Meken 63

Iesu a Hajine Hmaca La Itretre Drei Nyidrë

IESU pala hi me itre aposetolo i nyidrë e hnine la uma e Kaperenauma. Ngo ame la ewekë hnei angatre hna hnehengazone enehila, ke, thaa ene hmaca kö lo ajane troa pi nyi ka draië hune la itre xaa aposetolo, ngo hnene pena ha la ketre ewekë ka traqa ngöne la kola bëeke qaa Kaperenauma, ngöne la ketre ijine paatre kö Iesu. Kola qaja hnei Ioane aposetolo ka hape: “Öhnë hë huni la kete kola helëne la ite demoni ngöne la atesiwa i cilie, nge hne huni hna shewe nyën, ke, tha ate xöte thenge nyishëti.”

Eje hi laka, ma kolo jë a mekune hnei Ioane laka, itre aposetolo hmekuje hi la ka ijije troa kuca la itre iamamanyikeu. Ame koi angeic, thaa hna nue fe kö kowe lai atr troa hane kuca la itre iamamanyikeu, pine laka, thaa ka sine fe kö angeice la trongei angatr.

Ngo öni Iesu ka hape: “The shewe angeice kö, ke pëkö ate kuca la kete huliwa ka mene ngöne la ëjeng’ a troa canga qaja angazo ni. Ke ame la ate tha ithupëjia me eëshë te, ce enexöle me eëshë. Ke ame la ate troa thue ime i nyipunie la tepe timi ngöne la ëjene, laka ite sine i keriso, nyipici ini a qaja koi nyipunie, tha tro kö a pate la thupe i angeic.”

Eje hi, thaa hnene kö laka, ka thaa hane kö angeice ce tro me Iesu, ke tro ha qaja ka hape thaa ce angeice kö me nyidrë. Thaa hna acile pala kö la ekalesia i keresiano, nge thaa hnene kö laka, thaa hane fe kö angeice sine la gurup, ke, tro ha qaja ka hape, atrene angeice la ketre ekalesia. Atraqatre la lapaune i angeice kowe la ëje i Iesu, celë hi matre angeice a atreine helëne la itre dremoni. Ceitune hi la aqane ujë i angeic, memine lo itre xane hna qaja hnei Iesu, ene lo itre ka ijije troa kapa la manathith. Haawe, Iesu a amamane ka hape, pine la huliwa i angeic, tro ha hetre thangane ka loi koi angeic.

Ngo tune kaa hë enehila e nyi zö angeice jë hnene la itre trenge ewekë, me itre huliwa ne la itre aposetolo? Ketre ewekë ka ngazo catre lai! Öni Iesu ka hape: “Ngo ame la ate nyi zöne la kete ne la ite ka co celë ka lapaune koi ni, te, loi koi angeice troa fena ngöne nyinawa i angeice la etë nyine amudromudron, me kuië angeic’ e kuhu hnagejë.”

Thupene lai, Iesu a qaja kowe la itretre drei nyidrë ka hape, loi e tro angatre a xome trije qa ngöne la mele i angatre la ewekë ka nyi zö angatr, maine ka sisitria ju hë hune la wanakoim, me waca, maine alameke pena. Nyipi ewekë kö e troa thipe trije la ketre ewekë hne së hna hnim, me lö hnine la Baselaia i Akötresie, hune la troa lapa xome la ewekë cili, me kuiëne ngöne la gehena (hna trije la nöjei ewekë nyine troa dreuthe trij, ezine e Ierusalema, nge e cili la eë ka thaa pi kö), kola aceitunëne lai memine la meci ka epine palua.

