ˈWƆN ˗GƆ 28
˗Kwa Zoova waa Yesu ˗an ˈˈnuɛ bho pë ˈwo˗ ˗kë kwa ˗dhɛ ˗a ˗bha.
Kwa ˈˈtɔŋdë ˗ya pë ˗së gbɔɔ kwa ˗gɔ, ˗yö ˗kë kwa ˈgü ˗kɔ ˗kë ꞊dhɛ? ˗Yö kwa zuʋ̈ˈˈ ꞊nii ˗da ꞊dedewo ˈö ˈkwa˗ ˈˈnuɛ bho. Zoova waa Yesu ˗wo gbɔɔdhe ˈkpii˗ ˈö ˗kë ˗gɔtadhɔpë ˈka bhë, ˗a ˗kë kwa ˗gɔ ˈpö. Kwa ˗dho ˗an ˈˈnuɛ bho ˗kɔ ˗kë ꞊dhɛ?
1. ˈWɔn ˗së ˈö ˗Zlan waa Klito ˈwo˗ ˗kë kwa ˗dhɛ bhë, ˗an ˈˈnuɛ bho ˗kɔ ˗së do ˈnën ˗tɔ ˗mën?
Biblö ˗ya ˗pö «mɛ ˈoo mɛ ˈö ˈdhoë˗ ö ˗zo yö [Yesu ˗dhɛ]» ˗yö ˗dho ˗tosɛta ˈö ˈyaa ɲën ˗a ꞊slɔɔ. (Zan 3:16, NTBL) ˈˈKɛɛ ˗mën ˈö ˗tɔ ö ˗zo ˗yö ˗a ˗dhɛ ˗sü? Kwa kwa ˗bha ˗zoyödhe ˗zɔn ʒiaan ˗nu ˈö ˈkwa ˗da ˗an ˗ta waa kwa këwɔn ˗nu ˈgü. (Zakö 2:17) Kö ˈkwa kwa ˗bha ˗zoyödhe ˗zɔn kwa këwɔn ˗nu waa kwa blɛɛwɔn ˗nu ˈgü, ˗mlɛɛn ˈö kwaa Yesu waa ˈö Dë Zoova kwa ꞊zinŋgü, ˗a ˗gɛn ˗yö ˗gban.—Zan 14:21 ˗wo pö.
2. ˈWlaan˗ ˗mɛɛn ˈö ˈkwa ˗dho kë ˗a ˗ta, kö ˈkwa Zoova waa Yesu ˗an ˈˈnuɛ bho pë ˈwo˗ ˗kë kwa ˗dhɛ ˗a ˗bha?
Gbeŋ ˗totaabhasü ˈö Yesu waa ö ˗bha gwëëˈˈ ˗nu ˈwo˗ ˗kë wo ˈkwëë˗ ˗a ˈka, ˗yö pë ˈˈwɛɛ ˈbhaa ˈwo dho ˗a kë kö ˗wa ˈˈnuɛ bho ˗a ˗bha ga ˈˈsaa˗ ˗bha ˗a ˗zɔn. Yi ˈö bhë ˗a ˈka, ˗yö ˈwlaan˗ do ˈbhaa ˈö Biblö ˗ya ˗dhɛ «Dëmɛn ˗bha ˈˈdooka ˗bhöpë» ˈö ˈwo˗ ˗dhɛ ˈzü Klito ˗bha ga ˗zo ˗bo ˈwlaan˗ bhë ˗a ˗blɛɛsü ˗kë. (1 Kodhɛngtö 11:20, NWT) ˈWlaan˗ ˈö bhë ˗yö Yesu ˗bha bɔmɛn ˗nu waa kletiɛn ꞊dede ˗nu ˈwo to ˗an ˗zo ˗buö ꞊dhɛ Yesu ˗yö ˗ga mɛnbhɩɩdhe ˗nu kwa ˗wɔn ˈgü. Gbeŋ ˈö bhë ˗a ˈka Yesu ˗ya ˗pö: «ˈKa kë ˗kaa ˗bhö ꞊sië kö ka ˗zʋ ˗yö ˗bö n ˗wɔn ˗ta ˗kpɛawo.» (Dhukö 22:19) ˈKwa kë ˗zo ˗bo ˈwlaan˗ ˈö bhë ˗a ˗ta ˈyö ˈkwa˗ ˗zɔn ꞊dhɛ kwa Zoova waa Yesu ˗an ˈˈnuɛ ˗bho ˗dhɔ ꞊dede ˈwo˗ ˗zɔn kwa ˗dhɛ bhë ˗a ˗bha.
