ZANNOO 26
Bonso Ka Yelfaare Ane Dɔgɛɛ Bebe?
Ka yelfaa kaŋaŋ wa e, noba maŋ sooreŋ ka, “Bonso ka a yɛlɛ ŋa e?” Te poɔ pɛlɛɛŋ yaga a Baabole naŋ iri a soorebiri ŋa noɔre ko te!
1. Bo ka Setaana e ka lɛ vɛŋ ka yelfaare be a teŋɛzuŋ?
Setaana a Dɛɛvul da iri zɔɔrɔ neŋ la Naaŋmen. Setaana da boɔrɔŋ ka o dire naaloŋ a kaara nensaaleba, azuŋ, o da bɛnlɛɛ a dɛndɛŋ nensaaleba na, Adama neŋ Hawaa, baŋ zagre Naaŋmen noɔre. Setaana da e la a yɛlɛ ŋa saŋa na oŋ da ŋma zirii a kyaare Jehoova a ko Hawaa na. (Munpiilee 3:1-5) Setaana da bɛnlɛɛ Hawaa oŋ teɛre ka Jehoova tu la sori naŋ ba seŋ poɔŋ a kyɛ de bonsoŋ kaŋa sɔgloo. Setaana da boɔrɔŋ ka o wuli ka, ka nensaalebaŋ zagre Naaŋmen noɔre ba na taa la popeɛloŋ yaga. Setaana la ŋma a ziri-fɔrɔ na, o da yelko la Hawaa ka o koŋ kpi. Azuŋ ka a Baabole boɔle Setaana ka “ziri-ŋmaara ane ziri-ŋmaareba zaa saa.”—Gyɔɔn 8:44.
2. Bo gbɛre ka Adama neŋ Hawaa da de?
Jehoova da yuo la o nu yaga zaa a ko Adama neŋ Hawaa bontaree yaga. Jehoova da yelko baŋ ka ba na baŋ di la a teere na zaa naŋ be a Eeden gaadin na poɔŋ ŋmama, kyɛ o da yelka ba ta wa dire teɛ bonyeni kaŋa yoŋ ŋmanee. (Munpiilee 2:15-17) Kyɛ Adama neŋ Hawaa da e la tokpeɛne a di ana teɛ na ŋmanee. Hawaa “da kpɛlɛɛ a [teɛ] ŋmanee a de di.” A puoreŋ o da kpɛlɛɛ mine ko Adama “oŋ meŋ de di.” (Munpiilee 3:6) Ba zaa da zagrɛɛ Naaŋmen noɔre. Adama neŋ Hawaa da e la noba naŋ pɛgiyi, azuŋ, a da e la mɔlɔ ko ba ka ba e yɛlɛ naŋ soma. Kyɛ ba da yi la ba menne boɔbo poɔŋ a zagre Naaŋmen noɔre. Lɛ na baŋ da e na da ba soma, a da lɛ wuleeŋ ka ba ba boɔrɔ ka Naaŋmen dire naaloŋ a kaara ba. A gbɛre na baŋ da de na da de la dɔgɛɛ naŋ e kpoŋ a wa eŋ ba.—Munpiilee 3:16-19.
3. Bo yɛlɛŋ yi Adama neŋ Hawaa gbɛ de na poɔŋ a wa pɔge te?
Saŋa na Adama neŋ Hawaa naŋ wa e tokpeɛne na, ba da wa leɛ la neŋfaare. Azuŋ, ba biiri zaa ba naŋ dɔge a puoreŋ meŋ wa leɛ la neŋfaare. A Baabole yelee Adama yɛlɛ ka: “Azuiŋ, aŋa yelbieri naŋ tu neŋyeni zie kyɛ wa a teŋɛzu, ka kũũ meŋ tu yelbieri zie a wa, a lɛ meŋ la ka kũũ yaare te ta nensaaleba zaa.”—Urom 5:12.
Yɛlɛ yaga zuŋ la so teŋ maŋ dire dɔgɛɛ. Saŋa kaŋa, ka teneeŋ de gbɛ-faare a maŋ de la dɔgɛɛ wa eŋ te. Saŋa kaŋa meŋ te maŋ be la zie kaŋa wagre naŋ ba seŋ poɔŋ ka yelfaa kaŋa e beŋ, lɛ meŋ na baŋ de la dɔgɛɛ wa eŋ te.—Kanne Ikilisiasitiz 9:11.
ZANNE YƐLƐ YAGA POƆ
Ho na zanne nyɛɛ sieree naŋ wuli ka Naaŋmen naaneŋ vɛŋ ka yelfaare ane dɔgɛɛ be a donɛɛ poɔŋ. Ho na lɛ zanne nyɛɛ teɛroŋ na Naaŋmen naŋ taa kyaare dɔgɛɛ na teŋ dire na.
4. Neɛ naŋ vɛŋ teŋ dire dɔgɛɛ
Noba mine sagedieŋ ka Naaŋmen la dire naaloŋ a kaara a donɛɛ zaa. Yelmeŋɛ la? Ŋmɛ a VIDIO.
Kanne Gyimisi 1:13 ane 1 Gyɔɔn 5:19, a kyɛ gyieli a soorebiri ŋa yɛlɛ:
Naaŋmen la vɛŋ ka dɔgɛɛ ane yelfaare bebe bee?
5. Bo yɛlɛŋ yi Setaana naaloŋ diibu na poɔŋ wa?
Kanne Munpiilee 3:1-6, a kyɛ gyieli a soorebie naŋ tu na yɛlɛ:
Bo zirii ka Setaana da ŋma?—Kaa o wɛlbo 4 ane 5.
