Pane Tus Samuela
1 Hetre atr e Ramathaimasofima,* Elekana la ëjen. Ka mele angeic ngöne la itre Wetr e Eferaima. Angeice la nekö i Ierohama, lo nekö i Elihu, nekö i Tohu, nekö i Zuf, atre Eferaima. 2 Hnei Elekana hna xome la lue föe, Hana me Penina. Ka trene kuku Penina, ngo pë fe kö nekö i Hana. 3 E nöjei macatre, hnei Elekana hna majemine tro qa ngöne la traone i angeic, troa hmi* e Silo, me tro fë huuj koi Iehova, joxu ne la itre trongene isi e hnengödrai. Nge Hofeni me Fineasa, lue nekö i Eli, la lue atre huuj i Iehova e Silo.
4 Ngöne la ketre drai, hnei Elekana hna tro fë huuj, matre angeic a thewe mitre koi Penina, me itre nekö i angeic trahmany me jajiny. 5 Angeic a hamëne pi fe la ka nyipi lolo koi Hana, ke tru catre kö la ihnimi angeic koi Hana hui Penina. Ame pe, tha hnei Iehova kö hna aijijë Hana troa hnaho.* 6 Nge Penina pala hi a thele troa akötrë Hana. Angeic a hnyimasai Hana, ke tha hnei Iehova kö hna aijijë Hana troa hnaho. 7 Celë pala hi la hnei angeic hna kuca e nöjei macatre. Ame la Hana a elë kowe la uma ne hmi i Iehova, Penina pala hi a ihnyimasai, matre Hana a treij me tha xen. 8 Öni Elekana jë hi: “Hana, hnauëne la nyipoti a treij me tha xen? Hnauëne laka, akötre catre la hni nyipo? Tha sisitria kö ni hune la 10 lao nekönatr trahmany?”
9 Thupene la angatr a ase xen, Hana a mejë jë. Nge ngöne la ijine cili, Eli, lo atre huuj, a nango lapa të hune icea ngöne la hnë lö ne la uma ne hmi* i Iehova. 10 Atraqatre la akötre* i Hana. Angeic a thithi koi Iehova, me treije lapa. 11 Matre angeic a sisinyi jë koi Iehova me hape: “Ekölöhini Iehova, joxu ne la itre trongene isi e hnengödrai, pane goeëne ju la akötreng. Nge e tro nyipëti a meku ni, me tha thëthëhmine la hlue i nyipë, me hamë ni la nekönatr trahmany, tro hë ni a hamë nyën koi nyipë Iehova, matre tro nyën a nyihlue i nyipë uti hë mec. Nge tha tro kö a cine la he i nyën.”
12 Hana pala hi a thithi koi Iehova, nge Eli a goeëne la ihneqë i angeic. 13 Hana a thithi thaup, nge ihneqë i angeice hi la ka enij, ngo pëkö nine i angeic. Matre öni Eli pena kö ka hape, ka hnaitö angeic. 14 Öni Eli jë hi: “Tro eö a hnaitö uti hë eu? Loi ju hë hna iji waina.” 15 Sa jë hi Hana ka hape: “Waea joxung, atraqatre la hleuhleung.* Tha hnenge kö hna iji waina, maine itre xa ka haitre pena, ngo eni a fe la hninge* koi Iehova. 16 The mekune kö ka hape, ka pë jole ni, ke trenge akötr me hleuhleu atraqatr la ka upi ni troa thith aqeany.” 17 Matre öni Eli jë hi: “Tro jë hë memine la tingeting, nge epi tro la Akötresi Isaraela a kapa la sipo i eö.” 18 Nge öni Hana: “Oleti la hna hnime la hlue i nyipë.” Angeic a tro ju me xen, nge tha hleuhleu hë la iqëmeke i Hana.
19 Hnei Elekana me fami angeic hna canga ilë troa thili koi Iehova. Thupene lai, angatr a bëeke jë a tro Rama. Nge Elekana a ce meköle ju me Hana föi angeic, nge meku Hana jë hi hnei Iehova. 20 Nge ngöne la macatre cili,* upune jë hi Hana. Hnei angeic hna hnahone la nekönatr trahmany, me ati ëjen Samuela,* ke öni angeic: “Hnenge hna sipo Iehova.”
21 E thupen, hnei Elekana me fami angeic hna ce elë a tro Silo troa huuj koi Iehova, tune lo aqane kuca i angeic e nöjei macatre. Hnei angeice fe hna tro fë ahnahna ne sisiny. 22 Ngo lapa ju pe kö Hana, ke öni Hana koi föi angeic: “E ase hë ni triji thine la nekönatr, tro hë ni a tro sai nyën, me amamai nyën koi Iehova. Nge tro hë nyën a mel e cili.” 23 Hnei Elekana hna sa ka hape: “Qanyi nyipoti kö. Lapa ju hö e celë hnalapa, uti hë la kola ase triji thi nyën. Epi tro Iehova a eatrëne la mekuna i nyipo.” Matre hnei Hana hna lapa pe me iji thine lai nekönatr, uti hë la kola triji thin.
24 Ame ju hi la kola ase triji thin la nekönatr, hnei Hana hna tro sai nyën a tro Silo. Hnei angeic hna tro fë la neköi kau ka köni macatre, me ca efa* farin, me ca trengene waina ka tru. Matre angeic a tro ju kowe la uma i Iehova e Silo, memine la nekö i angeic. 25 E cili, hna humuthe la neköi kau, me amamane la nekönatr koi Eli. 26 Nge öni Hana jë hi: “Joxu, eni hi la a nyipici koi nyipë, eni hi lo föe ka cile qëmeke i nyipë, nge ka thithi koi Iehova. 27 Hnenge lo hna sipon troa hnahone la nekönatre celë, nge hnei Iehova hna kapa la sipong. 28 Nge eni hë la a nue nyëne koi Iehova. Matre eni a nue nyën koi Iehova e nöjei drai ne mele nyën.”
Nge angeic* a thili ju koi Iehova.