ZANNOO YƐLƐ 15
YIELOŊ 30 My Father, My God and Friend (N Saa, N Naaŋmen Ane N Zɔmeŋɛ)
Tenee Yɛŋ ‘A Soma Ko Teŋ Ka Te Tagra Peɛlɛ Naaŋmen’!
‘Maaŋ yɛŋ, a somaŋ ka N tagra peɛlɛ Naaŋmen.’—YIEM. 73:28.
YƐLƐ TE NAŊ NA ZANNE
Te na zannɛɛ sori teŋ na baŋ tu a tagra peɛlɛ Jehoova, ane maaloo teŋ na nyɛ ka teneeŋ e lɛ.
1-2. (a) Sɛre ka te neŋ neɛ na baŋ nyɔge zɔmennoŋ naŋ e kpeɛŋaa na, bo yɛlɛ aŋ seŋ ka te e? (b) Bo yɛlɛ teŋ na zanne a zannoo ŋa poɔŋ?
HO TAAƐ zɔmeŋɛ kaŋa naŋ peɛle bo yaga zaa bee? Boŋ vɛŋ yɛŋ wa e zɔmenne naŋ peɛle taa? Aminekaŋaŋ, ho ne o maŋ laŋ erɛɛ yɛlɛ. Lɛ vɛŋɛɛŋ hoŋ wa baŋ yelkpeɛne o naŋ tuoro, yɛlɛ oŋ boɔrɔ ane yɛlɛ o naŋ ba boɔrɔ. Ho wa nyɛɛŋ ka ho zɔmeŋɛ na taaɛ gyog-sonne yaga hoŋ na baŋ tɔgle. Lɛ vɛŋɛɛŋ hoŋ wa nɔŋ ho zɔmeŋɛ na yaga zaa.
2 A maŋ de la wagre neŋ moɔbo yaga sɛre ka ho neŋ neɛ kaŋa na baŋ nyɔge zɔmennoŋ naŋ e kpeɛŋaa. Lɛ neŋ o zu la, a maŋ de la wagre neŋ moɔbo yaga sɛre kyɛ teŋ na toɔ̃ baŋ Jehoova Naaŋmen soŋ, ka lɛ vɛŋ ka te ne o nyɔge zɔmennoŋ naŋ e kpeɛŋaa. A zannoo ŋa poɔŋ, te na zanne nyɛɛ sori teŋ na baŋ tu a tagra peɛlɛ Naaŋmen, ane maaloo teŋ na nyɛ ka teneeŋ erɛ lɛ. Kyɛ, a dɛndɛŋ soba, yɛ vɛŋ ka te nyɛ bon nanso aŋ soma yaga zaa ka te tage peɛle te Zɔmeŋɛ Jehoova.
3. Bonso aŋ seŋ ka te maŋ teɛrɛ maaloo teŋ na nyɛ ka teneeŋ tagra peɛlɛ Jehoova yɛlɛ? De yelmannaa wuli a muni.
3 Nɔkpeɛne zaa kyebe ka hooŋ meŋɛ baŋɛɛŋ ka, ka hooŋ tagra peɛlɛ Jehoova a eɛ yɛlɛ naŋ soma. Kyɛ, bonso teŋ yelka a somaŋ yaga zaa ka te tagra peɛlɛ Jehoova? (Yiem. 63:6-8) Te de a yelmannaa ŋa wuli a muni. Te zaa baŋɛɛŋ ka ka teneeŋ dire bondirii naŋ soma, a dɛnnɛ te kɔbɔ, a maŋ de wagre naŋ seŋ neŋ pɛnne, a nyuuro koɔ̃ meŋ, a eɛ yɛlɛ naŋ na toɔ̃ vɛŋ ka te taa laafeeloŋ naŋ soma. Kyɛ, noba yaga ba maŋ kyaara erɛ a yɛlɛ ama. Azuŋ, ba ba maŋ taa laafeeloŋ naŋ soma. Kyɛ, ka teneeŋ maŋ teɛrɛ lɛ na a yɛlɛ ama naŋ e nimizeɛ aseŋ, ana vɛŋeŋ ka te moɔ̃ niŋe a eraa. Lɛ neŋ o zu la, te zaa baŋɛɛŋ ka a somaŋ ka te tagra peɛlɛ Jehoova, kyɛ ka teneeŋ maŋ bɔ wagre a teɛre yɛlɛ gaa tɔɔre a nyɛ maaloo teŋ na nyɛ ka teneeŋ erɛ lɛ, a na eŋ teŋ faŋa ka te moɔ̃ niŋe a tagra peɛlɛ te Zɔmeŋɛ na yaga zaa.—Yiem. 119:27-30.
