Hetre Hnëqa Së
1 Hnei Iesu hna upe la itretre drei nyidrë troa “inine la nöjei nöj’asëjëihë.” (Mata. 28:19) Kola mama enehila ngöne la 232 lao nöje me hnapeti e celë fene laka, faifi milio nge sin lao atr ka atrunyi Iehova Akötresie, angatre a aeatrëne la hna amekötine koi angatre hnei Iesu. Ngo tuneka fe së isa alacaas? Hapeu, easë kö a hane nyipiewekëne hnyawa la hnëqa së, ene la troa cainöj?
2 Ketre Hna Amekötine Nyine Troa Kuca: Ame la qa së, ke, celë hi “nyine troa kuca matre troa trongëne la itre huliwa hna amekötin.” Hna upi së hnei Keriso troa cainöj. (Ite Huliwa 10:42) Hnei Paulo aposetolo hna öhne la enyipiewekëne la hnëqa cili, maine pena la hna amekötine nyine troa kuca, ene la troa cainöjëne la maca ka loi. (1 Kor. 9:16) Hanawange la ceitun: Epuni a matelo ne la ketre he a kolo ha troa lö. Kola upi epuni hnene la kapene troa canga thuemacane la itre atrene la he, nge troa xomi angatre kowe la itre bootr. Hapeu, tro kö epuni a thë troa thëthëhmine la ithuemacanyi cili me mekune hmekuje la mele i epun? Ohe. Troa mele la itre xane hnei epun. Angatre e qëmekene la mec. Ngöne la meköt, qa i epuni troa kuca la hnëqa i epun, ene la troa xatua angatr.
3 Hna upi së hnei Akötresie troa qaja la ketre ithuemacanyi ka tru, thaa nyine tro kö xome ahmalohmaloeën. Easenyi hë matre, apaatrene pi hë Iehova la aqane melëne la fene celë ka ngazo. Thaa mama hnyawa pala kö la pune kowe la itre atr ka alanyim, itre milio la etrun. Matre tuneka, ka loi kö koi së la troa lapa thaupu fë la ithuemacanyi me meku së hmekuj, nge nue ju pë hë la itre xaa atr troa mec? Ohe, thaa ka loi kö lai. Qa së ngöne la meköt, troa ixatua matre troa amelene la itre xan.—1 Tim. 4:16.
4 Xötrethenge Jë La Itre Tulu Ne Atr Ka Mele Nyipici: Hnei Ezekiela perofeta hna mekune ka hape, qa i nyidrë troa thuemacane la nöje Isaraela ka thaa idrei. Hnei Iehova hna catre thuemacanyi angeice la itre pune ka ngazo, e thaa kuca kö angeice la hnëqa i angeic: “E qaja eni kowe la ate ka ngazo, ka hape, Tro eö a mec; nge thaa kuji angeice hnei’ö . . . tro la ate ka ngazo a meci fë la ngazo i angeic, ngo tro pe ni a thele la madra i angeice thei’ö.” (Ezek. 3:18) Ngacama catrehnine la icilekeu, ngo hnei Ezekiela hna eatrëne hnyawa la qa i angeic. Celë hi matre, ngöne la Iehova a axulune la itre hnei Nyidrë hna amekötin, ijije hi tro angeice a madrin.
5 Itre hadredrene macatre thupen, hnei Paulo aposetolo hna cinyihane la hnëqa i angeice troa cainöj. Hnei angeice hna qaja ka hape: “Gufa kö ni ene la madra ne la nöjei ate asë. Ke pëkö hnenge hna juetëne la nöjei hna mekuatin’asë hnei Akötesie.” Hnei Paulo hna cainöje kowe la ka alanyim, me ngöne itre hnalapa trootro; atre hi angeice laka, maine thaa tro kö angeice a kuca la huliwa cili, tro ha zö i angeice qëmeke i Akötresie la meci ne la itre xan.—Ite Huliwa 20:20, 26, 27.
6 Hapeu, tro fe kö së a hane catre tui Ezekiela? Hetre ajane së troa catre cainöje tui Paulo? Ceitune hi la qa së me nyidro. Qa së troa eatrëne pala hi la hnëqa së, ene la troa thuemacane la itre xaa atr, ngacama tro angatre a hutrö koi së me thaa nyipiewekë së, maine troa icilekeu pena. Nyimutre catre pala kö hnei atr, itre thauzane la etrun, ijije petre kö tro angatre a hane kapa la maca ne Baselaia, me hane qaja ka hape: “Tro huni a ce tro me nyipunie, ke ate hë huni laka thei nyipunie la Akötresie.” (Zaka. 8:23) Epi tro la ihnimi së koi Akötresie, me kowe la itre atr ka hni ka menyik, a upi së troa catre nyihlue i Iehova, ngo thaa tro pe a nuetrije la lapaune së. Hetre hnëqa së, ene la troa cainöj!