Ketre Ijin Ne Madrin Me Xeni Ngöne La Götrane La Ua
1. Tune kaa la aqane aejëne hnyawa Iehova la itre aja ne la itre hlue i Nyidrë ngöne la götrane la ua?
1 Iehova a aejëne hnyawa la itre aja ne la itre ka nyihlue i Nyidrë ngöne la götrane la ua. Ngacama kola jiinë xeni ngöne la götrane la ua e celë fen, ngo ame pe kö së, tre, hna ithua së hnyawa. (Is. 65:13) Ame ngöne la nöjei macatre, hetrenyi la ketre aqane hamëne Iehova koi së la göxeni ngöne la ua hna jëne la itre kovasio ne distrik. Hane kö nyipunieti hnëkë matre troa hane sine la nöjei drai ne la Kovasio ne Distrik ka troa xulu, hna hape, “Hna Eatrongëne Hnene La Uati Hmitrötre i Akötresie”? Hna hnëkëne hë la ketre göxeni ngöne la ua ka hnyapa me nyine loi koi së.
2. Nemene la nyine tro sa kuca ngöne la easa hnëkë troa sine la Kovasio Ne Distrik?
2 Loi e Tro Sa Canga Hnëkë: “Ame la ite mekune ne la ate cate huliwa, te, kola atena mon.” (Ite edomë 21:5) Qa ngöne lai, ame ngöne la easa hnëkë troa hane sine la köni drai ne kovasio, nyipi ewekë tro sa canga sipo ijine mano kowe la maseta së. Hnei epuni kö hna hane canga hnëkë matre troa sipo hnalapa? Loi e tro fe nyipunieti a hane hnëkë kemej, matre troa ce xeni memine la itre trejine ngöne la hnë kovasio. Nge hnëkë jë fe troa canga traqa ngöne la köni drai ne asabele, matre troa thele göhnë me ce thing la nyima me ce thithi memine la itre atrene la icasikeu.
3. Nemene la pengöne iheetr hne së hna mekune troa xetrën?
3 Loi e xeci hnyawa koi së ka hape, ame la aqane heetre së, tre, ka qahmihmi me ka lolo. (1 Tim. 2:9, 10) Ame la itre Kovasio ne Distrik, tre, celë hi itre ijine tro së lai a cainöje kowe la itre atr. Ngöne la hne së hna wange hnyawa la aqane heetre së me afenane lo badge göi Kovasio ngöne la traon hna kovasio ngön, easa amamane la isa pengö së memine la itre ka thaa lapaune kö, nge ketre, troa hetre thangane mina fe kowe la itre ka goeë së. Maine tro sa thupëne la aqane heetre së ngöne la traon hna troa kovasio ngön, me acatrene pala hi la itre badge së ngöne la iheetre së, haawe, tro ha mama la eisapengö së memine la itre ka thaa lapaune kö, nge tro ha hetre thangane ka loi fe kowe la itre atr ka goeë së.
4. Nemene la ka troa xatua së memine la hnepe lapa së troa kepe thangane hnyawa qa ngöne la porogarame ne Kovasio?
4 Loi e Tro Sa Drenge Hnyawa: Eje hi laka, thaa ajane kö së troa triane la ketre hnepe ini hna hamëne ngöne la ijine pui ne xeni cili, ngöne la götrane la ua! (Ite edomë 22:17, 18) Loi e tro sa e la itre xötre ngöne la isa Tusi Hmitrötre së, me fejane la itre hnepe mekune hna hamëne jëne la itre cainöj, matre thaa tro kö a ajeane la itre mekuna së. Nge e heji hë, ijije hi tro sa ce thawa la itre mekune ka sisitria hne së hna kapa ngöne la ijine kovasio. Ngöne la itre macatre ka ase hë, hna öhne ngöne la ijine kovasio la itre xaa thöthi e ce lapa me porotrik, maine icinyanyikeu jëne mobilis. Maine hetre nekö së, itre ka co me itre thöth, loi e tro nyudren a ce lapa me easë itre keme me thin, me hane drenge hnyawa ngöne la ijine asabele, ngo thaa tro kö a nue nyudrene caas memine la itre xaa thöth.