˗KAA ˈˈPIƲ̈ ˈPƆN
˗Kɔ ˈbhaa ˈö ˈkwa ˗dho Zoova waa Yesu ˗an ˈˈnuɛ bho ˗a ˈka waa ˈwɔn ˈbhaa ˗nu ˈwo ˗gban ˗zo ˗bo ˈwlaan˗ ˗bha, ˗kwaa ˗an ˗ga.
3. Mɛn ˈˈnuɛ bho zuʋ̈ga ˗yö kwa ˗blü ˈwɔn ˗së ˗nu kë ˗sü ˗bha.
˗Bhö ü ˗zota kö ˈbha ˗puö ˈˈyi ꞊bhaa ˈˈkɛɛ kö ˈbhaa ˈˈyikëdhɛ dɔ. Ü ˗zo ˗dhö bhɔ mɛn ˈö nu ˈö ü bho ˈˈyi ˈö bhë ˗a ˗gɔ ˗a ˈka ˗ee? ˗Abin toŋtoŋdhö. Ü ˗dho pë ˈˈpɛpɛ kë kö ˈü˗ ˈˈnuɛ bho ü dha ˈö˗ wo bhë ˗a ˗bha.
Zoova ˗yö ˈˈsaa˗ ˗bho ö Gbö ˈka kö ˈö kwa dha. ˗Ka 1 Zan 4:8˗10 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
ˈMën ˗kë ˈö Yesu ˗bha ˈˈsaa˗ ˈdhö gbɔɔdhe ꞊bhlëësü ˈka?
ˈBha ü ˗zota pë ˈö Zoova waa Yesu ˗wa ˗kë kwa ˗dhɛ bhë ˗a ˈgü, ˗yö ˗pa ü ˈka ˗kɔ ˗kë ˗dhɛ?
Kwa ꞊mɔɔn˗ ˗bha ˈkwa Zoova waa Yesu ˗an ˈˈnuɛ bho ˗kɔ ˗kë ꞊dhɛ ˗gɔtadhɔpë ˗wɔn ˈgü? ˗Ka 2 Kodhɛngtö 5:15; 1 Zan 4:11 waa˗ 5:3 ˗wo pö. ˈKa˗ ˈdhɛ ˈö ˈdhö ˗a ˗wo pö kö ˈka dhɛɛˈˈ ˈö yö ˗a ˗yɔ mɛɛnˈˈ:
Kwa ˗dho Zoova waa Yesu ˗an ˈˈnuɛ bho ˗kɔ ˗kë ꞊dhɛ?
4. ˗Kwa ʒiö Yesu ˗bha ˈwɔnzuan ˈˈpiʋ̈.
˗Zlan waa Yesu ˗an ˈˈnuɛ bho ˗kɔ do ˈnën ˈö ˗tɔ ˗ʒiö Yesu ˗bha ˈwɔnzuan ˈˈpiʋ̈ ˗sü. ˗Ka 1 Piɛdhö 2:21 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Ü ꞊mɔɔn˗ ˗bha ˈü ʒiö Yesu ˗bha ˈwɔnzuan ˈˈpiʋ̈ ˗kɔ ˗kë ꞊dhɛ?
˗Zlan ˈˈDhiwo ˗dhɔ ˗yö Yesu ˗kë, ˈö ˗gblüdëdhɛ nɔɔn˗ ˗së pö, ˈö mɛn ˗nu ˗takun
5. Kwa dua ˗mü ˈkwa kë ˗zo ˗bo ˈwlaan˗ ˗ta.
˗Ka Dhukö 22:14, 19, 20 ˗wo pö kö ˈka Dëmɛn ˗bha ˗bhöpë ˈwlaan˗ kë ˗kɔ dɔ. ˈKa ka bo kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
˗Wo Dëmɛn ˗bha ˗bhöpë ˈwlaan˗ ˗kë ˗kɔ ˗kë ꞊dhɛ?
ˈBluu˗ waa we ˈwo bhë ˗an ˗gɛn ˈnën ˈö ˗tɔ ˗mën? —˗Ka kpɔɔˈˈ ˗a ˈˈɲan ˈsɛɛn˗ 19 waa 20 ˗bha.
