Mekune Hne Së Hna Ce Axeciën—Troa Trongëne La Jëne Mele Qa thei Iehova
1 Hetrenyi la ketre madrine ka tru hne së hna kapa ngöne lo itre ijine Kovasio ne distrik, hna hape, “Jëne mele qa thei Akötresie;” ene lo kola ce axeciëne hnene la itre atrene la asabele la ketre mekun, hna hamëne ngöne la cainöje ka nyipune la Kovasio. Hna nyiqaane la mekune cili tune la: “Easë . . . a kapa hnene la hni së ka pexej, laka, ame la jëne mele qa thei Akötresie, celë hi gojenyi lai ka sisitria.” Amekunëne hmaca jë la itre mekune ka tru me aliene ej, ka upi së troa ce axeciëne me hape, “EJE HI!”
2 Hne së hna ce axeciëne laka, easë a ajane troa pë ethane la mele së xajawai Iehova, nge thaa tro kö a ajojezine eje hnene la fen. Tro së a catre amë panëne pala hi la aja i Akötresie, ngöne la mele së. Loi e tro pala hi së a nue la Wesi Ula, ene la Tusi Hmitrötr, troa eatrongë së, matre thaa tro kö së a jea kowe la götrane maca me mi; haawe, tro ha mama hnyawa koi së ka hape, draië catre kö la jëne mele qa thei Akötresie, hune la jëne mele qa thene la fen.
3 Nyimutre catre la itre atrene fen, ka thipe trije la jëne mel qa thei Akötresie, matre angatre a menuëne la itre ethane la aqane ujë cili. (Iere. 10:23) Haawe, loi e tro pala hi së a kapa hnyawa la itre ini hna hamëne hnei Iehova, Atre ini Së Ka Tru, ke, Nyidrëti a qaja ka hape: “Dei la gojeny, tro nyipunie a trongën’ej.” (Isa. 30:21) Tune la aqane anyipiewekëne hnyawa hnei Tusi Hmitrötr, ame la jëne mel qa thei Akötresie, ke, ka sisitria catre eje kowe la nöjei pengöne götrane la mel. Maine easë a ajane troa xötrethenge la gojenyi cili, haawe, nyipi ewekë catre tro së a thele troa kepe thangane hnyawa la itre ini hnei Iehova hna hamëne koi së.
4 Sisitria Catre La Ini Hna Hamëne Hnei Iehova: Iehova a ini së la nyipi aliene la mel, memine la aqane troa tro xome ej, matre hetre thangane ka lolo catre koi së. Nyidrëti a ini së troa hetrenyi la itre nyipi mekun, me alolone la itre thiina së, memine la mele së ngöne la götrane la ua. Nyidrëti fe a ini së la aqane troa ce mele tingetinge memine la itre trejin, me itre hnepe lapa së, memine la itre xaa atr ju kö. Itre ini lai, hnei Nyidrëti hna hamëne jëne la itus, ene la Tusi Hmitrötr, nge jëne fe la organizasio i Nyidrë.
5 Qa ngöne lai, nyipi ewekë catre la itre icasikeu ne la ekalesia. Maine tro së a catre troa hane sine pala hi, me hamëne la itre mekune nyine ithahnatane ngöne asë lo lai faifi lao icasikeu së, haawe, atreine hi tro së a kapa la ini ka pexej; ini lai ka ajijë së troa hane tro fë hnyawa la maca ka loi, me atreine melëne hnyawa la mele ne keresiano. (2 Tim. 3:16, 17) Kola hamëne fe hnene la Atre Ini Ka Tru, la itre mekune i Nyidrë nyine ini së, jëne la itre asabele me itre Kovasio. Qa ngöne lai, maine pëkö sine meci së, maine pë pena kö ka ajolë së troa sine la itre icasikeu cili, haawe, loi e thaa tro pi kö së a triane la caa icasikeu, maine caa ijine asabele.
6 Epi tro pala hi së a catre trongëne ngöne la itre drai ka calemi, la gojenyi ne mel qa thei Akötresie; easë asë hi lai a atrunyi Iehova, me thele troa kapa la itre manathithi ka epine palua!—Is. 48:17.