Gaa A Lantaapuoruu Nembɛrɛ Zie A Te Bɔ Sommo

1. Wala ka Jehoova e a de wuli ka o ba deɛnɛ neŋ o puorebiiri yɛlɛ?

JEHOOVA ba deɛnɛ neŋ o puorebiiri yɛlɛ. O maŋ kaarɛɛ ba zu aŋa lɛ na pekyeenɛ naŋ maŋ kaara o peere zu na. Jehoova tu la Yezu yɔɔdeɛbo sareka na eŋɛŋ a da o puorebie zaa. O kaa iree a lantaapuoruu nembɛrɛ ka ba kaara ba zu meŋ. (Tom. 20:28) Naaŋmen kaa iree Yezu ka o e a lantaapuoruu zusoba. Azuŋ, Yezu neŋ Jehoova boɔrɔŋ ka a nembɛrɛ maŋ wulo o puorebiiri na nimimaaroŋ. A nembɛrɛ maŋ de la sowuli na Yezu naŋ korɔ ba na tonɔ neŋ toma, azuŋ ba maŋ soŋɛɛ ba yɔɔmine na ka ba neŋ Jehoova niiloŋ e kpeɛŋaa.—Aiz. 32:​1, 2.

2. Aŋ mine eŋɛŋ ka Jehoova teɛroŋ maŋ be yaga zaa? (Iziikiel 34:​15, 16)

² Jehoova nɔŋɛɛ o puorebiiri zaa yɛlɛ, kyɛ o teɛroŋ maŋ be la o puorebiiri naŋ dire dɔgɛɛ eŋɛŋ yaga. Ka ba mineŋ wa ŋmɛ gbɛɛ ka lɛ vɛŋ baŋ dire dɔgɛɛ, Jehoova na baŋ tu la a nembɛrɛ zie a de sommo naŋ seŋ neŋ ko ba. (Kanne Iziikiel 34:​15, 16.) Jehoova boɔrɔŋ ka o soŋ te saŋa na teŋ wa boɔrɔ sommo. Ka teneeŋ maŋ puore sɔre Jehoova ka o soŋ te, a somaŋ, kyɛ Jehoova lɛ boɔrɔŋ ka te gaa “noba naŋ kaara a yelderebɛ zu ane wulwulibo” zie a te bɔ sommo.—Efe. 4:​11, 12.

3. Ka teneeŋ zanne toma a lantaapuoruu nembɛrɛ naŋ tonɔ na, sobuo aŋ na baŋ soŋ te kaŋa zaa?

³ A zannoo ŋa poɔŋ, te na nyɛɛ lɛ na Jehoova naŋ maŋ tu a lantaapuoruu nembɛrɛ zieŋ a de sommo ko noba ne o niiloŋ naŋ sãã na. Te na nyɛɛ a soorebie ama nɔɛ iribo. Bo saŋa aŋ seŋ ka te gaa a nembɛrɛ zie a te bɔ sommo? Bonso aŋ seŋ ka te e lɛ? Sobuo ka a nembɛrɛ maŋ tu a de sommo ko te? Ka teneeŋ e noba naŋ ba tuoro yelkpeɛne zaa pampana, kyɛ a zannoo ŋa na soŋ teŋ ka te taa nimipa ko yɛlɛ na Jehoova naŋ sɛgre biŋ na. Bebiri kaŋa a yelsɛgraa ŋa na baŋ soŋ teŋ ka te nyɛ nyɔvore.

BO SAŊA AŊ SEŊ KA TE “BOƆLE A LANTAAPUORUU NEMBƐRƐ”?

