A Somaŋ Ka Te Tagra Peɛlɛ Taa!

1-2. Bo yɛlɛ la e nimizeɛ yaga zaa ko Jehoova? Bo ka Jehoova boɔrɔ ka te e?

JEHOOVA boɔrɔŋ ka te wulo taa nɔmmo. A yɛlɛ ŋa eɛ nimizeɛ yaga zaa ko Jehoova. Yezu yeleeŋ ka te nɔŋ te taaba aseŋ te menne. (Mat. 22:​37-39) Lɛ wuleeŋ ka aseŋ ka te wulo nimimaaroŋ korɔ noba naŋ ba puoro Jehoova. Ka teneeŋ erɛ lɛ, a wuleeŋ ka te tɔglɛɛ Jehoova. Bonso, Jehoova Naaŋmen maŋ vɛŋeŋ “ka ŋmenaa puri eŋ a neŋfaare ane a nemmenne; a kyɛ e ka saa mi eŋ a nemmenne ane a neŋfaare zaa.”—Mat. 5:45.

² Yelmeŋɛ la, Jehoova nɔŋ la nensaaleba zaa, kyɛ o nɔŋɛɛ noba naŋ erɛ yɛlɛ naŋ soma yaga zaa. (Gyn. 14:21) Jehoova boɔrɔŋ ka te tɔgloo. O eŋnɛ teŋ faŋa ka te taa “nɔmmo naŋ e zuluŋ” ko te yɔɔdɔba neŋ te yɔɔpɔgeba. A lɛ moɔrɔ te moɔbo zaa a wulo ba “nyonono.” (1 Pit. 4:8; Uro. 12:10) Aŋa lɛ na teŋ maŋ nɔŋ te dɔgrɔ kaŋa kyɛbee te zɔmeŋɛ kaŋa ka lɛ vɛŋ oŋ peɛle te yaga zaa na, lɛ neŋ o zu ka Jehoova boɔrɔ ka te nɔŋ te yɔɔmine, ka te ne ba meŋ peɛle taa yaga zaa.

3. Bo yelnimizeɛ aŋ seŋ ka te baŋ a kyaare nɔmmo?

³ Ka teneeŋ sɛle boma te gaadin poɔŋ, aseŋ ka te maŋ eŋnaa koɔ̃ a kaara a zu sɛre kyɛ ka a na toɔ̃ baa velaa. Lɛ ka nɔmmo meŋ waa. Aseŋ ka te gɛrɛ nimitɔɔre a wulo te yɔɔmine nɔmmo. Bitontona Pɔɔl sɛgɛɛŋ ka: “Yɛ vɛŋ ka nɔmmo naŋ kyɛnɛ be yɛ zie.” (Hib. 13:1) Jehoova boɔrɔŋ ka nɔmmo na teŋ taa ko te yɔɔmine na maaleŋ erɛ kpoŋ. A zannoo ŋa poɔŋ, te na zannɛɛ bon nanso aŋ seŋ ka te tage peɛle te yɔɔmine yaga zaa, ane sori teŋ na toɔ̃ tu a moɔ̃ niŋe erɛ lɛ.

BONSO AŊ SEŊ KA TE TAGRA PEƐLƐ TAA?

