Nemen La Hnene La Itretre Anyipici Iehova La Hna Mejiune Kow?

“Ngo aja huni troa denge thei nyipë la mekune i nyipë; ke ate hë huni laka hna qaja angazon’ e cailo fene la hmi celë.” (Ite Huliwa 28:22) Drei la tulu ka loi hnene la itre atr ka tru ngöne la nöje e Roma. Hna amë pe lo hneijine i Iesu, angatr a ajan troa atrepengön lai hmi thaa qaathene kö la itre ka ixöjetrij qaa trön, ngo qaathene pe la itre sipu atren.

Haawe, tune la Itretre Anyipici Iehova enehila, hna qaja angazo angatr, nge thaa loi kö e troa atre la nyipi pengöi angatr, jën la itre ka ixöjetrij. Qa ngöne lai, eahuni a madrin troa qeje pengön koi nyipunie la itre xaa ini ka tru hne huni hna mejiune kow.

Tusi Hmitrötr, Iesu Keriso, Me Akötresie

Eahuni a mejiune laka “qa thene la Ua i Akötresie la hna cinyihan’ asë, nge ka nyipi ewekë.” (2 Timoteo 3:16) Nge ngacama kola majane hnei itre xan ka hape, thaa itre nyipi keresiano kö hun, ngo eje hi laka thaa trenge nyipici kö lai. Caasi hi la mekuna huni memin la hna cainöjën hnei Peteru göi Iesu Keriso kola hape: “Pëkö iamele thei kete, ke pëkö kete ëjene e celë fene hnengödrai hna hamëne kowe la ate, ka ateine troa amele shë.”​—Ite Huliwa 4:12.

Ngo, pine laka hnei Iesu hna qaja ka hape “Hupuna i Akötresie” nyidrë, me hape “hnei Tetetroti ka mele hna upi ni,” haawe, itre Temoë i Iehova a mejiun laka ka draië kö Akötresie hui Iesu. (Ioane 10:36; 6:57) Hnei Iesu lo hna ketre sipu qaja ka hape: “Atraqatre Tetetroti hung.” (Ioane 14:28; 8:28) Qa ngöne lai, thaa tro kö së a mejiun ka hape ceitune hi la edraië i Iesu me Tretretro, tune la aqane qaja hnene la Tirinite. Ngo, easë pe a mejiun laka hna xupi nyidrëti hnei Akötresie, nge Iesu e fei Nyidrë..​—Kolose 1:15; 1 Korinito 11:3.

Ame qene Drehu, tre, Iehova la ëje i Akötresie. Öni Tusi Hmitrötr ka hape: “Cilieti la Kasisitia hmekuje hune la fene hnengödrai asëjëihë nge Iehova la atesiwa i cilie.” (Salamo 83:18) Thenge la trenge ewekë celë, hnei Iesu hna qaja atrun la ëje i Akötresie, me inin la itretre drei nyidrë troa thith, me hape: “Tetetro i anganyihunieti e koho hnengödrai, jiniati e hmitöte la atesiwa i enëtilai.” Ketre, hnei nyidrëti hna ketre sipu thith koi Akötresie ka hape: “Ase hë ni amamane la atesiwa i cilie kowe la nöjei ate hnei cilieti hna nunuë nie.”​—Mataio 6:9; Ioane 17:6.

Itre Temoë i Iehova a mejiun laka, loi e tro angatr a xom la tulu i Iesu, ene la troa qaja amaman kowe la itre xaa atr la ëje i Akötresie, me itre trepene mekune i Nyidrë. Haawe, hne hun hna xom la ëje hna hape, Itretre Anyipici Iehova, ke, eahuni a thel troa xötre thenge la tulu i Iesu, lo “Ate anyipicine ka nyipici.” (Hna Amamane 1:5; 3:14) Nge ka ihmeku fe la mekune celë memin la aqane qaja hnei Isaia 43:10 la nöj ka kuca la aja i Akötresie, kola hape: “Nyipunie la itete anyipici ni, öni Iehova, nge hluenge lo hnenge hna iën.”

