Hetre Thangane Kaloi e Troa Qaja Amamane La Itre Hna Kuca Hnei Iehova!
1 Hna eamone ngöne la wesiula i Akötresie ngöne la tusi salamo mekene 48 kola hape ‘tro xötreithi Ziona jë; ejë la itre hnapo ne ej, xödrane ju la itre eneti ne ej; mate tro nyipunie a qaja xötën’eje kowe la xöte hnapin.’ Jëne la ihnimi angatre koi Iehova, ewekë ka sisitria koi angatre la nöjei götranene la traone nyipine la musi Akötresie kowe la fen. Kola sisitria la nöjei ewekë cili pine laka hna atë ngöne la traone cili la atresiwa i Nyidë. Troa ithahnatane pe hnei angatr, nge kolo mina fe matre nyine troa thupëne matre tro la itre matra i angatr’a drenge palahi la troa ithahnatane la itre trengamo cëlë itre hnei angatre hna hnin. — Sal. 48:12, 13.
2 Hawe enehila ame lo musine la Mesia qathei Akötresie, ke, tha eje hmaca kö nyipine Ziona e celë fen, ngo ngöne la Ierusalema e hnengödrai. (Heb. 12:22) Ame la Baselaia i Iehova hna nuxeciëne koi Iesu keriso, ke, mama ha la musin’ej qane lo macatre 1914. (Hna Ama. 12:10) Ame la itre huliwane ej, ke, ka nyipi ewekë catre koi së. Easë fe a haine la aqane xome amekötine i Iehova la itre hlue i nyidrë e celë fen, ene la angetre anyipicine la baselaia, itretre aeatrëne la mekuanai Nyidrë. Nge eje ngöne lo itusi hne së hna xötrei kapa la itre götrane hne së hna pi atre, ene lai itusi: Les Témoins de Jéhovah: Prédicateurs du Royaume de Dieu. Atraqatre la madrinene la nöjei atr la kola amamane la itusi lo ijine kovasio ne distirik “L’enseignement divin”!
3 Ame hë lo drai 1 semitrepa, ke, hetrenyi hë la itusi celë ngöne la 20 lao qenehlapa nge kolo fe a ujëne kowe la 13 lao xan. Hapeu, Hetre itusi epuni fe hë? Nge ase fe hë epuni nyiqaane e? Hawe, Hane fe kö epuni iqajakeune la itre hnei epuni hna e qa hnin’ej?
4 Thupene la hna xödrane la itre iatr me wange la itre hna qejepengön, tune la itre tulu hna amamane lo ijine kovasio, hawe, nyimutre la nöjei trejine trahmanyi me föe, ka canga e lai itus. Nemene la aqane kapa i angatre la itre hna cinyihan? Hanawange la hna qaja hnene la itre xane e angatr.
5 Hna cinyihane hnene la ketre söre ka hape: “Pë palakö ketre itusi ka tune la itusi celë, ka amejëne la trenge aja theng, ene la troa canga e afenesine matre tro ni a nyiqaane hmaca jë troa e ej. Traqa ha ni enehila ngöne mekene 25. E tro palahi ni a e, ke, kolo palahi a uti xötrë la itre trenge timidrang, nge kolo mina fe a kökötre la ihniminge koi Iehova. Itusi lai ka ithuecatre koi së me ekögölithe la lapaune së.”
6 Hna qaja hnene la ketre trejine ka 40 hë lao macatre ne nyihlue i Iehova: “Tha ase kö ni ekö mekune ka hape tro la itusi celë a axulune e kulu hninge la trenge ajan’atraqatre troa e ej. Tha canga meköle kö ni e jidr, nge canga hlë ni e hmakanyi matre afenesine ni e la itusi thupene lue wiik. Nyipici, ketre itusi lai hnenge hna e ka ketri ni catr. Hawe, ketre itusi ka nyipiewekë catre nyine troa thele mekune me hamë ixatua.”
7 Loi e troa hetre porogarame matre e lapaan: Hnei itre xane hna e nyimenyimëne lai itusi utihë la fenes, nge thupene lai, angatr’a nyiqaane hmaca jë troa e hnyawa.
