Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane
© 2025 Watch Tower Bible and Tract Society of Pennsylvania
MAY 5-11
BAABOLE POƆ YELNIMIZEERE YENG YELIBIE 12
Ho Na Baŋ Nyɛɛ Tɔnɔ Yaga Zaa Yi Ho Tonkpeɛne Poɔŋ
w16.06 30 wɛl. 6
Teŋ Na Taa Gyog-Sonne Seɛ La Kusi-Nyegree
A na baŋ eɛ kpeɛŋaa ko Jehoova puorebiiri mine ka ba nyɛ boma yɛlɛ naŋ ferɛ ba ba zemmo poɔŋ. Kyɛ ba ba maŋ yɔ boɔrɔ sori naŋ ba soma ka ba tu kyɛ nyɛ ba yelfɛree kyɛ ba maŋ toŋ la tonkpeɛne a na toɔ̃ kaa ba yideme. Naaŋmen puorebiiri maŋ wuliŋ ka ba de la Naaŋmen gyogo naŋ la yelmennoŋ aneŋ o gyogri naŋ kyɛre na tegroŋ yaga zaa a gaŋ eŋgannoŋ poɔ boma.—Yeng. 12:24; Efe. 4:28.
w15 2/1 5 wɛl. 4-6
Yɛlɛ Naŋ Na Baŋ Soŋ Bo Ka Ho Taa Popeɛloŋ Ho Toma Poɔŋ
Ka teneeŋ wa teɛre a baaraa soorebiri na yɛlɛ, a na soŋ teŋ ka te nyɛ lɛ noba naŋ maŋ nyɛ tɔnɔ yi te tonkpeɛne poɔŋ, lɛ na vɛŋeŋ ka te taa popeɛloŋ. Yezu meŋɛ da yeleeŋ ka: “Neɛ naŋ terɛ taaɛ popeɛloŋ yaga a gaŋ neɛ naŋ derɛ.” (Toma 20:35) Aneazaa ka te dadi taaba ane noba naŋ de te ba toma zieŋ maŋ nyɛɛ tɔnɔ yi toma na te naŋ tonɔ na poɔŋ, kyɛ noba mine meŋ maŋ la nyɛɛ tɔnɔ yi te tonkpeɛne na poɔŋ. A na noba ŋa mine la te meŋɛ yideme ane noba naŋ boɔrɔ sommo.
Te meŋɛ yideme. Ka booree zudaanaŋ wa tonɔ tonkpeɛne ka o kaara o yideme zu, ba maŋ nyɛɛ tɔnɔ soe ayi mine poɔŋ. A dɛndɛŋ soba, o maŋ vɛŋeŋ baŋ nyɛ ba eŋgannoŋ poɔŋ yelfɛree aŋa, bondirii, bonsuurii ane gaazie. Naaŋmen ko la booree zudaana zaa ferebo toma ka o maŋ “kaa o meŋɛ [yideme].” (1 Timoti 5:8) A yiiloŋ soba, ka booree zudaanaŋ tonɔ tonkpeɛne a maŋ eɛ ewuli soŋ yaga a kyaare lɛ a naŋ e nimizeɛ ka te tonɔ tonkpeɛne. Shane te naŋ yel o yɛlɛ a zannoo naŋ pare na poɔŋ yeleeŋ ka, “N saa eɛ neɛ naŋ e ewuli soŋ a ko ma a kyaare tonkpeɛne tommo. O zemmo kpoŋ zie zaa kapenta toma la oŋ toŋ, o da e la dɔɔ naŋ taa yelmennoŋ o toma zaa poɔŋ. A yi o ewuli soŋ na poɔŋ, N zannɛɛŋ ka N maŋ de N nuuri maale neŋ boma naŋ na baŋ soŋ noba ba zemmo poɔŋ.”
Noba naŋ boɔrɔ sommo. A bitontona Pɔɔl da yelko la o Kristabitaaba na ka ba maŋ “tonɔ tonkpeɛne . . . ka lɛ vɛŋ ka [ba] taa bonkaŋa a de soŋ noba naŋ be awonaa poɔŋ.” (Efesu 4:28) Yelmeŋɛ la, ka teneeŋ tonɔ tonkpeɛne a toɔnɔ kaara te menne ane te yideme, lɛ na baŋ vɛŋeŋ ka te toɔ̃ soŋ noba naŋ be awonaa poɔŋ. (Yeng Yelibie 3:27) Azuŋ tonkpeɛne na baŋ vɛŋeŋ ka te yuoro te nu a korɔ te taaba boma, ka lɛ vɛŋ ka te taa popeɛloŋ.
Baabole Poɔ Yelsonne
ijwyp zannoo yɛlɛ 95 wɛl. 10-11
N Maŋ Vɛŋeŋ Ka Yelkpeɛne N Naŋ Tuoro Dɔnnɔ Ma Te Gaali Bee?
● Ka hooŋ wa tuore yelkpeɛŋaa kaŋa teɛre a yɛlɛ gaa tɔɔre kyɛ erɛ yelzaa. Zanne lɛ hoŋ na baŋ e baŋ wɛltaa naŋ be yelkpeɛne naŋ e nimizeɛ ane a na na yɛlɛ naŋ ba e nimizeɛ yaga. A Baabole yeleeŋ ka: “Damboli maŋ wulee o sukpeɛŋaa dayeni, kyɛ neɛ aŋ baŋ o meŋɛ taabo maŋ pɔgɛɛ olo.” (Yeng Yelibie 12:16) Yelkpeɛne zaa hoŋ na tuore naaneŋ seŋ ka ho maŋ vɛŋ ka a dɔnnɔ bo te gaali.
“N sakuu poɔ, ka yelbile kaŋaŋ wa e N taaba na maŋ tagɛɛ a yɛlɛ lɛɛŋ. Ka ba taaba naŋ be intanɛt zuŋ wa are ba puoriŋ a maŋ vɛŋeŋ baŋ maaleŋ tagra a yɛlɛ yaga zaa, aŋ vɛŋ baŋ ba maŋ toɔ̃ teɛre yɛlɛ gaa tɔɔre kyɛ erɛ yɛlɛ.”—Joanne.
MAY 12-18
BAABOLE POƆ YELNIMIZEERE YENG YELIBIE 13
Ta Vɛŋ Ka ‘Neŋfaare Fentena’ Bɛnle Bo
it-2 196 wɛl. 2-3
Fentena
Soe Mine Teŋ Maŋ La De O Toŋ Toma. Bon na naŋ maŋ kyaaŋ nensaalaa sori na la baŋ de are ko fentena. Yelbigree na yeng yelibie naŋ de toŋ neŋ toma na wulee tɛɛtɛɛ naŋ be sontuuribo aneŋ neŋfaare kpakyagaŋ, be yeleeŋ ka: “Sontuuribo kyaanee maŋ kyaanaŋ aneŋ nyegroo, kyɛ neŋfaare fentena na kpiŋ.” (Ye 13:9) Sontuuribo fentena maŋ kyaanaŋ wagre zaa, kyɛ wagre mineŋ a maŋ waa ŋa neŋfaare fentena naŋ kyaana yaga zaa, ka ba eŋgannoŋ poɔ yɛlɛ nyɛrɛ nimitɔɔre gaabo soŋ zaa meŋ. Kyɛ a baaraa zaa Naaŋmen na vɛŋeŋ ka ba baare ligroŋ poɔŋ, beŋ la oŋ na ŋmɛ gbɛre a le. A toɔrɔ ŋa la na pɔge neɛ naŋ pɔrɔ ennɛ o saa ane o ma ka faaloŋ pɔge ba.—Ye 20:20.