4. Bo ka neɛ naŋ sɛge Yieme 73:28 na yeli?
4 Kanne Yieme 73:28. Neɛ naŋ sɛge Yieme 73 eɛ Liivai dɔɔ kaŋa ba naŋ da kaa iri ka o maŋ kyeɛrɛ yiele Jehoova ŋmenpuoredie naŋ. O de la yuomo yaga a puore Jehoova yelmennoŋ poɔŋ. Kyɛ, o da naŋ teɛrɛɛŋ ka a eɛ nimizeɛ ka o leɛteɛre o meŋɛ, ane o taaba ka a somaŋ ka ba ‘tagra peɛlɛ Naaŋmen.’ Bo maaloo teŋ na nyɛ ka teneeŋ tagra peɛlɛ Naaŋmen?
KA TENEEŊ ‘TAGRA PEƐLƐ NAAŊMEN,’ A NA VƐŊEŊ KA TE TAA POPEƐLOŊ YAGA
5. (a) Ka teneeŋ wa tagra peɛlɛ Jehoova yaga zaa, bonso aŋ maŋ vɛŋ teŋ taa popeɛloŋ? (b) Aŋa lɛ na Yeng Yelibie 2:6-16 naŋ wuli na, manne soe na mine teŋ maŋ nyɛ tɔnɔ saŋa na teŋ wa de yɛlɛ na Jehoova naŋ wulo te na tonɔ neŋ toma.
5 Ka teneeŋ tagra peɛlɛ Jehoova yaga zaa, a na vɛŋeŋ ka te popeɛloŋ meŋ maaleŋ erɛ kpoŋ. (Yiem. 65:4) Bonso teŋ yeli lɛ? A ananso eɛ yaga. Aŋa mannoo poɔŋ, ka teneeŋ wa de Baabole sowuli toŋ neŋ toma, a maŋ vɛŋeŋ teŋ taa popeɛloŋ. Yɛlɛ na Jehoova naŋ maŋ wulo te yire a Baabole poɔŋ na maŋ go teŋ yi yelzaa naŋ na baŋ pere te eŋɛŋ. A maŋ lɛ vɛŋeŋ teŋ ba ŋmeɛrɛ gbɛɛ naŋ e nimizeɛ. (Kanne Yeng Yelibie 2:6-16.) A Baabole yeleeŋ ka: ‘Popeɛloŋ be la dɔɔ naŋ nyɛ yɛŋ zieŋ, a be dɔɔ naŋ nyɛ nimiyuo zieŋ.’ (Yeng. 3:13) A yɛlɛ ŋa eɛ yelmeŋɛ yaga zaa.