Yesu ˗ya ˈˈpiʋ̈ kö ö ˗bha gwëëˈˈ ˗nu ˗wo ö ˗bha ga ˗zo ˗bo ˈwlaan˗ kë ˗kwɛ ˈˈpɛpɛ ˈka ˗dhɛkpaɔyi ˈö ga ˗a ˈka bhë ˗a ˈka. ˗A ˗wɔn ˈgü ˗kwɛ ˈˈpɛpɛ ˈka Zoova ˗bha ꞊Gbɛkiö ˗nu ˗wo ˗dho wo ˈkwëëdhö ˈö ˈwo Klito ˗bha ga ˗zo ˗bo ˈwlaan˗ ˗kë. ˗Kɔ ˈö Yesu ˗yö ˈwlaan˗ ˈö bhë ˗a ˗blɛɛsü ˗kë ˗a ˈka, ˈyö ˈwo to ˗a ˈˈpiʋ̈. ˈKa˗ pö ˈwɔn ˈö ˗gban ˗a ˗bha ˈka˗ ˈbhaa ˈgüman, ˗kaa VIDEO ˗ga, kö ˈka dhɛɛˈˈ ˈö ˈˈshia bhë ˗a ˗yɔ mɛɛnˈˈ.
˗Wo ˗zo ˗bo ˈwlaan˗ ˗kë ˗kɔ ˗kë ꞊dhɛ?
ˈBluu˗ waa we ˈwo bhë ˈwɔnzuan ˗nu ˗mü. ˈBluu˗ ˈnën ˗tɔ Yesu kwi ˈˈslʋ̈ʋ̈slʋ̈ ˈö˗ nu kwa ˗wɔn ˈgü ˗a ˈwɔnzuan, ˈyö we ˗yö ˗kë ˗a ꞊ɲɔɔn ˈwɔnzuan ˈka.
MƐN ˈBHAA ˗NU ˗WA ˗PÖ: «ˈMɛn ˈbha ˈˈwɩ Yesu ˗wɔn ˗bha kö ˈbha dha.»
Ü ˗dho ˗a ˗mɛn ˗takun Zan 3:16 waa Zakö 2:17 ˈka ˗kɔ ˗kë ꞊dhɛ kö ˗ya ˈwɔn dɔ ꞊dhɛ kwa dua ˗mü kö ˈkwa pë ˈˈwɛɛ ˈbhaa kë, kö ˈkwa dha?
˗A ˈDHƐ TO KWA ˈˈƝAAN
ˈKwa˗ pö ˈkwa Zoova waa Yesu ˗an ˈˈnuɛ bho Yesu ˗bha ˈˈsaa˗ ˗wɔn ˈgü, kwa dua ˗mü kö ˈkwa kwa ˗bha ˗zo ˗yö ˗a ˗dhɛ ˗sü ˗zɔn, kö ˈkwa kë ˗zo ˗bo ˈwlaan˗ ˗ta.
˗Zobuödhe
˗Mën ˈö ˗tɔ ˗zo ˗yö Yesu ˗dhɛ ˗sü?
ˈMën ˈü dho ˗a kë kö ˈü˗ ˗zɔn ꞊dhɛ pë ˈö Zoova waa Yesu ˗wa ˗kë ü ˗dhɛ bhë, ü ˗an ˈˈnuɛ ˗bho ˗a ˗bha?
ˈMën ˗kë ˈö ü dua ˈdhö ˗mü kö ˈü kë Klito ˗bha ga ˗zo ˗bo ˈwlaan˗ ˗ta?
˗AN ˗GA ˈPÖ
Pë ˈö Yesu ˗bha ga ˗yö kwa ꞊faan mën ˗a kë ˗sü ˗bha ˗a ˗ga.
ˈWɔn ˈbhaa ˗nu ˈwo ˗gban ˗zoyödhe ˗bha, waa ˗kɔ ˈwo˗ ˗zɔn ˗a ˈka ˗an ˗ga.
ˈDhɛ ˈö dhebɔnën do ˗yö ö ˗zota ˗gɔtadhɔpë ˗wɔn ˈgü, ˗kɔ ˈö ö ˗de yö ˗a ˈka ˗yö ˗go ˈˈgblʋʋ. ˗A ˗kwɛzlan ˈö˗ ˗gɔ ˗kë «A n ˗de ˈgü ˗së ˈö ˗tosɛta ˗dhɔ ˗yö n ˗kë» ˈka bhë ˗a ˗ga.
«Biblö ˗yö mɛn ˗bha ˗tosɛta ˗bho ˈˈgblʋʋ» (˗Kwɛ 2011 ˈUtö 1 ˗bha ˈˈGlaadhiʋ̈ ˗tɔn)
Mɛn ˈˈmliɲɔn ꞊va ˈwo nu ˗zo ˗bo ˈwlaan˗ ˗ta, ˗a ˈmɛn ˈwo ˈbluu˗ ˗bhö ˈö ˈwo we mü ˈwaa ꞊va. ˈMën ˗kë? ˗A ˗yɔ ˗ga.