Matio

5 Saŋa na oŋ da wa nyɛ a nembeɛoŋ na, o da do la a taŋazu; saŋa na oŋ da wa zeŋ baare na, o potuuribo na da wa la o zie. 2 Beŋ la oŋ da yuo o noɔre a piili wulo ba yɛlɛ, a yele: 3 “Noba naŋ boɔrɔ Naaŋmen nimizeɛ̃ taaɛ popeɛloŋ, bonso ba naŋ so a sazu Naaloŋ na. 4 “Noba naŋ kono na taaɛ popeɛloŋ, bonso ba na nyɛ la sukyiridii. 5 “Noba naŋ waa sumaaroŋ deme taaɛ popeɛloŋ, bonso ba na di la a teŋgane kyɛŋ. 6 “Noba naŋ mɔɔrɔ ba mɔɔbo zaa a tuuro Naaŋmen bege na taaɛ popeɛloŋ, bonso ba na nyɛɛ maaloo yaga. 7 “Noba naŋ zoro nembaaloŋ taaɛ popeɛloŋ, bonso ba na zo la ba meŋ nembaaloŋ. 8 “Sukyiri-peɛlaa deme taaɛ popeɛloŋ, bonso ba na nyɛ la Naaŋmen. 9 “Noba naŋ waana neŋ emmaaroŋ taaɛ popeɛloŋ, bonso ba na boɔle baŋ ka Naaŋmen biiri. 10 “Noba ba naŋ dɔgrɔ ba, ba naŋ e nemmenne zuŋ taaɛ popeɛloŋ, bonso a sazu Naaloŋ na e la ba soobu. 11 “Bana na noba naŋ toorɔ, a dɔgrɔ ba, a kyɛ yele yelfa-boorɔ zaa dɔglɔ ba N zuŋ taaɛ popeɛloŋ. 12 Yɛ taa popeɛloŋ a nyagna yaga zaa, bonso yɛ kyɔɔtaa e la kpoŋ sazuŋ, lɛ ka ba da dɔgrɔ a Naaŋmen daŋyelba naŋ da de yɛ weɛ. 13 “Yɛnee la a tendaa nyɛnnoo, kyɛ ka nyɛnnoo noɔ̃ wa yi, wala baŋ na e ka a noɔ̃ leɛ wa? A koŋ lɛ taa tɔnɔ zaa, azuŋ, ba maŋ de aŋ lɔɔ bare yeŋeŋ ka noba neɛrɛ. 14 “Yɛnee la a tendaa kyaanee. Teŋkpɛŋ naŋ are taŋazuŋ koŋ baŋ sɔgle. 15 Ka nobaŋ wa kyɔŋ fentelɛ, ba ba maŋ de peɛ pɔgoo, kyɛ ba maŋ de o la dɔgle fentendaa zuŋ oŋ e kyaanee a ko a die deme zaa. 16 Lɛ zuŋ, yɛ vɛŋ ka yɛ kyaanee a kyãã ko noba, ka lɛ vɛŋ ka ba nyɛ yɛ tonveɛle a de pugibu a ko yɛ Saa naŋ be sazuŋ. 17 “Yɛ ta teɛre ka N waɛŋ ka N sãã a Bege kyɛbee a Daŋyelba yelyelii. N ba wa ka N saaŋaa bare, kyɛ N waɛŋ ka N paalaa. 18 Yelmeŋɛ zaa ka N yele korɔ yɛ, a na e la mɔlɔ ka sazu ane a tendaa tɔle wa gaa a gaŋ ka yelbi-yenaa naŋ be a Bege poɔŋ le teŋɛŋ, a te ta saŋa na yelzaa naŋ na wa te nyɛ eebo. 19 Azuŋ, neɛzaa naŋ zagre ka o tu a Naaŋmen nɔɛ yelbi-bile ŋa kaŋa zaa, a kyɛ wulo o taaba meŋ ka ba erɛ lɛ, na waa la nembile a