Wala Aŋ Seŋ Ka Kristabie Maŋ Erɛ O Yɛlɛ?​—Wala Ka A Baabole Yelkyaare A Yɛlɛ Ŋa?

Zenɛ ŋa noba yaga maŋ yeleŋ ka Kristabiiri la ba, kyɛ ba maŋ erɛɛ ba taa yelfaare. Ba mine eɛ noba naŋ maŋ boɔrɔ ba yoŋ boma, ba ba taa yelmennoŋ a ba maŋ wulo nimimaaroŋ. Ba mine maŋ yi la ba kultatɔ puoriŋ a te sãã kultaa. Lɛ na baŋ maŋ erɛ ba yɛlɛ na maŋ vɛŋeŋ ka noba mine teɛrɛ ka: ‘Wala aŋ seŋ ka Kristabie maŋ erɛ o yɛlɛ?’

Lɛ aŋ seŋ ka Kristabie erɛ o yɛlɛ

A maŋ eɛ moɔlɔ ka neɛ yelka o e la Kristabie. Kyɛ a lɛ yoŋ ba seŋ. Aŋa lɛ na a Baabole naŋ yeli na, Kristabie e la neɛ naŋ e Yezu Krista potuuro. (Toma 11:26) Yezu meŋɛ da yeleeŋ ka: “Ka yɛnee wa sage de a N yɛlɛ a ba leɛrɛ puori, yɛ sereŋ waa la N potuuribo.” (Gyɔɔn 8:31) A yelmeŋɛ la ka neɛzaa kyebe a na baŋ tu Yezu noɔre te baare nɛnɛ. Kyɛ aseŋ ka Kristabie mɔɔ o mɔɔbo zaa ka o sagra Yezu wuluu a kyɛ maŋ de a tonɔ neŋ toma o zemmo poɔŋ bebiri zaa, ka o naŋ wa boɔrɔ ka o de gbɛre kaŋa. Hoŋ nyɛ a yɛlɛ mine.

Kristabiiri maŋ wulee nɔmmo meŋɛmeŋɛ

Yɛlɛ Yezu naŋ yeli: “N eŋnɛ la nɔpaalaa korɔ yɛ, yɛ nɔnɔ taa. Aŋa N naŋ da nɔŋ yɛ lɛ, yɛ meŋ nɔnɔ taa. A ŋaa zie la ka neɛzaa na baŋ ka yɛ waa la N potuuribo, ka yɛnee wa nɔnɔ taa.”​—Gyɔɔn 13:34, 35.

Yɛlɛ Yezu naŋ e: Yezu da wuleeŋ ka o nɔŋ la nensaaleba zaa lɛ na zaa ba zemmo na be. O da saŋ la noba naŋ beɛrɛ, a ko noba siimaa saŋa na kɔŋ naŋ kpɛ ba, a kyɛ da de o nyɔvore yɔɔdeɛ nensaaleba zaa.​—Matio 14:14-21; 20:28.

Lɛ Kristabiiri naŋ maŋ erɛ ba yɛlɛ: Kristabiiri maŋ wulee nɔmmo meŋɛ a korɔ ba taa a yuoro ba nu a sonnɔ ba taa, a kyɛ maŋ vɛnɛ korɔ ba taa meŋ. Ba maŋ sonnɛɛ noba naŋ boɔrɔ sommo, a kyɛ maŋ e siri ka ba de ba boŋ nanee iri sareka a soŋ ba taa.​—1 Gyɔɔn 3:16.

Kristabiiri maŋ taa la yelmennoŋ

Yɛlɛ Yezu naŋ yeli: “Maa la a. . . yelmeŋɛ.”​—Gyɔɔn 14:6.

Yɛlɛ Yezu naŋ e: Yezu da taa la yelmennoŋ a yi o yelzaa oŋ da maŋ erɛ. O daŋ ba bɛnle noba baŋ e yɛlɛ o naŋ boɔrɔ bee a yele yɛlɛ naŋ ba e yelmeŋɛ. O da taa la yelmennoŋ, a lɛ zuŋ noba yaga da ba nɔŋ o yɛlɛ.​—Matio 22:16; 26:63-67.

Lɛ Kristabiiri naŋ maŋ erɛ ba yɛlɛ: Kristabiiri ba ŋmaara zirii. Ba maŋ yɔ la ba zuyɔɔ, ba ba zuuro meŋ, ka ba naŋ wa tonɔ toma ba maŋ tonɔ neŋ ba sukyiri zaa. (Urom 13:5-7; Efesu 4:28) Ba ba faara ba taa, a fiŋle saŋa na baŋ wa sɛgrɛ exams bee a ŋmaa zirii eŋ ba toma gama poɔŋ ane gama mine naŋ kyaare ba.​—Hiburu 13:18.

Kristabiiri maŋ wulee nimimaaroŋ

Yɛlɛ Yezu naŋ yeli: “Yɛ wa N zie, yɛ bana na zaa naŋ bale a tuo tuo-tegrɛ a gore, N na ko yɛ la pɛnnoo. Yɛ de N yoki na yɛre a tɔglɔ ma, N e la sukyirimaaroŋ ane sigrimeŋɛ soba, yɛ na nyɛɛ pɛnnoo a ko yɛ menne. Bonso N yoki yɛroo e la mɔlɔ, ka N tuobu meŋ ba e tegroŋ.”​—Matio 11:28-30.

Yɛlɛ Yezu naŋ e: Yezu da waa la nimimaaroŋ soba kyɛ da maŋ e bɔin ka lɛ da vɛŋ ka neɛzaa naŋ baŋ gaa o zie. O da nɔŋ la bibiiri, a maŋ soŋ noba sukyie naŋ dɔnnɔ ba a kyɛ maŋ wulo o taaba gyeremɛ.​—Marko 10:13-15; Luka 9:11.

Lɛ Kristabiiri naŋ maŋ erɛ ba yɛlɛ: Kristabiiri maŋ yelee yɛlɛ neŋ gyeremɛ korɔ ba taa; ba ba maŋ yele potu-yɛlɛ korɔ ba taa. (Efesu 4:29, 31, 32) Ba maŋ teɛrɛɛ ba taa yɛlɛ a maŋ boɔrɔ sori baŋ na baŋ tu kyɛ soŋ ba.​—Galasiya 6:10.

Kristabiiri maŋ dire la yelmennoŋ korɔ ba kultatɔ

Yɛlɛ Yezu naŋ yeli: “Bon na Naaŋmen naŋ de lantaa, neɛzaa ta wɛlaataa.”​—Marko 10:9.

Yɛlɛ Yezu naŋ e: Aneazaa ka Yezu da ba de pɔge kyɛ o da eŋ la kultaa deme faŋa ka ba dire yelmennoŋ korɔ taa. (Matio 19:9) O da kpãã la noba a kyaare bon naŋ na ba sãã kultaa.​—Matio 5:28.

Lɛ Kristabiiri naŋ maŋ erɛ ba yɛlɛ: Kristabiiri maŋ kaarɛɛ ba menne soŋ ka ba ta e yelzaa naŋ ba wulo gyeremɛ korɔ ba kultatɔ. (Hiburu 13:4) Kultaa deme maŋ erɛ yɛlɛ korɔ taa nɔmmo aneŋ gyeremɛ soriŋ.​—Efesu 5:28, 33.