The Hmitre Kö Troa Xomi Bapataiso

1. Qaja jë la itre kepin matre loi e tro eö a xomi bapataiso.

KA HNIMI Iehova kö eö, lo Atre hamëne la nöjei ahnahna, tune la mel? Aja i eö kö troa amamane la ihnimi eö koi Nyidrë? Ame la ketre aqane kuca, ke troa nue mele koi Nyidrë me xomi bapataiso. Tro hë eö lai a sine la fami Nyidrë. Nge pine laka Kem me Sinee i eö hë Nyidrë, tro hë Nyidrëti lai a eatrongë eö me thupë eö. (Sal. 73:24; Isa. 43:1, 2) Ketre, tro Nyidrëti a hamë eö la mele ka pë pun.—1 Pet. 3:21.

2. Nemene la hne së hna troa ce wang ngöne la tane mekune celë?

² Hetre ka sewe eö kö troa xomi bapataiso? Nga tha eö casi kö. Itre milio lao atr ka saze aqane ujë, me aqane mekun qëmekene troa xomi bapataiso. Ame hë enehila, angatr a catre nyihlue i Iehova ngöne la madrin. Nemene la ini hne së hna xom qaathene la itre ka bapataiso ngöne la ijine la itre pane keresiano? Tro sa ce wang la itre jol hnei angatr hna elë hun me xomi ini qa ngön.

ANGETRE SAMARIA A XOMI BAPATAISO

3. Qëmekene troa xomi bapataiso, nemene la nyine tro la angetre Samaria a kuca?

³ Ame ngöne la hneijine i Iesu, ame la angetre Samaria, ke kola qaja la itre atr ka sine la ketre hmi e Sekema me e Samaria ngöne la götrane kolopi ne Iudra. Qëmekene tro la angetre Samaria a xomi bapataiso, hnei angatr hna pane inine apexejene la Trengewekë i Akötresie. Pine nemen? Ke ame ekö, angatre hi a mejiune kowe lo 5 pane itus ne la Tusi Hmitrötr, ene Genese utihë Dreuteronomi, nge ma tusi Iosua mina fe. Ketre, loi e tro angatr a kepe Iesu ka hape, Mesia. Nyipici laka, angetre Samaria a lapa treqene la Mesia thenge la hna qaja ngöne Dreuteronomi 18:18, 19. Ngo ame enehila, nyipiewekë tro angatr a mejiune laka, Iesu hi la Mesia. (Ioa. 4:25) Eje hi, “ala nyimu la angetre Samaria” ka lapaune koi Iesu. (Ioa. 4:39) Ketre, loi e tro fe angatr a isine troa nuetrij la imethinë i angatr kowe la angetre Iudra.—Luka 9:52-54.

4. Thenge la Itre Huliwa 8:5, 6, 14, tune kaa la aqane ujë la angetre Samaria kowe la cainöje i Filipo?

⁴ Nemene la ixatua hna kapa hnene la angetre Samaria? Ame lo Filipo a “cainöjë Keriso” kowe la angetre Samaria, ke alanyimu thei angatr ka “kapa la trengewekë i Akötresie.” (E jë la Itre Huliwa 8:5, 6, 14.) Ngacama atre Iudra Filipo, ngo hnei angatr hna drei angeic. Maine jë, hnei angatr hna mekun la ketre xötr ka qaja ka hape, tha ka ië hna hnime kö Akötresie. (Dreut. 10:17-19) Hnei angatr hna “drenge hnyawa la itre hna qaja hnei Filipo” göi Keriso, me kapa la itre hatrene ka amamane laka, ce Akötresie me angeic. Tru catr la itre iamamanyikeu hnei angeic hna kuca, tune la troa aloine la itre ka wezipo me helëne la itre dremoni.—It. Hu. 8:7.