6. Boŋ da vɛŋ ka a yieloŋ yiele da ba lɛ taa popeɛloŋ?
6 Kyɛ, aŋa lɛ te zaa naŋ baŋ na, saŋa kaŋa Jehoova zɔmenne meŋ maŋ tuoree posãã yɛlɛ. Neɛ naŋ sɛge Yieme 73 da ba lɛ taa popeɛloŋ saŋa na oŋ piili teɛrɛ yɛlɛ mine naŋ ba kyɛnɛ soŋ o zemmo poɔŋ na yɛlɛ. O da teɛrɛɛŋ ka neŋfaare naŋ ba erɛ Naaŋmen boɔbo, kyɛbee a ba de o bege tonɔ neŋ toma zemmo da somaŋ yaga. Lɛ da vɛŋɛɛŋ oŋ piili erɛ ba nyuuri, ka o suuri meŋ da iri. O da teɛrɛɛŋ ka noba naŋ tonɔ kpaŋkpaŋkpeɛ̃o toma, ane noba naŋ zɛgrɛ ba menne maŋ leɛ la bondaanba, a taa laafeɛ, ka toɔrɔ meŋ zaa ba waana ba zuŋ. (Yiem. 73:3-7, 12) A yɛlɛ ŋa da dɔɔnɛɛ a yieloŋ yiele yaga zaa. O gba da piili teɛrɛŋ ka Jehoova puoruu ba taa tɔnɔ zaa. Posããnaa da kpɛ oŋ ka lɛ vɛŋ oŋ yelka: ‘Yelmeŋɛ la, kpale la neŋ maŋ e ka N sukyiri e forifori. Kpale la maŋ pɛge N nuuri aŋ yi faaloŋ bammo poɔŋ.’—Yiem. 73:13.
7. Ka te poɔŋ wa sãã ka lɛ vɛŋ teŋ ba lɛ taa popeɛloŋ, wala aŋ seŋ ka te e? (Kaa a foto.)
7 A yieloŋ yiele da ba vɛŋ ka posããnaa na oŋ taa na vɛŋ oŋ bare Jehoova puoruu. O da eɛ yɛlɛ naŋ somoo oŋ leɛre o teɛroŋ. O da te ‘kpɛɛ Naaŋmen zi-forifori na.’ Beŋ ka Jehoova da somoo oŋ leɛre o teɛroŋ. (Yiem. 73:17-19) Ka te poɔŋ wa sãã, te Zɔmeŋɛ Jehoova maŋ baŋeŋ. Ka teneeŋ puore sɔroo ka o ko te sowuli yi o Yelbiri a Baabole poɔŋ, a lɛ sage sommo yi a lantaapuoruu noba zieŋ, te na nyɛɛ faŋa naŋ na toɔ̃ soŋ te ka te are te posããnaa na noɔreŋ. Haali ka teɛroŋ gyɛreŋ wa gaali te, kyɛ Jehoova na baŋ dii la te sukyie ka lɛ vɛŋ ka te taa sukyirimaaroŋ.—Yiem. 94:19.a
A Liivai dɔɔ naŋ sɛge Yieme 73 la are ‘Naaŋmen zi-forifori na’ poɔŋ (Kanne wɛlbo 7)
KA TENEEŊ ‘TAGRA PEƐLƐ NAAŊMEN,’ A MAŊ VƐŊEŊ TEŊ TAA ZEŊ LAAFEƐ PAMPANA, A LƐ VƐŊ TEŊ TAA NENDAARE KAŊA TEƐRETƆ
8. Bo soe mine naŋ e nimizeɛ yaga zaa zuŋ aŋ soma ka te tagra peɛlɛ Naaŋmen?
8 Soe ayi mine naŋ e nimizeɛ yaga zaa zuŋ aŋ seŋ ka te tagra peɛlɛ Naaŋmen. A dɛndɛŋ soba, a maŋ vɛŋeŋ teŋ taa zeŋ laafeɛ pampana. Ayi soba, a maŋ vɛŋeŋ teŋ taa nendaare kaŋa teɛretɔ. (Jer. 29:11) Yɛ vɛŋ ka te manne a maaloo ayi ŋa yɛlɛ gaa tɔɔre.
