Matio

21 Saŋa na baŋ da wa peɛle Gyɛruzɛlɛm a ta Bɛtefage naŋ be a Oolif Taŋazuŋ na, Yezu da toŋ la o potuuribo bayi, 2 a yelko ba ka: “Yɛ gaa a koraa na naŋ peɛlɛɛ na, yɛ na nyɛɛ boŋa kaŋa ba naŋ le, ka o bile be o zieŋ. Yɛ loroo a taa o wa ko ma. 3 Ka neɛzaaŋ wa yeli yelzaa ko yɛ, yɛ yelkoo ka, ‘A Daana boɔroo la.’ A tɔntɔbaalɛ, o na de oŋ ko yɛ.” 4 A yɛlɛ ŋa da eɛ la ka yɛlɛ na a daŋyele naŋ yeli na na nyɛ eebo, onaŋ yelka: 5 “Yɛ yelko Zaayɔŋ pɔgeyaa na ka: ‘Nyɛ! Ho naa waanɛɛ ho zie, a taa sumaaroŋ, a zeŋ boŋa zuŋ, ɛɛ, boŋ-bile zuŋ, duŋo baŋ maŋ de derɛ tuobu bile.’” 6 Azuŋ, o potuuribo na da gaaɛ la a te e yɛlɛ na zaa Yezu naŋ da manne ko ba ka ba e na. 7 Ba da de la a boŋa ane o bile na waneŋ o zie, a de ba kpar-bɛrɛ dɔgle a zuriŋ, oŋ da zeŋ a zuŋ. 8 A nembeɛoŋ kpoŋ zie zaa da de la ba kpar-bɛrɛ tɛ a teŋɛŋ, ka ba mine meŋ da ŋmaara teere nuuri a de a tɛtɛ a soriŋ. 9 Ane meŋ, a nembeɛoŋ naŋ da be o nimitɔɔreŋ ane bana na naŋ da tuuroo na da kyeerɛŋ a yele ka: “Te puoro sɔrɔŋ, yɛ faa Deevid Bidɔɔ na! Soba na naŋ de Jehoova yuori waana neŋ nyɛɛ maaloo yaga! Te puoro sɔrɛɛ soba na naŋ be a sazu baaraa zie na ka o faa o!” 10 Saŋa na oŋ wa kpɛ Gyɛruzɛlɛm na, a teŋkpɛŋ noba zaa da iri arɛɛ ba gbɛɛŋ, a yele ka: “Nembuo la ŋa?” 11 A nembeɛoŋ da yele ka: “Daŋyele Yezu naŋ yi Naazɛrɛ naŋ be Galili teŋɛ na la!” 14 Ane meŋ, zɔnne ane gbɛrɛɛ da wa la o zie a ŋmenpuoredie poɔŋ, oŋ da saŋ ba baaloŋ ko ba. 15 Saŋa na a ŋmenpuore wedeɛreba ane a sɛgsɛgreba naŋ da nyɛ a yelseɛlɛ na oŋ e na ane a bidɔɔbilii naŋ da kyeerɛ a ŋmenpuoredieŋ a yele ka, “Te puoro sɔrɔ boŋ, faa Deevid Bidɔɔ na!” ba suuri da iree la 16 beŋ la baŋ da yelko Yezu ka: “Ho woŋee yɛlɛ na a noba ŋa naŋ yele?” Ka Yezu deɛ yelko ba ka: “Ɛɛ. Ka lɛ yɛ ba kanne a yɛlɛ ŋa bee, ‘Ho vɛŋɛɛŋ ka pugibo yire bibiiri ane bilɛɛre nɔɛ pooreŋ’?” 17 O da bare baŋ kyɛ gaa, o da yi gaa la Bɛtane teŋkpoŋ na, a te gaŋ be zisoɔree saŋa.