Vɛŋ Ka Sagediibu Ho Naŋ Taa Jehoova Lantaapuoruu Na Eŋɛŋ Maaleŋ E Kpeɛŋaa

1. Dɛndɛŋ Kristabiiri saŋa na sobuo ka Jehoova da tu kyɛ sɛgre o puorebiiri na puoruu yɛlɛ?

KA JEHOOVAŊ ko o noba toma ka ba toŋ, o maŋ kaarɛɛ soriŋ ka ba sɛgre ba menne soŋ a toŋ a toma. (1 Kor. 14:33) Aŋa mannoo poɔŋ, a eɛ Naaŋmen boɔbo ka ba manne a duorisoŋ a donɛɛ lombori zaa. (Mat. 24:14) Jehoova da kaa iree Yezu ka o kaara a toma zu. Yezu meŋ mɔɔ la o moɔbo zaa a sɛgre a toma yɛlɛ soŋ zaa ka a toma nyɛrɛ nimitɔɔre gaabo. A dɛndɛŋ yuoŋ kɔɔ na saŋa, lantaapuoree da be la ziiri yaga poɔŋ, baŋ da iri lantaapuoruu nembɛrɛ baŋ kaara a toma zu a kyɛ korɔ a lantaapuoruu deme sowuli. (Tom. 14:23) A nembɛrɛ ane a bitontonee na naŋ da be Gyɛruzɛlɛm na da terɛɛ sowuli mine, a da seŋ ka a lantaapuoree zaa naŋ da bebe a lɛ saŋa na de toŋ neŋ toma. (Tom. 15:2; 16:4) A Kristabiiri naŋ da de a lɛ sowuli na toŋ neŋ toma na zuŋ, “a puoruu laŋne deme yeldeebo da zɛge do [la] saa, kyɛ ka ba noɔre da yɛllɛ bebiri zaa.”​—Tom. 16:5.

2. A yi yuoni 1919 a wa tɔ pampana, sobuo ka Jehoova korɔ o noba sowuli ane siiloŋ poɔ bondirii?

² Jehoova naŋ maŋ sɛgrɛɛ o puorebiiri puoruu yɛlɛ zenɛ ŋa. A yi yuoni 1919 a wa tɔ pampana, Yezu maŋ tu la dɔbɔ ba wala mine ba naŋ sɔ ba naaloŋ kãã eŋɛŋ baŋ sɛgre a naaŋ moɔloo toma soŋ zaa, a kyɛ de Baabole sowuli korɔ o potuuribo na wagre naŋ seŋ neŋ poɔŋ.a (Luk. 12:42) A pɛlɛɛŋ ka Jehoova korɔ baŋ maaloo ane toma na ba naŋ tonɔ na.​—Aiz. 60:22; 65:13, 14.

3-4. (a) Tere yelmannaa kaŋa naŋ wuli lɛ ba naŋ sɛgre te puoruu yɛlɛ soŋ zaa lɛ. (b) Bo teŋ na zanne a zannoo ŋa poɔŋ?

³ Ka teneeŋ da ba sɛgre te yɛlɛ soŋ, te da koŋ baŋ toŋ toma na Yezu naŋ ko te ka te toŋ na. (Mat. 28:19, 20) Aŋa mannoo poɔŋ, ka te yɔɔdɔbɔ naŋ da ba sɛgre yɛlɛ ka te maŋ tonɔ a naaŋ moɔloo toma zie na ba naŋ ŋmaa ko te lantaapuoruu na, neɛzaa da na maŋ tonɛɛ a naaŋ moɔloo toma zie zaa o naŋ boɔrɔ. Ka teneeŋ da erɛ lɛ te na maŋ moɔlɛɛ a duorisoŋ zi-yenaa kaŋa yoŋ kyɛ bare a ziiri mine. Ho na baŋ lɛ wulee tɔnɔ mine meŋ te naŋ maŋ nyɛ banaŋ sɛgre te puoruu toma yɛlɛ soŋ zaa na zuŋ bee?

