Nyipiewekë Tro Palahi a Sine La Porogarame Ne Icasikeu Ne La Ekalesia i Epun
1 Ame ngöne la itre macatre ka ase hë, ke, hna öhne hnene la ketre nekötrahmanyi la pepa hna fejane la itre ijine la icasikeu ne la ekalesia. Pine laka, angeic’a thele la nyipici, angeic’a mekune troa hane sine lai icasikeu me nöjei atr ngöne la wiike ka troa xulu. Canga traqa hi angeice ngöne la uma ne Baselaia lai sabath. Ka keukawa hnine la aqane ibozu me angeice hnene la ketre atre cainöj, nge ngöne la nyidro a porotrik, ke, kola hnyingë angeice hnene lai atr cainöje ka hape ajane kö angeice troa hane etid, ngo jole kö angeic. Ngo ame pe, ke, hna ketri angeice hnene lo cainöje hna hnëkëne hnyawane matre ujë jë hë la mekune i angeic, celë hi matre ame la thupene lai icasikeu, angeic’a ajane troa etid. Nyimenyime me kökötre loi la thangane hna amamane hnene la melene la nekötrahmanyi, ene pe xomi bapataiso ju fe kö nyëne ngöne la itre treu thupene lai. Ijije tro së a hane atrepengöne la köni ini qangöne lai hna melëne celë.
2 Ame la ewekë hnapan, ke, hna ithuemacanyine la icasikeu. Hapeu, huliwaane kö epuni la itre pepa, ene lo porogarame hna fejane la itre icasikeu ne la ekalesia? Ame la hna majemine, ke, hna cilefë palahi hnene la ketre trejine me easë ka ciamëne troa canga amamane la taane cainöje hna troa cilefë ngöne la wiike ka troa xulu, qangöne lai, ijije tro së a hane mekune la itre xaa atr ka lapa ngöne la götrane së matre ijiji angatre fe troa hane drenge la cainöje celë. Ceitune hi, maine itre ka e, maine itre ka tha e petrekö la itre itusi së, ngo loi pe itre ka ajane troa hane drenge la ketre cainöje hna eköthe eje hune la ketre taane hna xome qahnine la Tusi Hmitötr.
3 Ame la hnaluen, ke, hnene laka ka keukawa la aqane kapa lai atr ka xötrei traqa. Maine hnei epuni hna mekune tro palahi a canga traqa ngöne la uma ne Baselaia, ke, ijije tro epuni a ibozu memine la itre trejine me epuni memine lo itre atr ka traqa troa hane sine la icasikeu. (Heb. 10:24) Nge maine atr ka xötrei sine la icasikeu, ke, ma thatre kö pengöne palakö angeice la icasikeu. Hawe, qejepengöne jë koi angeice ka hape kola nyiqaane la icasikeu së qangöne nyima me thith, nge qaja ju fe la aqane trongene la icasikeu. Maine ijije hi, ke, hë angeice jë troa lapa ezi epuni matre troa ce goeëne me angeice la Tusi Hmitrötre me nyima i epun. Hë angeice jë troa porotrike me epuni göne la itre hnyinge i angeice thupene la icasikeu.
4 Ame la hnaakönin, ke, hna hnëkëne hnyawane la cainöj. Ame la itre ka cilefë la cainöje ngöne la itre ekalesia, ke, hnei angatre hna lapaane la itre hawa ka nyimutre troa hnëkëne hnyawane me sine thele la itre mekune nyine troa xatuane la itre atr matre kökötre thei angatre la ihnime memine fe la itre huliwa ka loi. Ame easë asë, ke, easë a akötre enehila, pine laka easë mele e celë fene ka ngazo, ngo ame pe, ke, kola aegöcatrenyi së hnene la itre nyipici qa hnine la Tusi Hmitrötr, nge celëhi ewekë ka xatua së troa xomi hni. Ejehi laka, ka nyipiewekë palahi la aliene la cainöj, ngo troa pë thangane koi së e hne së hna tha drenge hnyawane la hna qaja. Hapeu, jole kö koi së, e itre xaa ijine troa hane drenge hnyawane la kola cainöj? Ma loi e tro së a hane xomi not, tune lo aqane kuca së lo ijine kovasio. Mekune hnyawane kö hane goeëne ngöne la Tusi Hmitrötre i epuni la kola e la nöjei mekene tusi me qeje pengön’itr’ej.
5 Hnei Sasaiatri hna canga hnëkëne la itre cainöje hna eköthe hune la nöjei pengöne mekune hna qejepengöne hnei Tusi Hmitrötre. Troa kuca lai cainöje hnene la atre thup peresida, maine pena ketre trejine hna iëne hnei nyidrë, tro la kolezi ne la itre qatre thup a kuca la porogarame ne reinio ne la ekalesia. Ame la itre taane ne cainöj, ke, hna iëne hnei Sasaiatri nyine troa hamëne la itre ixatua ka ijije ngöne la itre götran. The tro kö a paatre ngöne la itre ijine cili, pine laka, easë a kapa la itre ithahnata hna melen, nge nyipiewekë tro palahi a sine apexejene la nöjei icasikeu ne la ekalesia ngöne la wiik.