ZANNOO 57
Ka Hooŋ E Yelfaa Kaŋa Naŋ E Nimizeɛ, Wala Aŋ Seŋ Ka Ho E?
Yelmeŋɛ la, ho nɔŋɛɛ Jehoova yaga zaa, ho mɔɔrɛɛ ho mɔɔbo zaa meŋ ka ho erɛ yɛlɛ naŋ na pɛlɛ o poɔ yoŋ. Kyɛ, saŋa kaŋa, ho na baŋ ŋmɛɛ gbɛɛ. Gbɛ ŋmɛ mine bebeŋ a e nimizeɛ yaga zaa. (1 Korinti 6:9, 10) Ka hooŋ e yelfaa kaŋa naŋ e nimizeɛ, lɛ wuleeŋ ka Jehoova ba lɛ nɔnɔ bo bee? Ai. Jehoova eɛ siri ka o vɛŋ ko bo a kyɛ soŋ bo meŋ.
1. Bo yɛlɛ aŋ seŋ ka te e ka lɛ vɛŋ ka Jehoova di te yelbebe suuri ko te?
Te nɔŋ la Jehoova, azuŋ ka teneeŋ wa e yelfaa kaŋa naŋ e nimizeɛ, a maŋ dɔɔnɔ teŋ yaga zaa. Kyɛ noɔre na Jehoova naŋ eŋ ko o puorebiiri na maŋ toɔ̃ dii la ba sukyie. Jehoova yelka: “Haali ka yɛ toŋfaareŋ e gyimegyime, a na leɛ pɛleŋ aŋa sinoo.” (Aizeeya 1:18) Ka teneeŋ yi te sukyie poɔŋ a e kaŋdabaŋkalɛ, Jehoova na vɛŋ ko teŋ kpɛlɛŋkpɛlɛŋ. Wala teŋ na baŋ e a wuli ka te e la kaŋdabaŋkalɛ? Aseŋ ka te vɛŋ ka faaloŋ na teŋ e Jehoova na yɛlɛ beɛrɛ te yaga zaa, lɛ na vɛmeŋ ka te bare a yelfaa eebo a kyɛ gaa Jehoova zie a te sɔre te yelbebe sudi. Aseŋ ka te lɛ mɔɔ te mɔɔbo zaa ka te leɛre teɛroŋ faare ane gyog-faare naŋ vɛŋ teŋ e a yelfaa na. Te na moɔ̃ la niŋe a de Jehoova bege naŋ e forifori na tonɔ neŋ toma meŋ.—Kanne Aizeeya 55:6, 7.
2. Ka teneeŋ e yelfaa kaŋa naŋ e nimizeɛ, sobuo ka Jehoova maŋ tu a lantaapuoruu nembɛrɛ zieŋ kyɛ de sommo ko te?
Ka teneeŋ wa e yelfaa kaŋa naŋ e nimizeɛ, Jehoova yelko teŋ ka te “boɔle a puoruu laŋne nembɛrɛ.” (Kanne Gyimisi 5:14, 15.) A lantaapuoruu nembɛrɛ nɔŋɛɛ Jehoova ane ba Kristabitaaba zaa. Ba de la wulibo naŋ seŋ neŋ ko a lantaapuoruu nembɛrɛ, ka lɛ na vɛŋ ka ba de sommo naŋ seŋ neŋ a ko te saŋa na te neŋ Jehoova niiloŋ naŋ wa sãã na. Ba na toɔ̃ soŋ teŋ ka te leɛ maale te neŋ Jehoova niiloŋ na naŋ sãã na.—Galesiya 6:1.
Ka teneeŋ wa e yelfaa kaŋa, wala ka a lantaapuoruu nembɛrɛ maŋ e a soŋ te? A lantaapuoruu nembɛrɛ bayi bee bata na de la a Baabole soŋ te ka te nyɛ lɛ gbɛre na te naŋ ŋmɛ na naŋ e nimizeɛ a seŋ. Ba na eŋ teŋ faŋa a kyɛ ko te sowuli meŋ naŋ na toɔ̃ soŋ te ka te tage te menne yi yelfaare eeboŋ. Ka neɛ kaŋaŋ wa e yelfaa kaŋa naŋ e nimizeɛ a kyɛ ba e kaŋdabaŋkalɛ, a lantaapuoruu nembɛrɛ maŋ iree o soba bare a lantaapuoruu poɔŋ. Ba maŋ eɛ lɛ ka o soba ta de o gyog-faare na wulo a lantaapuoruu noba.