4. Bonso teŋ na baŋ yelka yɛlɛ naŋ be Gyimisi 5:​14-16, 19, 20 wulee neɛ naŋ beɛrɛ siiloŋ poɔŋ? (Kaa a fotori.)

⁴ Yezu potuuro Gyimisi la wuli sori na Jehoova naŋ maŋ tu a nembɛrɛ zieŋ a de sommo naŋ seŋ neŋ ko te. O da sɛgɛɛŋ ka: “Neɛ kaŋa beɛrɛŋ yɛ poɔŋ bee? Vɛŋ ka o boɔle a lantaapuoruu nembɛrɛ ka ba wa o zie.” (Kanne Gyimisi 5:​14-16, 19, 20.) Ka hooŋ teɛre Gyimisi yɛlɛ na gaa tɔɔre, ho na nyɛŋ ka a baaloŋ na oŋ yele na eɛ neɛ neŋ Jehoova niiloŋ naŋ sãã. Bonso, ka eŋgannoŋ baaloŋ da la, o da naŋ yeliŋ ka o soba boɔle dɔkta, kyɛ o yeleeŋ ka o soba boɔle a lantaapuoruu nembɛrɛ. O lɛ yeleeŋ ka ka o sobaŋ nyɛ sudi, o na nyɛɛ laafeɛ. Soe mine poɔŋ na, te na baŋ yeliŋ ka sori na dɔktare naŋ maŋ tu a saŋ neɛ naŋ taa eŋgannoŋ baaloŋ, neŋ sori na a lantaapuoruu nembɛrɛ naŋ maŋ tu a saŋ neɛ naŋ beɛrɛ siiloŋ poɔŋ yi la taa. Ka teneeŋ wa beɛrɛ eŋgannoŋ poɔŋ, te maŋ gaaɛ dɔkta zie a te manne a yɛlɛ koo. A dɔkta maŋ ko teŋ sowuli teŋ de toŋ neŋ toma. Lɛ neŋ o zu la, ka teneeŋ wa beɛrɛ siiloŋ poɔŋ, aseŋ ka te gaa a lantaapuoruu neŋkpoŋ kaŋa zie a te manne a yɛlɛ koo. Ka o naŋ wa ko te Baabole poɔ sowuli, te maŋ mɔɔŋ a de a tonɔ neŋ toma.

5. Bo yɛlɛ mine la na baŋ wuli ka te neŋ Jehoova niiloŋ na ba lɛ e kpeɛŋaa?

⁵ Yɛlɛ naŋ be Gyimisi zuri 5 na eŋnɛ teŋ faŋa ka te maŋ gaa a nembɛrɛ zie a te bɔ sommo, saŋa na teŋ nyɛ ka yɛlɛ mine bebeŋ a na baŋ sãã te neŋ Jehoova niiloŋ. A somaŋ yaga zaa ka te bɔ sommo sɛre kyɛ wa erɛ yelzaa naŋ na baŋ sãã te neŋ Jehoova niiloŋ na. A Baabole kpãã teŋ ka, ka teneeŋ ba kaa soŋ te neŋ Jehoova niiloŋ na baŋ sããŋeŋ, kyɛ ka te teɛre ka te neŋ o niiloŋ eɛ kpeɛŋaa. (Gyi. 1:22) A yɛlɛ ŋa taa daaŋ pɔgɛɛ Kristabiiri naŋ da be Saadise na. Azuŋ, Yezu da yelko baŋ ka ba neŋ Jehoova niiloŋ na sããŋɛɛŋ. (Yel. 3:​1, 2) Te na baŋ soorɛɛ te menne ka: ‘Eŋnyagroŋ na maŋ taa ko Jehoova puoruu na duoree sãã bee? (Yel. 2:​4, 5) A Baabole kannoo ane maŋ na maŋ teɛrɛ o poɔ yɛlɛ gɛrɛ tɔɔre naŋ noma korɔ maŋ? N maŋ narɛɛ N meŋɛ velaa a kyɛ gɛrɛ a lammore meŋ zaa bee? N maŋ de la wagre naŋ seŋ neŋ pɛlɛ N niŋe, a vɛŋ ka boma na maŋ taa na seŋ ma bee?’ Ka teneeŋ wa iri a soorebie ama kaŋa zaa noɔre ka ai, a na baŋ wuliŋ ka te neŋ Jehoova niiloŋ na ba lɛ e kpeɛŋaa. Ka teneeŋ ba e yelkaŋa kyaare a yɛlɛ meŋ, te neŋ Jehoova niiloŋ na baŋ sããŋeŋ kpɛlɛŋkpɛlɛŋ. Ka teneeŋ moɔrɔ faana ka te zɔɔtoɔ̃ a yɛlɛ, kyɛbee ka teneeŋ e yɛlɛ a sãã Jehoova poɔ, aseŋ ka te gaa a nembɛrɛ zie a te bɔ sommo.