sazu Naaloŋ noba zaa poɔŋ. Kyɛ neɛzaa naŋ sagra Naaŋmen nɔɛ, a kyɛ lɛ wulo o taaba meŋ ka ba erɛ lɛ, na waa la neŋkpoŋ a sazu Naaloŋ noba zaa poɔŋ. 20 Yelmeŋɛ ka N yele korɔ yɛ, ka yɛ yelmennoŋ ba gaŋ a bege wulwulibo ane a Faraziimine, yɛ daŋ koŋ baŋ kpɛ a sazu Naaloŋ poɔŋ. 21 “Yɛ woŋeeŋ ba naŋ da yelko a takoreŋ saŋa noba: ‘Ta ko neɛ, kyɛ neɛzaa naŋ ko neɛ, ba na de o la gaaneŋ a dantorii sɛrɛɛdiibu zie.’ 22 Kyɛ maaŋ yele korɔ yɛ, ba na de la neɛzaa naŋ kyɛnɛ taa sutoloŋ neŋ o yɔɔ gaaneŋ a dantorii sɛrɛɛdiibu zie; ka neɛŋ yeli yel-bayelii a kyaare o yɔɔ, aseŋ ka ba de o soba gaaneŋ a sɛrɛɛdiibu ziiri zaa Zikpoŋ; neɛzaa meŋ naŋ to o yɔɔ ka, ‘Boŋ laanee ŋa!’ ba na de la o soba lɔɔ eŋ Gɛhena vũũ zele na poɔŋ. 23 “Ka hooŋ de ho kyɔɔtaa waana neŋ a sareka iribo zie, a teɛre ka ho yɔɔ kaŋa taa boŋ neŋ posaanaa, 24 bare ho kyɔɔtaa na a sareka iribo zie kyɛ gaa. Daŋ gaa ka ho ne ho yɔɔ na te maale taa sɛre kyɛ ka ho pãã leɛ wa a sareka iribo zie a wa iri ho sareka na. 25 “Vɛŋ ka ho ne neɛ naŋ taa yelbawoŋtaa sɛgre yɛlɛ wieoŋ, saŋa na yɛ naŋ be soriŋ a gɛrɛ a sɛrɛɛdiibu zie, ka lɛ naane, o na de bo la ko a sɛreŋmaara, ka a sɛreŋmaara meŋ de bo ko a nempɔgedie toŋtonɔ, ka o de bo lɔɔ eŋ nempɔgedie poɔŋ. 26 Yelmeŋɛ ka N yele korɔ yɛ, ho koŋ yi a nempɔgedieŋ a te ta saŋa na hoŋ na yɔɔ a sane zaa baare. 27 “Yɛ woŋeeŋ ka ba da yeli: ‘A ba seŋ ka neɛzaa sãã kultaa.’ 28 Kyɛ N yele korɔ yɛŋ, neɛzaa naŋ kaara pɔge lɛɛŋ a te taa peɛ̃mo vɔlaa koo saaŋɛɛ kultaa ne a pɔge o sukyiriŋ. 29 Ka ho duluŋ nimiriŋ vɛŋ ka ho erɛ yelfaare, nyɔgoo logri iri, a de o lɔɔ bare. Bonso, a na somaŋ yaga ka ho kɔŋ ho eŋdaa ziyenaa kaŋa a gaŋ baŋ na de ho eŋdaa zaa lɔɔ eŋ Gɛhena poɔŋ. 30 Ane meŋ, ka ho nuduluŋ wa vɛŋ ka ho erɛ yelfaare, nyɔgoo ŋmaa, a de o lɔɔ bare. Bonso, a na somaŋ yaga ka ho kɔŋ ho eŋdaa ziyenaa kaŋa a gaŋ baŋ na de ho eŋdaa zaa lɔɔ eŋ Gɛhena poɔŋ. 31 “Yɛ daŋ woŋeeŋ ka ba yelka: ‘Neɛzaa naŋ bare o pɔge, aseŋ ka o koo kultabare gane.’ 32 Kyɛ N yele korɔ yɛŋ ka, neɛzaa naŋ bare o pɔge ka peɛ̃mo toma yoŋ zuŋ naane yuo la sori ko a pɔge ka o sãã kultaa, dɔɔ zaa meŋ naŋ de pɔge o serɛ naŋ bare saaŋɛɛ kultaa. 