ˈWƆN ˗GƆ 30
Kwa ˗bha mɛn ˗nu ˈö ˗wa ga kwa ꞊mɔɔn˗ ˗bha ˈkwa ˗kpan ˗an ˗bha ˈzü!
Kwa ˗bha mɛn ˗ya ˈgo kwa ˗bha ˗yö ˗mën kwa ˈka ꞊dedewo. Biblö ˗ya ˗pö kwa ˈyɔɔ˗ ˗mü ga ˈka. (1 Kodhɛngtö 15:26) Kwa˗ ˗yö ˈwɔn ˗gɔ 27 ˈgü ꞊dhɛ Zoova ˗dhö ga bho ˈˈshia˗. ˈˈKɛɛ mɛn ˗nu ˈö ˗wa ga ˈsaadhö ꞊wɛ? Zoova ˗ya ˈˈplüün ˗bho kwa ˗dhɛ ˈˈnɛɛnnɛn ˈka ꞊dhɛ, ö ˗dho mɛn ˈˈmliya ꞊va bho ga ˈgü. ˈWɔn ˈö ˗gban ˗a ˗bha, kwa ˗dho ˗a yö ˗së ˈka ˈwɔn ˗gɔ ˈö yö ˗a ˈgü. Zoova ꞊yaa˗ ˗an bho ga ˈgü, ˗wo ꞊mɔɔn˗ ˗bha ˈwo ˗tosɛta ˗kë ˗toëpö ˈka. ˈˈKɛɛ ˗yö ˗dho kë ˈˈdhʋ̈ ꞊dedewo ˗ee? Mɛn ˗nu ˈö ꞊wa ga ˗wo ˗dho ˈgo ga ˈgü dhaŋ˗ ˈgü ˗ee, ɛɛnˈˈ ˈˈkpɔnŋ ꞊taa ˗ee?
1. ˈMën Zoova ˈdhö˗ ˈˈpiʋ̈ ˈö˗ kë kwa ˗bha mɛn ˗nu ˈö ˗wa ga ˗an ˗dhɛ?
Zoova ˗ya ˈˈpiʋ̈ ꞊dedewo ˈö mɛn ˗nu bho ga ˈgü. Gɔndë do ˈö ˗zoyödhe ꞊dede ˗yö kun ˗a ˗gɔ ˈö ˈwo˗ ˗dhɛ Zɔbö, ˗yö ˗kun ˗a ˈˈɲaan ꞊dhɛ ˈya ga ˗Zlan ˗zo yö ˈti ˗dho bhɔ ö ˈka. ˗Ya ˗pö ˗Zlan ˗dhɛ: «Ü ˗dho n ˗dhɛ, ˈyö ˈa [bɔ n wɔdhɛ ˈgü blɔɔndhö ˈa] ˗we ü ˗gɔ.»—Job 14:13˗15 ˗an ˗wo pö.
2. Kwa˗ ˈwɔn ˗dɔ ˗kɔ ˗kë ꞊dhɛ ꞊dhɛ mɛn ˗nu ˈö ˗wa ga ˗wo ˗dho ˗buö?
ˈDhɛ ˈö Yesu ˗yö kun ˈˈkpɔnŋ ꞊taa, ˗Zlan ˗yö mɛn ˗bho ga ˈgü ˗sü ꞊faan ˗nu ˗a ˗dhɛ. Yesu ˗yö ˈnëndhe ˈtɩtɩ do ˈö˗ ˗kwɛ ˗yö kun 12 waa ꞊gɛɛndhe do gbö ˗bho ga ˈgü. (Makö 5:41, 42; Dhukö 7:12˗15) ꞊Taabha Yesu ˈˈtɔŋdë Dhazaa ˗wɔn ˗yö ˗kë. ˈKö ˗kë ꞊dhɛ ˗wa ˗wɛɛbho ˈö ˗dhɛkpaɔyi ˗yiishiö ˗kë bun ˈgü, Yesu ˗ya ˗bho ga ˈgü. ˈDhɛ ˈö Yesu ö bo bhɛɛsü ˈka ˗Zlan ˗dhɛ, ˈyö ˗gbla ˈö˗ pö: ‹Dhazaa, ˗bhö yö ˈˈkpɛnŋ!› ˈYö ‹ˈmɛ ˈö ꞊ya ga ˈnu ˈö˗ yi ꞊ya ꞊gwëë bha ˈö yö ˈˈkpɛnng.› (Zan 11:43, 44) ˈYaa za ˈgü ꞊dhɛ Dhazaa ˗bha ˈkɔdhigümɛn ˗nu waa˗ ˈˈtɔŋdë ˗nu ˗an zuʋ̈ˈˈ ˈˈgblü ˗yö ˗dhi ꞊dedewo.
3. ˈMën ˗Zlan dho ˗a kë kwa ˗bha mɛn ˗nu ˈö ˗wa ga ˗an ˗dhɛ?
