Moɔ̃ Nimiri Moɔlɔ A Duorisoŋ Nɔmmo Ho Naŋ Taa Zuŋ!

1. Boŋ teŋ da zanne a 2023 yuoni zaa lammo na poɔŋ?

A YUONI 2023 yuoni zaa lammo na poɔŋ,a te nyɛɛ wuli paala mine a kyaare yɛlɛ mine teŋ da sagedi, ane duorisaamma mine a kyaare te naaŋ moɔloo toma na. Te da zannɛɛŋ ka, ka ba naŋ gbaŋ wa sãã Baabilɔŋ Kpoŋ baare, kyɛ aminekaŋaŋ noba mine naŋ na nyɛɛ a vuo ka ba wa puore Jehoova yelmennoŋ poɔŋ. Te da lɛ woŋee meŋ ka a yi November 2023 poɔŋ, a koŋ lɛ fɛre ka Naaŋ moɔleba sɛge yɛlɛ na zaa ba naŋ e a naaŋ moɔloo poɔŋ na waneŋ. A leɛroo ŋa zaa ba naŋ e na wuleeŋ ka te naaŋ moɔloo toma na ba lɛ e nimizeɛ yaga bee? Ai, lɛ naane!

2. Ananso la wala ka bebiri zaaŋ wa pare ka te naaŋ moɔloo toma na maŋ lɛ e nimizeɛ yaga zaa? (Marko 13:10)

² Ka bebiri zaaŋ wa pare, a maŋ lɛ eɛ nimizeɛ yaga zaa ka te moɔlɔ a duorisoŋ. Ananso la wala? Bonso lɛ wuleeŋ ka a donɛɛ baaroo tagra peɛlɛŋ. Te nyɛ yɛlɛ na Yezu naŋ da yelkyaare lɛ baŋ na tonɔ a naaŋ moɔloo toma a bebi-baaree saŋa. (Kanne Marko 13:10.) Yezu da yeleeŋ a Matio gane poɔŋ ka ba na moɔlɛɛ a duorisoŋ a donɛɛ lombori zaa sɛre kyɛ ka a “baaraa saŋa” pãã ta. (Mat. 24:14) Lɛ wuleeŋ ka ba na sãã la a Setaana donɛɛ ŋa bare kpɛlɛŋkpɛlɛŋ. Jehoova biŋee a ‘bebiri ane a saŋa’ a yɛlɛ ŋa zaa naŋ na nyɛ eebo. (Mat. 24:36; 25:13; Tom. 1:7) Ka bebiri zaaŋ wa pare gaa, te maŋ tage peɛlɛɛ a lɛ bebiri na a yɛlɛ ŋa naŋ na nyɛ eebo. (Uro. 13:11) Kyɛ aseŋ ka te naŋ moɔlɔ a duorisoŋ a te ta saŋa na a baaraa saŋa naŋ na ta.

3. Ananso la wala teŋ maŋ moɔlɔ a duorisoŋ?

³ Saŋa ŋa te naŋ teɛrɛ te naaŋ moɔloo toma yɛlɛ na, yɛ vɛŋ ka te zaa leɛ peɛre te menne a soorebiri ŋa: Ananso la wala teŋ maŋ moɔlɔ a duorisoŋ? A yɛlɛ ŋmaaŋmaa la ka, nɔmmo te naŋ taa na zuŋ teŋ maŋ moɔlɔ a duorisoŋ. Ka teneeŋ wa moɔlɔ a duorisoŋ, te maŋ wuliŋ ka te nɔŋ la a duorisoŋ, nensaaleba, ane meŋ agaŋaazaa a maŋ wuliŋ ka te nɔŋ la Jehoova ane o yuori na. Yɛ vɛŋ ka te peɛre a yɛlɛ ŋa kaŋa zaa gaa tɔɔre.

TE MAŊ TONƐƐ A NAAŊ MOƆLOO TOMA TE NAŊ NƆŊ A DUORISOŊ ZUŊ

4. Wala teŋ maŋ e te yɛlɛ ka teneeŋ wa woŋ duorinoɔŋ mine?

⁴ Wala aŋ da erɛ bo saŋa na popɛle yɛlɛ mine naŋ da e ho zemmo poɔŋ na, aminekaŋaŋ ho dɔgrɔ kaŋa da dɔge la bi-paalaa bee ho da nyɛ la toma mine hoŋ da boɔrɔ yaga zaa? Aminekaŋaŋ ho poɔ da pɛlɛɛŋ yaga zaa, hoŋ da e wieoŋ lɛ a yel a yɛlɛ ko ho booree deme ane ho zɔmenne. Saŋa na hoŋ da wa woŋ a Naaŋmen Naaloŋ duorisoŋ na naŋ e duorinoɔŋ a gaŋ duoro zaa na, lɛ neŋ o zu hoŋ da e bee?