5. Nemene la aqane tro sa akökötrene la madrine së qa ngöne la hna sine la Kovasio?
5 Loi e Tro Sa Ce Madrine Memine La Itre Trejin: Tru catre kö la madrine së ngöne la easa ce thawa la itre kemeji së memine la itre sinee së. (Ite edomë 15:17) Ketre, ame la troa ce memine la itre trejine me easë, tre, celë hi ka akökötrene la madrine së ngöne la hna kovasio. Qa ngöne lai, ame ngöne la ijine kola ase la ketre hnepe götrane la porogaram, drei kö la madrine së troa hane ibozu memine la itretre ce sine me easë la asabele! (Sal. 133:1) Ame ngöne la kola sipo së hnene la perezida troa isa lapa göhnen nge kola elone la miuzik nyine nyiqaan, loi e tro sa thupa la itre porotrike së me canga lapa, qëmekene troa nyiqaane la porogaram.
6. Qaja jë la hne së isa ala caas hna melën, ka amamane la aqane cainöje së kowe la itre atr ngöne la traon hna hnen la kovasio.
6 Loi e Tro Sa Thupën La Itre Ijine Troa Cainöj: Ame la itre Kovasio, tre, celë hi itre ijine lai ka troa aijijë së troa cainöje kowe la itre atr. Ame la kola bëeke hmaca hnene la itre ka sine la Kovasio kowe la itre hnalapa i angatr, kola hnyingë angatr hnene la itre atr ka lapa ezi angatr maine itre xane ju kö, la taan la kovasio hna cinyihane ngöne la badge i angatr. Celë hi ka aijijë angatre lai troa hane ce thawa memine la itre xan la nyipici. Nge thupene lai, kola hane könë angatre fe troa hane sine la kovasio.
7. Pine nemen matre nyipi ewekë tro sa sine la kovasio ne Distrik ka troa xulu?
7 Nyimutre la itre hawa itre thauzane la etrun, hna xome göne matre troa hnëkëne la porogaram, memine la hnë Kovasio, me itre hnëqa hna troa kuca hnene la itre trejin, me itre cainöj hna troa cile fë. Ame asë hi la itre huliwa cili hna kuca cememine la ihnim, nge hna hnëkëne thatraqane la pui ne xeni ne la ua, tre, itre eje a amamane la ihnimi Iehova kowe la itre atr. Epi tro asë hi së a traqa troa hane sin la Kovasio, me kapa hnyawa la itre ini hna hamëne ngön! Maine tro sa kuca tune lai, thaa tro hë së a ceitu memine la itre atr ne fen, ngo tro pe sa “hë draië kola aciaci la hni.”—Is. 65:14.
[Hna eköhagen götran 4]
Nyine Amekunë Së Göi Kovasio Ne Distrik
◼ Traeme Ne Icasikeu: Troa nyiqaane la porogaram e 9 h 20, ngöne la köni drai asë. Troa fe la itre qëhnelö e 8 h e hmakany. Ame la kola nyiqaane elone la miuzik ne la Baselaia, tre, loi e tro asë hi së a ilapany, celë hi aqane tro së lai a amamane la metrötre së ngöne la kola nyiqaane la icasikeu. Nge, troa nyipune la icasikeu e 16 h 55 e Drai Ka Tru me Mecixen, nge 16 h e Sabath.
◼ Hna Acili Loto: Ame ngöne la nöjei hnë kovasio hna thupëne hnyawa pala hi la itre loto ngöne la itre hnë acile itre ej, nge hetrenyi la itre göhnë thatraqane la itre ka pane traqa. Pëkö pepa ka ketre pengöne hna troa hnyingë së qëmekene la troa lö, ijije hi lo itre badge hne së hna afenan. Troa acile ngöne la itre göhnë hna hnëkëne hë thatraqane la itre sine atr, ene hmekuje hi lo itre trene pepa ka ithuemacanyi laka itre sinatr angatr, nge itre hna aijijëne troa cile e cili.
