Salamo
Thatraqane la atre jumi traem; Masekil* i Dravita. Nyima ngöne Maalath.*
53 Itre atr ka hmo* a qaja e kuhu hni i angatr ka hape:
“Pëkö Iehova.”
Matre tha ka meköti kö nge ka sis la itre huliwa i angatr;
Pëkö ala cas ka kuca la loi.
2 Ngo qa hnengödrai, Akötresieti a goeëne la itre nekö i atr
Matre wang ka hape, hetre atre kö ka inamacan nge ka thele Iehova.
3 Nanyi hë angatr qa ngöne la gojenyi ka meköt;
Ka qali thiina asë hi angatr.
Pëkö ca ka kuca la loi,
Pëkö ala cas.
4 Hetre atre iakötrë kö ka trotrohnin?
Angatr a öni la nöjeng tune la angatr a xeni falawa.
Tha angatre kö a hë Iehova.
5 Ngo tro hë angatr a meci hnei xou,
Ketre xou atraqatr hna tha hane kö melën ekö,*
Ke tro hë Akötresieti a ijene la itre jun ne la itre ka icilekeu* me eö.
Tro hë eö a ahmahmanyi angatr, ke ase hë Iehova nuetriji angatr.
6 Ekölöhini, epi traqa pi qa Ziona la iamele* i Isaraela!
Ngöne la ijine tro Iehova a bëeke fë la itre atre i nyidrë qa ngöne la nöje trenyiwa,
Epi tro Iakobo a madrin, nge tro Isaraela a elitrauj hnei madrin.