⁴ Aŋa lɛ Yezu naŋ da sɛgre o potuuribo yɛlɛ soŋ zaa saŋa na oŋ da be a donɛɛ zuŋ kyɛ na, lɛ meŋ la oŋ naŋ sɛgrɛ Naaŋmen puorebiiri yɛlɛ zenɛ ŋa meŋ. A zannoo ŋa poɔŋ te na nyɛɛ lɛ Yezu naŋ e ewuli ko te, ane lɛ a lantaapuoruu naŋ tuuro o ewuli na. Te na la zanne nyɛɛ lɛ teŋ na baŋ wuli nimipa yaga zaa a ko Jehoova lantaapuoruu na.

TE LANTAAPUORUU NA MAŊ TUURO LA YEZU EWULUU

5. Sobuoŋ teŋ tuuro Yezu ewuluu? (Gyɔɔn 8:28)

⁵ Yezu maŋ tɔglɔ la o Saa naŋ be sazuŋ o yelyaga ane o yel-eree poɔŋ. Jehoova lantaapuoruu na meŋ tuuree Yezu ewuli na, a maŋ de a Baabole wulo te yɛlɛ naŋ soma ane yɛlɛ naŋ ba soma a kyɛ korɔ te sowuli te zemmo poɔŋ. (Kanne Gyɔɔn 8:28; 2 Tim. 3:16, 17) Wagre zaa ba maŋ teɛrɛ teŋ ka te kanna Naaŋmen Yelbiri na a de tonɔ neŋ toma te zemmo poɔŋ. Sobuo teŋ maŋ nyɛ tɔnɔ yi a kawane ŋa poɔŋ?

6. Bo tɔnɔ mine teŋ maŋ nyɛ ka teneeŋ wa zanna a Baabole?

⁶ Ka teneeŋ wa de te gama na zanna neŋ a Baabole, te maŋ nyɛ la tɔnɔ yaga zaa. Aŋa mannoo poɔŋ, te maŋ baŋ de la a Baabole wuluu manne neŋ sowuli na a lantaapuoruu naŋ maŋ korɔ te na. Ka teneeŋ wa nyɛ ka sowuli na a lantaapuoruu naŋ korɔ te na yi la a Baabole poɔŋ, a maŋ vɛŋeŋ teŋ maaleŋ sage a lantaapuoruu di yaga zaa.​—Uro. 12:2.

7. Bo duoro ka Yezu da moɔlɔ korɔ noba, ka sobuo ka Jehoova lantaapuoruu na tuuro o ewuli na zenɛ ŋa?

⁷ Yezu da moɔlɛɛ “a Naaŋmen Naaloŋ duorisoŋ na.” (Luk. 4:43, 44) Ane meŋ, Yezu da yelko la o potuuribo ka ba moɔlɔ a Naaloŋ duorisoŋ. (Luk. 9:1, 2; 10:8, 9) Noba na zaa naŋ be Jehoova lantaapuoruuŋ zenɛ ŋa moɔlɛɛ a Naaloŋ duorisoŋ zie zaa ba naŋ be, bee arezie zaa ba naŋ taa a lantaapuoruu poɔŋ.