5. Nemene la itre ini hne së hna xom qaathene la angetre Samaria?

⁵ Maine ju, tro la angetre Samaria a xele ma kapa la itre ini qaathei Filipo, ke atre Iudra angeic, nge ka hnyipixe la itre ini hnei angeic hna traqa fë. Ngo tha celë kö la hnei angatr hna kuca. Ame hë la angetre Samaria a öhne laka, ka nyipici la hnei Filipo hna cainöjën, ke tha hmitre kö angatr xomi bapataiso. Öni Tusi Hmitrötr, “Ame ju hi la angatr a mejiune koi Filipo atre cainöjëne la maca ka loi ne la Baselaia i Akötresie me ëje i Iesu Keriso, hnene la itre trahmanyi me föe hna xomi bapataiso.” (It. Hu. 8:12) Hapeu, ka xecie kö koi eö laka, ka nyipici la Tusi Hmitrötr? Nge Itre Temoë Iehova a ihnimikeu, thenge lo hna qaja hnei Iesu kowe la itretre dreng? (Ioa. 13:35) Nga canga xomi bapataiso jë, nge tro kö Iehova a amanathithi eö.

6. Nemene la ini hnei eö hna xome qaathei Ruben?

⁶ Hna hetru Ruben ngöne la ketre fami ka Temoë e Allemagne. Ame lo angeic a jeune, angeic a luelue ka hape, hetre Akötresie. Nemene la ka xatua angeic? Öhne hi angeic laka, thatre hnyawa kö angeic la mekune cili, matre hnei angeic hna ithel. Öni angeic: “Ame la eni a ini Tusi cas, hnenge hna thel troa atre la nyipici qa ngöne la itre mekun ka tria. Anyimua ithele ni göne lo ini Évolution.” Hnei Ruben hna e la itus Y a-t-il un Créateur qui se soucie de vous ? Tru la itre mekun e kuhu hnin ka xatua angeic. Matre öni angeic: ‘Nyipici! Ka mele Iehova.’ Hna acatrene la lapaune i angeic la angeic a vizitëne la hnalapa ne xomi meköt. Hnei angeic hna öhn e cili la aqane cas la itre trejin e cailo fen. Ketre iamamanyikeu lai! Ame hë la angeic a bëeke hmaca e Allemagne, hnei angeic hna xomi bapataiso nge 17 lao macatre i angeic. Maine eö a luelu göne la ketre hnying, ke ithele jë ngöne la itre itusi së. Tro la “atrehmekune” a xatua eö troa thipetrij la luelu ka eje thei eö. (Efe. 4:13, 14) Maine hnei eö hna öhne la ihnim me cas thene la itre Temoë Iehova ngöne la itre xaa götran, nge ka eje fe ngöne la ekalesia i eö, tro ha kökötre la ihnimi eö kowe la itre trejin e cailo fen.

SAULO ATRE TARASO A XOMI BAPATAISO

7. Nemene la nyine tro Saulo a saze ngöne la aqane mekune i angeic?

⁷ Tro pena sa ce wange la pengöi Saulo atre Taraso. Ka mama catre angeic ngöne la hmi angetre Iudra, nge atre catre angeic la wathebo. (Gal. 1:13, 14; Fil. 3:5) Ame ngöne la hneijine i angeic, kola mekun hnene la angetre Iudra ka hape, itre ka iamenumenu la itre keresiano. Matre Saulo a axösisi angatr, ke ame koi angeic, aja i Akötresieti lai. (It. Hu. 8:3; 9:1, 2; 26:9-11) Qëmekene tro angeic a hane atre drei Iesu me xomi bapataiso, loi e tro angeic a trotrohnine laka, tro fe a hane axösisi angeic.

8. (a) Nemene la ixatua hnei Saulo hna kapa? (b) Thenge la Itre Huliwa 22:12-16, tune kaa la aqane xatua Saulo hnei Anania? (Wange ju fe la foto.)