6. Bo ka noba naŋ e yelfaare naŋ e nimizeɛ seŋ ka ba e?

⁶ Yelfaare mine bebeŋ a e nimizeɛ. Ka neɛŋ wa de o meŋɛ eŋ a poɔŋ, a ba e kaŋdabaŋkalɛ, ba na toɔ̃ iruuŋ yi a lantaapuoruu poɔŋ. Azuŋ, neɛŋ naŋ e ana yelfaare na kaŋa zaa seŋ ka o gaa a neŋkpoŋ kaŋa zie a te bɔ sommo. (1 Kor. 5:​11-13) Neɛzaa naŋ e a yelfaare naŋ e nimizeɛ ŋa kaŋa zaa boɔrɛɛ sommo ka o leɛ maale o neŋ Jehoova niiloŋ na. Ka teneeŋ sereŋ e kaŋdabaŋkalɛ, a leɛre te eebo, Jehoova na tu la a yɔɔdeɛbo sareka eŋɛŋ a di suuri ko te. (Tom. 26:20) Yel na kaŋa teŋ na baŋ e a de wuli ka te eɛ kaŋdabaŋkalɛ la teŋ na gaa a nembɛrɛ zie a te bɔ sommo saŋa na teŋ wa e yelfaa kaŋa naŋ e nimizeɛ.

7. Aŋ mineŋ seŋ ka ba gaa a nembɛrɛ zie a te bɔ sommo?

⁷ Noba naŋ e yelfaare naŋ e nimizeɛ yoŋ naane ka a nembɛrɛ maŋ de sommo ko. Ba maŋ soŋɛɛ noba naŋ moɔrɔ faana ka ba erɛ yɛlɛ naŋ soma meŋ. (Tom. 20:35) Aŋa mannoo poɔŋ, ka hooŋ nyu tẽẽkpeɛne ka a kpɛ ho zĩĩ, kyɛbee ho da maŋ kaarɛɛ pornography, kyɛbee ka hooŋ da tonɔ peɛ̃mo toma sɛre kyɛ wa zanne a yelmeŋɛ, a na baŋ eɛ kpeɛŋaa ko bo ka ho zɔɔtoɔ̃ ana vɔlfaa na. A nembɛrɛ na toɔ̃ soŋ boŋ ka ho zɔɔtoɔ̃ a vɔlfaa. Ho na baŋ mannɛɛ a yɛlɛ ko a neŋkpoŋ kaŋa naŋ na kyɛlle ho yɛlɛ na soŋ, a ko bo kawane naŋ seŋ neŋ, a lɛ dii ho sukyiri meŋ a vɛŋ ka ho baŋ ka ho na baŋ zagrɛɛ a vɔlfaa bare, a kyɛ erɛ yɛlɛ naŋ pɛlɛ Jehoova poɔ. (Ikil. 4:12) Ka ho eŋɛŋ wa kyoɔre, a nembɛrɛ na baŋ teɛre boŋ ka lɛ wuleeŋ ka ho de la ho neŋ Jehoova niiloŋ na tegroŋ yaga zaa, azuŋ hoŋ ba dɛle ho meŋɛ te gaali.—1 Kor. 10:12.