4. Aŋa lɛ na Yieme 133:1 naŋ wuli na, wala teŋ na baŋ e a naŋ kyɛnɛ de te yɔɔmine zaa tegroŋ? (Kaa a fotori.)

⁴ Kanne Yieme 133:1. A yieloŋ yiele yeleeŋ ka, ka te naŋ wa nyɔge noba naŋ nɔŋ Jehoova zɔmennoŋ, a eɛ yɛlɛ naŋ ‘soma’ a lɛ ‘noma’ meŋ. A teɛroŋ ŋa neŋ o zu te meŋ taa. Te de ka bebiri zaa ho maŋ kyɛŋ wa parɛɛ te-kpoŋ kaŋa. A bebi-dɛndɛŋ na hoŋ kyɛŋ wa para a te-kpoŋ na ho noɔre zaaŋ da mãã. Kyɛ, wagre naŋ gɛrɛ poɔŋ na, a teɛ yɛlɛ koŋ lɛ erɛ bo nɔmãã. Azuŋ, ka teneeŋ ba kaa soŋ, te naŋ maŋ nyɛrɛ te yɔɔmine gbɛɛ yaga daagbuli zaa na zuŋ, te koŋ lɛ de ba ka ba eɛ tegroŋ. Ka lɛŋ wa e, te koŋ lɛ de noɔreyeni na teŋ taa na tegroŋ yaga. Azuŋ, boŋ na toɔ̃ soŋ te ka te naŋ kyɛnɛ de te yɔɔmine tegroŋ? Aseŋ ka te maŋ leɛteɛre ka te yɔɔmine kaŋa zaa eɛ neŋtegroŋ ko te ane a lantaapuoruu noba zaa.

5. Ka noba mineŋ wa nyɛ nɔmmo na teŋ taa ko taa na, wala aŋ maŋ tɔ ba sukyie aseŋ?

⁵ Ka noba mineŋ wa wa a lammozie a dɛndɛŋ saŋa, ba maŋ nyɛŋ ka te sereŋ taaɛ nɔmmo ko taa. Ba na toɔ̃ arɛɛ ana yɛlɛ na yoŋ zuŋ a yelka ba nyɛɛ a yelmeŋɛ puoruu. Yezu da yeleeŋ ka: “A ŋaa zie la ka neɛzaa na baŋ ka yɛ waa la N potuuribo, ka yɛnee wa nɔnɔ taa.” (Gyn. 13:35) Yɛ vɛŋ ka te de Kyayitira yɛlɛ ŋa wuli a muni. Kyayitira eɛ university sakuubie ka o neŋ Jehoova Sieree Deme da piili zanna a Baabole. Ba da toŋboɔlooŋ ka o wa te lammokpɛŋ na kaŋa. O da gaaɛ a lammokpɛŋ. A bebi-dɛndɛŋ soba o da yelko la o Baabole wulwulo na ka: “N dɔgreba daaŋ ba kore ma zaa. Kyɛ, a bebi-yenaa ŋa maŋ wa a lammokpɛŋ ŋa zieŋ, noba naŋ ta 52 wa kore maŋ! N wa nyɛɛŋ ka Jehoova tu la o puorebiiri zieŋ a wulo ma nɔmmo. N boɔrɔŋ ka N meŋ wa poɔ o puorebiiri na poɔŋ.” Kyayitira da nyɛɛ nimitɔɔre gaabo a de suobu yuoni 2024. Ɛɛ, ka nempaalbaŋ wa nyɛ tonsonne na teŋ tonɔ na, aŋa nɔmmo na teŋ wulo taa na, a maŋ tɔɛ ba sukyie baŋ boɔrɔ ka ba meŋ wa puoro Jehoova.—Mat. 5:16.

6. Ka teneeŋ tagra peɛlɛ te yɔɔdɔba neŋ te yɔɔpɔgeba, sobuo aŋ na baŋ go te?

⁶ Ka teneeŋ tagra peɛlɛ te yɔɔmine, a eɛ yɛlɛ naŋ na baŋ go te ka te ta wa erɛ yɛlɛ naŋ na sãã te neŋ Jehoova niiloŋ na. Pɔɔl da ko la o Kristabitaaba kawane ka: “Yɛ yele yɛlɛ teɛrɛ taa bebiri zaa . . . ka yelbebe bɛllɛ ta wa dare yɛ kaŋa zaa sukyiri.” (Hib. 3:13) Ka te eŋɛŋ wa kyoɔre yaga zaa ka lɛ vɛŋ teŋ ba lɛ erɛ yɛlɛ naŋ tori Jehoova nimitɔɔreŋ, Jehoova na baŋ tu la te Kristabitɔ kaŋa zie a de sommo naŋ seŋ neŋ ko te. (Yiem. 73:​2, 17, 23) A faŋa emmo ŋa na baŋ soŋ teŋ yaga zaa.