8 Maine alanyimu la itre atrene la hnalapa i epuni ngöne la nyipici, hawe, ijije tro epuni a xome la itre xaa götrane la itusi matre etidine memine la fami. Ase hë nyiqaane kuca tune lai hnene la itre xaa fami, qaane ju kö lo angatr’a kapa lai itus, lo ijine kovasio. Tha hape kö tro ha tha nyipiine la itre xaa ewekë, tune la troa hnëkëne la La Tour de Garde. Ngo tro pe nyipunie a öhnyi thangane ka loi, e troa xome la 10 maine 15 menetre troa ce wange la itus Prédicateurs.
9 Ame thei itre xaa fami, ke, hnei angatre hna e la luetre maine köni götran — kösë casi maine lue hna cinyihane’atrun — e nöjei thupene xeni hej. Nge ame itre atrene lai fami, ke, ase fe hë angatre isa e casine la ketre götrane katru ne la itus. Ngo sisitria palakö e troa tro hmidra, ene la troa ce e hnyawane memine la fami matre ce wange palahi la itre mekune nyine ce ithahnataan. Ame la itre fami cili, hetre itre atrene laka, nyimutre catre hë la itre macatre ne angatr’a nyihlue i Iehova. Celëhi matre ame ngöne la angatr’a e la tus, ke, ene pe amejëne hmaca jë la itre ewekë hnei angatre hë hna atre. Nge angatr’a pi treije la kola amekunë angatre hmaca lo itre ijine ekö hnei angatre hna melën.
10 Maine hna aijijëne hnene la itre isa pengöne mel, maine ka mele cas, maine trene föe me ha kuku troa e casine la itus. Pane ce drenge ju së la tusi ne la ketre söre koi Sasaiatri kola hape: “Hnenge hna e e nöjei heji qëmekene tro ni a meköle matre hna amejëne la mekunenge hnene la itusi celë memine fe la ihniminge ka jui kowe la nyipici, nge kösë kola easenyi ni catre koi Iehova. Ketre, drenge catre ni e kuhu hninge laka, eni a hane sine la organizasio i Nyidrë, nge ase hë ni e asë la nöjei götrane la itus.”
11 Nyipici laka, ka hmeköni pi hë la itus, ngo ame pe hna thewe nyimu hnahagen. Ame la hnahage ne nyiqaan, ke, hetre 108 lao götran. Maine nyimenyime hi la aqane amamane la itre ewekë qaane lo ijine i Abela, nge utihë lo 1992, ngo loi pe, maca hnyawa la itre hna qejepengöne la itre ewekë cili. Ame la itre hnahage, ke, hetre ka 13 lao götrane, nge ame la itre xan, ke, traqa pi hë, la itre hnahage katru koi 150 lao götran. Ame la aqane isa thawa, ke, nyimu mekene e ca hnahag. Hawe, tha tro kö a e nyimenyimën, ngo loi palahi troa acesedrëne matre e hnyawa la ca hnahage, maine ca meken, maine ca hna cinyihan’atrun, nge troa e ce memine la ajan’atraqatre matre hetre thangane ka loi qa then’ej.
12 Loi e tro epuni a mekune hnyawa kowe la itre hna e: Tuneka la hni epuni la epuni a e la itus? Tha ene kö la troa goeëne nyimenyimëne la itre götrane la itus. E hnine la itus Prédicateurs la treng’amo i nyipunie thatraqane la ua. Loi e tro epuni a atre hnyawa itr’ej. Mekune hnyawa ju kowe la itre aqane tro së a melëne la itre hne së hna e. Ame ngöne la epuni a e la nöjei pengöne huliwa ne la itretre anyipici Iehova ngöne la itre drai ka ase hë, ke, mekune ju kowe la aqane tro epuni a xötrethenge la lapaune i angatr. (Heb. 12:1, 2) Ame lo hna cinyihane ka qejepengöne lo itre ka icilekeu kowe la nyipici, ke, loi e troa trotrohnine hnyawa matre tha tro kö a jeli së hnene la itre thethi cili, matre troa ekögölithi hnyawa palahi la mele së ngöne la ua. Ame la easë a traqa kowe la itre götrane ka qejepengöne la itre hna melëne la hneijine së, wangatrehmekune hnyawa ju la itre thina ne la ua ka eje thene la itre trahmanyi me föe, itre hlue i Akötresie, la aqane amamane angatre laka, aliene ne hni angatre la troa pane kuca la hanengë i Akötresie memine fe la aqane ujë ka loi angatre qëmekene la itre jole me akötr, ene la ijine Akötresieti petrekö enehila a nue itr’ej. — Heb. 13:7.