8. Ka teneeŋ wa ŋmɛ gbɛre zaa aseŋ ka te maŋ gaa a nembɛrɛ zie a te bɔ sommo bee? Wuli a muni.

⁸ Kyɛ, lɛ ba wuli ka ka teneeŋ wa ŋmɛ gbɛre zaa, aseŋ ka te gaa te yelko a nembɛrɛ. Te de ka ho yelee potu-yɛlɛ mine ko ho yɔɔ kaŋa, kyɛbee ho suuri ireeŋ ka ho ne o de taa. A ba seŋ ka ho gaa te manne a yɛlɛ ko a neŋkpoŋ kaŋa. Kyɛ, aseŋ ka ho de Yezu kawane naŋ be Matio 5:​23, 24 toŋ neŋ toma. Ho na baŋ lɛ peɛrɛɛ gyogri aŋa bɔinloŋ, kannyiri, ane meŋɛ bantaabo yɛlɛ gaa tɔɔre a nyɛ lɛ hoŋ na baŋ wulo a gyogri ŋa nendaare kaŋa. Tɔɔ, ka hooŋ ba toɔ̃ sɛgre a yɛlɛ, ho na baŋ sɔrɛɛ sommo yi a neŋkpoŋ kaŋa zieŋ. Ka hooŋ kaa lɛta bitontona Pɔɔl naŋ sɛge te ko a Filipi lantaapuoruu na poɔŋ, o da yelko la o yɔɔ kaŋa ka o soŋ Yuodiya neŋ Sintɛkye ka ba sɛgre yelbawoŋtaa naŋ be ba kpakyagaŋ na. A neŋkpoŋ kaŋa na baŋ soŋ boŋ ka ho meŋ e lɛ.—Fil. 4:​2, 3.

BONSO AŊ SEŊ KA TE BOƆLE A LANTAAPUORUU NEMBƐRƐ?

9. Bonso aŋ ba seŋ ka te kaa vi zuŋ a zagre ka te boɔle a nembɛrɛ? (Yeng Yelibie 28:13)

⁹ Neɛ naŋ taa nyaa neŋ sagediibu la maŋ gaa a nembɛrɛ zie a te bɔ sommo saŋa na oŋ e yelfaa kaŋa naŋ e nimizeɛ. Vi ba maŋ erɛ o soba ka o vɛŋ ka a nembɛrɛ baŋ ka o mɔɔrɔ faanaŋ ka o zɔɔtoɔ̃ vɔlfaa kaŋa. A ba seŋ ka te kaa vi zuŋ a zagre ka te boɔle a nembɛrɛ. Ananso la wala? Ananso la ka, ka teneeŋ gaa a nembɛrɛ zie a te bɔ sommo, a wuleeŋ ka te dɛlɛɛ Jehoova, a lɛ de sowuli na oŋ korɔ te ka te e kpeɛne a sagediibu poɔŋ na tonɔ neŋ toma. Te maŋ lɛ wuliŋ ka ka onaŋ ba soŋ te te koŋ toɔ̃ erɛ yɛlɛ naŋ soma. (Yiem. 94:18) Ka teneeŋ e yelfaa naŋ e nimizeɛ, a manne a yɛlɛ ko a nembɛrɛ, a leɛre te eebo, Naaŋmen na di la suuri ko te.—Kanne Yeng Yelibie 28:13.

10. Ka teneeŋ e yelfaare naŋ e nimizeɛ a de sɔglɔ, boŋ na baŋ pɔge te?

¹⁰ Ka teneeŋ e yelfaa kaŋa naŋ e nimizeɛ, a zagre ka te manne a yɛlɛ ko a nembɛrɛ, a de a yɛlɛ sɔglɔ, a yɛlɛ na maaleŋ sããŋeŋ. Saŋa na Naa Deevid naŋ da de yelfaare na oŋ e a sɔglɔ na, o neŋ Jehoova niiloŋ da sããŋɛɛŋ, ka a yɛlɛ meŋ da dɔɔnoo yaga, oŋ piili kɔgrɔ. (Yiem. 32:​3-5) Ka neɛŋ beɛrɛ eŋgannoŋ poɔŋ a ba saŋ o meŋɛ velaa, a ba maŋ soma. Lɛ aŋ maŋ waa ka teneeŋ ba wa saŋ te menne velaa saŋa na teŋ wa beɛrɛ siiloŋ poɔŋ. Jehoova baŋɛɛ a yɛlɛ ŋa, azuŋ oŋ yelko te ka te gaa a nembɛrɛ zie ka ba soŋ te ka te maale te ne o niiloŋ na.—Aiz. 1:​5, 6, 18.