Ka neɛ ‘fentenaŋ kpi’ lɛ meŋ la wuleeŋ ka o soba ba taa nendaarekaŋa tamaa zaa. Yeng yelbie kaŋa lɛ yeleeŋ ka: ‘Neŋfaare ba taa nendaarekaŋa tamaa. Neŋfaare fentena na kpiŋ.’—Ye 24:20.
w12 7/15 12 wɛl. 3
Puoro Naaŋmen Na Naŋ Korɔ Someŋɛ
3 Ka Setaanaŋ toɔ̃ bɛnle nensaaleba bayi naŋ pɛgeyi aneŋ malekere mine ka ba zagre Naaŋmen kpeɛ̃o, lɛ wuleeŋ ka o na baŋ bɛnlɛɛ te meŋ. O bɛnlɛ soe na naŋ ba leɛre. O maŋ boɔrɔŋ ka o bɛnle te ka te teɛrɛ ka Naaŋmen sowuli eɛ kpeɛŋaa a kyɛ maŋ sãã te popeɛloŋ ane emmaaroŋ meŋ. (1 Gyn. 5:3) A teɛroŋ ŋa na baŋ nyɛɛ kpeɛ̃o yaga zaa te eŋɛŋ ka te naŋ kyɛllɛ wonaa. Te yɔɔpɔge kaŋa naŋ nyɛ yuomo 24 naŋ da de o meŋɛ eŋ peɛ̃mo toma poɔŋ yeleeŋ ka, “zɔmeŋ-faare tuubu da sãã maŋ yaga zaa, bonso N da zoree dabeɛ̃ ka N vɛŋ ka N taaba na baŋ ka N taa la teɛroŋ yuo a kyaare peɛ̃mo toma.” Aminekaŋaŋ ho meŋ tuoree a yɛlɛ ŋa taa.
w04 7/15 31 wɛl. 6
“Nimiyuoro Maŋ E La O Yelzaa Yɛŋ Poɔŋ”
Nimiyuoro naŋ e sontuuro naŋ maŋ erɛ yelzaa yɛŋ poɔŋ, na nyɛ la maaloo. Soolomoŋ yeleeŋ ka: “Sontuuro maŋ diŋ ka o eŋɛ mãã kyɛ neŋfaa poɔ na taa la kɔŋ.” (Yeng Yelibie 13:25) Jehoova la baŋ yɛlɛ naŋ soma ko te te zemmo poɔŋ, a yi te booree zemmo yɛlɛ, te neŋ te taaba laŋ kpeɛbo yɛlɛ, te naaŋ moɔloo toma kyɛbee saŋa na baŋ wa ko te dɛnnoo. Ka teneeŋ de kawane zaa naŋ be a Baabole poɔŋ tonɔ neŋ toma, te na taa la zeŋ laafeɛ te zemmo poɔŋ.
Baabole Poɔ Yelsonne
it-2 276 wɛl. 2
Nɔmmo
Nɔmmo naŋ ba e meŋɛ. Sɛre ka neɛ na baŋ taa nɔmmo meŋɛmeŋɛ aseŋ ka o bɔ yɛŋ a yi Naaŋmen Yelbiri na poɔŋ, a kyɛ vɛŋ ka Naaŋmen vooroŋ soŋ na wuluu sori. Aŋa mannoo poɔŋ, bidɔgrɔ maŋ taa la nɔmmo naŋ e zuluŋ ko o bie. Kyɛ ka onaŋ ba kaa soŋ a nɔmmo na baŋ sããŋeŋ ka lɛ vɛŋ ka o maŋ korɔ o bie na bonzaa o naŋ yelka o boɔrɔŋ, ka a yɛlɛ gbaŋ ba fɛre. Aminekaŋaŋ lɛ na vɛŋeŋ o koŋ maŋ korɔ o bie na dɛnnoo ane to-tage ka a naŋ seŋ ka o e lɛ. (Ye 22:15) Noba mine maŋ de la a nɔmmo ŋa erɛ neŋ pɔloo, kyɛ a lɛ eebo ba wulo nɔmmo meŋɛ. A Baabole yeleeŋ ka, neɛ naŋ erɛ a yɛlɛ ŋa ba wulo nɔmmo kyɛ haabo la ka o taa ko o bie na, bonso a lɛ eebo na baŋ vɛŋeŋ ka o bie na kɔŋ o nyɔvore.—Ye 13:24; 23:13, 14.
MAY 19-25
BAABOLE POƆ YELNIMIZEERE YENG YELIBIE 14
Maŋ Teɛre A Yɛlɛ Ŋa Yɛlɛ Soŋ Saŋa Na Saammo Kpoŋ Kaŋa Naŋ Wa Wa
w23.02 22-23 wɛl. 10-12
De Nyɔvore Naŋ E Kyɔɔtaa Naŋ Yi Naaŋmen Zie Na Tegroŋ
10 Wagre mineŋ, yɛlɛ na mine naŋ maŋ e na eɛ yɛlɛ teŋ koŋ baŋ e yelzaa kyaaraa. A na yɛlɛ na mine la saammo bɛrɛ, baaloŋ lɔnnaa, ane zɔɔre. Kyɛ ka ana yɛlɛ ŋa taaŋ wa e, te na baŋ eɛ yɛlɛ mine a soŋ faa te nyɔvoɛ. A mine la teŋ na maŋ sage sowuli a kyaare curfew, a zo yi ziiri ba naŋ yelka te zo yi na, ane saŋa na baŋ wa de sowuli ko te a kyaare yel-uraa kaŋa na. (Uro. 13:1, 5-7) Te menne na baŋ nyɛŋ ka a yɛlɛ ŋa mine na eŋ, azuŋ te maŋ mɔɔrɔ ka te tu sowuli na a paaloŋ nembɛrɛ naŋ de korɔ te na ka lɛ soŋ te ka te nare te menne ko saammo bɛrɛ. Aŋa mannoo poɔŋ, te na baŋ bɔ la koɔ̃, bondirii naŋ koŋ baŋ sãã ane tẽẽnɛɛ biŋ.
11 Bo aŋ seŋ ka te e ka baaloŋ lɔnnaa kaŋaŋ wa iri zie na te naŋ kpeɛrɛ na? Aseŋ ka te de yel-ure sowuli tonɔ neŋ toma, a mine la teŋ na maŋ pɛgrɛ te nuure, a kyɛ ta peɛlɛ noba, kyɛ maŋ pɔge te noɔre neŋ te nyebɔge ane saŋa na baŋ wɛl te yoŋ eŋ die poɔŋ. Lɛ na teŋ na mɔɔrɔ te moɔbo zaa ka te de a yɛlɛ ŋa tonɔ neŋ toma na wuliŋ ka, te de la nyɔvore ka o eɛ kyɔɔta tegroŋ naŋ yi Naaŋmen zie.
12 Yel-uraa saŋa, te zɔmenne, te kpeɛreŋ taa ane noba naŋ be intanɛt zuŋ maŋ yelee yɛlɛ naŋ ba e yelmeŋɛ. Azuŋ a ba seŋ ka te sage “yelzaa” te naŋ woŋ di, kyɛ aseŋ ka te maŋ kyɛllɛ duoro naŋ yi a gɔmenante ane laafeeloŋ toŋtoneba zie naŋ taa dɛlebo. (Kanne Yeng Yelibie 14:15.) A Lantaa Zukaareba aneŋ bɛɛtil zukaareba maŋ mɔɔ la ba mɔɔbo zaa ka ba bɔ duoro naŋ be dɛlebo, sɛre kyɛ de sowuli a ko te a kyaare te lammore zie gaabo ane a naaŋ moɔloo toma. (Hib. 13:17) Ka teneeŋ wa sagra sowuli, te maŋ go la te menne ane te taaba. Lɛ na baŋ vɛŋeŋ ka a lantaapuoruu taa yo-soŋ a na gbandige na poɔŋ.—1 Pit. 2:12.
Taa Nyaa Aŋa Zeedɔk
11 Ka te yɔɔmineŋ tuoro kũũ neŋ nyɔvore yɛlɛ mine a boɔrɔ te sommo, sobuoŋ teŋ na baŋ tɔgle Zeedɔk nyaa taabo na? (1) Maŋ tuuro sowuli. Ka teneeŋ wa tuoro a yɛlɛ ŋa taa, a maŋ eɛ nimizeɛ yaga zaa ka te taa noɔreyeni. Maŋ tuuro sowuli na ho paaloŋ Bɛɛtil naŋ korɔ yɛ na. (Hib. 13:17) A lantaapuoruu nembɛrɛ seŋ ka ba leɛteɛre neɛzaa sowuli naŋ bebe kyaare lɛ teŋ na baŋ sɛgre te menne ko saammo bɛrɛ, ane lɛ aŋ seŋ ka te e ka saammo kpoŋ kaŋaŋ wa e. (1 Kor. 14:33, 40) (2) Taa nyaa kyɛ kaara ho meŋɛ soŋ. (Yeng. 22:3) Maŋ teɛre yɛlɛ soŋ sɛre kyɛ erɛ yelzaa. Ta bonnɔ erɛ yɛlɛ mine naŋ na baŋ vɛŋ ka ho pere bee a kɔŋ ho nyɔvore. (3) Dɛle Jehoova. Teɛre baŋ ka Jehoova boɔrɔŋ ka ho neŋ ho yɔɔmine zaa taa gomeŋɛ. O na baŋ soŋ boŋ ka ho soŋ ho yɔɔmine kyɛ naŋ nyɛ gomeŋɛ.