7. Sobuo ka nɔmmo maŋ vɛŋ teŋ taa noɔreyeni? (Kolosi 3:​13, 14)

⁷ Te poɔ la noba naŋ maŋ moɔrɔ ba moɔbo zaa ka ba wulo nɔmmo korɔ taa, azuŋ te maŋ nyɛrɛɛ maaloo yaga zaa. (1 Gyn. 4:11) Aŋa mannoo poɔŋ, nɔmmo la maŋ vɛŋ teŋ “naŋ kyɛnɛ dire kannyiri korɔ taa.” Lɛ eebo maŋ vɛŋeŋ ka noɔreyeni be te kpakyagaŋ. (Kanne Kolosi 3:​13, 14; Efe. 4:​2-6) Azuŋ, ka teneeŋ wa gaa te lammozie, te eŋɛ zaaŋ maŋ noma te naŋ be te yɔɔmine poɔŋ. A noɔreyeni ŋa tɔ ba lɛ be a teŋɛzu zie zaa.

YƐ TAA EMMO KO TAA

8. Bo yɛlɛ ka Jehoova e a boɔrɔ ka o de soŋ te ka te taa noɔreyeni?

⁸ Lɛ te yɔɔmine naŋ taa noɔreyeni a donɛɛ lombori zaa na eɛ yelseɛlee. Aneazaa ka te eɛ noba naŋ ba pɛgeyi, kyɛ Jehoova vɛŋɛɛŋ teŋ taa noɔreyeni. (1 Kor. 12:25) A Baabole yeleeŋ ka ‘Naaŋmen wuli teŋ ka te nɔnɔ taa.’ (1 Tɛs. 4:9) Lɛ wuleeŋ ka Jehoova tu la a Baabole eŋɛŋ a wulo te yɛlɛ naŋ seŋ ka te erɛ ka lɛ vɛŋ ka te tagra peɛlɛ taa. Ka teneeŋ maŋ zanna yɛlɛ na Naaŋmen naŋ wulo te na, a de a yɛlɛ meŋ tonɔ neŋ toma, lɛ yɛŋ te na baŋ yeliŋ ka ‘Naaŋmen wulo teŋ.’ (Hib. 4:12; Gyi. 1:25) A yɛlɛ ŋa neŋ o zu ka Jehoova Sieree Deme maŋ moɔrɔ ka ba erɛ.

9. Aŋa lɛ na Urom 12:​9-13 naŋ wuli na, wala teŋ na baŋ e a de wuli ka te taaɛ emmo ko taa?

⁹ Sobuo ka Naaŋmen Yelbiri na na baŋ soŋ te ka te tagra peɛlɛ taa? Bitontona Pɔɔl da yelee yelkaŋa kyaare a yɛlɛ ŋa. (Kanne Urom 12:​9-13.) Ka hooŋ kaa a sɛgre soŋ, Pɔɔl yeleeŋ ka, “yɛ vɛŋ ka yɛ kaŋa zaa noba emmo maŋ zuo o tɔsoba deni.” Wala ka lɛ wuli? Lɛ wuleeŋ ka aseŋ ka te maŋ de weɛ a wulo te taaba “yɔɔloŋ nɔmmo.” Ka teneeŋ maŋ dire suuri korɔ taa, a derɛ te taaba saannoŋ, a yuoro te nu terɛ boma, ane a yɛlɛ ama taa, a na wuliŋ ka te wulee te yɔɔmine “yɔɔloŋ nɔmmo.” (Efe. 4:32) A ba seŋ ka ho zeŋ kyɛnlɛ ka ho yɔɔmine tage peɛle bo. Ho na baŋ de la weɛ a tagra peɛlɛ ba. Yezu da yeleeŋ ka: “A e la maaloo yaga ka ho tere a gaŋ ho naŋ derɛ.”—Tom. 20:35.

10. A Baabole yeleeŋ ka “yɛ vɛŋ ka yɛ kaŋa zaa noba emmo maŋ zuo o tɔsoba deni,” sobuo ka tonkpeɛne tommo na toɔ̃ vɛŋ ka te e lɛ? (Kaa a foto.)