13 Kola acatrene hnyawa la lapaune i nyipunie jëne la itre ewekë hna amaman, ene la aqane tro xome i Iehova la nöje i Nyidrë matre trotrohnine hnyawa angatre me e asë fe la nyipici qa hnine la Tusi Hmitrötr. Qangöne la atre hnyawa ha së la aqane eköthe la organizasio, hawe qangöne lai troa catre fe la mejiune së kowe la nöjei ewekë hna acile hnei Iehova, itre nyine huliwaane e celë fen. Eje hi laka, jëne tro epuni lai a madrin’atraqatre troa atre la aqane aeatrene la itre hna perofetane matre tro la maca ka loi a ketr fe la itre götrane ka nanyi catre ne la fen. Tro fe epuni a sesëkötre troa atre la aqane catre fë la itre hlue i Iehova troa cainöjëne la maca ka loi. Tro fe epuni a kapa la itre ixatua qathene la aqane xomihniine la itre hlue i Akötresie, la itre itupathi ka traqa koi angatre hnene laka tru catre la ihnimi angatre koi Iehova.
14 Thupene la hna e la ketre götrane la itus, loi e troa ce ithahnataane memine la fami la etrun’eje memine la nöjei ewekë ka nyimutre nyine troa ce wang. Maine hetre nekö i epuni ka co, upi angatre jë troa qejepengöne la iatr me qaja koi epuni la pengöne la itre atr hnei angatre hna wangatrehmekun. Maine epuni pena a e casin, ke, porotrikëne jë koi itre xane la itre hnei epuni hna trotrohnin. Ame la itre hnei epuni hna inine qahnine la itus, ke, ijiji epuni troa nyipiewekëne ngöne la itre ijine iwaihmaca, maine pena la ijine epuni a ini tusi me ketre atr. Ame la itre hne së hna atre, ke, Loi e troa qaja ngöne la isa ijine ka ijij. E tro palahi së a qaja lapaan, ke, tro la itre mekune celë a lapa huti hnine la he së me ngöne fe la hni së, nge tro fe la itre atr hne së hna ithahnata memin’a hane kepe thangane ka loi.
15 Troa wang’atrune la nöjei götran’asë: Ame la epuni a e lai itus Prédicateurs, ke, ijine tro epuni lai a öhnyi loi me madrin.
16 Ajane kö epuni tro epuni me fami epuni a hane ihamë ngöne la hna jilapa, ene la iwaane la organizasio ne la itre temoë i Iehova? Tro la itre götrane qaane 208-209 a amamane la itre uma i Sasaiatri hna lapa fë la huliwa, qaane hë la ca hadredre lao macatre ngöne la ketre götrane e Pitisibör. Nge itre götrane 216-217 a amama i epuni la itre uma ne huliwa pena ha e Borokilin. Ame la itre hna xupi atr qaane la götrane 352-356, ke, nyine troa hane amama i epuni la hna jilapa enehila. Ame la itre mekene 26 me 27, ke, nyine qejepengöne la nöjei ewekë hna kuca e kuhu hnine Bethela. Nge ame la götrane 295-298, ke, itr’eje palahi a qejepengöne la itre huliwa memine la mele ngöne la Bethela.