8. Bo poɔsori naŋ e kpoŋ yaga zaa la teŋ taa?

⁸ Te nyɛɛ apoɔsori naŋ e kpoŋ yaga zaa ka te manna Naaŋmen Naaloŋ na yɛlɛ korɔ noba! Neɛzaa naaneŋ taa a lɛ poɔsori ŋa. Aŋa mannoo poɔŋ, saŋa na Yezu naŋ da be a donɛɛ zuŋ kyɛ na, o da ba tere sori ka a sefaare di sieree a kyaaroo. (Luk. 4:41) Zenɛ ŋa, sɛre kyɛ ka neɛ na baŋ wa poɔ Jehoova puorebiiri eŋɛŋ a moɔlɔ a duorisoŋ na, aseŋ ka o zemmo yɛlɛ pɛlɛ Jehoova poɔ. Ka teneeŋ maŋ moɔlɔ a duorisoŋ wagre zaa ane zie zaa te naŋ be, lɛ na wuliŋ ka te taa la nimipa ko apoɔsori na te naŋ taa na. Te boɔrɔŋ ka te tɔglɔ Yezu, azuŋ te maŋ mɔɔrɛɛ te moɔbo zaa ka te manna a Naaloŋ yelmeŋɛ korɔ noba a kyɛ wulo ba a yelmeŋɛ.​—Mat. 13:3, 23; 1 Kor. 3:6.

9. Sobuo ka a laŋnoɔre puoruu tu kyɛ sonnɔ noba ka ba baŋ Naaŋmen yuori na?

⁹ Yezu da vɛŋɛɛŋ ka noba baŋ Naaŋmen yuori na. Yezu da puore sɔrɛɛ o Saa naŋ be sazuŋ a yelka: “N vɛŋɛɛŋ baŋ baŋ ho yuori na.” (Gyn. 17:26) Jehoova laŋnoɔre puoruu na tɔglɛɛ Yezu, a mɔɔrɔ ba moɔbo zaa ka ba soŋ noba ka ba baŋ Naaŋmen yuori na. Sori na kaŋa ba naŋ tu kyɛ e lɛ la ka, a Donpaalaa Kɔkɔleɛroo Sɛge Forifori na poɔŋ, zie zaa Naaŋmen yuori naŋ seŋ ka o be na, ba leɛ de oŋ eŋ beŋ. Ba leɛrɛɛ a Baabole ŋa zaa gbuli bee o kyɛlee eŋ kɔkɔɛ naŋ ta 270. Ka hooŋ kanne a Baabole baaraa ziiri na ba naŋ boɔlɔ Appendixes A4 ane A5 na, ho na nyɛɛ yɛlɛ yaga a kyaare ananso ba naŋ leɛ de Naaŋmen yuori na eŋ a Baabole ŋa poɔŋ. A Study Bible meŋ baaraa zie na kaŋa ba naŋ boɔlɔ Appendix C na meŋ wulee sieree yaga zaa naŋ wuli ka aseŋ ka Naaŋmen yuori na be a Kristabiiri Giriki Sɛgre na poɔŋ a ta gbɛɛ 237.

10. Boŋ teŋ zanne yi a pɔge naŋ be Myanmar paaloŋ na zemmo yɛlɛ ŋa poɔŋ?

¹⁰ Te meŋ boɔrɔŋ ka te soŋ noba lɛ zaa te naŋ na toɔ̃ ka ba meŋ wa baŋ Naaŋmen yuori na. Pɔge kaŋa naŋ nyɛ yuomo 67 a be Myanmar paaloŋ naŋ da wa zanne baŋ Naaŋmen yuori na, o da konoŋ kyɛ yele ka: “N dɛndɛŋ saŋa la ŋa maŋ woŋ ka Naaŋmen yuori la Jehoova. . . . Yɛ wuli maŋ yelnimizeɛ naŋ gaŋ yelzaa N zemmo poɔŋ.” Aŋa lɛ te naŋ nyɛ a pɔge ŋa zemmo yɛlɛ poɔŋ na, ka neɛŋ wa zanne baŋ Naaŋmen yuori na, a na baŋ leɛrɛɛ o zemmo kpɛlɛŋkpɛlɛŋ.