Biblö ˗ya ˗pö ˗yö ˗dho ˗an «˗bö ˈö ˈwo go ga ˈgü.» (Këwɔn ˗nu 24:15) Mɛn ˗nu ˈö Yesu ˗yö ˗an bho ga ˈgü ꞊kwɛŋzü, ˗an ˗bha ˗tosɛta kë ˗sü ˈö ˈˈkpɔnŋ ꞊taa ˈzü bhë ˗yö ˗an zuʋ̈ˈˈ ꞊nii ˗da ꞊dedewo. ˗Ya ˗zɔn ꞊dhɛ ˈdhɛ ˈwo ga wo ˈti ˈdho dhaŋ˗ ˈgü. (Zan 3:13) ˗Kɔ do ˈö bhë ˗a ˈka, ˗a ˈˈtʋ̈ŋ ˗ya ˈto ꞊klöö˗ kö Yesu ˗yö mɛn ˈˈmliya ꞊va bho ga ˈgü kö ˗wo ˗tosɛta ˈö ˈyaa ɲën ˗a kë ꞊bhɔɔ ˈgü ˈˈkpɔnŋ ꞊taa. ˗Ya ˗pö mɛn ˈˈpɛpɛ ˈö ˗wa ga ˈö ˈwo ˗Zlan ˗zo ˈˈpiʋ̈, ˗wo ˗dhö ˈgo ga ˈgü. ˗A mɛn ˗nu ˗dee ˈö kwa ˗zo ˗ya bhɔ ˗an ˈka, ˗wo ˗dho ˈgo ga ˈgü ˈyö ˗tɔ ꞊dhɛ ˗an ˈtɔ ˗yö ˗Zlan ˈˈɲaan ˈka.—Zan 5:28, 29, NWT.
˗KAA ˈˈPIƲ̈ ˈPƆN
˗Kɔ ˈö Biblö ˗ya ˗zɔn ˗a ˈka ꞊dhɛ mɛn ˗nu ˗dhö ˈgo ga ˈgü ꞊dedewo waa ˗kɔ ˈö ˗go ga ˈgü ˗sü nɔɔn˗ ˗yö kwa zuʋ̈ˈˈ ˗kë ˗saa ˈö kwa ˗zogban ˗a ˈka, ˗kwaa ˗ga.
4. Yesu ˗ya ˗zɔn ꞊dhɛ ö ꞊mɔɔn˗ ˗bha ˈö mɛn ˗nu bho ga ˈgü.
ˈPë Yesu ˗ya ˗kë ö ˈˈtɔŋdë Dhazaa ˗dhɛ, ˗kwaa ˈbhaa ˗ga. ˗Ka Zan 11:14, 38˗44, NTBL ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
˗Mën ˈö˗ ˗zɔn ꞊dhɛ Dhazaa ˗yö ˗ga ꞊dedewo? —˗Ka kpɔɔˈˈ ˗a ˈˈɲan ˈsɛɛn˗ 39 ˗bha.
꞊Ya kë ꞊dhɛ ˈdhɛ ˈö Dhazaa ˗yö ga ˗yö ˗dho ꞊bhɔɔ ˗pö ˈgü dhaŋ˗ ˈgü ˗be, ü ˗bhaa ˈka Yesu ˗dho ˗a bho mü ˈö nu ˗a ˈka ˈˈkpɔnŋ ꞊taa ˗ee?
5. Mɛn ˈˈmliya ꞊va ꞊dede ˗dho ˈgo ga ˈgü.
˗Ka Psaume 37:29 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Mɛn ˗nu ˈö ˈwo -dho ˈgo ga ˈgü, ˗wo ˗dho ˗tosɛta kë ˈˈmɛn?
Zoova ˗dhɔkëmɛn ˗nu wo dosɛnŋ ˈyaa ˈnën ˈö Yesu dho ˗an bho ga ˈgü. ˗Ka Këwɔn ˗nu 24:15 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
De ˈü˗ ˈˈpiʋ̈ kö ˗yö ˈgo ga ˈgü kö ˈü ˗kpan ˗a ˗bha?
Yesu ꞊mɔɔn˗ ˗bha ˈö mɛn bho ga ˈgü ˗bhaasü ˈka ꞊dhɛ ˗kɔ ˈö ˈnën dë ˗yö pa ˗a ˈka ö ˗bha ˈnën ˗bha ˗a ˈdhö.
6. ˗Gogagüsü ꞊mɔɔn˗ ˗bha ˈö kwa zuʋ̈ˈˈ ˗kë ˗saa ˈö kwa ˗zogban.
Mɛn ꞊vadhɛ ˈö ga ˗yö bhɔ ˗an ˗bha, Zɛdhiusö ˈdhu ˗bha ˗gogagüsü ˗kwɛzlan ˗yö ˗an ꞊faan ˗mën ˈö ˗an ˗zogban. ˗Kaa ˗kwɛzlan ꞊dede ˈö Dhukö 8:40˗42, 49˗56 ˗an ˈgü bhë ˗a ˗wo pö.