ZANNE YƐLƐ YAGA POƆ
Ho na zanne nyɛɛ lɛ Jehoova naŋ maŋ e a de sommo a ko te saŋa na teŋ wa e yelfaa kaŋa naŋ e nimizeɛ.
3. Ka teneeŋ kyiiri te yelfaare a na soŋ teŋ ka te maale te neŋ Jehoova niiloŋ na
Ka teneeŋ wa e yelfaa zaa, a maŋ beɛrɛɛ Jehoova, azuŋ, aseŋ ka te maŋ kyiiri te yelfaare ko Jehoova. Kanne Yieme 32:1-5, a kyɛ gyieli a soorebiri ŋa yɛlɛ:
Bonso aŋ soma yaga zaa ka te maŋ kyiiri te yelfaare a ko Jehoova a gaŋ teŋ na de a sɔgle?
Ka teneeŋ wa kyiiri te yelfaare a ko Jehoova baare, a kyɛ lɛ gaa a lantaapuoruu nembɛrɛ zie a te bɔ sommo, te na nyɛ la sukyirimaaroŋ yaga zaa. Ŋmɛ a VIDIO, a kyɛ gyieli a soorebiri naŋ tu na yɛlɛ.
A vidio poɔŋ, wala ka a lantaapuoruu nembɛrɛ da e a soŋ Canon oŋ leɛ wa Jehoova zie?
Aseŋ ka te maŋ yi te poɔ zaa a yeli a yɛlɛ yelmeŋɛ zaa ko a lantaapuoruu nembɛrɛ, bonso ba boɔrɔŋ ka ba soŋ te. Kanne Gyimisi 5:16, a kyɛ gyieli a soorebiri ŋa yɛlɛ:
Ka teneeŋ e yelfaa kaŋa naŋ e nimizeɛ yaga zaa a kyɛ yel a yɛlɛ yelmeŋɛ zaa ko a lantaapuoruu nembɛrɛ a maŋ e la mɔlɔ ko ba ka ba soŋ te. Ananso la wala?
Kyiiri ho yelfaare, yeli a yɛlɛ yelmeŋɛ zaa ko a lantaapuoruu nembɛrɛ, sage sommo na Jehoova naŋ yi nɔmmo poɔŋ a korɔ bo na
4. Jehoova maŋ wulee nembaalonzoe korɔ yelfa-erebɛ
Ka neɛŋ wa e yelfaa kaŋa naŋ e nimizeɛ, a kyɛ lɛ zagre ka o de Jehoova bege na meŋ tonɔ neŋ toma, lɛ yɛŋ aseŋ ka ba iri o soba bare a lantaapuoruu poɔŋ. Ka ba naŋ wa iroo bare a lantaapuoruu poɔŋ, te ne o koŋ baŋ lɛ laŋ e yɛlɛ. Kanne 1 Korinti 5:6, 11 a kyɛ gyieli a soorebiri ŋa yɛlɛ:
Ka hooŋ de bilɛ fẽẽ lɛ eŋ paanuu zɔŋ poɔŋ, a maŋ vɛmeŋ ka a zɔŋ zaa pi. Azuŋ, ka te neŋ neɛ kaŋa ba naŋ iri bare a lantaapuoruu poɔŋ wa laŋ erɛ yɛlɛ, bo toɔrɔ aŋ na baŋ de wa eŋ a lantaapuoruu?