NAŊ KYƐNƐ TAA SAGEDIIBU NAŊ E KPEƐŊAA A LAŊNOƆRE PUORUU EŊƐŊ

11. Wala ka a lantaapuoruu nembɛrɛ na baŋ e a wuli ka ba sagɛɛ Jehoova laŋnoɔre puoruu na di? (Kaa a foto meŋ.)

¹¹ Wala ka a lantaapuoruu nembɛrɛ na baŋ e wuli ka ba sage la Naaŋmen laŋnoɔre puoruu na di? Ka a laŋnoɔre puoruuŋ wa ko a lantaapuoruu nembɛrɛ sowuli, aseŋ ka ba kanne a sowuli soŋ a mɔɔ ba moɔbo zaa a de toŋ neŋ toma. Aŋa mannoo poɔŋ, ba maŋ nyɛɛ sowuli a kyaare lɛ baŋ na toɔ̃ toŋ ba toma a lammore saŋa, ane lɛ baŋ na toɔ̃ puore sɔre ko a lantaapuoruu, kyɛ ba maŋ lɛ ko baŋ sowuli meŋ a kyaare lɛ baŋ na baŋ kaara Krista peere na zu. Ka a lantaapuoruu nembɛrɛŋ wa de sowuli zaa a laŋnoɔre puoruu naŋ korɔ ba na tonɔ neŋ toma, a maŋ vɛŋeŋ ka te yɔɔmine naŋ be a lantaapuoruu poɔŋ na nyɛ ka Jehoova nɔŋ baŋ a kyɛ kaara ba zu meŋ.

12. (a) Bonso aŋ seŋ ka te sagra a lantaapuoruu nembɛrɛ nɔɛ? (Hiburu 13:7, 17) (b) Ananso la wala aŋ seŋ ka te de te teɛroŋ zaa eŋ gyog-sonne na a lantaapuoruu nembɛrɛ naŋ taa na eŋɛŋ?

¹² Ka a lantaapuoruu nembɛrɛŋ wa ko te sowuli aseŋ ka te maŋ yi te poɔ zaa a tuuraa. Ka teneeŋ wa erɛ lɛ, a na vɛŋeŋ ka noba naŋ deɛrɛ te weɛ na toma e mɔlɔ ko ba. A Baabole eŋ teŋ faŋa ka te sigri te menne ko bana na naŋ derɛ te weɛ na. (Kanne Hiburu 13:​7, 17.) Kyɛ saŋa kaŋa a maŋ eɛ kpeɛŋaa ko te ka te e lɛ. Ananso la wala? Bonso a dɔbɔ ŋa ba pɛgeyi. Kyɛ ka teneeŋ kaara ba gbɛ-ŋmɛ yoŋ a kyɛ ba nyɛrɛ ba gyog-sonne yɛŋ, a na waa ŋa teŋ sonnɔ te dɔndɔnne. Bonso teŋ yel lɛ? Te dɔndɔnne na boɔrɔŋ ka te teɛrɛ ka Naaŋmen ba tuuro a laŋnoɔre puoruu ŋa eŋɛŋ kyɛ korɔ te sowuli. Azuŋ ka teneeŋ taa teɛroŋ naŋ ba soma a kyaare a nembɛrɛ a na vɛŋeŋ ka te piili taa teɛroŋ naŋ ba soma a kyaare a laŋnoɔre puoruu meŋ. Ka lɛŋ wa e, te koŋ lɛ sage a laŋnoɔre puoruu di. Wala teŋ na baŋ e a zagre te dɔndɔnne zirii na zaa?