Sobuo ka Setaana da tu kyɛ boɔrɔ ka o wuli ka Jehoova de la bonsoŋ kaŋa sɔgle nensaaleba?
Aŋa lɛ Setaana naŋ boɔrɔ ka o wuli na, Jehoova Naaloŋ diibu na toɔ̃ vɛmeŋ ka te taa popeɛloŋ bee?
Kanne Ikilisiasitiz 8:9, a kyɛ gyieli a soorebiri ŋa yɛlɛ:
A yi saŋa na zaa Jehoova naŋ ba dire Naaloŋ a kaara te na, bo yɛlɛŋ e?
A. Adama neŋ Hawaa da e la noba naŋ pɛgiyi. Ba da kpeɛrɛɛ Paradiisi poɔŋ. Kyɛ, ba da tu la Setaana noɔre, a kyɛ zagre Jehoova noɔre
B. A yi saŋa na Adama neŋ Hawaa naŋ zagre Jehoova noɔre na, a vɛŋɛɛŋ ka a donɛɛ zaa paale neŋ faaloŋ, dɔgɛɛ, ane kũũ
D. Jehoova na iree faaloŋ, dɔgɛɛ, ane kũũ a yi nensaaleba eŋɛŋ. Ka lɛŋ wa e nensaaleba na lɛ pɛgiyiŋ a kyɛ taa zeŋ laafeɛ Paradiisi poɔŋ
6. Ka teneeŋ dire dɔgɛɛ a maŋ fɛrɛɛ Jehoova
Ka teneeŋ dire dɔgɛɛ a maŋ fɛrɛɛ Naaŋmen bee? Hooŋ nyɛ yɛlɛ na Naa Deevid ane bitontona Piita naŋ da sɛge. Kanne Yieme 31:7 ane 1 Piita 5:7, a kyɛ gyieli a soorebiri ŋa yɛlɛ:
Jehoova nyɛrɛɛ dɔgɛɛ na zaa teŋ dire na, o taaɛ te yɛlɛŋ meŋ. A yɛlɛ ŋa tɔ la ho sukyiri bee?
7. Naaŋmen na iree dɔgɛɛ zaa nensaaleba naŋ dire a bare
Kanne Aizeeya 65:17 ane Yel-iriwulaa 21:3, 4, a kyɛ gyieli a soorebiri ŋa yɛlɛ:
A Baabole sɛgre ŋa vɛŋɛɛŋ teŋ baŋ ka a koŋ kɔɔre Naaŋmen ne iree dɔgɛɛ na zaa teŋ dire na a bare. Bonso ka a yɛlɛ ŋa e sukyiridii yɛlɛ a ko bo?
Ho da baŋɛɛŋ?
Saŋa na Setaana naŋ da ŋma a ziri-fɔrɔ na, o da dɛgɛɛ Jehoova yuori. Lɛ wuleeŋ ka o da vɛŋɛɛŋ ka noba teɛre ka Jehoova e la neŋfaa, a kyɛ lɛ wuli ka Jehoova e la Naa naŋ ba taa nɔmmo. A koŋ kɔɔre, Jehoova na iree dɔgɛɛ zaa nensaaleba naŋ dire a bare. Ka o naŋ wa e lɛ, o na pɛgɛɛ o yuori naŋ e forifori na ka o yi. Lɛ wuleeŋ ka, o na vɛmeŋ ka neɛzaa baŋ ka o naŋ seŋ ka o dire naaloŋ a kaara nensaaleba. Jehoova yuori naŋ na pɛgiyi na yɛlɛŋ fɛre yaga zaa gaŋ yelzaa naŋ bebe.—Matio 6:9, 10.
NOBA MINE MAŊ YELEŊ KA: “Naaŋmen la maŋ sɛge biŋ ka te wa dire dɔgɛɛ.”
Wala hoŋ na yel?
A ZANNOO YELNIMIZEERE
Setaana a Dɛɛvul ane Adama neŋ Hawaa la vɛŋ ka yelfaare be a donɛɛ poɔŋ. Ka teneeŋ wa dire dɔgɛɛ a maŋ fɛrɛɛ Jehoova. A koŋ kɔɔre o na iree dɔgɛɛ zaa bare.
Bo Hoŋ Zanne
Bo zirii ka Setaana a Dɛɛvul da ŋma ko Hawaa a kyaare Jehoova?
Bo yɛlɛŋ yi Adama neŋ Hawaa tokpeɛne na poɔŋ a wa pɔge te?
Wala teŋ e baŋ ka ka teneeŋ wa dire dɔgɛɛ a maŋ fɛrɛɛ Jehoova?
YƐLƐ MINE NAŊ LƐ BEBE
Kanne nyɛ yɛlɛ na a Baabole naŋ yel kyaare faaloŋ.
Setaana a Dɛɛvul da ŋma la zirii mine a Eeden gaadin na poɔŋ, kanne a nyɛ yelnimizeere naŋ da be a yɛlɛ poɔŋ.
“Bonso Ka Naaŋmen Tere Sori Teŋ Dire Dɔgɛɛ?” (A Watchtower, January 1, 2014)
Saŋa kaŋa naŋ pare yelfaa kaŋa da e la a donɛɛ poɔŋ, kanne nyɛ nɔɛ iribo naŋ toɔrɔ sukyiri a kyaare a yɛlɛ ŋa.
Dɔɔ kaŋa da nyɛɛ noba naŋ dire dɔgɛɛ yaga zaa. Kaa a vidio ŋa a nyɛ bon na o naŋ zanne yi be.