⁸ Nemene la ixatua hnei Saulo hna kapa? Ame lo Iesu a ithanata koi Saulo qa hnengödrai, hna hudrume la lai i nyidrë me atimekë angeic. (It. Hu. 9:3-9) Ame ngöne la köni drai, hnei Saulo hna tha xen, me mekun lo ewekë ka traqa koi angeic. Celë hi ka amamane koi angeic laka, Iesu hi la Mesia, nge nyipi hmi thene la itretre drei nyidrë. Hnei angeice jë hna hace fë la itre ewekë hnei angeic hna kuca lo kola mec hnei Setefano! (It. Hu. 22:20) Thupene la köni drai cili, hnei Anania ketre atre drei Iesu, hna wai angeic me fe la luemeke i angeic, me ithuecatre koi angeic troa canga xomi bapataiso. (E jë la Itre Huliwa 22:12-16.) Hnei Saulo hna ipië me kapa la ixatua i Anania, me xome la hmi keresiano.—It. Hu. 9:17, 18.

9. Nemene la itre ini nyine tro sa xome qa ngöne la tulu i Saulo?

⁹ Hetre ini nyine tro sa xome qa ngöne la tulu i Saulo. Tha hnei angeice kö hna nue la pi tru maine xoue atr troa sewe angeic troa xomi bapataiso. Pine laka, ka ipië Saulo, hnei angeic hna kapa la nyipici göi Iesu me saze aqane ujë me mekun. (It. Hu. 26:14, 19) Ngacama atre hi angeic laka, troa hane axösisi angeic, hnei angeic hna iëne troa atre drei Keriso. (It. Hu. 9:15, 16; 20:22, 23) Nge thupen la angeic a bapataiso, hnei angeic pala hi hna mejiun kowe la trengecatre i Iehova, matre cile kowe la itre itupath. (2 Kor. 4:7-10) Maine tro eö a xomi bapataiso thene la itre Temoë Iehova, tro fe a hane tupath la lapaune i eö, ngo hetre ixatua hnei eö hna troa kapa. The luelue kö laka, tro pala hi Iehova me Keriso a ce me eö.—Fil. 4:13.

10. Nemene la ini hne së hna xome qaathei Anna?

¹⁰ Hna hetru Anna ngöne la ketre fami kurde, ngöne la götrane koië ne Europe. Ame thene la angetre kurde, ke ka ce mel ngöne la ca uma la itre atrene la fami. Thupene la kola bapataiso hnene la thine i Anna, hnei angeic hna sipo kem troa ini Tusi Hmitrötr, nge 9 lao macatre i angeic. Hna kapa la sipo i angeic hnei kem. Ngo hnene la itre xa atrene la fami hna icilekeu me Anna. Ame koi angatr, angeic a ahmahmane la fami la angeic a trotrij la hmi qaqaa. Ame hë lo angeic a 12 lao macatre, hnei angeic hna sipone la keme i angeic troa xomi bapataiso. Ngo nyidrëti a pane pi atre ka hape, sipu mekuna i angeice kö maine angeic a inyitipu. Matre öni Anna jë hi, “Eni a hnimi Iehova.” E cili, hnei kem hna nue angeic troa xomi bapataiso. Ngo thupene lai, hna lapa hnyimasai angeic me qanangazo angeic. Önine la ketre atrene la fami angeic ka hape, “Ka loi ju kö la tro eö a hetre sine ce elo me ufi sixa hune la troa Temoë Iehova.” Nemene la ka xatua Anna troa elëhun la itre itupath? Öni angeic, “Hnei Iehova hna thue trengecatreng, nge hnei kaka me nenë hna xatua ni.” Hnei Anna hna amë ngöne la ketre list la itre ijine Iehova a xatua angeic me thupë angeic. Ame itre xaa ijin, angeic a goeëne lai list, matre tha tro kö angeic a thëthëhmine la hnei Iehova hna kuca koi angeic. Maine eö a xouene troa traqa la ketre icilekeu, the thëthëhmine kö laka, tro kö Iehova a xatua eö.—Heb. 13:6.

KONELIO A XOMI BAPATAISO

11. Nemene la ka troa sewe Konelio troa xomi bapataiso?

¹¹ Tusi Hmitrötre fe a qaja la tulu i Konelio. Angeic la “atre musinën la 100 lao sooc” i angetre Roma. (It. Hu. 10:1, ithuemacany.) Ketre atr ka mama angeic thene la angetre Roma me ngöne la trongene isi. Nge “ka majemine angeice hamëne la nöjei pengöne ahnahna ne utipin.” (It. Hu. 10:2) Hnei Iehova hna upi Peteru aposetolo troa thawa la maca ka loi koi angeic. Hapeu, hnene kö la göhnë i Konelio hna sewe angeic troa xomi bapataiso?