11. Ka teneeŋ de yelfaare naŋ e nimizeɛ a sɔgle, sobuo aŋ na toɔ̃ de toɔrɔ waneŋ te taaba zuŋ?

¹¹ Ka teneeŋ e yelfaa kaŋa naŋ e nimizeɛ a de sɔgle, a na baŋ de la toɔrɔ waneŋ te taaba zuŋ. A na toɔ̃ vɛŋeŋ ka Jehoova vooroŋ soŋ na ba lɛ tonɔ toma a lantaapuoruu poɔŋ velaa. A na baŋ sããŋɛɛ emmaaroŋ naŋ be te yɔɔmine kpakyagaŋ. (Efe. 4:30) Azuŋ, ka teneeŋ wa baŋ ka neɛ kaŋa naŋ be a lantaapuoruu poɔŋ eɛ yelfaa kaŋa naŋ e nimizeɛ, aseŋ ka te emoo faŋa ka o manne a yɛlɛ ko a lantaapuoruu nembɛrɛ.a Ka teneeŋ soŋ o soba a de a yelfaa sɔgle, te nu na poɔ la o faaloŋ na poɔŋ. (Liiv. 5:1) Ka teneeŋ sereŋ nɔŋ Jehoova yɛŋ, te na mannɛɛ yelfaa na o soba naŋ e na ko a nembɛrɛ. A na vɛŋeŋ ka a lantaapuoruu e forifori, kyɛ ka ba de sommo ko neɛ naŋ e a yelfaa naŋ e nimizeɛ na, ka o neŋ Jehoova niiloŋ leɛ e kpeɛŋaa.

SOBUO KA A LANTAAPUORUU NEMBƐRƐ MAŊ TU A DE SOMMO KO TE?

12. Sobuo ka a lantaapuoruu nembɛrɛ maŋ tu a de sommo naŋ seŋ neŋ ko noba neŋ Jehoova niiloŋ naŋ sãã?

¹² A Baabole yeleeŋ ka a nembɛrɛ seŋ ka ba de sommo naŋ seŋ neŋ ko noba neŋ Jehoova niiloŋ naŋ sãã na. (1 Tɛs. 5:14) Ka hooŋ e yelkaŋa naŋ sãã ho neŋ Jehoova niiloŋ na, a nembɛrɛ na baŋ soore boŋ soorebie mine a moɔrɔ ka ba baŋ yɛlɛ naŋ be ho teɛroŋ poɔŋ, ane lɛ na a yɛlɛ naŋ dɔɔnɔ bo aseŋ. (Yeng. 20:5) Noba mine bebeŋ, zie na baŋ guoli ba, ba gyogo, kyɛbee vi maŋ vɛŋeŋ aŋ e kpeɛŋaa ko ba ka ba yeli yɛlɛ naŋ be ba sukyiriŋ. Kyɛ, ka hooŋ yuo ho sukyiri a yeli yelzaa naŋ bebe ko a nembɛrɛ, a na toɔ̃ soŋ baŋ yaga zaa. Ta wa zoro dabeɛ̃ ka ho na yelee yelfaa kaŋa. (Joob 6:3) A nembɛrɛ koŋ lonneŋ wieoŋ a ŋmaa ho sɛrɛɛ, kyɛ ba na mãã la ba menne a kyɛlle woŋ ho yɛlɛ na velaa zaa, a baŋ a yɛlɛ yelmeŋɛ zaa sɛre kyɛ derɛ Baabole poɔ kawane korɔ bo. (Yeng. 18:13) A nembɛrɛ baŋɛɛŋ ka a maŋ de la wagre sɛre baŋ na toɔ̃ de sommo naŋ seŋ neŋ ko neɛ kaŋa. Azuŋ, ba na toɔ̃ lɛ boɔle boŋ ka ho wa ka ho ne ba lɛ di dama, ka lɛ vɛŋ ka ba de sommo naŋ seŋ neŋ ko bo.