5. Wala aŋ da erɛ bo a dɛndɛŋ saŋa na hoŋ da wa zanna a yelmeŋɛ naŋ be a Baabole poɔŋ na? (Kaa a fotori meŋ.)

⁵ Hooŋ leɛteɛre nyɛ lɛ ho poɔ naŋ da pɛle seŋ a dɛndɛŋ saŋa na hoŋ da wa zanne a yelmeŋɛ naŋ be Naaŋmen Yelbiri na poɔŋ. Ho da wa zannɛɛŋ ka ho Saa naŋ be sazuŋ na nɔŋ boŋ yaga, ka o boɔrɔŋ ka ho wa poɔ o booree naŋ e o puorebiiri poɔŋ, ka o eŋɛɛ noɔre ka o na vɛŋeŋ ka te dɔgɛɛ ane te woore zaa baare, a ko te teɛretɔ ka te nɔŋneba zaa naŋ kpi na leɛ-iriŋ a donpaalaa poɔŋ ka te nyɛ ba—ane yɛlɛ yaga. (Mak. 10:29, 30; Gyn. 5:28, 29; Uro. 8:38, 39; Yel. 21:3, 4) A yelmenne ŋa hoŋ da zanne na da vɛŋɛɛŋ hoŋ taa popeɛloŋ yaga zaa. (Luk. 24:32) Ho da nɔŋ la yɛlɛ na ho naŋ zanna na, a da boɔrɔ ka ho manne a yelmenne ŋa ko neɛzaa ho naŋ baŋ!—De manne Jeremaiya 20:9.

6. Boŋ teŋ zanne yi Ernest ane Rose zemmo yɛlɛ ŋa poɔŋ?

⁶ Te nyɛ a zemmo yɛlɛ ŋa. Te yɔɔdɔɔ kaŋa yuori naŋ di Ernestb da nyɛɛ yuomo pie kyɛ ka o saa kpi. Ernest yeleeŋ ka: “N da sooreŋ ka: ‘O gaa la sazu? Bee o ba lɛ kyebe togitogi?’ Nyuuri da maŋ kpɛ maŋ ka maaŋ wa nyɛ biiri mine naŋ naŋ taa ba saamine.” Ernest da maŋ gaa la zie na ba naŋ ũũ o saa na a te gbi dumo a puore ka: “Naaŋmen sɔrebo la N boɔrɔŋ ka N baŋ zie na N saa naŋ be.” O saa naŋ da kpi yuomo 17 puoriŋ ka Ernest da nyɛ a vuo ka o zanne a Baabole, oŋ da sage wieoŋ lɛ ka o na zannɛɛ a Baabole. O poɔ zaaŋ da pɛle saŋa na oŋ da wa zanne nyɛ ka noba naŋ kpi ba lɛ baŋ yelzaa, ba waa ŋa noba naŋ gbiri gaa tɔɔre, ka a Baabole meŋ eŋ noɔre ka nendaare kaŋa ba na nyɛɛ kũũ leɛ-iruu. (Ikil. 9:5, 10; Tom. 24:15) A baaraa zaa, soorebie na oŋ da boɔrɔ ka o baŋ a nɔɛ iribo na, o da wa nyɛɛ a zaa nɔɛ iribo! Ernest poɔ zaaŋ da pɛle neŋ Baabole yelmenne na oŋ da zanna na. O pɔge Rose meŋ da wa piileeŋ a zanna a Baabole a meŋ da wa nɔŋ yɛlɛ na o naŋ zanna na. Yuoni 1978 poɔŋ ba da de la suobu. Ba da de la eŋnyagroŋ a manne yelmenne na ba naŋ zanne na yɛlɛ ko ba booree deme, ba zɔmenne ane noba mine meŋ. Yɛlɛ naŋ da yi a poɔŋ wa la ka Ernest ane Rose da toɔ̃ soŋɛɛ noba naŋ gaŋ 70 baŋ wa zanne a yelmeŋɛ a de suobu.