Baabole Poɔ Yelsonne
it-2 1094
Teɛrɛ Yɛlɛ Gɛrɛ Tɔɔre
Ka neɛŋ wa teɛrɛ yɛlɛ gɛrɛ tɔɔre saŋa kaŋa noba ba maŋ nɔŋ o soba yɛlɛ. Aminekaŋaŋ lɛŋ vɛŋ ka Yeng Yelibie 14:17 yelka: “Ba maŋ ha la neɛ naŋ maŋ teɛrɛ yɛlɛ gɛrɛ tɔɔre.” Gbɛɛ yaga noba naŋ maŋ zagre ka ba teɛrɛ yɛlɛ gɛrɛ tɔɔre maŋ ha la noba naŋ teɛrɛ yɛlɛ gɛrɛ tɔɔre. Ane meŋ, ba maŋ ha la noba naŋ erɛ yɛlɛ Naaŋmen naŋ boɔrɔ. Aŋa lɛ Yezu naŋ yel na: “N naŋ kaa-iri yɛ yi ne a tendaa noba poɔ, ka yɛ ba la poɔ ba poɔ la so ka a tendaa noba kyiire yɛ.” (Gyn 15:19) Kyɛ a yelbie “teɛrɛ yɛlɛ gɛrɛ tɔɔre” ba naŋ de toŋ neŋ toma Yeng Yelibie 14:17 na, na baŋ lɛ wulee neɛ naŋ taa teɛroŋ faa. Azuŋ a sɛgre ŋa na baŋ lɛ wuliŋ ka, ba maŋ ha la neɛ naŋ teɛrɛ faaloŋ tommo, Baabolehi mine meŋ maŋ yeliŋ ka: “Ba maŋ ha la dɔɔ naŋ teɛrɛ faaloŋ tommo.”—JP, Ro.
MAY 26–JUNE 1
BAABOLE POƆ YELNIMIZEERE YENG YELIBIE 15
Soŋ Ho Taaba Ka Ba Taa Popeɛloŋ
w10 11/15 31 wɛl. 16
Te Na kyɛnɛɛ Yelmennoŋ Poɔŋ!
16 Gyoob da eɛ dɔɔ naŋ yuoro o nu. (Joob 31:31, 32) Zenɛ ŋa, te meŋ na baŋ eɛ lɛ aneazaa ka te ba e bondaaneba, kyɛ te na baŋ wulee “saamma saannoŋ.” (Uro. 12:13) Te na baŋ maalɛɛ bonkaŋa fẽẽ lɛ ka te neŋ te taaba di, kyɛ teɛre baŋ ka “bondirii naŋ e zɛvaare kyɛ ka nɔmmo bebe a seɛ la ba naŋ ko napɔlii naŋ noɔŋ kyɛ ka hataa bebe.” (Yeng. 15:17) Azuŋ ka ho neŋ ho Kristabitɔŋ wa laŋ dire ka nɔmmo bebe a maŋ vɛŋeŋ yɛŋ taa popeɛloŋ, kyɛ yɛŋ eŋ taa faŋa meŋ.
w18.04 23-24 wɛl. 16-18
Yɛ Eŋnɛ Taa Faŋa “Saŋa Na [Yɛ] Naŋ” Nyɛ A Vuo
16 A koŋ soma ka teneeŋ yelka, te koŋ baŋ eŋ te taaba faŋa bonso a maŋ eɛ kpeɛŋaa ka te neŋ te taaba di dama. Yelfẽẽ kaŋa teŋ na e na baŋ eŋ la te yɔɔmine faŋa, aŋa teŋ na more laare saŋa na teŋ wa puoro neɛ kaŋa. Ka o sobaŋ ba la tɔgle te a na baŋ wuliŋ ka yɛlɛ ba kyɛnɛ soŋ. Azuŋ ka teneeŋ wa bɛge toori a kyɛlle woŋ o soba yelyaga a lɛ na baŋ dii la o sukyiri.—Gyi. 1:19.
17 Te yɔɔdɔɔ Henri naŋ e baapaalaa yideme mine naŋ peɛloo ane o saa naŋ e a lantaapuoruu neŋkpoŋ kaŋa naŋ da bare Jehoova puoruu na, o eŋɛ da kyoɔrɛɛŋ. Gbandige zukaara kaŋa da de la Henri gaaneŋ zie baŋ maŋ nyuuro coffee a te emoo faŋa, kyɛ o da kyɛlle woŋ la Henri saŋa na oŋ yele o sukyiri poɔ yelzaa na. Henri da nyɛɛŋ ka o na baŋ soŋ la o yideme na ka ba leɛ wa puoro Jehoova ka onaŋ are kpeɛŋaa a naŋ dire yelmennoŋ. Wagre na oŋ da wa kanne Yieme 46; Zefanaiya 3:17; ane Marko 10:29, 30 na, o da nyɛɛ faŋa emmo a yi a Baabole sɛgre ŋa poɔŋ.
18 Marthe ane Henri yɛlɛ ŋa wuli teŋ ka te zaa na baŋ eŋ la te yɔɔmine faŋa saŋa na baŋ wa boɔrɔ sommo. Naa Soolomoŋ da sɛgɛɛŋ ka: “Yelbiri ba naŋ yeli wagre naŋ seŋ neŋ poɔŋ—nyɛ lɛ a naŋ soma aseŋ! Laare maŋ vɛŋeŋ ka sukyiri nyagna; Duorisoŋ maŋ eŋɛɛ kɔbɔ faŋa.” (Yeng. 15:23, 30.) Ane meŋ ka neɛŋ kanna A Kaakaara Ziduoruu kyɛbee yɛlɛ naŋ be te intanɛt zie na, a na baŋ eŋ la o soba faŋa ka o eŋɛŋ wa kyoɔre. Pɔɔl soŋɛɛŋ teŋ nyɛ ka, ka teneeŋ wa yiele te yieme na a na baŋ eŋ teŋ faŋa. O da yeleeŋ ka: “Yɛ naŋ kyɛnɛ wulo taa, a de yiele eŋnɛ taa faŋa, a pugiro Naaŋmen, a maŋ yiele bareka puoruu yiele a yire yɛ sukyie pooreŋ a korɔ Jehoova.”—Kol. 3:16; Tom. 16:25.
Baabole Poɔ Yelsonne
ijwbq zannoo 39 wɛl. 3
Kristabie Na Baŋ Te Bɔ La Baaloŋ Saŋ Bee?
2. Aseŋ ka N te bɔ baaloŋ saŋ yi ziiri yaga bee? Ka “kawaŋ-terebɛ e yaga” a lɛ na baŋ somaŋ yaga zaa, agaŋaazaa saŋa na teŋ wa taa baaloŋ nimizeɛ kaŋa.—Yeng Yelibie 15:22.
JUNE 2-8
BAABOLE POƆ YELNIMIZEERE YENG YELIBIE 16
Soorebie Ata Naŋ Na Soŋ Bo Ka Ho De Gbɛ-Sonne
w14 1/15 19-20 wɛl. 11-12
De Gbɛ-Sonne Ho Baapaaloŋ Saŋa
11 Te naŋ puoro Jehoova na maŋ ko teŋ popeɛloŋ yaga zaa. (Yeng. 16:20) Kyɛ Gyeremaiya gaŋ sɛgrɛ Baaruk, da innee a yɛlɛ ŋa. A da wa ta la saŋa kaŋa o da ba la taa popeɛloŋ Jehoova toma poɔŋ. Azuŋ Jehoova da yelkooŋ ka: “Ho boɔrɛɛ bonbɛrɛ korɔ ho meŋɛ. Bare a boma ama taa boɔbo. Bonso N waanaŋ ka N de saammo waneŋ nensaaleba zaa zuŋ, . . . zie zaa hoŋ na gaa, N na de la ho nyɔvore ko bo aŋa kyɛŋ bon.” (Jer. 45:3, 5) Ho teɛreŋ ka boŋ naaŋ baŋ vɛŋ ka Baaruk poɔ pɛle? Oŋ na boɔrɔ bonbɛrɛ kyɛbee oŋ na dire yelmennoŋ a nyɛ faabo yi Gyɛruzɛlɛm saammo poɔŋ?—Gyi. 1:12.