A lantaapuoruu nembɛrɛ maŋ tɔglɛɛ Jehoova nembaalonzoe na oŋ taa ko yelfa-erebɛ na, azuŋ a lantaapuoruu nembɛrɛ maŋ moɔrɔŋ ka ba soŋ noba na ba naŋ iri bare a lantaapuoruu poɔŋ na. Aneazaa ka a dɛnnoo na baŋ de ko te yɔɔmine na baŋ iri bare a lantaapuoruu poɔŋ na da beɛrɛ baŋ yaga, kyɛ a dɛnnoo maŋ soŋ baŋ baŋ leɛre ba eebo a leɛ wa a lantaapuoruu poɔ. (Yieme 141:5).
Sobuo ka lɛ na Jehoova naŋ maŋ moɔrɔ ka o sonnɔ yelfa-erebɛ na wuli ka o eɛ Neɛ naŋ maŋ teɛrɛ yɛlɛ gɛrɛ tɔɔre, a taa nembaalonzoe, ane nɔmmo meŋ?
5. Ka teneeŋ e kaŋdabaŋkalɛ, Jehoova na vɛŋ ko teŋ
Yezu da de la yelmannaa kaŋa a wuli lɛ Jehoova naŋ maŋ teɛre saŋa na neɛ kaŋa naŋ e kaŋdabaŋkalɛ a leɛ wa o zie na. Kanne Luka 15:1-7, a kyɛ gyieli a soorebiri ŋa yɛlɛ:
Bo ka a yɛlɛ ŋa wuli bo a kyaare Jehoova?
Kanne Iziikiel 33:11, a kyɛ gyieli a soorebiri ŋa yɛlɛ:
Bo gbɛre naŋ e nimizeɛ la aŋ seŋ ka te de a wuli ka te e la kaŋdabaŋkalɛ?
Aŋa lɛ pekyeena naŋ maŋ taa o peere yɛlɛŋ na, lɛ meŋ la ka Jehoova meŋ taa o peere yɛlɛŋ yaga zaa
NOBA MINE MAŊ YELEŊ KA: “Dabeɛ̃ erɛ maŋ, bonso ka maaŋ yelko a lantaapuoruu nembɛrɛ ka N e la yelfaa kaŋa naŋ e nimizeɛ, ba na iri maŋ bare a lantaapuoruu poɔŋ.”
Ka neɛ kaŋaŋ teɛre lɛ a yelko bo, wala hoŋ na yelko o soba?
A ZANNOO YELNIMIZEERE
Ka teneeŋ e yelfaa kaŋa naŋ e nimizeɛ a kyɛ yi te poɔ zaa a e kaŋdabaŋkalɛ, a bare a yelfaa eebo, Jehoova na vɛŋ ko teŋ.
Bo Hoŋ Zanne
Bonso aŋ soma yaga zaa ka te kyiiri te yelfaare ko Jehoova?
Bo yɛlɛ aŋ seŋ ka ho e ka Jehoova di ho yelbebe suuri a ko bo?
Ka teneeŋ e yelfaa kaŋa naŋ e nimizeɛ yaga zaa, bonso aŋ seŋ ka te gaa a lantaapuoruu nembɛrɛ zie ka ba soŋ te?
YƐLƐ MINE NAŊ LƐ BEBE
Aizeeya 1:18 wuleeŋ ka Jehoova e la nembaalonzoe soba. Kaa a vidio ŋa a nyɛ lɛ dɔɔ kaŋa naŋ wa nyɛ ka a yɛlɛ ŋa sereŋ e la yelmeŋɛ.
Sobuo ka a lantaapuoruu nembɛrɛ maŋ tu a moɔrɔ ka ba soŋ noba naŋ e yelfaa naŋ e nimizeɛ?
Kanne a nyɛ sori na baŋ maŋ tu a wuli nɔmmo ane nimibaaloŋ ko noba naŋ e yelfaare a kyɛ ba e kaŋdabaŋkalɛ.
Kanne a yɛlɛ ŋa, “N Wa Nyɛɛŋ Ka Aseŋ Ka N Leɛ Wa Jehoova Zie,” a nyɛ bon naŋ da soŋ dɔɔ kaŋa oŋ leɛ wa Jehoova zie.
“A Baabole Soŋ Baŋ Baŋ Leɛre Ba Zemmo Yɛlɛ” (A Watchtower, April 1, 2012)