12. Nemene la ixatua hnei Konelio hna kapa?

¹² Nemene la ixatua hnei Konelio hna kapa? Öni Tusi Hmitrötr, “atre xoue Akötresie angeic me [fami] i angeic asë.” Nge ketre atre ka thithi lapa angeic. (It. Hu. 10:2) Ame lo Peteru a cainöjëne la maca ka loi koi angeic, hnei angeic me itre atrene la fami angeic hna kepe Keriso, me canga xomi bapataiso. (It. Hu. 10:47, 48) Tha cile kö Konelio me fami angeic troa saze la aqane mele i angatr matre nyihlue i Iehova.—Ios. 24:15; It. Hu. 10:24, 33.

13. Nemene la itre ini hne së hna xome qaathei Konelio?

¹³ Ceitu hi Konelio me Saulo. Tha hnei Konelio kö hna nue la göhnë i angeic troa sewe angeic troa xome la hmi keresiano. Ame eö ke, hetre ewekë kö nyine tro eö a saze ngöne la mele i eö qëmekene troa xomi bapataiso? E hetreny, tro kö Iehova a xatua eö. Tro kö Nyidrëti a amanathithin la itre trengecatre hnei eö hna nu matre nyihlue i Nyidrë me mele thenge la itre trepene meköti Nyidrë.

14. Nemene la ini hne së hna xome qaathei Tsuyoshi?

¹⁴ Hnei Tsuyoshi ka mel e Zapo, hna nue la itre xaa hnëqa ngöne la huliwa i angeic, matre hane xomi bapataiso. Angeic la ka xatuane la he ne ka tru ngöne la école d’art floral e Ikenobo. Maine tha ijije kö kowe la he ne ka tru troa sine la kele wezipo, ke tro lai a upi angeic. Ngazo pe, ame la itre xaa wezipo, ke hna hmine hnei bouddhistes. Ame hë la angeic a atre la nyipici göne la itre ka mec, trotrohnine hë angeic laka, tha ijiji angeice kö troa bapataiso, e tro pala hi angeic a sine la itre hna majemine cili. Matre hnei angeic hna axeciëne laka, tha tro hmaca kö angeic a hane sin la itre kele wezipo cili. (2 Kor. 6:15, 16) Nge hnei angeic hna qaja la mekuna i angeic kowe la he ne ka tru. Nemene hë la thangan? Tha sine hmaca kö Tsuyoshi la itre kele wezipo i bouddhistes, nge tha hna upi angeic kö hnene la maseta. Ca macatre thupene la angeic a nyiqane ini Tusi Hmitrötra, hnei angeic hna xomi bapataiso. Maine tro eö a saze huliwa matre amadrinë Iehova, tro kö Iehova a thupë eö me fami eö.—Sal. 127:2; Mat. 6:33.

ANGETRE KORINITO A XOMI BAPATAISO

15. Nemene la itre jol hna cile kow hnene la angetre Korinito qëmeken troa bapataiso?

¹⁵ Ame la angetre Korinito ekö, ke ka hnimi mani me kuca la itre huliwa ka sis. Alanyim la itre ka kuca la itre ewekë hna sisine hnei Iehova. Maine ju, tro la aqane mele i angatr a sewe angatr troa kapa la maca ka loi. Ngo ame la Paulo aposetolo a cainöjë Keriso koi angatr, ke “ala nyimu fe la angetre Korinito ka hane lapaun thupene la hna drenge la maca ka loi.” (It. Hu. 18:7-11) Thupene lai, hnei Iesu Keriso hna mama koi Paulo me qaja ka hape: “Ala nyimu catre la itre atreng ngöne la traone celë.” Matre hnei Paulo hna catre cainöj e Korinito koi ca macatre me sin.