12 Te yɔɔdɔɔ Ramiro da nyɛɛ popeɛloŋ saŋa na oŋ tonɔ korɔ o taaba na. O yeleeŋ ka: “N neŋ N yideme yi la teŋbile kaŋa naŋ be Andes Tanne zu. Maŋ de suobu a wa e Jehoova Sieree Deme kaŋa a ba kɔɔre kyɛ ka N beɛre da yelka o na yɔɔ la N university sakuu fees, a da eɛ apoɔsori naŋ e kpoŋ N naŋ nyɛ. Kyɛ a na saŋa na ka paaneɛ kaŋa da toŋboɔle ma ka N wa ka te laŋ toŋ a naaŋ moɔloo toma teŋbile kaŋaŋ. N da gaa la be a te zanne zu-kyeɛbo, azuŋ N da yuo la zu-kyɛ zie beŋ a na toɔ̃ kaara N meŋɛ. Saŋa na teŋ wulo noba a Baabole poɔ yɛlɛ na, noba yaga da sagɛɛ a yɛlɛ. A puoriŋ, N da te poɔ la lantaapuor-paalaa kaŋa naŋ yele a teŋɛ kɔkɔre. N naŋ tonɔ a wagre zaa naaŋ moɔloo toma na yuoŋ pie la ŋa. Toma zaa kyebe a na baŋ ko ma popeɛloŋ a gaŋ a toma ŋa, bonso N sonnɛɛ noba baŋ zanna Jehoova yɛlɛ ba menne kɔkɔreŋ.”
w13 9/15 17 wɛl. 1-3
Ho Toɔ̃ Leɛrɛɛ Ho Eebo Bee?
ZIE na te naŋ baa ane lɛ na ba naŋ guoli te na maŋ nyɛɛ kpeɛ̃o yaga zaa te eŋɛŋ. Te maŋ su la boma, a dire bondirii, a kyɛ maŋ erɛ yɛlɛ lɛ na baŋ guoli te na. Bonso noba naŋ ŋmaa gyeere te ane te zemmo yɛlɛ maŋ nyɛ la kpeɛ̃o te eŋɛŋ.
2 Yɛlɛ mine bebeŋ a e nimizeɛ yaga zaa a gaŋ bondirii te naŋ nɔŋ, aneŋ te bonsuurii. Aŋa mannoo poɔŋ, ba guoli teŋ teŋ maŋ nyɛ yɛlɛ mine ka a somaŋ a tu sori meŋ, kyɛ zagre yɛlɛ mine yɛŋ ka a ba tu sori. Neɛzaa taa la lɛ o naŋ maŋ teɛre kyaare a yɛlɛ ŋa. Gbɛɛ na teŋ maŋ derɛ na na baŋ wulee lɛ yɛlɛ naŋ nyɛ kpeɛ̃o te eŋɛŋ. A Baabole yeleeŋ ka a “nemboore-yobo naŋ ba taa a bege [maŋ] erɛɛ yɛlɛ ne ba yɛŋ aseŋ lɛ a bege naŋ wulo.” (Uro. 2:14) Lɛ wuleeŋ ka ka Naaŋmen ba biŋ bege zaa, te na baŋ tu la yɛlɛ na baŋ de guoli te na aneŋ yɛlɛ na noba naŋ erɛ zie na te naŋ be na bee?
3 Te nyɛ yelnimizeere ayi mine naŋ vɛŋ ka Kristabiiri ba maŋ vɛŋ ka lɛ na noba naŋ erɛ ba yɛlɛ zie na ba naŋ be na nyɛ kpeɛ̃o ba eŋɛŋ. A dɛndɛŋ soba, a Baabole yeleeŋ ka: “Sori kaŋa bebeŋ a waa ŋa o naŋ tori a ko nensaalaa, kyɛ ka o baaraa e kũũ sori.” (Yeng. 16:25) Te naŋ e nensaaleba naŋ ba pɛgeyi na zuŋ, te koŋ baŋ baŋ yɛlɛ naŋ soma a ko te, a kyɛ wuli te menne sori naŋ tori te baare. (Yeng. 28:26; Jer. 10:23) A yiiloŋ soba, a Baabole vɛŋɛɛŋ aŋ pɛle ka yelpaala ane lɛ noba naŋ maŋ erɛ ba yɛlɛ a donɛɛ ŋa poɔŋ na, Setaana naŋ la “a donɛɛ ŋa ŋmene” na nu poɔ la be. (2 Kor. 4:4; 1 Gyn. 5:19) Azuŋ ka teneeŋ boɔrɔ ka Jehoova poɔ pɛlɛ te yɛlɛ kyɛ ka te nyɛ o maaloo, lɛ yɛŋ aseŋ ka te de a Baabole kawane ŋa tonɔ neŋ toma te zemmo poɔŋ Urom 12:2.—Kanne.
Baabole Poɔ Yelsonne
it-1 629
Dɛnnoo
Yɛlɛ Naŋ Maŋ Pɔge Noba Naŋ Sage Wuluu Aneŋ Noba Naŋ Maŋ Zagre Wuluu. Neŋfaare, dambolo aneŋ noba naŋ erɛ yeldɛgɛ wuleeŋ ka ba ba nɔŋ Jehoova dɛnnoo bonso ba zagraaŋ bare kpɛlɛŋkpɛlɛŋ. (Ym 50:16, 17; Ye 1:7) Ba damboli yɛlɛ na maŋ de la dɔgɛɛ yaga zaa waneŋ ba eŋɛŋ. Aŋa lɛ na yeng yelibie naŋ yel na: “Damboloŋ maŋ ko la dambolo dɔgroŋ.” (Ye 16:22) Yɛlɛ aŋ na baŋ pɔge ba la, naŋ, nyaaba, baaloŋ aneŋ kũũ. A Izerayɛl biiri zemmo yɛlɛ vɛŋɛɛŋ teŋ nyɛ lɛ a yɛlɛ ŋa naŋ e yelmeŋɛ aseŋ. Ba da ba maŋ kyɛllɛ wono dɛnnoo aneŋ kawane na a daŋyelba naŋ da maŋ korɔ ba na. A Izerayɛl biiri naŋ da zagre Jehoova dɛnnoo zuŋ, ba da kɔŋ la o maaloo aneŋ o guubu. A baaraa zaa ba da nyɛ la to-tage naŋ e kpoŋ a yi Jehoova zie, azuŋ ba da zɔɔtoɔ̃ baŋ a kyɛ nyɔge ba gaaneŋ gbaŋgbaaloŋ poɔ.—Jr 2:30; 5:3; 7:28; 17:23; 32:33; Ho 7:12-16; 10:10; Zf 3:2.
JUNE 9-15
BAABOLE POƆ YELNIMIZEERE YENG YELIBIE 17
Taa Emmaaroŋ Ho Kultaa Poɔŋ
g 9/14 11 wɛl. 2
Wala Teŋ Na Baŋ E A Ta Maŋ Gbuulo Yɛlɛ Ennɛ Te Poɔŋ?
Peɛre ho meŋɛ soŋ nyɛ. A Baabole soŋ teŋ teŋ nyɛ ka noba ‘suuri naŋ maŋ ire wieoŋ’ ane noba naŋ taa “sutoloŋ” na bebeŋ. (Yeng Yelibie 29:22) A yɛlɛ ŋa kyaare boŋ bee? Soore ho meŋɛ ka: ‘N maŋ gbuulee yɛlɛ eŋ N poɔŋ bee? N suuri maŋ iree wieoŋ bee? N maŋ tagrɛɛ yɛlɛ te gaali bee?’ A Baabole yeleeŋ ka, “neɛ naŋ yele yɛlɛ buyi buyi maŋ wɛlɛɛ zɔmeŋ-sonne.” (Yeng Yelibie 17:9; Ikilisiasitiz 7:9) A yɛlɛ ŋa taa na baŋ eɛ kultaa poɔŋ meŋ. Azuŋ ka hooŋ e neɛ naŋ maŋ gbuulo yɛlɛ ennɛ ho poɔŋ, soore ho meŋɛ ka, ‘Ka lɛ N na baŋ di la kannyiri ko N kultatɔ bee?’—Baabole sowuli: 1 Piita 4:8.
w08 5/1 10 wɛl. 6–11 wɛl. 1
Sɛgre Yelkpeɛne
1. Yɛ bɔ wagre sɛgre a yɛlɛ. “Yelzaa taaɛ o wagre ba naŋ sɛgre biŋ,. . . wagre naŋ seŋ ka ho taŋ ho noɔre ane wagre naŋ seŋ ka ho yel yɛlɛ.” (Ikilisiasitiz 3:1, 7) Aŋa lɛ te naŋ nyɛ na, nɔkpeɛne na baŋ vɛŋeŋ ka neɛ suuri iri yaga zaa. Ka lɛŋ wa e aseŋ ka ho nyɔge ho meŋɛ a “taŋ ho noɔre” ka lɛ ta vɛŋ ka yɛ suuri iri te gaali. Ka hooŋ de a Baabole sɛgre ŋa toŋ neŋ toma, a na soŋ boŋ ka ho neŋ ho kultatɔ taa niiloŋ naŋ soma: “Zɔɔre piilee maŋ waa ŋa ba naŋ yuoro kɔmpiiri bara, sɛre ka a nɔkpeɛne na piili na, yi a zieŋ a gaa.”—Yeng Yelibie 17:14.
