Yel-iriwulaa

21 N da nyɛɛ sazu paalaa ane teŋgaŋ-paalaa; a sazu koroo ane a teŋgaŋ-koroo na da tɔle wa gaaɛ la, a mane da ba lɛ bebe. 2 N da nyɛɛ a teŋkpɛŋ naŋ e forifori na meŋ, Gyɛruzɛlɛm Paalaa na, oŋ yi Naaŋmen zie sazuŋ a sigre waana, a nare o meŋɛ aŋa pɔgpaalaa naŋ su bonveɛle a ko o serɛ. 3 Beŋ la maŋ da woŋ kɔkɔkpeɛŋaa kaŋa naŋ yire a nakogi zieŋ a yele: “Nyɛ! Naaŋmen kpeɛbo zie be la nensaaleba zieŋ, o na kpeɛrɛ ne baŋ, ka ba e o noba. Naaŋmen meŋ na be la ba zieŋ. 4 O na eɛrɛɛ nentaŋ zaa bare ba nimieŋ, kũũ koŋ la kyebe, woore, konni, ane kpɛlle ŋmeɛbo koŋ la bebe. A na e la yelkorɔ naŋ pare wa gaa.” 5 Neɛ naŋ zeŋ a nakogi zuŋ na da yeleeŋ ka: “Nyɛ! N maala la bonzaa ka a na e paalaa.” O lɛ yelka: “Sɛge, bonso a yelbie ama taa la dɛlebo a e yelmeŋɛ meŋ.” 10 Azuŋ, o da de la a vooroŋ soŋ kpeɛ̃o na de maŋ gaaneŋ taŋkpoŋ kaŋa naŋ do yaga zaa zu, a da wuli ma a Gyɛruzɛlɛm teŋkpɛŋ naŋ e forifori na naŋ yi Naaŋmen zie sazuŋ a sigre waana 11 o taa la Naaŋmen gyeremɛ. O da nyegrɛɛ o zaa aŋa kusi-nyegraa naŋ nyegrɛ yaga zaa, aŋa Gyasepa kuuri naŋ nyegrɛ a pɛle o zaa fanana.