Baselaia i Akötresie

Hnei Iesu hna inin la itretre drei nyidrë troa thith, öni Nyidrë, “Jiniati e hlepëtipi la baselaia i enëtilai,” nge Baselaia hi la taan ka tru ne la ini hnei nyidrëti hna hamën. (Mataio 6:10; Luka 4:43) Itretre Anyipici Iehova a mejiun laka ame la Baselaia, tre, celë hi la ketre mus ka ej e koho hnengödrai, nge tro ej a musinën la fene hnengödrai asë, nge Iesu Keriso la Joxu ka sihngödr hna iën troa cilën la Baselaia cili. Öni Tusi Hmitrötr ka hape: “Troa eje hune la lue hnaiape i nyidë la mus, tha tro kö a nyipune troa kekë la musi me tingetinge i nyidë.”​—Isaia 9:6, 7.

Ngo, thaa Iesu Keriso hmekuje kö la joxu ne la Baselaia i Akötresie. Ala nyimu la itre ka troa ce mus me nyidrë, e koho hnengödrai. Hnei Paulo aposetolo hna cinyihan ka hape: “Maine eësha xomi hni, tro sha ce joxu me nyidë.” (2 Timoteo 2:12) Tusi Hmitrötr a qaja ka hape, ame la itre atr hna amelen hmaca troa ce musi me Keriso e hnengödrai, tre, hna tuluthe hi la etrun “ala ca hadede nge luate nge ekete la o thausan, ene la ite hna itöne qa la fen.”​—Hna Amamane 14:1, 3.

Eje hi laka, ame la nöjei mus, ka hetre jinin asë hi, nge kola mejiun hnene la Itretre Anyipici Iehova laka, itre miliar la itre atr elany ka troa hane hetrenyi la mel ka thaa ase palua kö, ngo thaa kolo kö a qaja lo itre ka ce mus me Keriso. Ame e thupen, tre, tro hë la fen a paradraiso, me mingöming, nge troa lapan ej hnene la itre jin ka hni kowe la Baselaia i Akötresie, nge tro asë hi angatr a ipië me drenge thenge la musi Keriso, me itre ka ce mus me nyidrë. Haawe, ka xecie hnyawa kowe la Itretre Anyipici Iehova laka thaa tro kö a paatr la ihnadro, nge troa eatr la hna thingehnaean hnei Tusi Hmitrötr lo hna hape: “Tro ha la ange ka meköti a hetenyi la nöj, me lapa palua kö ngön’ ej.”​—Salamo 37:29; 104:5.

Ngo, troa traqa tune kaa la Baselaia i Akötresie? Hapeu troa hlepëti la Baselaia i Akötresie, e thili asë pi elany la nöjei atr asë kowe la Baselaia i Nyidrë? Ohea, kolo pe a amaman hnei Tusi Hmitrötr laka, ame la ijin troa traqa la Baselaia, tre, nyipi ewekë la tro Akötresieti a amekötin la itre atr: “Tro Akötesieti ne hnengödrai a axulune la kete baselaia ka tha tro kö a apaten’ epine palua. Nge tro ej’ a . . . lep’ anyilanyilane me apatene la nöjei baselaia, nge tro ej’ a cile hut’ epine palua.”​—Daniela 2:44.

Eu la ijin troa traqa hnene la Baselaia i Akötresie? Jën la itre hna perofetan hnene la Tusi Hmitrötr ka eatr enehila, itretre Anyipici Iehova a mejiun laka, easenyi hnyawa ha la tro ej a traqa. Celë hi matre eahuni fe a könë nyipunie troa wang la itre xaa hna perofetan göne lo “ite drai hnapin” ne la fene celë, zin la ngazo. Hna qeje pengön itre ej ngöne Mataio 24:3-14; Luka 21:7-13, 25-31; me 2 Timoteo 3:1-5.

