˗Kwa Kë ˗Zlanwopömɛn ˗Nu ˗Tiaandhö ˈKa​—ˈSëëdhɛ ˗së ˗bɔ mɛn ˗nu ˗dhɛ ˗sü ˈka

˗MËN ˈÖ ˗KË ˈÖ˗ ˗WƆN ˈDHÖ ˈˈGBƖƖ˗? ˈSëëdhɛ 14 ˈö bɔmɛn Pɔdhö ˗yö ˗an ˗bɛn zë kö ˗yö Kletiɛn ˗nu ꞊faan ˈmën bhë, ˗a do ˈnën ˈtɔ˗ 1 Kodhɛngtö. ˈSëëdhɛ ˗bɔ mɛn ˗nu ˗dhɛ ˗sü ˗ya ˗bɛnzëmɛn ˗takun ˈö ö ˗kɔ ˗yɛ ˗së ˈka pë ˗nu ˈö ˗dho ˗an pö ˗an ˗bha. ꞊Ya ˈgo mü ˈzü mɛn ˈwo˗ bɔ ˗a dhɛ, ˗yö ꞊mɔɔn˗ ˗bha ˈö˗ ˗wo pö ˗gɛnɲan ˈka ꞊va. ˈKwa˗ pö ˈkwa ˗zlanwopö kwa ˗mɛn ˗nu waa kwa ˈˈtɛɛbɔ ˗nu ˗dhɛ, ˈsëëdhɛ ˗bɔ ˗an ˗dhɛ ˗sü ˗ya ˈˈslö ˗së do ˈka. ˗Yö ˗së ˈpö mɛn ˗nu ˈö ˈkwaa ꞊mɔɔn˗ ˗bha ˈkwa ˈwɔn blɛɛˈˈ ˗an ˗dhɛ ˗an ˗bhaa ˈka. ˗A ˈwɔnzuan ꞊nɛn: ˗Zlan ˗dhɔ ꞊mɔɔn˗ ˗bha ˈö ˗kë mɛn ˈbha ˗bha, ˈˈkɛɛ ˈö ˗kpan ˗a ˗bha ˗sü ˗yö ˗kë ˈˈgbɩɩ˗. Mɛn ˈbha ˗nu ˈwo kwa ˗bha ˈˈyasa ˈgü, ˗kpan ˗an ˗bha ˗sü ꞊mɔɔn˗ ˗bha ˈö ˗kë ˈˈgbɩɩ˗ ˈyö ˗tɔ ꞊dhɛ ˗wo ˈkɔ ˈˈgblʋ̈gblʋ̈ ˗nu ˈö mɛn ˈbha ˈyaa ꞊mɔɔn˗ ˗bha kö ˗yö ˗da ˗an ˈgü ˗an ˈgü. Ɛɛnˈˈ ˈzü ˗wo ˗dhɛ ˗nu ˈö mɛn ˗nu ˈwaa ˗wo mü ꞊plɛ ꞊plɛ ˗an ˈgü. ˈKwa ˈsëëdhɛ bɔ ˗ni ˈgü mɛn ˈbha ˈö ˈkwaa˗ dɔ ˗a ˗dhɛ, ˗mën ˈö ˈkwa ˗dho kwa ˗zo ˈto ˗a ˈˈpiʋ̈?

KWA ˗DHO ˗A KË ˗KƆ ˗KË ꞊DHƐ?

• 

  Pë ˈkwa ˗dho ˗a pö kö ˈkwa ˗kpan ˗a mɛn ˗bha ˗be, ˗kwaa ˗bɛn zë. ˗Kwa kwa ˗de ˗zɔn ˗a züdɔdhɛ ˈgü. ˈPë ˗kë ˈkwa ˈsëëdhɛ bɔ ˗a ˗dhɛ, ˗kwaa ˗gɛn pö ˈˈpuu ˈka. ˈKwa kwa bo, kwa ꞊mɔɔn˗ ˗bha ˈkwa dhɛɛˈˈ do ˈö ˗dho ö ˗zota ˗a ˈgü ˗a ˈkpɔ ˗a ˗gɔ, kö ˈkwa kwa ˗bha ɛntɛnɛtö ˈˈnimlɔn ˗zɔn ˗a ˗dhɛ. Biblö draansü ˈö ɛntɛnɛtö ˗ta ɛɛnˈˈ ˈö ˈkɔ ˈgü ˈkɔ ˈgü, ˗kwaa ˗wɔn blɛɛˈˈ ˗a ˗dhɛ. ˗Kwa ˈwɔn gɔ ˈbha ˗nu ˈwo kwa ˗bha Biblö ˗draan ˈgü ˈsëëdhɛ ˗be do ˈgü, ˗an ˗bɛn zë. ˈSëëdhɛ ˗nu ˈwo kë ꞊dhɛ JW ˈˈnimlɔn ˈsëëdhɛ, mɛn ˗dhɛ ˈsëëdhɛ ɛɛnˈˈ ˈsëëdhɛ ˈˈpɛn ˗nu ˈdhö bhë, kwa ꞊mɔɔn˗ ˗bha ˈö ˈkwa ˗an ꞊nënŋ ˗a ˗bha.

• ˈSëëdhɛ ˈkwa ˗dho ˗a bɔ, ˈya ˗dho kë ꞊gblɛɛn. ꞊Ya kë ꞊gblɛɛn, ˗a ˗mɛn ˈgü ꞊mɔɔn˗ ˗bha kö ˗yö ga ˗a ˗wo pö ˗sü ˈka. ˗A ˈsëëdhɛ ˗bɛn zë ˗kɔ ˈwɔnzuan do ˗ga.

• ˗Kwaa ˗wo pö kö ꞊ya kë ꞊dhɛ kwa ˗wo yö ˈti zë ˗a ˈgü, ˈö˗ ˗wo pö ˗sü ˈdho ˗së, ˈö ˈˈnɛɛnnɛn, ˈö pa mɛn zuʋ̈ˈˈ ˈka, ˈkwa˗ ˈwɔn dɔ. ˗Kwa tɛnblö ꞊nënŋ ˗a ˗ta.