Ane meŋ “wagre naŋ seŋ ka ho yel yɛlɛ” meŋ bebeŋ. Nɔkpeɛne maŋ waa ŋa moɔ, ka hooŋ baara a maŋ bulee yaga zaa. Azuŋ ta wa bara a nɔkpeɛne a teɛrɛ ka a na bebeŋ lɛɛŋ a wa mãã. Ka yɛ naŋ bare a yɛlɛ a ba di dama kyaaraa, kyɛ naŋ wulo gyeremɛ korɔ ho kultatɔ na, a mɔɔ kyɛ bɔ wagre ka yɛ di dama kyaare a yɛlɛ. A na yelsɛgraa ŋa na baŋ soŋ la yɛ bayi ka yɛ de a Baabole kawane ŋa toŋ neŋ toma: “Yɛ ta maŋ vɛŋ ka yɛ suuri iri te kpɛ ŋmenaa.” (Efesu 4:26) Azuŋ mɔɔ kyɛ paale noɔre na ho naŋ eŋ na.
Baabole Poɔ Yelsonne
it-1 790 wɛl. 2
Nimiri
Neɛ na baŋ de la o nimie wuli yɛlɛ o naŋ teɛrɛ. A na baŋ wuliŋ ka o soba taa la nembazo kyɛbee o ba taa nembazo (Du 19:13); a soba na baŋ nyigree o nimie a wuli ka o ba nɔŋ neɛ kaŋa yɛlɛ bee o boɔrɔŋ ka o e daware yɛlɛ. (Ym 35:19; Ye 6:13; 16:30) Ka neɛ kaŋaŋ ba boɔrɔ ka o soŋ o tɔ, te na baŋ yeleŋ ka o sɔglɛɛ o nimie. (Mt 13:15; Ye 28:27) A Baabole yeleeŋ ka damboli nimie maŋ yɔ yoɔrɛɛ “teŋgane zaaŋ” weɛ lɛ, a ba baŋ zie o teɛroŋ naŋ be. (Ye 17:24) Neɛ kaŋa nimie waaloŋ na baŋ vɛŋeŋ ka te baŋ o laafeeloŋ, faŋa kyɛbee lɛ o naŋ taa popeɛloŋ a seŋ. (1Sa 14:27-29; Du 34:7; Jb 17:7; Ym 6:7; 88:9) Naa Gyɛhoosafat da yelko la Jehoova ka: “Ho eŋɛŋ ka te nimie be.”—2Tu 20:12.
JUNE 16-22
BAABOLE POƆ YELNIMIZEERE YENG YELIBIE 18
Maŋ Vɛŋ Ka Ho Yelyaga Eŋnɛ Noba Laafeeloŋ Naŋ Ba Paale Faŋa
w22.10 22 wɛl. 17
Yɛŋ Moɔlɔŋ
17 Maŋ teɛre yɛlɛ sɛre kyɛ yele. Ka teneeŋ ba kaara te menne soŋ te yelbie na baŋ perɛɛ te taaba yaga zaa. Lɛŋ vɛŋ ka a Baabole yelka: “Neɛ kaŋa bebe ka o yelyaga waa ŋa soɔ naŋ kyɔgrɔ, kyɛ yɛmbaŋna zele waana neŋ la laafeɛ.” (Yeng. 12:18) Te neŋ noba na baŋ taa la niiloŋ naŋ soma ka teneeŋ ba maŋ yele ba gbɛ-ŋmɛ korɔ te taaba. (Yeng. 20:19) Ka teneeŋ boɔrɔ ka te yelyaga maŋ eŋnɛ te taaba faŋa, aseŋ ka te maŋ kanna Naaŋmen Yelbiri a de bammo na te naŋ nyɛ yi be na tonɔ neŋ toma. (Luk. 6:45) Ka teneeŋ maŋ teɛrɛ yɛlɛ na teŋ zanne yi a Baabole poɔŋ na yɛlɛ gɛrɛ tɔɔre, te yelbie na waa ŋa “yɛŋ koɔ̃bulee” naŋ maŋ vɛŋ ka te taaba eŋɛ mãã.—Yeng. 18:4.
mrt zannoo yɛlɛ 19 daga
Lɛ Teŋ Na Toɔ̃ E Ka Baaloŋ Faa Kaŋaŋ Wa Kpɛ Te Wagre Na Teŋ Ba Kaara Soriŋ
Maŋ kyɛllɛ wono yɛlɛ soŋ. Yelkaŋa teŋ na baŋ e soŋ te zɔmeŋɛ la, ka o naŋ wa boɔrɔ ka o yel yɛlɛ ko te aseŋ ka te kyɛlle woŋ o yelyaga na. Ta maŋ mɔɔrɔ ka ho meŋ yel yelkaŋa wagre zaa o naŋ wa yele yɛlɛ korɔ bo. A na somaŋ ka hoŋ maŋ kyɛllɛ wono kyɛ ta yel yelzaa. Maŋ mɔɔrɔ ka ho teɛre yɛlɛ soŋ, a kyɛ kaara soŋ a ta wa dire o sɛrɛɛ. Ta wa yele ka, ho baŋɛɛ yɛlɛ na poɔ oŋ be agaŋaazaa saŋa na teŋ koŋ baŋ nyɛ o baaloŋ na o eŋɛŋ.—Yeng Yelibie 11:2.
Maŋ yele yɛlɛ naŋ eŋnɛ faŋa. Aminekaŋaŋ ho koŋ baŋ yɛlɛ na a naŋ seŋ ka ho yel, kyɛ hoŋ na yel yelkaŋa a wuli ka ho teɛrɛɛ ho zɔmeŋɛ na yɛlɛ a lɛ na baŋ dii la o sukyiri gaŋ hoŋ koŋ yel yelzaa. Ka hooŋ ba baŋ lɛ zaa hoŋ na yel, ho na baŋ yeleŋ ka, “N ba baŋ lɛ zaa maŋ na yel, kyɛ N boɔrɔŋ ka ho baŋ ka N teɛrɛɛ ho yɛlɛ.” Kaara soŋ a ta wa yelka “Ba na baŋ saŋ la a baaloŋ ŋa yɛŋ” kyɛbee “Ho ba taa . . . ”
Ho na baŋ peɛrɛɛ yɛlɛ a kyaare ho zɔmeŋɛ baaloŋ na yɛlɛ a de wuli ka ho teɛrɛɛ o yɛlɛ. Ka hoŋ zanne o baaloŋ na yɛlɛ a na vɛŋeŋ ka ho yelyaga maŋ emoo faŋa, kyɛ ka o poɔ meŋ pɛle ho naŋ baŋ yɛlɛ na poɔ o naŋ be. (Yeng Yelibie 18:13) Kyɛ kaara soŋ a ta wa koroo kawane kyaare o baaloŋ na yɛlɛ ka onaŋ ba sɔre ho sommo.
Ho na baŋ toŋ la toma mine soŋ. Ta teɛrɛ ka ho baŋɛɛ yɛlɛ hoŋ na baŋ e somoo, kyɛ sooroo yɛlɛ o naŋ boɔrɔ ka ho e koo. Teɛre baŋ ka aminekaŋaŋ ho zɔmeŋɛ na koŋ sage yelka o boɔrɛɛ sommo bonso o ba boɔrɔ ka o leɛ tuobu dɔgle ho zuŋ. Ka lɛŋ wa e, ho na baŋ sooroo nyɛ ka ho na baŋ di la daa wa ko o, a maale o zie bee a toŋ toma mine a ko o bee?—Galesiya 6:2.