13. Sobuo ka a nembɛrɛ na toɔ̃ tu puore sɔroo ane a Baabole poɔŋ a de sommo ko te? (Kaa a fotori.)

¹³ A nembɛrɛ koŋ sage yeli yelzaa naŋ na vɛŋ ka ho poɔ maaleŋ sãã yaga neŋ yelfaa na hoŋ e na. Kyɛ, ba na arɛɛ ho gbɛbɔgriŋ a puore sɔre Jehoova ko bo. Ana e boŋ seɛlee neŋ lɛ na Jehoova naŋ na iri ba puore sɔroo na noɔre. Lɛ na eŋ boŋ faŋa yaga. Ba na lɛ de la “kãã sɔ [bo] Jehoova yuori eŋɛŋ.” (Gyi. 5:​14-16) A “kãã” are ko la a Baabole. A nembɛrɛ na toɔ̃ de la a Baabole poɔ yɛlɛ a dii ho sukyiri, a lɛ soŋ bo ka ho neŋ Jehoova niiloŋ leɛ e kpeɛŋaa. (Aiz. 57:18) A Baabole poɔ yɛlɛ na baŋ na manne ko bo na na toɔ̃ eŋ boŋ faŋa ka ho moɔ̃ niŋe erɛ yɛlɛ naŋ soma. Jehoova na tu la a nembɛrɛ zieŋ a yele korɔ bo ka: “A sori la ŋa. Kyɛnɛ o zuŋ.”—Aiz. 30:21.

14. Aŋa lɛ na Galesiya 6:1 naŋ wuli na, sobuo ka a nembɛrɛ na toɔ̃ de sommo ko neɛ naŋ de gbɛ-faa? (Kaa a fotori.)

¹⁴ Kanne Galesiya 6:1. Ka Kristabieŋ wa ŋmɛ gbɛre, lɛ wuleeŋ ka o ba erɛ yɛlɛ Jehoova naŋ boɔrɔ. Aminekaŋaŋ, o de la gbɛ-faa kaŋa, kyɛbee o eɛ yelnimizeɛ kaŋa a sãã Naaŋmen bege na. A nembɛrɛ maŋ moɔrɔŋ ka ba de sumaaroŋ a leɛre o soba yi a faaloŋ poɔŋ. A Giriki yelbiri na baŋ de toŋ neŋ toma a zie ŋaŋ na wulee lɛ na neɛ kɔɔree naŋ kɔɔ ka dɔkta mãã o meŋɛ a sɛgre a kɔɔree, ka lɛ vɛŋ oŋ tɔnne taa velaa. A dɔkta maŋ mãã la o meŋɛ a sɛgre a kɔɔree bɔin bɔin, ka lɛ vɛŋ ka biinii ta kpɛ o soba yaga. A nembɛrɛ meŋ ba maŋ boɔrɔ ka ba lɛ eŋ te biinii saŋa na teŋ wa beɛrɛ siiloŋ poɔŋ na. A Baabole yeleeŋ ka a nembɛrɛ “gu ba menne velaa.” Saŋa na baŋ derɛ sommo korɔ ba taaba na, kyɛ a nembɛrɛ seŋ ka ba baŋ ka ba meŋ na toɔ̃ ŋmɛɛ gbɛɛ. Azuŋ, a ba seŋ ka a nembɛrɛ zɛgrɛ ba menne, kyɛbee a teɛre ka ba na yɛŋ eɛ nemmenne, kyɛbee a dire ba tɔ na sɛrɛɛ. Aseŋ ka ba de ba menne eŋ o soba gbɛbɔgriŋ, a de sommo koo.—1 Pit. 3:8.