Pine laka eahuni a ‘aja [“Iehova,” MN] Akötesi huni hnene la hni ka pexej, me [“ua,” MN] huni ka pexej, me mekune huni ka pexej, me tenge cate huni ka pexej, me hnime la ate lapa eashenyi hun,’ thaa hna isa huni kö me agomegomë hun hnene la isi pi nöj, maine hnene pena la isa qene hlapa, me isa aqane mel pena. (Mareko 12:30, 31) Hna wangatrehmekunyi hun hnene la ihnim ka ej thene la itre trejin me eahun itre Keresiano, nge caasi hi la aqane mele hun, ngöne la nöjei götran la fen hne huni hna lapa ngön. (Ioane 13:35; 1 Ioane 3:10-12) Qa ngöne lai, thaa eahuni kö a hane kuci politik, maine nyi enexölen pena la ketre musi ne la fen. Eahuni a thel troa xom la tulu thene la itretre drei Iesu hnapan, hnei nyidrë hna qeje angatr ka hape: “Tha itete fene kö angat, nge tunge tha ate fene kö.” (Ioane 17:16) Eahuni a mejiun laka ame la troa lapa ananyin la fen, ke, kola hape, troa ananyin la thiina ka sis ka hlemu enehila, memine fe la thoi, atrekënö, me kuci ngazo, me nyixetë, me ce meköl la lue trahmany maine lue föe, me huliwan menun la madra, me thil koi idrola, me itre xaa ewekë ju kö hna wathebon hnei Tusi Hmitrötr.—1 Korinito 6:9-11; Efeso 5:3-5; Ite Huliwa 15:28, 29.

Mejiun Kowe La Itre Drai Elany

Kola mejiun hnene la Itretre Anyipici Iehova, laka, thaa kolo kö a afenesin la mele së enehila hnene la mec. Eahuni a mejiun laka hnei Iehova hna upi Keriso a tro celë fen, troa nue la mele i nyidrë matre nyine thupene mel, me aijijën la itre atr troa meköt xajawai Akötresie, me hetrenyi la mel ka thaa ase palua kö ngöne la fen ka hnyipixe. Celë hi mekun hna qaja hnene la ketre aposetolo i Iesu, kola hape: “Ngo enehila hna jele meköti shë hnene la madra i nyidë.” (Roma 5:9; Mataio 20:28) Atraqatr la ole ne la Itretre Anyipici i Iehova koi Akötresie me Hupuna i Nyidrë, pine la thupene mel ka fe gojenyi ne la itre atr kowe la mel ka epin palua.

Ka catr la mejiun ne la Itretre Anyipici Iehova kowe la mele ka troa xulu, hna hneatrepen hnene la mele hmaca qa ngön la mec, elany fene la musi ne la Baselaia i Akötresie. Tune la hna qaja hnei Tusi Hmitrötr, eahuni a mejiun laka, ngöne la kola mec la atr, tre, paatre hnyawa ha angeic, nge “ngöne la drai cili patë hë la ite mekune i angeic.” (Salamo 146:3, 4; Ezekiela 18:4; Ate Cainöj 9:5) Eje hi laka, hetre mel elany kowe la itre ka mec, pine laka, tro Akötresieti a meku angatr, me amele angatr hmaca.—Ioane 5:28, 29.

Ngo, ka xecie kowe la Itretre Anyipici Iehova, laka, ala nyimu la itre ka mel enehila a thaa tro kö angatr a mec ngöne la kola troa apaatren la itre mus hnene la Baselaia i Akötresie; nge tune la hna amele Noa me hnepe lapa i angeic qa ngön la iwë, haawe, tro fe a amele angatr matre tro angatr a hetrenyi la mel ka thaa ase palua kö ngöne la fen hna ahmadradran. (Mataio 24:36-39; 2 Peteru 3:5-7, 13) Ngo eahuni a mejiun laka, troa hetrenyi la mel e hna trongën la itre hna amekötin hnei Iehova, tun la hna qaja hnei Tusi Hmitrötr, kola hape: “Kola pate la fene hnengödrai . . . ; ngo troa cile huti epin palua la ate kuca la aja i Akötresie.”​—1 Ioane 2:17; Salamo 37:11; Hna Amamane 7:9, 13-15; 21:1-5.

Eje hi laka, thatreine kö troa qaja asë e celë la nöjei hna mejiune kow hnene la Itretre Anyipici Iehova, ngo eahuni a könë nyipunie troa thel la itre xaa mekun hnei nyipunie hna ajan troa atre.

Maine pëkö hna qaja, ke, troa xome la itre mekene tusi ngöne hi lo Lifu Bible​—The Bible Society in the South Pacific.

[Hna cinyhan ne la götran 4]

Hne huni hna xom la ëje hna hape, Itretre Anyipici Iehova, ke, eahuni a thel troa nyitipu Iesu