Ta wa bala. Wagre mineŋ ho zɔmeŋɛ na baaloŋ zuŋ, o na baŋ vɛŋeŋ ka yɛ bare yɛlɛ mine yɛ naŋ sɛgre biŋ kyɛbee o koŋ boɔrɔ ka o yel yɛlɛ ko bo. Ka a naŋ wa e lɛ, taa yɛlɛ muni wommo aneŋ kannyiri ko o. Naŋ kyɛnɛ koroo sommo naŋ seŋ neŋ.—Yeng Yelibie 18:24.
wp23.1 14 wɛl. 3–15 wɛl. 1
Lɛ Teŋ Na Baŋ E Soŋ Noba Naŋ Taa Teɛroŋ Gyɛre Baaloŋ
“Yele yɛlɛ [naŋ] diire . . . sukyie.”—1 TƐSALONIKA 5:14.
Ho zɔmeŋɛ na eŋɛ na kyerɛŋ bee ka o teɛrɛ ka o ba taa tɔnɔ zaa. Ka hooŋ vɛŋ ka o baŋ ka ho teɛrɛɛ o yɛlɛ, a na baŋ dii la o sukyiri a kyɛ emoo faŋa aneazaa ka ho ba baŋ yɛlɛ hoŋ na yel.
“Zɔmeŋ-soŋ maŋ wulee nɔmmo wagre zaa.”—YENG YELIBIE 17:17.
Ho na baŋ toŋ la toma mine soŋ. Ta teɛrɛ ka ho baŋɛɛ yɛlɛ hoŋ na baŋ e somoo, kyɛ sooroo yɛlɛ o naŋ boɔrɔ ka ho e ko o. Ka a naŋ wa e kpeɛŋaa ko ho zɔmeŋɛ na ka o yelko bo ka o boɔrɛɛ sommo, ho na baŋ vɛŋeŋ ka yɛ laŋ e yɛlɛ mine, yɛ na baŋ laŋ kyɛŋeŋ kyɛbee ho na baŋ di la daa wa ko o, a maale o zie bee a toŋ toma mine a ko o.—Galesiya 6:2.
“Yɛ dire kannyiri.”—1 TƐSALONIKA 5:14.
Kaapɔge wagre zaa naane ka ho zɔmeŋɛ na na maŋ boɔrɔ ka o yel yɛlɛ, azuŋ vɛŋ ka o baŋ ka ka o naŋ boɔrɔ neɛ kaŋa ka o neŋ o di dama ho bebeŋ. Ho zɔmeŋɛ na baaloŋ na zuŋ aminekaŋaŋ o na baŋ yelee yɛlɛ mine bee a e yelkaŋa naŋ na baŋ vɛŋ ka ho poɔ sãã. O na baŋ vɛŋeŋ ka yɛ bare yɛlɛ mine yɛ naŋ sɛgre biŋ kyɛbee ka o yel-eree ire ho suuri, taa yɛlɛ muni wommo aneŋ kannyiri kyɛ koroo sommo naŋ seŋ neŋ.—Yeng Yelibie 18:24.
Baabole Poɔ Yelsonne
it-2 271-272
Bie Lɔɔbo, I
Takoreŋ saŋa na sããkoŋyɛlɛ poɔŋ, ka ba naŋ yɛŋ de gbɛre kaŋa ba da maŋ lɔɔ la bie. Sori na baŋ da maŋ tu kyɛ lɔɔ a bie ŋa la, ba da maŋ de la kusi-bilii kyɛbee dabilii baŋ pɛnne eŋ kparoo bee doge poɔŋ a kyegrikyegri. Neɛ na zaa bon naŋ wa yi le o na la ka a pɔre kaa iri. Bie lɔɔbo waa ŋa pɔre neɛ naŋ maŋ pɔ. Ba da maŋ puoreŋ kyɛbee a e yelkaŋa a wuli ka ba boɔrɛɛ Jehoova sowuli a kyaare yelkaŋa. Bie lɔɔbo (Heb., goh·ralʹ) na baŋ are ko la yɛlɛ ayi, a na la “kyɛŋ” kyɛbee “toɔre.”—Jos 15:1; Ym 16:5; 125:3; Ai 57:6; Jer 13:25.
Lɛ baŋ maŋ de o toŋ toma. Yeng Yelbie 16:33 yeleeŋ ka: “Neɛ gbɛɛ zuŋ baŋ maŋ lɔɔ bie, kyɛ yelzaa naŋ yi be wa yi la Jehoova zie.” A Izerayɛl biiri saŋa na, ba da maŋ lɔɔ la bie a de sɛgre neŋ nɔkpeɛne: “Bie lɔɔbo maŋ vɛŋeŋ ka zɔɔre baare, a maŋ wɛl nemkpeɛne naŋ kyeerɛ taa.” (Ye 18:18) Ba da ba maŋ de a yɛlɛ ŋa deɛnɛ neŋ deɛŋ poɔŋ, bee a ŋmeɛrɛ gbaŋa. Ba da ba maŋ e a yɛlɛ ŋa ka a ŋmenpuore wederebɛ nyɛ libie bee ka ba nyɛ libie a soŋ nembaalba. Kyɛ a Urom sogyare na da taa la bombɔ gaŋneŋ gyogo aŋa lɛ na Yieme 22:18 naŋ yel na, ba da lɔɔ la bie ka ba de Yezu bonsuurii.—Mt 27:35.
JUNE 23-29
BAABOLE POƆ YELNIMIZEERE YENG YELIBIE 19
E Zɔmeŋ-Soŋ A Ko Ho Yɔɔmine
Wala Teŋ Na Baŋ E Ka Nɔmmo Te Naŋ Taa Ko Taa Maaleŋ E Kpeɛŋaa Yaga?
16 Maŋ de ho teɛroŋ eŋ ho yɔɔmine gyog-sonne eŋɛŋ a kyɛ ta maŋ kaara ba gbɛ-ŋmɛ. Te nyɛ yelmannaa ŋa. Te de ka ho neŋ ho yɔɔmine laŋɛɛ taa a pɛlɛ yɛ niŋe. Saŋa na yɛŋ wa pɛle yɛ niŋe baare na yɛŋ laŋ taa ka yɛ ŋmaa foto. Saŋa na yɛŋ wa ŋmaara a foto na, yɛŋ ŋmaa a foto gbɛre bota ka yɛ kaa iri oŋ na naŋ na soma. Kyɛ hoŋ nyɛ ka a foto kaŋa poɔŋ te yɔɔdɔɔ na kaŋa da ba more laare saŋa na yɛŋ da ŋmaara a foto na. Wala hoŋ na e ana foto na? Ho na nyɔgooŋ iri bare bonso a ayi na naŋ kyɛre na, te yɔɔmine na zaa ane a te yɔɔdɔɔ na morɛɛ laare a fotori poɔŋ.
17 Te na baŋ de la a fotori ŋa manne neŋ yɛlɛ te naŋ maŋ de eŋ te teɛroŋ poɔŋ. Te maŋ teɛrɛɛ yelsonne te neŋ te yɔɔmine naŋ laŋ e saŋa kaŋa naŋ pare. Kyɛ te de ka te yɔɔ kaŋa eɛ yelkaŋa bee yelee yelkaŋa a sãã te poɔ saŋa kaŋa na pare. Wala aŋ seŋ ka te e? Aseŋ ka te mɔɔ kyɛ iri ana yɛlɛ na bare te teɛroŋ poɔŋ aŋa lɛ na teŋ iri ana foto na naŋ ba soma bare na. (Yeng. 19:11; Efe. 4:32) Te na baŋ innee yelfẽẽ na te yɔɔ na naŋ e te na bonso, te teɛrɛɛ yelsonne yaga te yɔɔ na naŋ daaŋ e aŋ vɛŋ teŋ taa popeɛloŋ yaga zaa. Ana yelsonne na taa aŋ seŋ ka te maŋ vɛŋ ka a be te teɛroŋ ane te sukyie poɔŋ wagre zaa.