7. Wala teŋ maŋ erɛ ka teneeŋ wa nɔŋ Baabole yelmenne na te naŋ zanne na? (Luka 6:45)

⁷ A pɛlɛɛŋ ka ka teneeŋ wa nɔŋ Baabole yelmenne na te naŋ zanna na, te maŋ boɔrɔŋ ka te manne a yɛlɛ ko neɛzaa. (Kanne Luka 6:45.) Te maŋ taa la teɛroŋ na a dɛndɛŋ Kristabiiri naŋ da taa a da yelka: “Tenee eŋ koŋ toɔ̃ bare bon na te naŋ nyɛ bee a woŋ yeluu.” (Tom. 4:20) Te nɔŋ la a yelmeŋɛ yaga zaa azuŋ te boɔrɔŋ ka te manne a yɛlɛ ko noba yaga zaa teŋ na toɔ̃.

TE MAŊ MOƆLƐƐ A DUORISOŊ TE NAŊ NƆŊ NOBA ZUŊ

8. Ananso la wala teŋ maŋ boɔrɔ ka te manne a duorisoŋ ko noba mine? (Kaa a daga ŋa, “Nɔnɔ Noba—Soŋ Ba Ka Ba Leɛ Yezu Potuuribo.”) (Kaa a fotori meŋ.)

⁸ Te nɔŋ la noba aŋa lɛ Jehoova ane o Bidɔɔ naŋ nɔŋ noba na. (Yeng. 8:31; Gyn. 3:16) Te taa la nembazo yaga zaa a ko noba naŋ “ba baŋ Naaŋmen” a ba “taa teɛretɔ” meŋ na. (Efe. 2:12) Ba tuoree yelkpeɛne yaga zaa ba zemmo poɔŋ, kyɛ te taa la duoro naŋ na baŋ soŋ ba—a Naaŋmen Naaloŋ duorisoŋ na. Te naŋ nɔŋ ba a taa nembazo ko ba zuŋ, te boɔrɔŋ ka te mɔɔ te moɔbo zaa a manne a duorisoŋ ko ba. A duorisoŋ ŋa na baŋ soŋ baŋ ka ba taa teɛretɔ, a soŋ ba ka ba taa popeɛloŋ ba zemmo poɔŋ, a kyɛ ko ba a vuo ka ba nyɛ a “nyɔvo-meŋɛ” na, ona la a nyɔvore naŋ ba taa baaraa Naaŋmen donpaalaa na poɔŋ.​—1 Tim. 6:19.

9. Bo kpããmo la teŋ kpããna noba a kyaare nendaare kaŋa, ka ananso la wala? (Iziikiel 33:7, 8)

⁹ Te naŋ nɔŋ noba meŋ zuŋ, te maŋ boɔrɔŋ ka te kpãã ba ka a donfaa ŋa baaraa peɛlɛɛŋ. (Kanne Iziikiel 33:7, 8.) Te taa la nembazo a ko noba naŋ ba puoro Jehoova ane te booree deme na meŋ naŋ ba puoro Jehoova na. Noba yaga erɛɛ yelzaa ba naŋ boɔrɔ ba zemmo poɔŋ, kyɛ ba baŋ yɛlɛ naŋ waana—“dɔgroŋ kpoŋ kaŋa na waŋ, o tɔ daaŋ ba wa a yi a donɛɛ piiluu saŋa a wa ta ŋaaŋ, ai, o tɔ daaŋ koŋ lɛ wa zaa.” (Mat. 24:21) Te boɔrɔŋ ka ba baŋ yɛlɛ naŋ na e a sɛrɛɛ diibu saŋa; ba na daŋ sãã la zirii puoruu, a kyɛ pãã sãã a donfaa ŋa meŋ a Hammagedon zɔɔre na poɔŋ. (Yel. 16:14, 16; 17:16, 17; 19:11, 19, 20) Te puoro la ka noba yaga zaa kyɛlle woŋ yɛlɛ na te naŋ yele korɔ ba na, a wa puoro Jehoova. Kyɛ ka te booree deme ane noba na zaa naŋ zagre ka ba kyɛlle woŋ a kpããmo pampana na meŋ?