TA WA TERƐ SORI KA NEƐZAA VƐNƐ KA SAGEDIIBU HO NAŊ TAA A LAŊNOƆRE PUORUU EŊƐŊ NA SIGRE TEŊƐ

13. Sobuo ka Naaŋmen dɔndɔnne na maŋ tu a boɔrɔ ka ba dɛge o laŋnoɔre puoruu na zu?

¹³ Naaŋmen dɔndɔnne maŋ boɔrɔŋ ka noba teɛrɛ ka yelsonne na Naaŋmen laŋnoɔre puoruu naŋ erɛ na ba soma. Aŋa mannoo poɔŋ, Jehoova boɔrɔŋ ka te e forifori eŋgannoŋ poɔŋ, te gyogri poɔŋ, a kyɛ puoruu sori na yoŋ o naŋ boɔrɔ. O yeleeŋ ka neɛzaa naŋ erɛ yelfaa zaa booree a ba e siri ka o leɛre o eebo koŋ baŋ be a lantaapuoruu poɔŋ. (1 Kor. 5:11-13; 6:9, 10) Te maŋ de la ana Baabole sowuli ŋa tonɔ neŋ toma. Kyɛ ka teneeŋ wa erɛ lɛ, te dɔndɔnne maŋ yeleŋ ka te ba nɔnɔ noba yɛlɛ, ka te maŋ dire la noba sɛrɛɛ, ka ka te yɛlɛ meŋ e tuo te gaali.

14. Nembuo zie ka zirii na zaa ba naŋ maŋ ŋmaara kyaara a laŋnoɔre puoruu na yi?

¹⁴ Baŋ neɛ na meŋɛ naŋ la zɔɔrɔ neŋ te. Setaana a Dɛɛvul la sɔgle kyɛ ŋmaara a zirii ŋa zaa. Ona la a “zirŋmaareba zaa saa.” (Gyn. 8:44; Mun. 3:1-5) Azuŋ a ba e te seɛlee Setaana naŋ tuuro te dɔndɔnne eŋɛ kyɛ ŋmaara zirii kyaara Jehoova laŋnoɔre puoruu na. A yɛlɛ ŋa da pɔge la Yezu ane a dɛndɛŋ Kristabiiri na meŋ.

15. Boŋ ka a ŋmenpuore wedeɛreba da e Yezu ane o potuuribo na?

¹⁵ Aneazaa ka Naaŋmen Bidɔɔ Yezu da pɛgeyieŋ, a da toŋ toŋseɛlɛ yaga meŋ, kyɛ Setaana da vɛŋɛɛŋ ka noba ŋma zirii yaga zaa a kyaaroo. Aŋa mannoo poɔŋ, a ŋmenpuore wedeɛreba da maŋ yele korɛɛ noba ka kpeɛ̃o na Yezu naŋ da taa a maŋ de digre sefaare yire noba eŋɛŋ na, “a sefaare zaa naa” la de a lɛ kpeɛ̃o na koo. (Mak. 3:22) Saŋa na baŋ da dire Yezu sɛrɛɛ na, a ŋmenpuore wedeɛreba da yeleŋ ka o to la Naaŋmen zomma, a da toɔrɔ a nembeɛoŋ eŋnɛ ka ba vɛŋ ka ba koo. (Mat. 27:20) A puoriŋ, saŋa na Krista potuuribo naŋ da moɔlɔ a duorisoŋ na, noba naŋ da iri zɔɔrɔ neŋ ba na da “tɔ la a Nemboore-yobo eŋ a sãã ba teɛroŋ” ka ba dɔgrɔ a Kristabiiri. (Tom. 14:2, 19) Ŋaa ka December 1, 1998 A Kaakaara Ziduoruu yelkyaare Toma 14:2: “Noba naŋ da tuuro Setaana puoriŋ na da zagrɛɛ duoro na a Kristabiiri naŋ da moɔlɔ na, a kyɛ yele yelfaare kyaara ba ka lɛ na vɛŋ ka noba ta kyɛllɛ wono ba yɛlɛ, a ta nɔnɔ ba yɛlɛ meŋ.”