Vɛŋ Ka Nɔmmo Ho Naŋ Taa Ko Jehoova Ane Ho Taaba Maaleŋ Erɛ Kpeɛŋaa
10 Te meŋ maŋ boɔrɛɛ soe teŋ na baŋ tu kyɛ soŋ te Kristabitaaba. (Hib. 13:16) Te la nyɛ Anna zemmo yɛlɛ te naŋ da zanne a zannoo naŋ pare na poɔŋ. Sasekpeɛŋaa kaŋa naŋ da wa baare, o ne o serɛ da gaayɛŋ ka ba te puore booree kaŋa deme, baŋ da gɛrɛ ka a sasekpeɛŋaa vɔgi ba die. Lɛ da vɛŋɛɛŋ ka a booree deme boma zaa da dɛge baŋ ba taa boma na su. Anna yeleeŋ ka: “Te da de la ba bonsuurii na a te pɛge, a neɛŋaa a puuli puulaa, a de gaa te ko ba. A da ba e yelkpeɛŋaa zaa ko te ka te e, kyɛ te naŋ da e lɛ na zuŋ, te neŋ ba zɔmennoŋ eɛ kpeɛŋaa yaga a wa tɔ zenɛ.” Nɔmmo na Anna ane o serɛ naŋ da taa ko ba yɔɔmine na zuŋ ba da soŋ baŋ.—1 Gyn. 3:17, 18.
11 Ka teneeŋ wa wulo nimimaaroŋ ane nɔmmo a korɔ te taaba, ba na nyɛŋ ka te mɔɔrɔŋ ka te tɔglɔ Jehoova. Ba niŋe meŋ na paŋ yaga zaa ane nimimaaroŋ na te naŋ wulo ba na. Te yɔɔpɔge Khanh te naŋ yel o yɛlɛ a piilee saŋa na poɔ maŋ pɛleŋ yaga zaa, ka o naŋ wa teɛre lɛ o taaba mine naŋ da soŋ o na. O yeleeŋ ka: “N puoree te yɔɔpɔgeba na zaa naŋ da maŋ de ma teŋ gaa a naaŋ moɔloo bareka. Ba da maŋ wa de maŋ N dieŋ teŋ yi gaa te di bondirii, a kyɛ leɛ te sigri ma N dieŋ. Pampana ŋa, N nyɛɛŋ ka a da ba maŋ e mɔlɔ fẽẽ zaa ka ba e a yɛlɛ ŋa ko ma. Kyɛ ba da maŋ eɛ lɛ neŋ popeɛloŋ.” Yelmeŋɛ la, neɛzaa naaneŋ na puore te bareka ka teneeŋ wa e yelsoŋ kaŋa ko ba. Ŋaa ka Khanh yelkyaare bana naŋ da soŋ o na: “A naaŋ e maŋ noɔ̃ ka maaŋ da naaŋ baŋ e yelkaŋa a leɛ yɔɔ sane ko bana zaa naŋ da wuli ma nimimaaroŋ na, kyɛ N ba baŋ zie ba zaa naŋ kpeɛrɛ. Kyɛ Jehoova yɛŋ baŋɛɛŋ, azuŋ N puore sɔre la ka Jehoova ko ba zaa maaloo.” Yelmeŋɛ ka Khanh yel. Jehoova maŋ nyɛɛ yelfẽẽ zaa te naŋ e ka te wuli nimimaaroŋ ko te taaba, ka anaŋ gbaŋ e fẽẽ seŋ wala. O maŋ nyɛŋ ka a eɛ sareka naŋ e kpoŋ yaga zaa a e sane meŋ oŋ na leɛ yɔɔ ko te.—Kanne Yeng Yelibie 19:17.
w21.11 9 wɛl. 6-7
Yɛ Naŋ Kyɛnɛ Taa Yelmeŋɛ Nɔmmo Korɔ Taa
6 Zenɛ ŋa ka neɛŋ wa de yuomo yaga a tonɔ toma zie kaŋaŋ, te maŋ yeleŋ ka o e la tontona naŋ taa yelmennoŋ. Kyɛ aminekaŋaŋ a yuomo na zaa o naŋ tonɔ toma a toma zieŋ na, o daŋ ba nyɛ a toma zie nembɛrɛ kaŋa zaa. Wagre zaa naane meŋ ka o neŋ ba maŋ laŋ teɛroŋ a kyaare a toma sowuli. O ba nɔŋ a toma kyɛ o naŋ nyɛrɛ libie yire be na zuŋ oŋ taa popeɛloŋ a toma poɔŋ. Azuŋ o na toŋ la a lɛ toma na lɛɛŋ te gaa pension, kyɛ ka onaŋ nyɛ toŋ-yuo naŋ na ko o are-zikpɛŋ, o na barɛɛ a toma.
7 Tɛɛtɛɛloŋ naŋ be yelmennoŋ aneŋ yelmeŋɛ nɔmmo aŋa te naŋ nyɛ o wɛlbo 6 poɔŋ na, kyaarɛɛ o soba teɛroŋ o naŋ taa. A Baabole poɔŋ, bo teɛroŋ la ka Naaŋmen puorebiiri da maŋ taa kyɛ wulo yelmeŋɛ nɔmmo korɔ ba taaba? Noba na naŋ da wulo yelmeŋɛ nɔmmo na da maŋ eɛ lɛ neŋ ba poɔ zaa, a ba waa ŋa a naŋ seŋ ka ba e lɛ zuŋ la, kyɛ ba da maŋ yi la ba sukyie zaa a e lɛ. Te nyɛ Deevid zemmo yɛlɛ. O da yi la o sukyiri zaa a wuli yelmeŋɛ nɔmmo ko o zɔmeŋɛ Gyoonataŋ o naŋ nɔŋ yaga zaa aneazaa ka Gyoonataŋ saa da boɔrɔŋ ka o koo. Yuomo mine puoriŋ, saŋa na Gyoonataŋ naŋ wa kpi na kyɛ Deevid da naŋ wulee yelmeŋɛ nɔmmo korɔ Gyoonataŋ bidɔɔ Mefiiboset.—1 Sam. 20:9, 14, 15; 2 Sam. 4:4; 8:15; 9:1, 6, 7.
Baabole Poɔ Yelsonne
it-1 515
Kawane, Kawaŋ-Terɛ
Jehoova la yɛŋ zaa daana, neɛzaa kyebe a taa yɛŋ a gaŋ o. Azuŋ neɛzaa kyebe a na baŋ ko o kawane meŋ. (Ai 40:13; Ur 11:34) O Bidɔɔ na waa la “Kawaŋ-Terɛ Naŋ Waa Seɛlee,” a maŋ terɛ kawane aneŋ sowuli, bonso o maŋ de la sowuli na o naŋ maŋ nyɛ yi o Saa zieŋ na tonɔ neŋ toma kyɛ taa o Saa vooroŋ soŋ na. (Ai 9:6; 11:2; Gyn 5:19, 30) Azuŋ ka te naŋ meŋ na baŋ tere kawane ka a soma yaga zaa, aseŋ ka te de Jehoova kawane tonɔ neŋ toma. Kawane zaa naŋ ba yi Jehoova zie ba taa tɔnɔ, a koŋ baŋ soŋ te meŋ.—Ye 19:21; 21:30.
JUNE 30–JULY 6
BAABOLE POƆ YELNIMIZEERE YENG YELIBIE 20
Boŋ Na Baŋ Soŋ Dɔɔ Neŋ Pɔge Naŋ Tuuro Taa Ka Ba De Gbɛ-Soŋ
Ka Dɔɔ Neŋ Pɔgeŋ Wa Tuuro Taa Boŋ Na Baŋ Soŋ Ba Ka Ba Tutaa Na Baare Soŋ?
3 Aneazaa ka dɔɔ neŋ pɔge tutaa na baŋ vɛŋeŋ ka ba taa popeɛloŋ, kyɛ aseŋ ka ba teɛre ka a eɛ yelnimizeɛ bonso ba na baŋ tu la be a kpɛ kultaa poɔ. Ba kultaa bebiri, a dɔɔ neŋ a pɔge maŋ eŋɛɛ noɔre ko taa Jehoova nimitɔɔreŋ ka ba na nɔnɔ la taa a kyɛ wulo gyeremɛ korɔ taa ba zemmo zaa poɔŋ. Sɛre ka neɛ na eŋ noɔre zaa na, aseŋ ka o soba teɛre a yɛlɛ gaa tɔɔre soŋ. (Kanne Yeng Yelibie 20:25.) Lɛ meŋ la a kultaa nɔ-eŋ na. Dɔɔ neŋ pɔge tutaa maŋ soŋ la a dɔɔ ane a pɔge baŋ baŋ taa soŋ aŋ soŋ ba baŋ de gbɛ-soŋ. Saŋa kaŋa ba maŋ de la gbɛre ka ba na kulee taa, saŋa kaŋa meŋ ba maŋ de la gbɛre ka ba na barɛɛ ba tutaa na. Ka dɔɔ neŋ pɔgeŋ wa bare ba tutaa na lɛ ba wuli ka ba eɛ yelfaa kaŋa. Lɛ zaa naŋ la ba tutaa na soŋ baŋ baŋ de gbɛ-soŋ.