◼ Göi Göhnë Hnine Iuma Ne Drai: Tro hmekuje hi a ami göhnene la itre ka ce tro me easë hnine la loto ka caas, maine ka ce mele pena me easë.
◼ Xeni Hnaipajö: Ka lolo catr troa xeni la itre kemeji së ngöne la hnë kovasio, hune la troa trije la hnë drai troa xomi xen ngöne la ijine mano e hnaipajö. Ijije troa amë la ketre neköi ka lepanyi fene la icea së. Thaa hna nue kö troa traqa fë ngöne la hnë asabele la itre glasiere ka tru, me itre ver, me kahaitr.
◼ Itre Ahnahna: Ijije hi tro sa amamane la madrine së, ngöne la troa hane hamë ahnahna thatraqane la huliwa e cailo fen, e hnine la Uma ne Baselaia maine ngöne la hna kovasio. Maine kola hamë chèque loi e troa sija la hna hape “AEB Normandie.”
◼ Itre Eatr Me Itre Sine Mec: Maine kola traqa la ketre ewekë ngöne la ijine kovasio, canga wange ju lai ketre trene hnëqa easenyi së matre tro angeic a hëne nyimenyimën lo Pane Ixatua troa wai së. Ame göi itre eatre ka tru ijije tro nyipunie a hëne la numero 15.
◼ Itre Nyine Uku Medreng: Hna wathebone troa traqa fë la itre nyine uku medrenge ngöne la itre hna kovasio. Ngo thaa hna wathebone kö lo neköi cea i nekönatr matre tro la itre keme me thine a ati nyëne ezi angatr.
◼ Itre Nyine Troa Wange Hmaca: Loi e troa sija la sine pepa hna hape, Veuillez suivre l’intérêt (S-43) nyine hamë ithuemacanyi göne la itre atr ka hetre hni ne ajan thupene la hna sine la Kovasio ne District. Loi e tro la itre ka cainöj a mekune troa xome la caas maine lue sine pepa cili, göne matre troa iwai hmaca. Thupene la hna sija apexejene lai sine pepa ijije hi tro nyipunie a hamëne lai, ngöne la hna xomi tus maine pena kowe la seketere ne la ekalesia ngöne la kola bëeke koi hnalapa.—Wange ju la Huliwa Ne Baselaia ne Febuare 2005, götrane 6.
◼ Itre Hna Hnëkë Göi Uma Me Loto: Kola qaja hnei Ite edomë 3:27, ka hape: “The cipane kö la loi e ate kë ewekën, e atein’ eö troa kuca.” Nemene la ewekë ka loi me ka ijije tro epuni a kuca ngöne la kovasio? Tru elanyi la itre trejine ka isa traqa qa ngöne la itre hnalapa i angatr matre troa sine la Kovasio. Loi e troa canga wange göi uma me loto. Maine jë hetre ka aja ixatua göi loto maine göi uma hnene la itre trejine ka qatre hë, me itre sine wezipo, me itre ka pionie hut, me itre xane ju kö. Ame la pane hnëqa ne la itre sinee, tre, ene la troa thupëne la itre atr ka tune lai. (1 Tim. 5:4) Ngo maine thaa ijiji angatre kö troa kuca lai, tro pena la itre trejine keresiano a hamë ixatua. (Gal. 6:10) Loi e tro la itre trejine ka xomiujine la itre ini tus a ce wang memine la gurupe i angatr la itre ka aja ixatua matre troa xecie hnyawa laka, ase hë angatre hnëkë hnyawa thatraqane la kovasio.
◼ Hna hnëkëne la itre pepa ne sipo hnalapa thatraqane la itre trejine ka sine la kovasio. Loi e troa angatr a nyialiene la itre pepa i angatr, me canga hamëne itre ej. Tro la Kometr Ne La Huliwa Ne Cainöj Ne La Ekalesia a goeëne la itre trejin ka ijij. Ketre hna amekötine lai thatraqane la itre trejin ka pë ethan, memine fe la itre nekö i angatr ka loi la thiina.