¹⁰ Saŋa na Pɔɔl naŋ wa yelka te maŋ de weɛ a wulo taa emmo baare na, o gaaɛ nimitɔɔre a yelka “yɛ vɛŋ ka yɛ enne kyerɛ ne a toma.” Lɛ wuleeŋ ka a ba seŋ ka te e eŋtuo deme. Ka ba naŋ wa de toma zaa eŋ te nuuriŋ, aseŋ ka te maŋ mɔɔ a toŋ a toma velaa zaa. Yeng Yelibie 3:​27, 28 yeleeŋ ka: “Ta wa derɛ bonsoŋ mɔnnɔ neɛ naŋ seŋ ka ho de o tere ka hooŋ wa taa a kpeɛ̃o ka ho soŋ.” Azuŋ, ka teneeŋ wa nyɛ neɛ kaŋa naŋ boɔrɔ sommo, aseŋ ka te mɔɔ te moɔbo zaa a de sommo naŋ seŋ neŋ ko o soba. A ba seŋ ka te maŋ naara yɛlɛ eeboŋ, kyɛbee ka te teɛre ka neŋyuo kaŋa na eɛ a yɛlɛ.—1 Gyn. 3:​17, 18.

11. Boŋ na toɔ̃ soŋ te ka te tagra peɛlɛ taa?

¹¹ Ka te yɔɔ kaŋaŋ wa e te yɛlɛ naŋ ba seŋ neŋ, kyɛ ka te lonne wieoŋ a di suuri ko o soba, a eɛ sori kaŋa teŋ lɛ tu a wulo o soba emmo. Efesu 4:26 yeleeŋ ka: ‘Yɛ ta maŋ vɛŋ ka yɛ suuri iri lɛɛŋ ka ŋmenaa te kpɛ.’ Bonso aŋ ba seŋ ka te e lɛ? O wɛlbo 27 na yeleeŋ ka a na ‘bare la vuo ko a Dɛɛvul.’ Ka hooŋ kaa a Baabole poɔŋ, gbɛɛ yaga Jehoova maŋ yele korɔ teŋ ka te dire suuri korɔ taa. Kolosi 3:13 eŋnɛ teŋ faŋa ka te naŋ “kyɛnɛ dire kannyiri korɔ taa a vɛnɛ korɔ taa zaala zaala.” Ka teneeŋ ba maŋ de te teɛroŋ zaa eŋ te yɔɔmine gbɛ ŋmɛ, ane yɛlɛ ba naŋ ba erɛ soŋ eŋɛŋ, a na eɛ mɔlɔ ko te ka te tagra peɛlɛ ba. Lɛ eebo meŋ na soŋ teŋ ka te ‘moɔrɔ te moɔbo zaa ka te taa noɔreyeni a vooroŋ soŋ poɔ, ka emmaaroŋ laŋ te taa.’ (Efe. 4:3) Azuŋ, a yelnimizeɛ meŋɛ la ŋa, ka teneeŋ dire suuri korɔ taa a na vɛŋeŋ ka te taa noɔreyeni neŋ emmaaroŋ te kpakyagaŋ.

12. Sobuo ka Jehoova vooroŋ soŋ na na baŋ soŋ te ka te dire suuri korɔ te taaba?

¹² Yelmeŋɛ la, ka neɛ kaŋaŋ wa e te yelkaŋa ka a kpɛ te yaga, a maŋ eɛ kpeɛŋaa ka te di suuri ko o soba. Kyɛ, Jehoova vooroŋ soŋ na na baŋ soŋ teŋ ka te di suuri ko o soba. Ka hooŋ teɛre, saŋa na bitontona Pɔɔl naŋ wa yelka te “nɔnɔ taa ne yɔɔloŋ nɔmmo” baare na, o da gaaɛ nimitɔɔre a lɛ yelka, “yɛ vɛŋ ka yɛ enne kyerɛ ne a toma.” Wala ka a yelbie “enne kyerɛ” wuli? A Baabole poɔŋ a yelbie ŋa wulee neɛ Jehoova vooroŋ soŋ na naŋ emoo faŋa oŋ de eŋnyagroŋ a erɛ neŋ yɛlɛ. Lɛ wuleeŋ ka Naaŋmen vooroŋ soŋ na na baŋ soŋ teŋ ka te wulo taa yɔɔloŋ nɔmmo, a maŋ lɛ dire suuri meŋ korɔ taa zaala zaala. Azuŋ, aseŋ ka te maŋ yi te poɔ zaa a puore sɔre Jehoova ka o soŋ te.​—Luk. 11:13.