4 Noba naŋ ba kpɛ kultaa poɔ seŋ ka ba baŋ ka, ka dɔɔ neŋ pɔgeŋ wa piili tuuro taa lɛ wuleeŋ ka ba boɔrɔŋ ka ba wa baŋ taa soŋ, a nyɛ ka ba na baŋ kpɛ la kultaa poɔ bee. Ka ba naŋ baŋ lɛ, ba koŋ vɛŋ ka ba neŋ neɛ kaŋa ba naŋ baŋ ka ba neŋ o soba koŋ kultaa piili tuuro taa. Kyɛ noba naŋ ba kpɛ kultaa poɔ yoŋ naaneŋ seŋ ka ba baŋ a yɛlɛ ŋa. Te zaa seŋ ka te baŋ ananso dɔɔ neŋ pɔge naŋ maŋ tuuro taa. Aŋa mannoo poɔŋ, noba mine maŋ teɛrɛŋ ka ka dɔɔ neŋ pɔgeŋ wa tuuro taa ferebo la ka ba kultaa. Sobuo ka a yɛlɛ ŋa na baŋ e ferebo a ko Kristabiiri naŋ ba kpɛ kultaa poɔ? Te yɔɔpɔge Melissa naŋ ba kpɛ kultaa poɔ a be United States paaloŋ yeleeŋ ka: “Ka te yɔɔdɔɔ ane te yɔɔpɔge kaŋaŋ wa piili tuuro taa te yɔɔmine maŋ kaarɛɛ soriŋ ka ba kultaa. A maŋ vɛŋeŋ ka ba mine naŋ kyɛnɛ be a tutaa poɔŋ, aneazaa ka ba baŋɛɛŋ ka ba koŋ baŋ kultaa. Ka ba mine meŋ maŋ zagre ka ba kpɛ dɔɔ neŋ pɔge tutaa poɔŋ. Lɛ na baŋ vɛŋeŋ ka teɛroŋ gyɛre kpɛ ba mine.”
Wala Hoŋ Na Toɔ̃ E Nyɛ Kultatɔ Naŋ Soma?
8 Wala hoŋ na toɔ̃ e a mãã ho meŋɛ a kaara neɛ kaŋa ho naŋ boɔrɔ yel-eree soŋ? A Kristabiiri lammore zieŋ, ane saŋa na te yɔɔmine naŋ wa lantaa ka ba pɛle ba nimiri na, ho na baŋ nyɛɛ lɛ a soba neŋ Jehoova niiloŋ naŋ e kpeɛŋaa seŋ, o gyogri ane o yel-eree. Nembobo la o zɔmenne ka bo yɛlɛ ka o dama diibu maŋ kyaare? (Luk. 6:45) Yɛlɛ ho naŋ de biŋ ho nimitɔɔreŋ ane yɛlɛ o meŋ naŋ de biŋ o nimitɔɔreŋ yi la taa bee? Ho na baŋ soorɛɛ o lantaapuoruu nembɛrɛ o yɛlɛ bee Kristabiiri mine naŋ kyile a bamoo soŋ. (Yeng. 20:18) Ho na baŋ soorɛɛ gyogri o soba naŋ taa ane lɛ o naŋ waa ka neɛzaa baŋoo. (Ruut 2:11) Ka hooŋ wa kaara a soba yel-eree kaara soŋ a ta wa e yelzaa naŋ na vɛŋ ka a soba poɔ sãã. A koŋ soma ka ho maŋ boɔrɔ ka ho be a soba zieŋ wagre zaa bee a boɔrɔ ka ho baŋ yelzaa a kyaare a soba.
Ka Dɔɔ Neŋ Pɔgeŋ Wa Tuuro Taa Boŋ Na Baŋ Soŋ Ba Ka Ba Tutaa Na Baare Soŋ?
7 Wala hoŋ na baŋ e a wa baŋ o soba soŋ yaga zaa? Sori na kaŋa hoŋ na baŋ tu kyɛ e lɛ la ka ho maŋ soorɔ o soba soorebie, a kyɛ maŋ kyɛlle soŋ ka o sobaŋ wa yele yɛlɛ. Aseŋ ka yɛ maŋ yel yɛlɛ na meŋɛ naŋ be yɛ sukyieŋ ko taa. (Yeng. 20:5; Gyi. 1:19) Azuŋ yɛ na baŋ bɔ la soe mine yɛŋ na baŋ tu a nyɛ a vuo a di dama. Aŋa mannoo poɔŋ, yɛ na baŋ laŋ di la bondirii, a laŋ kyɛŋ gaa zie kaŋa, bee a laŋ gaa a naaŋ moɔloo. Ka yɛ neŋ yɛ zɔmenne meŋ maŋ wa laŋ erɛ yɛlɛ yɛ na baŋ nyɛɛ a vuo ka yɛ baŋ taa soŋ. Ho neŋ o soba na baŋ laŋ eɛ yɛlɛ mine naŋ na soŋ bo ka ho nyɛ lɛ a soba naŋ maŋ erɛ o yɛlɛ ka o naŋ wa tuore yɛlɛ mine bee ka o naŋ wa be noba mine poɔŋ. Aschwin naŋ be Netherlands paaloŋ wulee lɛ oŋ da maŋ e. Ŋaa oŋ yelkyaare o neŋ Alicia tutaa na: “Te da maŋ bɔ la yɛlɛ mine teŋ na baŋ laŋ erɛ ka lɛ vɛŋ ka te baŋ taa soŋ. Gbɛɛ yaga a yɛlɛ ŋa da maŋ eɛ yelbilii bilii mine teŋ da maŋ erɛ, aŋa mannoo poɔŋ, te da maŋ laŋ maalɛɛ bondirii bee a laŋ pɛge laare. Ana yɛlɛ ŋa taa da maŋ soŋ teŋ teŋ baŋ yɛlɛ te kaŋa zaa naŋ baŋ eebo ane yɛlɛ te naŋ ba baŋ eebo.”
8 Ka yɛneeŋ maŋ laŋ zanna Baabole meŋ a na soŋ yɛŋ ka yɛ baŋ taa soŋ. Ka yɛneeŋ wa kultaa baare, aseŋ ka yɛ bɔ wagre e yɛ booree zannoo, lɛ na vɛŋeŋ ka Naaŋmen yɛlɛ e nimizeɛ yɛ kultaa na poɔŋ. (Ikil. 4:12) Azuŋ yɛ maŋ bɔ wagre a zanne a Baabole saŋa ŋa yɛ naŋ tuuro taa na. Yelmeŋɛ la, ka nobaŋ wa tuuro taa, ba naŋ ba e kultaa deme sɛre, a dɔɔ meŋ naŋ ba e a booree zudaana sɛre. Kyɛ ka yɛneeŋ maŋ laŋ zanna boma gbɛɛ yaga, a na soŋ yɛŋ ka yɛ baŋ lɛ yɛ kaŋa zaa neŋ Jehoova niiloŋ naŋ e kpeɛŋaa seŋ. Max ane Laysa naŋ e kultaa deme naŋ be United States paaloŋ da nyɛɛŋ ka a yɛlɛ ŋa soŋ baŋ. Max yeleeŋ ka: “Te tutaa piilee saŋa na te da maŋ zannɛɛ gama naŋ kyaare dɔɔ neŋ pɔge tutaa yɛlɛ, kultaa yɛlɛ, ane booree zemmo yɛlɛ. Teŋ da maŋ zanna ana yɛlɛ ŋa taa na da maŋ soŋ teŋ teŋ di dama kyaare yelnimizeere mine naŋ da naaŋ e kpeɛŋaa ko te ka te yel a yɛlɛ.”
Baabole Poɔ Yelsonne
it-2 196 wɛl. 7
Fentena
Aŋa lɛ na Yeng Yelibie 20:27 naŋ yel na, “nensaalaa vooroŋ waa ŋa Jehoova fentena, a maŋ peɛrɛ yelsɔglaa zaa naŋ be nensaalaa sukyiriŋ.” Neɛ yel-eree bee o yelyaga la maŋ wuli neɛ na meŋɛ o naŋ waa o sukyiriŋ aneŋ gyogo o naŋ taa.—De manne Tm 9:1.