Ahmitrötrëne Jë Së La Hnë Tro Së a Hmi Koi Iehova
1 Ame la kola hë së hnene la ketre atr kowe la hnalapa i angeic, easë a amamane la metrötre së kowe la itre ewekë i angeic, me thupëne matre thaa tro kö a angazone itre ej, maine tro pena hmekëne wanga troa nyiejolene pena ha la itre hna majemine ngöne la hnalapa. Haawe, tro kö a mama catre la aqane metrötre cili, ngöne la kola könë së hnei Iehova! Celë hi matre, loi e tro së a thupëne la aqane ujë së ngöne la easë e hnine la uma i nyidrë. (Sal. 15:1; 1 Tim. 3:15) Ngacama hna amë la icasikeu i keresiano ngöne la uma ne Baselaia, maine ngöne la hnalapa ne la ketre trejin, maine ngöne la ketre uma thatraqane la ka ala nyimu pena, caasi pala hi la aqane metrötrëne itre eje hne së asë; easë a ahmitrötrëne la hnë tro së a hmi, kösë ēnē i Iehova, ke, “ka daië casi la atesiwa i nyidë, e koho hune la fene hnengödrai me hnengödrai la lolo i nyidë.”—Sal. 148:13.
2 Ngo hna nango wangatrehmekune pe hnene la itre xaa trejine laka, thaa metrötrëne kö hnene la itre xane la itre ijine icasikeu; angatre a iluilu me enije agö, kösë pëkö enyipiewekëne la itre ini hna hamën. Ketre kolo pe kö a porotrike menu la itre xaa trejine ngöne la verada, me ngöne akawane lue ngöne uma, me ngöne itre qëmekene kabine, maine e tröne pena la uma ne Baselaia, ngo thaa hane kö lö me drenge hnyawa la itre hna qaja ngöne la ijine icasikeu. Ame ngöne la itre xaa ijine kola thupëne hnene la nekönatre ka tru la jini angeic, nyidroti a nango nyiqaane troa elo, matre pëkö thangane hnei nyidroti hna hane kapa qa ngöne la icasikeu. Ketre, ame la kola ase la itre icasikeu, hetrenyi la itre thöthi hna öhne e elo e tröne la uma ne Baselaia; angatre a kakaeo, me ijei me ifeni tune lo itre ka kuci karate. Haawe, nyimu engazone lai, pine laka, kola wesitre hnene la itre ka lapa easenyine la uma ne Baselaia, nge ketre, troa wilëne la itre xan, ke angatre a nyenyape menu ngöne itre hna cile hnei loto, maine ngöne pena la gojenyi ka tru.
3 Nemene La Aqane Troa Amamane La Metrötre Së: Hetre aqane troa amamane ka hape, easë a atrune me ahmitrötrëne hnyawa la hmi së; ame itre xaa ijin, thatreine kö së troa drenge hnyawa la itre hna qaja ngöne la ijine icasikeu, pine laka, kola xeni me munyamunya hnei itre xan, maine hucë itrasa pena, maine fici pepa, maine mejë mejë trije la icasikeu troa tro koi kabine, maine traqa hmitre lapa ngöne la itre ijine icasikeu. Ame la itre keme me thine ka metrötr, nge ka hetre hni ne ipië, angatre a thupëne la itre nekö i angatr, wanga tro nyudrene a adrone la hnin, me ngön la uma ne Baselaia, maine ketre hnalapa pena hna Ini Tusi ngön. Ketre, easë asë hi a aejëne la mekune laka, thaa tro kö a eje ngöne la itre ijine icasikeu, la itre aqane ujë ka ngazo, tune la qene tratraij, me qene hmo, maine aqane ujë ka sis pena.—Efe. 5:4.
4 Maine tro pala hi së a mekune la kepine matre acile jë la itre icasikeu, haawe, tro ha xecie e kuhu itre hni së laka, easë me itre nekö së a amamane la metrötre së kowe la hmi i Iehova, jëne la aqane ujë së ngöne la göhnë “hna iëne troa cile ngön.”—Sal. 84:10.