Neŋnyaane—Yɛ Na Baŋ Soŋɛɛ A Lantaapuoruu Yaga Zaa
“Ka maaŋ wa leɛteɛre yɛlɛ na zaa maŋ da maŋ toɔ̃ e N baapaaloŋ saŋa na, N noɔre zaaŋ maŋ mãã. Kyɛ, pampana ŋa N nyaaŋɛɛŋ, N koŋ baŋ lɛ e yɛlɛ yaga.”—Connie, o nyɛɛ yuomo 83.
Aminekaŋaŋ, nyaammo vɛŋɛɛŋ hoŋ meŋ koŋ baŋ lɛ e yɛlɛ mine. Aneazaa ka ho deɛ yuomo yaga a puore neŋ Jehoova yelmennoŋ poɔŋ, kyɛ ka hooŋ de yɛlɛ na hoŋ da maŋ toɔ̃nɔ erɛ korɔ Jehoova saŋa naŋ pare na manne neŋ yɛlɛ na hoŋ maŋ toɔ̃ e pampana na, ho eŋɛ na baŋ kyoɔreŋ. Aŋa mannoo poɔŋ, ka hooŋ ba kaa soŋ ho na baŋ de la yɛlɛ na hoŋ erɛ zenɛ na manne neŋ yɛlɛ na hoŋ da maŋ toɔ̃ e saŋa kaŋa naŋ pare na. Ka hooŋ be a yɛlɛ ŋa poɔŋ, boŋ na baŋ soŋ bo ka ho taa popeɛloŋ?
YƐLƐ JEHOOVA NAŊ BOƆRƆ KA HO ERƐ
Soore ho meŋɛ ka, ‘Bo ka Jehoova boɔrɔ ka N erɛ?’ Yɛlɛ naŋ be Duturoonomi 6:5 na baŋ dii la ho sukyiri. Be yeleeŋ ka: ‘Aseŋ ka ho nɔnɔ Jehoova ho Naaŋmen neŋ ho sukyiri zaa, ane ho nyɔvore zaa, ane ho faŋa meŋ zaa.’
Aŋa lɛ na a Baabole sɛgre naŋ wuli na, Jehoova boɔrɔŋ ka ho nɔmoo neŋ ho sukyiri, nyɔvore ane ho faŋa zaa. A yɛlɛ ŋa na baŋ soŋ boŋ ka ho ta de ho meŋɛ manna neŋ ho taaba, kyɛbee a de yɛlɛ na hoŋ da toɔ̃nɔ erɛ saŋa kaŋa naŋ pare na manna neŋ yɛlɛ na hoŋ erɛ pampana na.
Teɛre a yɛlɛ ŋa: Saŋa na hoŋ da e baapaalaa na, wala hoŋ da tonɔ korɔ Jehoova aseŋ? Jehoova puorebiiri yaga zie zaa na yeliŋ ka, ba da moɔrɛɛ ba moɔbo zaa. Saŋa na ho meŋ naŋ da e baapaalaa na, ho meŋ da moɔrɛɛ ho moɔbo zaa a tonɔ korɔ Jehoova. Bo toma hoŋ toɔ̃nɔ tonɔ korɔ Jehoova? Ka hooŋ teɛre a yɛlɛ soŋ, ho na nyɛŋ ka aneazaa ka ho zemmo leɛrɛɛŋ, kyɛ ho naŋ moɔrɛɛ ho moɔbo zaa Jehoova toma poɔŋ. Ka hooŋ taa a teɛroŋ ŋa, a na soŋ boŋ ka ho nyɛ ka ho naŋ moɔrɛɛ ho moɔbo zaa Jehoova toma poɔŋ aŋa lɛ na hoŋ da erɛ saŋa kaŋa naŋ pare na. Ho da moɔrɛɛ ho moɔbo zaa saŋa kaŋa naŋ pare, pampana ŋa meŋ, ho naŋ moɔrɛɛ ho moɔbo zaa.
Saŋa na hoŋ da e baapaalaa na, ho da tonɛɛ ho faŋa bogiŋ a korɔ Jehoova, pampana ŋa ho leɛ la neŋnyaaŋaa, kyɛ ho naŋ tonɛɛ ho faŋa bogiŋ korɔ Jehoova
HO NA BAŊ DE LA HO ZEMMO YƐLƐ SOŊ HO TAABA
Yelkaŋa meŋ naŋ na baŋ soŋ bo la ŋa. Aminekaŋaŋ, hoŋ e neŋnyaaŋaa na zuŋ, ho na baŋ piili teɛrɛŋ ka yɛlɛ yaga bebeŋ hoŋ koŋ baŋ e. Kyɛ, yɛlɛ naŋ bebe la ka, ho na baŋ deɛ bammo na hoŋ taa na soŋ ho taaba. Aŋa Kristabie naŋ e neŋnyaaŋaa, yɛlɛ bebeŋ hoŋ na baŋ e pampana, kyɛ saŋa na hoŋ da e baapaalaa na ho koŋ baŋ e a na yɛlɛ na. Aŋa mannoo poɔŋ, ho na baŋ eɛ a yɛlɛ ama:
Ho na baŋ de la ho zemmo yɛlɛ soŋ ho taaba. Teɛre a Baabole sɛgre ŋa yɛlɛ soŋ a nyɛ:
Naa Deevid: ‘N daaŋ eɛ bipɔlee kyɛ ŋaaŋ yɛŋ N korɛɛŋ, kyɛ N naŋ ba nyɛ Daana naŋ zagre neŋsoŋ. N ba nyɛ o biiri naŋ sɔrɔ siimaa meŋ.’—Yiem. 37:25.