9. Ka teneeŋ tagra peɛlɛ Naaŋmen, sobuo aŋ maŋ soŋ te teŋ taa zeŋ laafeɛ pampana?
9 Ka teneeŋ tagra peɛlɛ Jehoova, a maŋ vɛŋeŋ teŋ taa zeŋ laafeɛ pampana. Noba mine bebeŋ a sagedi ka Naaŋmen kyebe, azuŋ, ba na yɛŋ zieŋ zemmo ba taa ananso zaa. Ba gba teɛrɛɛŋ ka bebiri kaŋa nensaaleba zaaŋ na kpi. Kyɛ, a yi a Baabole zannoo poɔŋ, tenee yɛŋ wa sagedieŋ ka Naaŋmen ‘maŋ ko la noba na zaa naŋ moɔ̃ niŋe a boɔroo na saŋyɔɔ.’ (Hib. 11:6) Jehoova maale teŋ ka te puoruu. Azuŋ, zenɛ ŋa gba te taaɛ popeɛloŋ, bonso te erɛɛ yɛlɛ na Jehoova naŋ maale te ka te erɛ na.—Dut. 10:12, 13.
10. Aŋa lɛ na Yieme 37:29 naŋ wuli na, wala ka noba naŋ de ba teɛretɔ zaa eŋ Jehoova eŋɛŋ nendaare kaŋa na waa?
10 Noba mine ba taa teɛretɔ a kyaare nendaare kaŋa. Ba na yɛlɛ la ka ba tonɔ toma, a de pɔge dɔge biiri, a bɔ libie biŋ a dire saŋa na baŋ koŋ toɔ̃ lɛ tonɔ toma na. Ba ba maŋ de Naaŋmen poɔ ba yɛlɛ zaa poɔŋ. Kyɛ, Jehoova puorebiiri yɛŋ maŋ de la ba teɛretɔ zaa eŋ o eŋɛŋ. (Yiem. 25:3-5; 1 Tim. 6:17) Te dɛlɛɛ Naaŋmen na teŋ tagra peɛlɛ na. Te taaɛ sagediibu meŋ ka o na paalɛɛ o nɔ-ennee zaa. Te taaɛ nendaare kaŋa teɛretɔ ka te na puoree Jehoova tegitegilɛ Paradiisi poɔŋ.—Kanne Yieme 37:29.
11. Ka teneeŋ wa tagra peɛlɛ Naaŋmen, bo maaloo teŋ maŋ nyɛ? Ka teneeŋ wa erɛ yɛlɛ naŋ soma, wala ka Jehoova maŋ teɛre?
11 A yi soe yaga mine meŋ poɔŋ, te na baŋ yeliŋ ka, teŋ na tagra peɛlɛ Naaŋmen soma ko teŋ. Aŋa mannoo poɔŋ, Jehoova eŋɛɛ noɔre ka o na di la o zɔmenne naŋ peɛloo yelfaare suuri ko ba. (Aiz. 1:18) Azuŋ, ka teneeŋ e yelfaare mine saŋa kaŋa naŋ pare, a ba seŋ ka te vɛŋ ka a yɛlɛ dɔɔnɔ te yaga zaa te gaali. (Yiem. 32:1-5) Ka teneeŋ wa erɛ yɛlɛ naŋ maŋ vɛŋ ka Jehoova poɔ pɛle, te eŋɛ zaaŋ maŋ noma. (Yeng. 23:15) Yelmeŋɛ la, te maŋ nyɛɛ maaloo yaga saŋa na te neŋ Naaŋmen naŋ wa nyɔge zɔmennoŋ naŋ e kpeɛŋaa na. Kyɛ, wala teŋ na baŋ e a naŋ tagra peɛlɛ Jehoova?