15. Ka teneeŋ wa taa yelwonaa kaŋa, wala aŋ seŋ ka te e?

¹⁵ Te na baŋ dɛlɛɛ a nembɛrɛ. Ba de la wuluu ko ba ka ba ta maŋ manna ba yɔɔmine yelsɔglɔ korɔ neŋyobo, a maŋ de kawane zaa baŋ terɛ kyaare neŋ a Baabole. Ba wuli baŋ ka ba maŋ moɔ̃ niŋe a derɛ sommo korɔ te. (Yeng. 11:13; Gal. 6:2) Yelmeŋɛ la, ba gyogri ane ba yelbaŋ ba yitaa, kyɛ ka teneeŋ taa yelwonaa zaa, te na baŋ gaaɛ a neŋkpoŋ kaŋa zaa zie a te manne a yɛlɛ koo. Neɛ kaŋa bebeŋ o maŋ gaaɛ a neŋkpoŋ kaŋa zie a te sɔre kawane, ka a neŋkpoŋ ba wa koo kawane na oŋ boɔrɔ na, o maŋ leɛ gaaɛ a neŋkpoŋ kaŋa meŋ zie a te sooroo ana yɛlɛ na neŋ a zu. Lɛ oŋ na e a te ta saŋa na a neŋkpoŋ kaŋa naŋ na koo kawane na oŋ boɔrɔ ka o woŋ. Lɛ eebo ba soma. A na wuliŋ ka te zagrɛɛ “wulsonne” naŋ be a Baabole poɔŋ na bare, a kyɛ boɔrɔ noba naŋ na yeli yɛlɛ ‘te naŋ boɔrɔ ka te woŋ.’ (2 Tim. 4:3) Ka hooŋ manne ho yelwonaa kaŋa ko a neŋkpoŋ kaŋa, o na baŋ soore boŋ ka ho mannɛɛ a yɛlɛ ko a neŋkpoŋ kaŋa meŋ bee, ane kawane na oŋ ko bo. Sigrimennoŋ na vɛŋeŋ ka a neŋkpoŋ te bɔ sowuli yi o tɔ kaŋa meŋ zieŋ.—Yeng. 13:10.

TE KAŊA ZAA FEREBO TOMA

16. Bo ferebo toma la ka te kaŋa zaa taa?

¹⁶ Naaŋmen kaa iree a nembɛrɛ ka ba kaara o puorebiiri zu, kyɛ a nembɛrɛ koŋ wuli te yɛlɛ naŋ seŋ ka te e. A be la te kaŋa zaa zieŋ ka te tu te yelyelii ane te yel-eree eŋɛŋ a wuli ka te boɔrɔŋ ka te erɛ yɛlɛ naŋ pɛlɛ Naaŋmen poɔ. Jehoova meŋ na soŋ teŋ ka te dire yelmennoŋ koroo. (Uro. 14:12) Azuŋ, a nembɛrɛ koŋ sage wuli te yɛlɛ naŋ seŋ ka te e, kyɛ ba na wuli teŋ Baabole sowuli naŋ na soŋ te ka te baŋ Naaŋmen teɛroŋ kyaare a yɛlɛ. Ka teneeŋ de ba kawane na toŋ neŋ toma, ana soŋ teŋ ka te de te yɛŋ toŋ neŋ toma a “teɛre yɛlɛ gaa tɔɔre,” ka lɛ vɛŋ ka te derɛ gbɛ-sonne.—Hib. 5:14.

17. Bo ka Jehoova boɔrɔ ka te e?

¹⁷ A eɛ apoɔsori naŋ e kpoŋ yaga zaa ka te e Jehoova puorebie kaŋa. Yezu la a “pekyee-meŋɛ.” Jehoova tomooŋ ka o wa yɔɔdeɛ te, a yuo nyɔvore naŋ ba taa baaraa sori ko te. (Gyn. 10:11) Jehoova eŋɛɛ noɔre ka: ‘N na ko yɛŋ kyeeneba N meŋɛ sukyiri boɔboŋ. Banaŋ na de bammo neŋ nimiyuo a guoli yɛ.’ (Jer. 3:15) O tu la a Krista lantaapuoruu nembɛrɛ zieŋ a paale a noɔre ŋa. Ka te neŋ Jehoova niiloŋ wa sãã, kyɛbee ka teneeŋ wa moɔrɔ faana ka te zɔɔtoɔ̃ vɔlfaa kaŋa, aseŋ ka te lonneŋ wieoŋ a gaa a nembɛrɛ zie a te bɔ sommo. Yɛ vɛŋ ka te zaa de a yelsɛgraa ŋa Jehoova naŋ sɛgre biŋ na tonɔ neŋ toma velaa zaa.