ˗nu ˈwo ˈˈkpɔnŋ ꞊taa ˗an ˈˈɲan bhɔ.

• «˗A ˗gɛn ˗mü ꞊dhɛ ˗a ˈˈtʋ̈ng bha˗ ˈgü, ˈmɛ ˈwo ˗ya wo ˗dɩ ˗wɔn ꞊në˗ zuën ˗ta doseng bha ˗wo ˗dho pa. ˗A ˗nu ˗bha ˈwëëga ˗wɔn ˗dho kë ˈˈgbɩɩ˗ ˈö ˗ziö ˈwɔn ꞊gban ˈˈpɛpɛ ˗ta. [...] Waa˗ mɛ ˈbha ˗mɛ ˈbha [ˈwii ˈdho] ꞊mɔɔ˗ ˈgü.»—2 Timote 3:2, 3.

  ˗A ˗gɛn ꞊nɛɛn: Biblö ˗ya to ˈˈdhiʋ̈ ˈö˗ pö ˈˈpuu ˈka ꞊dhɛ kwa ˗bha ˈˈtʋ̈ŋ ˈgü mɛn ˗nu ˈˈgblü ˗dho kë ˈya˗ ˈö ˈwii ˈdho ˈˈwɩ˗ ˗bha kö ˗wo yö kë wo ˈko ꞊bhaa mɛn ˈˈwɛɛ ˗nu ˗bha ˈwɔn ˗së ˈgü.

Kwa ꞊mɔɔn˗ ˗bha ˈkwa kwa ˈˈɲan to ˗dhɛkpaɔ dhiʋ̈ˈˈ ˗së ˗gɔ ˗ee?

Kwa ˗bha ˈˈkpɔnŋtaadhɛ ˗bha ˗dhɛkpaɔ dhiʋ̈ˈˈ ˈyaa ˈsü pë ˈö ˈˈsɛgɔdhiʋ̈mɛn ˗nu ˈwo˗ ˈˈplüün bho ˗a ˗bha. ˗Zlan ˗ya Mɛnkɔɔmɛn do ˈö ˗kɔmɔnwɔnbhasü ˈdhö˗ ˗gɔ ˗a ˗ya. Yö ˈnën ˈtɔ˗ Yesu Klito. Pë ˈö Biblö ˗ya pö ˗a ˗bha, yö ꞊nɛɛn:

• «Mɛn ꞊kɔɔnsü dho kë ˗a ꞊kwɛɛ˗. ˗Wo ˗dho ˗a ˗dhɛ ˗Dhioodɔmɛn ˗tiaandhö, ˗Zlan ˈgügbɩɩsü, kwa Dë ˈö ˗toëpö ˈka, ˗Gblüdë Gbö ˈö nu ˗yadeflëëgüsü ˈka.»—Isaïe 9:6.

Yesu Klito ˈnën ˗tɔ ˗Zlan ˗bha ˗Gblüdëdhɛ ɛɛnˈˈ ˗a ˗bha mɛnkɔɔnsü ˈö dhaŋ˗ ˈgü ˗a ˗Gɔdhiʋ̈mɛn. (Matiö 6:10) ˗Kɔmɔnwɔnbhasü waa ˈwɔndɔdhe ˗nu ˗ya ˗gɔ kö ˗yö ö ˗zokë kwa ˗bha ˈˈsɛ waa mɛn ˗nu ˈwo˗ ˗ta ˗an ˈˈpiʋ̈. ꞊Ya ˈgo mü ˗ya ˈˈpiʋ̈ ꞊dedewo ˈö˗ kë ˈˈdhʋ̈. (Psaume 72:12, 16) ˗A ˗bha mɛndhɛkësü ˈˈtʋ̈ŋ ˈka, mɛnkɔɔnsü ˈö dhaŋ˗ ˈgü bhë ˗dho «ˈwɔn ˗bho ˈˈsɛ see˗ ˗mɛ ˗nu ˈgü» ˈö ˈˈkpɔnŋtaadhɛ ꞊baa.—˗Dhɛkpaɔ dhiaˈˈ ˈsëëdhɛ 11:18; Isaïe 35:1, 7.

Pë ˈö dho ꞊mɔɔn˗ ˗bha ˈö ˈwɔn ˈö ˗gban ˈˈtʋ̈ŋ ˗bha ꞊slëë˗ ˈgü ˗sü ˗bha ˗a ˈˈɲan bhɔ ˗tokpa ˈka, ˈbha˗ pö ˈü˗ ˈbha ˈgüman, ˗bhö ˈwɔn ˗gɔ « Les changements climatiques et notre avenir : qu’en dit la Bible ? » ˗wo pö.