A BA SEŊ KA ‘WƐLTAA BE TE SOGƆŊ’

13. Bo yɛlɛŋ na baŋ waneŋ wɛltaa te kpakyagaŋ?

¹³ “Nemboorɔ zaa” naŋ yi ziiri tɛɛtɛɛ la wa lantaa a lantaapuoruu poɔŋ. (1 Tim. 2:​3, 4) Te naŋ e noba naŋ yi ziiri tɛɛtɛɛ na zuŋ, lɛ na teŋ maŋ maale te menne, a su boma, sori teŋ maŋ tu a saŋ te baaloŋ, ane yɛlɛ teŋ maŋ de pɛlɛ te niŋe meŋ ba maŋ yitaa. Azuŋ ka teneeŋ ba kaa soŋ a yɛlɛ ama na baŋ wanɛɛ wɛltaa te kpakyagaŋ. (Uro. 14:4; 1 Kor. 1:10) ‘Naaŋmen wuli teŋ ka te nɔnɔ taa,’ azuŋ, aseŋ ka te kaara soŋ a ta wa erɛ yelzaa naŋ na wuli ka yɛlɛ tenee naŋ kaa iri la seɛ te taaba deni na.​—Fil. 2:3.

14. Bo yɛlɛ aŋ seŋ ka te maŋ moɔrɔ ka te erɛ? Bonso aŋ seŋ ka te maŋ erɛ lɛ?

¹⁴ Ka teneeŋ maŋ yele yɛlɛ naŋ eŋnɛ te yɔɔmine faŋa, a lɛ korɔ ba pɛnnoo meŋ, a na soŋeŋ ka noɔreyeni be a lantaapuoruu poɔŋ. (1 Tɛs. 5:11) A ba kɔɔre kyɛ ka noba yaga ba naŋ iri bare a lantaapuoruu poɔŋ, ane noba naŋ bare Jehoova puoruu leɛ wa Jehoova zie. Te ko la a noba ŋa zaa waayaane. (2 Kor. 2:8) Te yɔɔpɔge kaŋa barɛɛ Jehoova puoruu aŋa yuomo pie. Kyɛ o da mɔɔ yɛŋ a leɛ gaa a Lammozie. Ŋaaŋ oŋ yeli saŋa na oŋ leɛ gaa be na: “Noba yaga da de la popeɛloŋ a wa nyɔge N nuŋ a puore ma.” (Tom. 3:19) Sobuo ka a yɛlɛ na baŋ e na tɔ te yɔɔpɔge ŋa sukyiri aseŋ? O yeleeŋ ka, “A da vɛŋɛɛŋ maŋ nyɛ ka Jehoova la wulo ma yɛlɛ aŋ seŋ ka N erɛ ka lɛ vɛŋ ka N taa popeɛloŋ.” Ka teneeŋ maŋ eŋnɛ te yɔɔmine faŋa, Yezu na baŋ tu la te zie a de pɛnnoo ko noba naŋ “tuo tuotegrɛ a bale.”​—Mat. 11:28, 29.