ˈDhɛ ˈö Yesu ˈdhö˗ ˈnëndhenën ˈö bhë ˗a bho ga ˈgü, ˗ya ˗pö ˗a dë ˗dhɛ: «ˈBha ˈdho ˈˈsuʋ̈, [...] ˈdhaŋ bho n ˈˈdhiʋ̈.» (˗Ka kpɔɔˈˈ ˗a ˈˈɲan ˈsɛɛn˗ 50 ˗bha.) ˗Zo -yö ˗gogagüsü ˗dhɛ ˗sü ˗yö ˗dho ˈü ˗takun ˗kɔ ˗kë ꞊dhɛ ...
kö ü ˗bha mɛn ˗ya ˈgo ü ˗bha?
kö ü ga ˗yɛ ˈˈdhiʋ̈?
˗Kaa VIDEO ˗ga, kö dhɛɛˈˈ ˈö ˈˈshia bhë ˈka˗ ˗yɔ mɛɛnˈˈ.
˗Zo ˗yö ˗gogagüsü ˗dhɛ ˗sü ˗yö Fedhisite ˗mɛn ˗nu ˗takun ˗kɔ ˗kë ꞊dhɛ ˈö ˗an ˗zogban?
MƐN ˈBHAA ˗NU ˗WA ˗PÖ: «˗A pö ˗sü ˈö ꞊dhɛ mɛn ˗nu ˗dho ˈgo ga ˈgü ˈö ˈwo ˗tosɛta ˗kë ˈzü bhë, ˈdhaŋ˗ ˗bho ˗a ˈˈdhiʋ̈ ˗sü ˗yö ˈˈgbɩɩ˗.»
Ü ü ˗bha ˗pö ˗a ˈgü ꞊dhɛ?
Mɛn ˈö˗ pö ˈˈdhʋ̈, Biblö ˈˈɲan ˗mɛɛn ˈü ˗dho ˗a pö ˗a ˗dhɛ, kö ˗ya ˈwɔn dɔ ꞊dedewo ꞊dhɛ mɛn ˗nu ˗dho ˈgo ga ˈgü?
˗A ˈDHƐ TO KWA ˈˈƝAAN
Biblö ˗ya ˗pö mɛn ˈˈmliya ꞊va ꞊dede ˗dho ˈgo ga ˈgü. Zoova ˗ya ˈˈpiʋ̈ kö ˗wo ˗tosɛta kë ˈzü. ˗A ˗wɔn ˈgü ˗yö ꞊faan ˗nu Yesu ˗dhɛ kö ˗yö ˗an bho ga ˈgü.
˗Zobuödhe
Kwa˗ ˈwɔn ˗dɔ ˗kɔ ˗kë ꞊dhɛ ꞊dhɛ mɛn ˗bho ga ˈgü ˗sü ˗lele ˗yö Zoova waa Yesu ˗an ˗ta?
Mɛn ˈˈmliya ꞊va ˈwo ˗dho ˈgo ga ˈgü bhë, ˗wo ˗dho ˗tosɛta kë dhaŋ˗ ˈgü ˗ee, ɛɛnˈˈ ˈˈkpɔnŋ ꞊taa ˗ee? ˈMën ˗kë ˈü˗ pö ˈˈdhʋ̈?
ˈMën ˗kë ˈö ü ˗zokun ꞊dedewo ꞊dhɛ ü dhɔɔbhaamɛn ˗nu ˈö ˗wa ga ˗wo ꞊mɔɔn˗ ˗bha ˈwo ˗tosɛta ˗kë ˈzü?
˗AN ˗GA ˈPÖ
Kwa ˗bha mɛn ˗ya ˈgo kwa ˗bha, pë ˗nu ˈö ˈkwa ꞊mɔɔn˗ ˗bha ˈkwa ˗an ˗kë, ˗bhö ˗an ˗ga.
«Mɛn ˈö ga ˗ya bhɔ ˗a ˗bha, ˗a ˗takunpë ˗nu» (˗Kwɛ 2018 ˗bha ˗Ka ˗ya ka ˈˈɲaan No. 3)
Mɛn ˈö ga ˗ya bhɔ ˗a ˗bha, Biblö ˗bha ˈtɔŋ˗ ˗gɛngbandhɛ ꞊mɔɔn˗ ˗bha ˈö˗ ˗takun ꞊dedewo ˗ee? ˗A ˗yɔ ˗ga!
ˈNën ˈsɛɛn˗ ˗nu ˗bha mɛn ˗wɔn ˗ya kë, ˗wo ˗dho ˗a ga ˗ya wo ˗kɔ ˗kë ꞊dhɛ?
Mɛn ˈbhaa ˗nu ˗dho ˈgo ga ˈgü dhaŋ˗ ˈgü ˗ee? De ˗nu ˈö wo ˈti ˗dho ˈgo ga ˈgü? Dhɛɛˈˈ ˗nu ˈwo bhë ˗an ˗yɔ ˗ga.