LƐ TEŊ NA TOƆ̃ E A NAŊ ‘TAGRA PEƐLƐ NAAŊMEN’
12. Bo yɛlɛ hoŋ e aŋ toɔ̃ soŋ bo hoŋ tagra peɛlɛ Jehoova?
12 Ka hooŋ e Kristabie naŋ de suobu, lɛ wuleeŋ ka ho mɔɔ yɛŋ a toɔ̃ tage peɛle Jehoova. Ho zannɛɛ yɛlɛ na a Baabole naŋ wulo a kyaare Jehoova neŋ Yezu Krista, a leɛre yi ho yelfaare eŋɛŋ, a erɛ yɛlɛ naŋ wuli ka ho taaɛ sagediibu Naaŋmen eŋɛŋ, a lɛ moɔrɔ ho moɔbo zaa a erɛ o poboɔbo yɛlɛ. Kyɛ, ka hooŋ boɔrɔ ka ho naŋ tagra peɛlɛ Jehoova, aseŋ ka ho naŋ moɔ̃ niŋe erɛ a yɛlɛ ama.—Kol. 2:6.
13. Bo yɛlɛ ata mine la na baŋ soŋ te ka te naŋ tagra peɛlɛ Jehoova?
13 Bo yɛlɛŋ na baŋ soŋ te ka te naŋ tagra peɛlɛ Jehoova? Yɛlɛ ata mine na baŋ soŋ teŋ. A dɛndɛŋ soba, aseŋ ka te moɔ̃ niŋe a kanna a kyɛ maŋ lɛ zanna a Baabole meŋ. Aseŋ ka te maŋ moɔrɔ ka te baŋ yɛlɛ na Naaŋmen naŋ boɔrɔ ka te erɛ, a lɛ moɔrɔ ka te baŋ a Baabole sowuli velaa zaa, ka lɛ vɛŋ ka te de a tonɔ neŋ toma. (Efe. 5:15-17) Ayi soba, Jehoova eɛ yɛlɛ yaga zaa a de wuli ka o taaɛ nɔmmo naŋ e zuluŋ a ko te yeni yeni zaa. Azuŋ, aseŋ ka te maŋ teɛrɛ a yɛlɛ ama gɛrɛ tɔɔre. Ata soba, aseŋ ka te kyiiri yɛlɛ Jehoova naŋ ba boɔrɔ, a lɛ tage te menne yi noba naŋ erɛ ana yɛlɛ na zie.—Yiem. 1:1; 101:3.
14. Aŋa lɛ na 1 Korinti 10:31 naŋ yeli na, bo yɛlɛ mine la teŋ na baŋ erɛ te bebiri zaa zemmo poɔŋ ka a vɛŋ ka Jehoova poɔ pɛle? (Kaa a fotori.)
14 Kanne 1 Korinti 10:31. A eɛ nimizeɛ yaga zaa ka te moɔ̃ niŋe a erɛ yɛlɛ naŋ pɛlɛ Jehoova poɔ. Ka teneeŋ gɛrɛ a naaŋ moɔloo, ane a lammore, a somaŋ. Kyɛ, a lɛ eɛ nimizeɛ ka te erɛ yɛlɛ naŋ pɛlɛ Jehoova poɔ te bebiri zaa yel-eree poɔŋ. Aŋa mannoo poɔŋ, ka teneeŋ wa e yelmeŋɛ deme yelzaa poɔŋ, a yuoro te nu terɛ boma, a maŋ vɛŋeŋ ka Jehoova poɔ pɛle yaga zaa. (2 Kor. 8:21; 9:7) Jehoova boɔrɔŋ ka te de te yel-eree wuli ka te niŋe paalɛɛ nyɔvore na oŋ ko te na. Azuŋ, a ba seŋ ka te e digbogbo deme, kyɛbee a maŋ nyuuro dããkpeɛne te gaali. Aseŋ ka te moɔrɔ te faŋa bɔgiŋ a kaara te laafeeloŋ yɛlɛ soŋ, lɛ na soŋ teŋ ka te tage peɛle Neɛ naŋ ko te nyɔvore na. Yelzaa te naŋ erɛ ka te pɛle Jehoova poɔ, haali ka a yɛlɛŋ e fẽẽ gba, kyɛ a maŋ vɛŋeŋ ka Jehoova nɔŋ te yɛlɛ yaga zaa.—Luk. 16:10.