Joosua: ‘Nyɛ, zenɛ ŋa N waanaŋ ka N kpi. Yɛ baŋɛɛŋ yɛ sukyieŋ neŋ yɛ nyɔvoɛ zaa poɔŋ ka yelsonne na zaa Jehoova yɛ Naaŋmen naŋ yeli a yɛlɛ na, yelyenaa zaa ba le. A zaaŋ wa paale ko yɛ. Yelbiri bonyeni zaa ba le.’—Joos. 23:14.
Aminekaŋaŋ, ho meŋ daaŋ yelee a yɛlɛ ŋa mine. Yɛlɛ na Deevid neŋ Gyoosua naŋ de ba nimie nyɛ yuomo yaga poɔŋ la baŋ da manna a yɛlɛ. Azuŋ, yɛlɛ na baŋ da yele na da eɛ yelmeŋɛ.
Ka hooŋ de yuomo yaga a puore neŋ Jehoova, ho meŋ na baŋ mannɛɛ maaloo na hoŋ nyɛ ko ho taaba. Ho teɛrɛɛ saŋa kaŋa Jehoova naŋ soŋ o yelmeŋɛ puorebiiri sori kaŋa naŋ e seɛlee poɔŋ bee? Ho na baŋ mannaaŋ ko ho taaba. A na baŋ eŋ baŋ faŋa aŋa lɛ na aŋ eŋ bo faŋa na. Ka hooŋ manne lɛ na hoŋ puore Jehoova yelmennoŋ poɔŋ ko ho taaba, a na eŋ baŋ faŋa yaga zaa.—Uro. 1:11, 12.
Ka hooŋ na toɔ̃, maŋ gaa a lammozie a Kristabiiri lammo saŋa. Lɛ na yuo la sori ko bo ka ho eŋ ho yɔɔmine faŋa. A na yuo la sori ko ho yɔɔmine meŋ ka ba eŋ bo faŋa. Connie lɛ yeleeŋ ka: “Ka maaŋ wa gaa a lammozie, N maŋ nyɛɛ faŋa emmo yaga. N yɔɔmine maŋ wulo maŋ nɔmmo a Lammozie, azuŋ N eŋɛ ba maŋ kyoɔre. N maŋ de la kyɔɔta-bilii bilii ko ba a de wuli N nimipa. Lɛ maŋ vɛŋeŋ ka N neŋ N yɔɔmine eŋ taa faŋa a lammozieŋ.”
JEHOOVA NIŊE PAALƐƐ YƐLƐ NA ZAA HOŊ E KOO NA
Ka hooŋ kaa a Baabole poɔŋ, ho na nyɛŋ ka noba mine da bebeŋ a koŋ baŋ e yɛlɛ yaga, kyɛ Jehoova da nɔŋɛɛ ba yɛlɛ. A neɛ ŋa kaŋa la Siimiyoŋ. O da eɛ Izerayɛl dɔɔ nyaaŋaa naŋ da bebe saŋa na baŋ dɔge Yezu na. Ka Siimiyoŋ wa gaa a ŋmenpuoredie, aminekaŋaŋ o da maŋ nyɛɛ baapaalba naŋ tonɔ tonkpeɛne. Bo ka Siimiyoŋ meŋ pãã na baŋ e? Nensaaleba teɛroŋ poɔŋ yɛŋ, Siimiyoŋ na baŋ teɛrɛŋ ka oŋ e neŋnyaaŋaa na zuŋ, o ba e neŋtegroŋ Jehoova nimitɔɔreŋ. Kyɛ, ana teɛroŋ na naane ka Jehoova da taa kyaare Siimiyoŋ. Jehoova nimitɔɔreŋ, Siimiyoŋ da waa la “nemmeŋɛ naŋ puoro Naaŋmen ne o poɔ zaa.” Jehoova da ko oŋ maaloo a vɛŋ oŋ nyɛ Yezu saŋa na oŋ naŋ e bilɛɛ. Jehoova vooroŋ soŋ na da soŋɛɛ Siimiyoŋ oŋ manne daŋyelbo kaŋa a kyaare yɛlɛ naŋ na pɔge a Mɛzaaya nendaare kaŋa. (Luk. 2:25-35) Jehoova da ba de o teɛroŋ eŋ Siimiyoŋ nyaammo na eŋɛŋ, kyɛ o da deɛ o teɛroŋ eŋ o sagediibu naŋ e kpeɛŋaa, ka a “vooroŋ soŋ da be o zie” na eŋɛŋ.