17 Ala xalaithe hi qa the së la ange ka qa hna ihamë ngöne la itre filiale i Sasaiatri. Hawe, ame la itre götrane 357-401 ne la itus Prédicateurs, ke, tro itr’ej’a tro xomi epuni troa hane ihamë kanothe la fen. Hawe, the ange hnyepeje menu kö, ngo wange hnyawa ju pe la isa ca nöj, nge xomi meköti ju jëne la karte ne la fene hnengödrai hna sija ngöne lo itre götrane 415-417 matre tro nyipunie a atrehmekune la göhnene la filiale ne la nöjei nöj’asë. E hnyawa jë fe la hna qejepengöne la itre hna xupi atr. Ketre mina fe, ijiji epuni troa atre la aqane qejepengöne la itre xaa nöj, e tro epuni a thele la itre nöje cili jëne lo index. Ketre jëne tro mina fe epuni lai a atre hnyawa la itre xaa nöje trehnyiwa hna mele ngöne hnene la itre xaa sine i epun.
18 Ame la itre xaa nyine elo, ke, kola aijiji së troa amacaane hmaca la itre hne së hna inine ekö matre troa atrehmekune la itre xaa ewekë ka sisitria ne la fen itre nöje maine isitoare pena. Ngo hapeue pe matre tha wange pe së la enyipiewekëne la tro së a atrehmekune hnyawa la itre macatre memine la itre ewekë ka axulune la isitoare ne la nöjei Iehova enehila? Hna amamane itr’ej qaane lo götrane 718 uti hë 723 ne lo itusi Prédicateurs. Ame lai isitoare e cili, ke, tha ka pexeje kö la hna qejepengöne; ngo hna apexejene pë hë ngöne la sine la itus. Huliwaane jë la itusi e itre epuni a iamacany. Tha tro kö a jole kowe la itre thöthi, ngo troa nango hmitre koi itre ka thupetresiji hë. Ngo ame pe la ka nyipi ewekë catre, ke, ijije kowe la nöjei pengöne xötre asë troa hetre hna atre. Thupene la hne së hna atrehmekune la itre macatre memine fe lo itre ewekë katru ka traqa, hawe, xupe jë ngöne la trepene cili. Loi e tro epuni a trotrohniine hnyawa la aliene la ca ewekë ka traqa. Matre loi e troa ithahnatane hmekune la ajai Akötresie. Nge thupene lai thele jë kahape nemene la götrane la ewekë ka traqa ka ketri epun wange hnyawa ju fe la sipu göhnei epun ngöne la itre ewekë hna kuca hnei Iehova.
19 Itre aqane fe jëi nyipunie: Ame la epuni a ce öhne la: Les Témoins de Jéhovah: Prédicateurs du Royaume de Dieu, epuni hi lai a wangatrehmekune la hna qaja hnei perofeta Isaia ngöne mekene 60:22. Kola e ngöne la götrane 519 ka hape: “ ‘Tro ha ala thausane la ala xalaith,’ hawe, eatre hnyawa ha enehila la hna thingehnaean. Ngöne la itre nöje ekö, co hi la 50, pë pena kö lai hna hape ‘ka co’, ame enehila hna sasaithe la ca thausane lao hlue i Iehova. Ame itre xa götrane hetrenyi la trene lao thausane, me ca hadredre thausane ngöne la itre xaa nöje la angetre anyipici Iehova ka catre cainöjëne la maca ka loi! E tro a wange asë ngöne la fene hnengödrai, ke, ame la angetre anyipici Iehova, ke, ketre “ka catr, nge alanyimu kö angatr’asë hune la itre atrene la 80 lao baselaia ne la fen.”
20 Ame la huliwa ne la Baselaia, ka ihuli troa mana, ke, tha fenesi palakö. Tro hmaca kö Iehova a asaqene catrëne hune lai. Nemene fe la qa i nyipunie? Wangatrehmekune hnyawa kö epuni la aqane fe gojenyi koi epun? Ame la epuni a trotrohnine trongëne la hna melëne hnene la itre xan, ke, loi e tro la hni epuni a upi epuni matre hetrenyi thei epuni fe la ijine ka ijij, matre tha cile hmaca kö epuni e troa hane sine la huliwa atraqatre hna amekötine kowe la hnedrai së hnene la Akötresi së ka ihnimi jëne Iesu Keriso.