Jehoova poɔ maŋ pɛleŋ yaga ka teneeŋ wa kaara velaa saŋa na teŋ mɔnɔ lɔɔre kyɛbee a zɔŋ moto, a dɛnnɛ te kɔbɔ, a dire bondirii naŋ soma, a maŋ lɛ derɛ te yɔɔmine meŋ saannoŋ na (Kanne wɛlbo 14)
15. Bo yɛlɛ ka Jehoova boɔrɔ ka te erɛ korɔ te taaba?
15 Jehoova maŋ wulee nimimaaroŋ korɔ noba naŋ e sontuuribo ane noba naŋ ba e sontuuribo. (Mat. 5:45) Jehoova boɔrɔŋ ka te meŋ wulo a nimimaaroŋ ŋa tɔ korɔ te taaba. Aŋa mannoo poɔŋ, te ba maŋ ‘yele yelfaare korɔ neɛzaa, a bare zɔɔre, . . . a kyɛ korɔ noba zaa gyeremɛ’ meŋ. (Tit. 3:2) Azuŋ, ka noba mineŋ ba wa taa sagediibu Jehoova eŋɛŋ, kyɛ a ba seŋ ka te taa kaabanyɛ ne ba. (2 Tim. 2:23-25) Ka teneeŋ maŋ erɛ yelsonne korɔ noba zaa, a wulo ba nimimaaroŋ meŋ, a na vɛŋeŋ ka te maaleŋ tagra peɛlɛ Jehoova.
KA TENEEŊ GBAŊ WA ŊMƐ GBƐRE, KYƐ TE NAŊ NA BAŊ ‘TAGRA PEƐLƐƐ NAAŊMEN’
16. Bo teɛroŋ ka neɛ naŋ sɛge Yieme 73 da taa?
16 Saŋa kaŋa, gbɛɛ na teŋ ŋmɛ na baŋ vɛŋeŋ ka te teɛre ka Jehoova ba lɛ nɔnɔ te yɛlɛ. Ka lɛŋ wa e, wala aŋ seŋ ka te e? Aŋa lɛ te naŋ yeli na, a yɛlɛ ŋa neŋ o zu la da pɔge a dɔɔ naŋ sɛge Yieme 73 na. A dɔɔ ŋa da yeleeŋ ka: ‘A da kyɛre fẽẽ lɛ ka N ŋmɛ gbɛre. N gbɛɛ da yɛŋ sareŋ.’ (Yiem. 73:2) A dɔɔ meŋɛ da yeleeŋ ka ‘o poɔ da sããŋɛɛŋ,’ ka lɛ vɛŋ oŋ leɛ ‘zɔle.’ O da lɛ yeleeŋ ka o da erɛɛ o yɛlɛ aŋa ‘duŋo’ Jehoova nimitɔɔreŋ. (Yiem. 73:21, 22) Kyɛ, o da teɛrɛɛŋ ka gbɛɛ na oŋ ŋmɛ na zuŋ Jehoova ba lɛ nɔnɔ o yɛlɛ, a koŋ di suuri meŋ koo bee?
17. (a) Wala ka a yieloŋ yiele da e saŋa na o eŋɛ naŋ da kyoɔre yaga zaa na? (b) Bo yɛlɛ teŋ na baŋ zanne yi o yɛlɛ na poɔŋ? (Kaa a fotori.)