Iesu a xatua angatre fe ka hape: “Wange kö the methinëne kö la kete ka co celë; ke ini a qaja koi nyipunie, laka, ame la angela i angat’ e hnengödrai a goeëne pala hi la qëmeke i Kakati e hnengödrai.” Thupene lai, nyidrëti a amamane la enyipi ewekëne la itre “ka co” ngöne la nyidrëti a qaja la ketre trahmanyi ka axö mamoe, ngo hna paatre la caa mamoe i nyidrë. Öni Iesu, tro la trahmanyi a nue pe la 99 lao mamoe i nyidrë, me tro troa thele la ka paatr, nge e öhne hë nyidrë, troa atraqatre kö la madrine i nyidrë kowe ej, hune lo lai itre ka 99 pe, matre öni Iesu jë hi ka hape: “Kete tune tha ajane kö la Tetetro i nyipunie e hnengödrai, laka, troa pate la kete ka co celë.”

Maine jë Iesu a mekune la ikucanyi ne la itre aposetolo i nyidrë, celë hi matre nyidrëti a hamëne la ixatua celë me hape: “Loi e hetenyi nyipunie la alase e kuhu ite hni nyipunie, me lapa iloi ju.” Kola puiloi la xeni hnene laka hna sootrëne ej. Haawe, ame ngöne la ua, nyipi ewekë la sootr, pine laka, eje a apuiloine la itre trenge ewekë ne la atr, matre thaa jole kö e troa kapa hnei ketre atr. Maine hetrenyi së la sootre cili, haawe, atreine hi tro së a hetrenyi pala hi la tingeting.

Ngo hnene laka, ka ngazo la atr, atreine hi troa fetra la itre iwesitrë. E celë fe, Iesu a hamëne la itre ixatua ngöne la aqane troa cile kowe la itre jole cili. Iesu a qaja ka hape: “Maine tejine me eö a ngazo koi ’ö, troja ithahnatane acone me angeice nyipoti hmekuje hi; maine angeic’ a dei ’ö, ame hna lue tejine hmaca nyipo.” Ngo maine thaa drenge kö angeic, öni Iesu ka hape, “nyi xöle eö ju fe la ka ala casi maine ala lue, mate acatene la nöjei ewekë asë hna ce qaja hnei ala lue maine ala kön.”

Öni Iesu ka hape, ame la ewekë tixenuë nyine troa kuca, ke, ene la troa qaja kowe “la ekalesia,” kola hape, troa qaja kowe la itre qatre thupe ne la ekalesia, matre tro angatr, itre atrekë hnëqane lai, a amekötin. Öni Iesu ka hape, Maine thaa drei angatre kö hnene la atr ka kuca la ngazo, “ame hna tui angeice koi ’ö la etheni me telona.”

Ame ngöne la kola amekötine hnene la itre qatre thupe la atr ka ngazo, loi e tro pala hi angatre a nyi trepene hnyawa la itre mekune i angatre hnene la itre ini qa hnine la Wesi Ula i Iehova. Qa ngöne lai, ame la angatre a troa atrehmekune laka ka kuci ngazo lai atr, me hamëne la pune koi angeic, kösë lo ‘ase hë acaten’ e koho hnengödrai’ la ewekë cili. Nge maine tro angatre a “sheng’ e celë fen,” kola hape, ame ngöne la angatre a öhne laka, thaa kuci ngazo kö la atr, haawe, kösë ase hë “sheng’ e hnengödrai.” Kola qaja hnei Iesu ka hape, ame ngöne la itre iameköti celë, “ke ame la hnei ala lue me ala köni hna icasikeu ene ngöne la ëjeng, te, ini hi lai e nyipi angat.” Mataio 18:6-20; Mareko 9:38-50; Luka 9:49, 50.

▪ Pine nemene matre, ame ngöne la ijine i Iesu, thaa nyipi ewekë kö e troa ce tro me nyidrë?

▪ Hapeu, ngazo ka tru la troa nyi zöne la ka co, nge tune kaa la aqane amamane Iesu la enyipi ewekëne la itre ka co?

▪ Maine jë nemene la kepine matre Iesu a xatuane la itre aposetolo troa hetrenyi la alase thei angatr?

▪ Nemene la aliene la lue hnaewekë celë, ‘acatren’ me ‘sheng’?