16. Nemene la ka xatuane la angetre Korinito troa nuetrij la itre hna majemine ka sewe angatr troa bapataiso? (2 Korinito 10:4, 5)

¹⁶ Nemene la ixatua hna kapa hnene la angetre Korinito? (E jë la 2 Korinito 10:4, 5.) Jëne la emenene la Tusi Hmitrötr me uati hmitrötr, hnei angatr hna saze aqane mel. (Heb. 4:12) Ame la angatr a kapa la maca ka loi göi Keriso, ke hnei angatr hna nuetrij la itre hna majemin ka ngazo, tune la iji gorok, atrekënö me ce meköle i lue trahmany me lue föe.—1 Kor. 6:9-11.b

17. Nemene la itre ini hne së hna xome qaathene la angetre Korinito?

¹⁷ Tha hnene kö la angetre Korinito hna mekune ka hape, tha ijiji angatre kö troa nuetrij la itre hna majemin ka ngazo me hane atre drei Iesu. Hnei angatr hna isine troa xötrëne la gojeny ka ilitr, ka tro xomi së kowe la mel ka pë pun. (Mat. 7:13, 14) Hapeu, eö kö a isi memine la ketre hna majemine ka ngazo? Nga the dekurage kö! Sipo Iehova jë pe la uati hmitrötre i nyidrë, matre xatua eö troa nuetrij la itre aja ka ngazo.

18. Nemene la ini hnei eö hna xome qaathei Monika?

¹⁸ Tro sa ce wange la hna melëne hnei Monika ka mele e Géorgie. Ka qeje ka sis catre angeic ekö, me goeëne la itre ewekë ka sis. Ngo hnei angeic hna isine troa saze, matre xomi bapataiso. Öni angeic: “Ame la ka ithuecatre koi ni lo eni a jeune, ke ene la thith. Atre hi Iehova laka, ajang troa kuca la loi matre hnei Nyidrëti hna xatua ni me eatrongë ni.” Matre hnei Monika hna xomi bapataiso lo angeic a 16 lao macatre. Hapeu, hetre hna majemine ka ngazo kö nyine tro eö a nuetrij matre amadrinë Iehova? Maine eje hi, catre jë sipo trengecatre koi Nyidrë matre troa saze. Nyidrëti a hamën atrune la uati hmitrötr.—Ioa. 3:34.

TRO LA LAPAUNE I EÖ A FEJE LA ITRE WETR

19. Nemene la nyine tro eö a kuca, matre elë hune la itre jole ka ceitu me itre wetr? (Wange ju fe la foto.)

¹⁹ The luelue kö laka, tru la ihnimi Iehova koi eö, nge aja i Nyidrë tro eö a hane sine la fami Nyidrë. Ngacama tru la itre jole hnei eö hna troa ixelë memin, ngo tro kö Iehova a xatua eö troa xomi bapataiso. Öni Iesu kowe la itre xaa atre dreng ka hape: “Maine tro la lapaune i nyipunie a tune la itine sinapi, tro nyipunie a qaja kowe la wetre celë ka hape, ‘Kötre jë qa lai kowe la,’ nge tro eje lai a kötre pi. Nge eje hi, pëkö ca ewekë hna troa thatreine kuca hnei nyipunie.” (Mat. 17:20) Ame la itre atr hnei Iesu hna ithanata kow, ke itre ka xötrei ce tro me nyidrë. Matre nyipiewekë tro angatr a acatrene la lapaune i angatr. Ngo hnei Iesu hna ithuecatr koi angatr ka hape, e tro angatr a acatrene la lapaune i angatr, tro kö Akötresie a xatua angatr troa elë hune la itre jol, ka ceitu me itre wetr. Tro fe Iehova lai a xatua eö!

20. Nemene la ini hnei eö hna xom qaathene lo itre keresiano ekö me enehila hne së hna ce wang ngöne la tane mekune celë?

²⁰ Maine eö a öhne laka, hetre ewekë ka sewe eö troa xomi bapataiso, ke the sili lue ime kö! Troa akeukawanyi eö me thue trengecatre i eö hnene la tulu ne la itre keresiano ekö me enehila. Epi tro la tulu i angatr a uku eö troa nue mele koi Iehova me xomi bapataiso. Pëkö xaa mel ka lolo hune lai!