10. Ananso la wala aŋ e nimizeɛ ka te moɔ̃ niŋe a kpããna noba a kyaare yɛlɛ naŋ koŋ kɔɔre kyɛ nyɛ eebo na?

¹⁰ Aŋa lɛ te naŋ nyɛ a zannoo naŋ pare na poɔŋ, aminekaŋaŋ Jehoova na faa la noba na mine naŋ na leɛre ba eebo ka ba naŋ wa nyɛ ka ba saaŋɛɛ Baabilɔŋ Kpoŋ. Ka lɛ na, a na eɛ nimizeɛ ka te maaleŋ yele korɔ ba pampana ŋa. Ananso la ka: Yɛlɛ na te naŋ na yel ko ba pampana ŋa la na soŋ ba ka ba leɛteɛre a yɛlɛ a lɛ saŋa. (De manne Iziikiel 33:33.) Aminekaŋaŋ ba na leɛteɛrɛɛ kpããmo na te naŋ da kpãã ba na, ka lɛ vɛŋ ka ba leɛ wa poɔ te poɔŋ a puoro Jehoova sɛre kyɛ ka a saammo wa. Aŋa lɛ a nempɔgedie kaara naŋ da be Filipae naŋ da leɛre o eebo saŋa na oŋ da nyɛ a “zie [naŋ] gbigri yaga yaga zaa” na, lɛ meŋ la, noba mine koŋ kyɛlle woŋ te yɛlɛ pampana, kyɛ ka a Baabilɔŋ Kpoŋ saammo naŋ wa vɛŋ ka a donɛɛ ŋa dɔŋ yaga zaa, ba meŋ na nyɛɛ lɛ a leɛre ba eebo.​—Tom. 16:25-34.

TE MAŊ MOƆLƐƐ A DUORISOŊ BONSO TE NƆŊ LA JEHOOVA ANE O YUORI NA

11. Sobuoŋ teŋ maŋ ko Jehoova gyeremɛ, emmo, ane kpeɛ̃o? (Yel-iriwulaa 4:11) (Kaa a fotori meŋ.)

¹¹ Yelnimizeɛ na meŋɛ zuŋ te naŋ maŋ moɔlɔ a duorisoŋ la nɔmmo na te naŋ taa ko Jehoova ane o yo forifori na. A naaŋ moɔloo eɛ sori teŋ maŋ tu kyɛ pugiro Naaŋmen na te naŋ nɔŋ na. (Kanne Yel-iriwulaa 4:11.) Te yi la te poɔ zaa a sage a yelbie ŋa baŋ da yel sazuŋ na: “Jehoova te Naaŋmen, ho seŋ nɛɛ a gyeremɛ, ane a emmo ane a kpeɛ̃o.” Te maŋ korooŋ a gyeremɛ ane emmo ka teneeŋ wa wuli noba sieree naŋ wuli ka ona la “maale bonzaa” ane meŋ ka ona la ko te nyɔvore teŋ voorɔ. Te maŋ de la te kpeɛ̃o ko Jehoova ka teneeŋ wa de te wagre, faŋa, ane te bontaree a mɔɔrɔ te moɔbo zaa ka te moɔle a duorisoŋ ko noba. (Mat. 6:33; Luk. 13:24; Kol. 3:23) A yɛlɛ ŋmaaŋmaa la ka, te nɔŋɛɛ Naaŋmen yaga zaa a maŋ boɔrɔ ka te manna o yɛlɛ korɔ noba. Te maŋ boɔrɔŋ ka te wuli noba o yuori na, ane Naaŋmen na naŋ la o. Ananso la wala?

12. Sobuoŋ teŋ maŋ pugiro Jehoova yuori na a naaŋ moɔloo poɔŋ?

¹² Nɔmmo te naŋ taa ko Jehoova la maŋ vɛŋ teŋ pɛgerɛ o yuori na. (Mat. 6:9) Lɛ wuleeŋ ka te boɔrɔŋ ka noba baŋ ka yel galema na zaa Setaana naŋ yel kyaare Jehoova na eɛ zirii. (Mun. 3:1-5; Joob 2:4; Gyn. 8:44) Ka teneeŋ wa be a naaŋ moɔloo poɔŋ te maŋ boɔrɔŋ ka te wuli neɛzaa yelmeŋɛ naŋ bebe a kyaare Jehoova. Te boɔrɔŋ ka neɛzaa baŋ ka o gyogo naŋ e kpoŋ yaga zaa la nɔmmo, ka o naaŋ diibu toriŋ ka daŋkyagre zaa ba kye o poɔŋ, ka a koŋ kɔɔre o Naaloŋ na na vɛŋeŋ ka nensaaleba dɔgɛɛ zaa baare kyɛ ka te taa emmaaroŋ ane popeɛloŋ te zemmo poɔŋ. (Yiem. 37:10, 11, 29; 1 Gyn. 4:8) Ka teneeŋ wa wulo noba a yɛlɛ ŋa zaa a naaŋ moɔloo poɔŋ, a maŋ vɛŋeŋ ka Jehoova yuori pɛgeyi. A maŋ vɛŋeŋ teŋ meŋ taa popeɛloŋ bonso te tonɛɛ toma na a naŋ seŋ ka te tonɔ aŋa Jehoova Sieree Deme na. Ananso la wala teŋ yel lɛ?