16. Ka teneeŋ wa woŋ zirii na ba naŋ maŋ ŋmaara kyaare a laŋnoɔre puoruu na, bo yɛlɛ aŋ seŋ ka te teɛre?

¹⁶ A wa tɔ zenɛ, Setaana naŋ ŋmaarɛɛ zirii. Zenɛ ŋa, o naŋ “[bɛnlɛɛ] a tendaa noba zaa.” (Yel. 12:9) Ka hooŋ wa woŋ zirii zaa a kyaara a laŋnoɔre puoruu bee te yɔɔmine naŋ deɛrɛ te weɛ na, leɛteɛre yɛlɛ na Naaŋmen dɔndɔnne naŋ da e Yezu ane a dɛndɛŋ Kristabiiri na. Yezu da yeleeŋ ka noba na naŋ na dɔgrɔ Jehoova puorebiiri zenɛ ŋa na na ŋmaarɛɛ zirii a kyaare ba. Lɛ neŋ o zu baŋ erɛ zenɛ. (Mat. 5:11, 12) A zirii ŋa taa koŋ baŋ bɛnle te ka teneeŋ baŋ neɛ na zie a zirii ŋa naŋ yi, a kyɛ ta kyɛllɛ wono a zirii ŋa taa. Wala teŋ na baŋ e go te menne yi o zirii na eŋɛŋ?

17. Wala teŋ na baŋ e go te menne yi zirii na ba naŋ maŋ ŋmaara kyaara a laŋnoɔre puoruu na? (2 Timoti 1:13) (Kanne a daga ŋa, “Lɛ Teŋ Na Baŋ E Ka Teneeŋ Wa Woŋ Zirii Ba Naŋ Ŋmaara Kyaara A Laŋnoɔre Puoruu.”)

¹⁷ Zagre zirii zaa booree bare. A bitontona Pɔɔl da vɛŋɛɛŋ teŋ baŋ yɛlɛ teŋ na baŋ e ka teneeŋ wa woŋ zirii ba naŋ ŋmaara kyaara te. O da yelko la Timoti ka o yelko “a noba . . . ka ba ta . . . de ba teɛroŋ zaa eŋ sensellɛ” eŋɛŋ a kyɛ “ta vɛŋ ka [ba] ne banaŋ naŋ tuuro selle-galma ane . . . yelfolo laŋ yelzaa.” (1 Tim. 1:3, 4; 4:7) Aneazaa ka bibile naŋ ba baŋ yɛŋ na baŋ de la bon dɛgre kaŋa teŋɛŋ a de eŋ o noɔreŋ, kyɛ neŋkpoŋ yɛŋ zaa koŋ sage e lɛ bonso o baŋɛɛ yɛlɛ naŋ na baŋ yi a poɔŋ wa. Te maŋ zagrɛɛ zirii zaa bonso te baŋɛɛ zie a naŋ yi. Kyɛ te maŋ kyɛllɛ wonee a yelmeŋɛ “yelbi-sonne” na yoŋ.​—Kanne 2 Timoti 1:13.

18. Wala teŋ na baŋ e a wuli ka te sereŋ taa la sagediibu Jehoova laŋnoɔre puoruu na eŋɛŋ?

¹⁸ Te zanne nyɛɛ yɛlɛ ata mine Naaŋmen laŋnoɔre puoruu naŋ erɛ a wuli ka ba tɔglɛɛ Yezu. Ka hooŋ wa zanna a Baabole, naŋ mɔɔrɔ ka ho nyɛ soe mine a laŋnoɔre puoruu naŋ tɔglɔ Yezu. Soŋ ho taaba mine meŋ ka ba maaleŋ taa sagediibu yaga zaa a laŋnoɔre puoruu eŋɛŋ. Naŋ moɔ̃ nimiri a puoro Jehoova yelmennoŋ poɔŋ a kyɛ de ho meŋɛ mare o laŋnoɔre puoruu na o naŋ tuuro o eŋɛŋ kyɛ vɛŋ ka o poboɔbo nyɛrɛ eebo na, ka hooŋ wa erɛ lɛ, a wuleeŋ ka ho naŋ kyɛnɛ taa la sagediibu o laŋnoɔre puoruu na eŋɛŋ. (Yiem. 37:28) Yɛ vɛŋ ka te maŋ puore Jehoova bareka yaga zaa ane o naŋ ko te apoɔsori ka te wa poɔ o yelmeŋɛ puorebiiri naŋ taa nɔmmo yaga zaa na poɔŋ.