15. Bo yɛlɛ teŋ na baŋ lɛ e a vɛŋ ka noɔreyeni be te kpakyagaŋ? (Kaa a foto.)

¹⁵ Te yelyelii lɛ eɛ sori kaŋa teŋ na baŋ lɛ tu a vɛŋ ka noɔreyeni be te kpakyagaŋ. Joob 12:11 yeleeŋ ka: ‘Ma toorii maŋ begrɛɛ yelbie nyɛrɛ wa, ka noɔre meŋ maŋ lɛnne bondirii nyɛrɛ wa?’ Ka neɛ naŋ baŋ bondirii maalooŋ wa maale bondirii baare, o maŋ daŋ lɛnnɛɛ a bondirii nyɛ ka a nomaŋ bee. Lɛ puoriŋ, o pãã maŋ de la a bondirii ko noba baŋ di. Lɛ neŋ o zu la, a maŋ somaŋ yaga zaa ka te teɛre yɛlɛ na teŋ waana ka te yeli na yɛlɛ gaa tɔɔre sɛre kyɛ ka a yɛlɛ yire te nɔɛŋ. (Yiem. 141:3) Aseŋ ka te maŋ mɔɔ te moɔbo zaa a yele yɛlɛ naŋ eŋnɛ te taaba faŋa, a korɔ ba pɛnnoo meŋ. Lɛ eebo na vɛŋeŋ ka te yelbie “taa maaloo ko a banaŋ naŋ kyɛllɛ wono a.”​—Efe. 4:29.

16. Aŋ mine la seŋ ka ba maŋ yele yɛlɛ naŋ eŋnɛ faŋa?

¹⁶ A eɛ nimizeɛ yaga zaa ka serebɛ ane bidɔgreba kaara ba yelyelii zieŋ soŋ. Aseŋ ka ba maŋ mɔɔ a yele yɛlɛ naŋ eŋnɛ faŋa. (Kol. 3:​19, 21; Tit. 2:4) A lantaapuoruu nembɛrɛ la ka Jehoova kaa iri ka ba kyeenɛ o peere na, azuŋ aseŋ ka ba meŋ maŋ yele yɛlɛ naŋ diire a lantaapuoruu noba sukyie, a lɛ korɔ ba pɛnnoo meŋ. (Aiz. 32:​1, 2; Gal. 6:1) A Baabole zie kaŋa yeleeŋ ka: “Yelbiri ba naŋ yeli wagre naŋ seŋ neŋ poɔŋ—nyɛ lɛ a naŋ soma aseŋ!”—Yeng. 15:23.

TE NƆNƆ TAA “YELMENNOŊ ANE TE EROŊ POƆ”

17. Wala teŋ na baŋ e a yi te sukyie poɔŋ a wulo te yɔɔmine nɔmmo?

¹⁷ Bitontona Gyɔɔn da sɛgɛɛŋ ka: “Yɛ ta vɛŋ ka te nɔmmo e noɔre poɔ nɔmmo, kyɛ te taa nɔmmo ne yelmennoŋ ane te eroŋ poɔ.” (1 Gyn. 3:18) Azuŋ, aseŋ ka te yi te sukyie poɔ a nɔnɔ te yɔɔdɔba neŋ te yɔɔpɔgeba. Sobuo teŋ na baŋ tu a e lɛ? Ka te neŋ te yɔɔmine maŋ laŋ erɛ yɛlɛ, a na soŋ teŋ ka te tagra peɛlɛ taa. Ka teneeŋ wa tagra peɛlɛ taa, nɔmmo na meŋ teŋ taa ko taa na na maaleŋ erɛɛ kpeɛŋaa. Azuŋ, maŋ boɔrɔ soe hoŋ na baŋ tu ka ho neŋ ho yɔɔmine laŋna erɛ yɛlɛ. A lammozie neŋ a naaŋ moɔloo eɛ soe teŋ na baŋ tu ka te neŋ te yɔɔmine laŋna erɛ yɛlɛ. Maŋ bɔ wagre a te puore ba meŋ. Ka teneeŋ wa erɛ a yɛlɛ ama zaa, te na wuliŋ ka ‘Naaŋmen wuli teŋ ka te nɔnɔ taa.’ (1 Tɛs. 4:9) A Baabole yeleeŋ ka: ‘Nyɛ, aŋ e soŋ a e noɔ̃ lɛ, ka yɔɔmine laŋkpeɛrɛ neŋ noɔreyeni.’ (Yiem. 133:1) Ka teneeŋ moɔ̃ niŋe a wulo te yɔɔmine nɔmmo, te na wa nyɛŋ ka a yɛlɛ ŋa sereŋ eɛ yelmeŋɛ yaga zaa.