13. Ananso la wala aŋ e emmo yaga zaa ko te ba naŋ boɔlɔ te Jehoova Sieree Deme? (Aizeeya 43:10-12)

¹³ Jehoova boɔle teŋ ka o “sieree deme.” (Kanne Aizeeya 43:10-12.) Yuomo mine naŋ pare, a Lantaa Zukaareba da sɛgɛɛ lɛtɛ kaŋa a yelka: “Emmo zaa ba kyebe a gaŋ emmo na te naŋ taa ka ba boɔlɔ te ka Jehoova Sieree Deme.”c Ananso la wala? Te nyɛ a yelmannaa ŋa. Te de ka ba ŋmaa la yɛlɛ dɔgle bo ka ho eɛ yelfaa kaŋa, hoŋ boɔrɔ neɛ naŋ na are ho gbɛbɔgriŋ a yel yɛlɛ a deɛ bo ka ba baŋ ka ho daŋ koŋ sage e lɛ zaa. Nɔkpeɛne zaa kyebe ka ho na bɔ la neɛ ho naŋ baŋ, a sagoo di, kyɛ oŋ taa yo-soŋ meŋ ka o wa yel deɛ bo. Jehoova meŋ naŋ kaa iri te ka te e o Sieree Deme na wuleeŋ ka o baŋ teŋ soŋ, a sagedi meŋ ka te na yel ko la noba ka ona yoŋ la a yelmeŋɛ Naaŋmen. Te nyɛɛŋ ka a eɛ emmo yaga zaa ka te e o Sieree Deme, azuŋ vuo zaa te naŋ maŋ nyɛ te maŋ boɔrɔŋ ka te soŋ noba ka ba baŋ o yuori na, kyɛ vɛŋ ka ba baŋ meŋ ka yɛlɛ na zaa Setaana naŋ yel kyaaroo na eɛ zirii. Ka teneeŋ wa erɛ lɛ, a wuleeŋ ka te tonɛɛ toma na te yuori naŋ wuli ka te tonɔ na: Ka te eɛ Jehoova Sieree Deme!—Yiem. 83:18; Uro. 10:13-15.

TE NA MOƆ̃ LA NIMIRI A MOƆLƆ A DUORISOŊ A TE TA A BAARAA SAŊA

14. A koŋ kɔɔre bo popɛle yɛlɛ la na nyɛ eebo?

¹⁴ Te eŋɛ nyagraŋ ka te nyɛ yɛlɛ naŋ na e nendaare kaŋa na! Te puoro sɔrɛɛ Jehoova ka o soŋ ka noba yaga zaa wa sage a yelmeŋɛ sɛre kyɛ ka a dɔgroŋ kpoŋ piili. Te poɔ pɛlɛɛŋ yaga zaa meŋ ka te baŋ ka a dɔgroŋ kpoŋ saŋa naŋ na e wagre kpeɛŋaa saŋa nensaaleba zemmo zaa poɔŋ na, kyɛ noba naŋ na yi la Setaana donɛɛ na poɔŋ a wa poɔ te eŋɛŋ ka te pugiro Jehoova!—Tom. 13:48.

15-16. Bo toma teŋ naŋ na moɔ̃ nimiri a tonɔ, ka bo saŋa ka a toma na baare?

¹⁵ Kyɛ te naŋ taa la toŋ nimizeɛ kaŋa ka te toŋ, ka teneeŋ wa toŋ a toma ŋa baare te daŋ koŋ lɛ toŋaa zaa. Te nyɛɛ a vuo ka te moɔle Naaŋmen Naaloŋ duorisoŋ na a donɛɛ lombori zaa. Kyɛ aseŋ ka te naŋ kpããna noba a kyaare yɛlɛ naŋ koŋ kɔɔre kyɛ nyɛ eebo na. A eɛ nimizeɛ ka noba baŋ ka a donfaa ŋa baaraa tagra peɛlɛŋ yaga zaa. Ka a sɛrɛɛ diibuŋ pãã wa ta, ba na baŋeŋ ka duoro na teŋ da moɔlɔ na yi la Jehoova Naaŋmen zie.​—Izik. 38:23.

¹⁶ Bo yɛlɛ teŋ e siri ka te na eŋ? Nɔmmo te naŋ taa ko a duorisoŋ, nensaaleba, agaŋaazaa nɔmmo te naŋ taa ko Jehoova Naaŋmen ane o yuori zuŋ, te na moɔ̃ la nimiri a moɔlɔ a duorisoŋ neŋ eŋnyagroŋ, ane nimizeeloŋ a te ta saŋa na Jehoova naŋ na yelka, “A naaŋ moɔloo toma baarɛɛŋ!”