Jehoova da ko la Siimiyoŋ apoɔsori oŋ nyɛ Yezu saŋa na oŋ naŋ e bilɛɛ, a da lɛ somoo oŋ manne daŋyelbo yɛlɛ a kyaare a Mɛzaaya
Yelmeŋɛ la, yɛlɛ mine bebeŋ hoŋ koŋ baŋ lɛ e. Kyɛ ho na baŋ sagediŋ peɛlaaŋ ka Jehoova niŋe paalɛɛ toma na zaa hoŋ toŋ koo na. A Baabole yeleeŋ ka: “Naaŋmen na sage de la a yɛ kyɔɔtaa a seŋ bon yɛ naŋ taa ka yɛ tere; a ba e bon neɛ naŋ ba taa eŋɛ.” (2 Kor. 8:12) A teɛroŋ ŋa ka Jehoova taa kyaare bo.
Azuŋ, de ho teɛroŋ eŋ yɛlɛ na hoŋ na baŋ e eŋɛŋ. Aŋa mannoo poɔŋ, ho na baŋ deɛ ho meŋɛ eŋ a naaŋ moɔloo poɔŋ, haali ka a naŋ e wagre fẽẽ lɛ. Ho na baŋ kɔɔlɛɛ neɛ kaŋa, kyɛbee a sɛge yɛlɛ eŋ gane poɔ a de toɔle neɛ kaŋa a emoo faŋa. A yelbilii bilii ŋa na vɛŋeŋ ka ho yɔɔmine baŋ ka ho nɔŋ baŋ. Ka ba naŋ wa baŋ ka neɛ kaŋa naŋ de yuomo yaga a puore neŋ Jehoova la erɛ a yɛlɛ ama korɔ ba, ba poɔ maŋ pɛleŋ yaga.
Aneazaa ka yɛlɛ mine bebeŋ yɛŋ koŋ baŋ e, kyɛ yɛ na baŋ eɛ yɛlɛ yaga ko Jehoova. Ho na baŋ kannɛɛ te yɔɔpɔge naŋ be Africa paaloŋ kaŋa zemmo yɛlɛ naŋ be a daga yelzu naŋ la “Te Yɔɔpɔge Kaŋa Deɛ A Baabole Poɔ Yɛlɛ Faa Neɛ Kaŋa Nyɔvore.”
Teɛre ka, ho sagediibu neŋ ho yelmennoŋ na na baŋ eŋɛɛ ho taaba faŋa. Ho eɛ ewuli soŋ a kyaare kannyiri diibu meŋ. Ho na baŋ sagediŋ peɛlaaŋ ka ‘Naaŋmen waa la meŋɛ soba naŋ nyɛrɛ a ho tonsonne ho naŋ tonɔ korɔ a nensonne ane a nɔmmo ho naŋ wuli ba a Naaŋmen zuŋ aŋa ho naŋ naŋ kyɛnɛ erɛ lɛ.’—Hib. 6:10.
MOƆRƆ HO MOƆBO ZAA A SONNƆ HO TAABA
Yelpeɛre wuleeŋ ka dɔɔ nyaane neŋ pɔge nyaane naŋ moɔrɔ a sonnɔ ba taaba maŋ taaɛ laafeeloŋ naŋ soma, teɛroŋ soŋ, ane nyɔvo-tɔɔre.
Te baŋɛɛŋ ka tonsonne koŋ baŋ iri yelkpeɛne na zaa hoŋ tuoro ho nyaammo saŋa na bare. Te eɛ noba naŋ nyɛ faaloŋ yi Adama zieŋ. (Uro. 5:12) Naaŋmen Naaloŋ na yoŋ la na baŋ iri nyaammo neŋ kũũ bare.
Kyɛ, toma na zaa yɛŋ tonɔ korɔ Jehoova, a sonnɔ noba ka ba wa baŋ Jehoova na na vɛŋeŋ ka yɛ teɛretɔ na e kpeɛŋaa, a vɛŋ ka yɛ taa laafeeloŋ naŋ soma meŋ. Neŋnyaane, te boɔrɔŋ ka yɛ baŋ peɛlaaŋ ka Jehoova niŋe paalɛɛ toma na zaa yɛŋ tonɔ koroo na. A lantaapuoruu noba meŋ niŋe paalɛɛ yɛ sagediibu ewuli soŋ na.