33 “Yɛ lɛ woŋeeŋ baŋ da yelko a takoreŋ saŋa noba ka: ‘A ba seŋ ka neɛ pɔ a kyɛ zagre ka o tu lɛ na oŋ pɔ na, kyɛ aseŋ ka yɛ maŋ iri yɛ pɔrɔ zaa ko Jehoova.’ 34 Kyɛ N yele korɔ yɛŋ ka: Yɛ ta wa poɔrɔ togitogi, yɛ ta wa poɔrɔ sazu, bonso beŋ ka Naaŋmen nakogi be; 35 yɛ ta wa poɔrɔ a tendaa meŋ, bonso o e la Naaŋmen gbɛɛ biŋ zie; yɛ ta wa poɔrɔ Gyɛruzɛlɛm meŋ, bonso o e la a Nakpɛŋ teŋkpɛŋ. 36 Yɛ ta wa poɔrɔ yɛ zuri, bonso yɛ koŋ baŋ leɛre yɛ zukɔɔloŋ kaŋa ka o e pelaa bee sɔglaa. 37 Vɛŋ ka ho ‘Ɛɛ’ e ɛɛ, a vɛŋ ka ho ‘Ai,’ meŋ e ai, a yi a yɛlɛ ama puoreŋ, yelzaa hoŋ na yel dɔgle yi la a neŋfaa zie. 38 “Yɛ woŋeeŋ ka ba da yelka: ‘Ka neɛŋ wa ŋmare ho nimiri, aseŋ ka ho meŋ ŋmare o nimiri, ka neɛŋ wa kɔɔ ho nyenee, aseŋ ka ho meŋ kɔɔ o nyenee.’ 39 Kyɛ N yele korɔ yɛŋ: Yɛ ta wa tuoro neŋfaa neŋ taawae, kyɛ soba na zaa naŋ fale ho duluŋ lampɛgreŋ, leɛ a gɔɔ meŋ koo ka o fale. 40 Ka neɛŋ boɔrɔ ka o de bo gaaneŋ sɛrɛɛdiibu zie a te faa ho kpar-bile, de ho kpar-kpoŋ meŋ koo; 41 ka neɛ kaŋa naŋ taa kpeɛ̃o wa fere bo ka ho tuo o boma a kyɛŋ maali yenaa, tuo a boma ka ho ne o kyɛŋ maali ayi. 42 Yɛ maŋ ko neɛzaa naŋ sɔrɔ yire yɛ zie, ka neɛŋ wa yɛ zie a boɔrɔ pɛmmo, yɛ ta wa mɔnnɔ o soba. 43 “Yɛ woŋeeŋ ka ba da yeli: ‘Aseŋ ka ho nɔnɔ ho tɔsoba, a kyɛ kyiire ho dɔndɔmɔ.’ 44 Kyɛ N yele korɔ yɛŋ: Yɛ naŋ kyɛnɛ nɔnɔ yɛ dɔndɔnne a kyɛ puoro korɔ noba naŋ dɔgrɔ yɛ, 45 ka lɛ vɛŋ ka yɛ wuli ka yɛ waa la yɛ Saa naŋ be sazu biiri, bonso o maŋ vɛmeŋ ka ŋmenaa puri ko neŋfaare ane nemmenne zaa, a vɛŋ ka saa mi eŋ nemmenne ane neŋfaare zaa. 46 Ka yɛneeŋ nɔnɔ noba naŋ nɔnɔ yɛ, boŋ saŋyɔɔ la ka yɛ na nyɛ? Lɛ naane ka a zuyɔɔ-derebɛ meŋ erɛ bee? 47 Ka yɛneeŋ maŋ puore yɛ yɔɔmine yoŋ, bo yelkpoŋ la ka yɛ erɛ gaŋ yɛ taaba? Lɛ naane ka a noba naŋ ba e Gyuu noba maŋ erɛ bee? 48 Aseŋ ka yɛ paale, aŋa lɛ na yɛ sazu Saa naŋ paale na.