17 Aminekaŋaŋ, a yieloŋ yiele da teɛrɛɛŋ ka Jehoova gyɛ oŋ bare, kyɛ a da ba kɔɔre oŋ leɛre o teɛroŋ na. Haali saŋa na o poɔ naŋ wa sãã yaga zaa na, kyɛ o da nyɛɛŋ ka ana saŋa la aŋ seŋ ka o maaleŋ tage peɛle Jehoova yaga zaa. Azuŋ, o da yeleeŋ ka: ‘N maŋ be la [Jehoova] zieŋ wagre zaa. Ho maŋ nyɔgɛɛ N nuduluŋ taa. Ho maŋ deɛ ne maŋ weɛ neŋ ho kawane. Lɛ puoriŋ, ho na deɛ maŋ gaaneŋ gyeremɛ poɔ.’ (Yiem. 73:23, 24) Ka te sagediibuŋ wa sigi teŋɛ, ka te gbɛ ŋmɛ meŋ wa vɛŋ ka te enne kyoɔre, aseŋ ka te sɔre Jehoova ka o soŋ te. (Yiem. 73:26; 94:18) Haali ka teneeŋ ŋmɛ gbɛre a tage te menne yi Jehoova zie saŋa kaŋa, kyɛ te na baŋ leɛ waɛ Jehoova zie. Te na baŋ taaɛ sagediibu ka o ‘eɛ siri ka o di suuri’ ko te. (Yiem. 86:5) A yɛlɛ yelnimizeɛ meŋɛ la ŋa, saŋa na te enne naŋ wa kyoɔre na, a saŋa aŋ e nimizeɛ yaga zaa ka te maaleŋ tagra peɛlɛ Naaŋmen.—Yiem. 103:13, 14.
Ka te sagediibuŋ wa sigi teŋɛ, a saŋa la aŋ seŋ ka te kpimare puore sɔroo eŋɛŋ, a gɛrɛ a lammore zaa meŋ, lɛ na vɛŋeŋ ka te tagra peɛlɛ Jehoova (Kanne wɛlbo 17)
‘TAGRA PEƐLƐ NAAŊMEN’ TEGITEGILƐ
18. Bonso ka neɛzaa koŋ baŋ yelka o tage peɛlɛɛ Jehoova a te baare?
18 Ho baŋɛɛ yelkaŋa? Neɛzaa kyebe a na baŋ yelka o tage peɛlɛɛ Jehoova a te baare. Bonso, te daaŋ koŋ baŋ zanne Jehoova yɛlɛ te baare zaa. A Baabole yeleeŋ ka Jehoova soe, o yɛŋ, ane o bammo “ba taa peɛroo.” (Uro. 11:33) Lɛ wuleeŋ ka te na zannɛɛ Jehoova yɛlɛ lɛɛŋ a gɛrɛ wagre naŋ ba taa baaroo.
19. Bo ka yɛlɛ naŋ be a Yieme gane poɔŋ yeli a kyaare nendaare kaŋa?
19 Yieme 79:13 yeleeŋ ka: ‘Lɛ ka tenee, ho noba, ho mɔmaara peere na na puore bo bareka a gɛrɛ wagre zaa. Te na maŋ wulee ho pugibu a yi dɔge-tutaa a gɛrɛ o tɔ.’ Ka hooŋ meŋ moɔ̃ niŋe a tagra peɛlɛ Jehoova tegitegilɛ, ho na nyɛɛ maaloo naŋ ba taa baaraa. Ho meŋ na baŋ de la nyaa a yelka: ‘Naaŋmen la N sukyiri faŋa. Ona la N kyɛŋ a gɛrɛ wagre zaa.’—Yiem. 73:26.
YIELOŊ 32 Take Sides With Jehovah! (Are Jehoova Puoriŋ!)
a Ka teɛroŋ gyɛreŋ wa kpɛ noba mine ka lɛ vɛŋ ka posãã neŋ eŋkyoɔre kpɛ ba wagre kɔɔroo kaŋa poɔŋ, aseŋ ka ba mɔɔ a gaa dɔkta zie a te bɔ sommo. Ka hooŋ boɔrɔ ka ho kanne yɛlɛ yaga poɔ, kanne A Kaakaara Ziduoruu, No. 1 2023.