Meken 71
Kola Xele Ma Kapa Hnene La Itre Faresaio
KOLA xou hnene la keme me thine ne lo timeke ekö, ngöne la kola hë nyidroti troa drenge la itre Faresaio. Atre hi nyidroti la hna amekötin, laka, ame la atr ka lapaune koi Iesu, haawe, tro hë a helë angeice qa hnine la sunago. Ketre, troa jole catre la mele ne la ketre fami ka puafala, e troa isa mele memine la itre atrene la nöj. Qa ngöne lai, kola hmeke hnei keme me thin.
Kola hnyinge hnei itre Faresaio ka hape: “Nekö i nyipoti la, la hnei nyipoti hna hape, hna hnahone ka timek? Hna tune ka laka, goe hë angeice enehila?”
Kola qaja hnene la keme me thine ka hape: “Ate hi nyiho laka, nekö i nyihoti la, nge hna hnahone ka timek; nyën’ a goe enehila, ngo tha ’te kö nyiho hna tune ka; nge kete tha te kö nyiho la ate fe la lue meke i nyën.” Maine jë hna hane qaja fe koi nyidroti lai hnene la nekö i nyidro, ngo nyidroti a tuluthe la aqane ithahnata i nyidro, me hape: “Inamacanë hë nyën, da hnyingë nyëne pe, qâ i nyëne qeje nyën.”
Haawe, kola hëne hmaca lai atr hnene la itre Faresaio, nge e cili, angatre a tupathe troa axounyi angeic, me amamane koi angeice ka hape, hetrenyi angatre la itre hatrene nyine jele ngazo Iesu. Angatre a qaja ka hape: “Atrunyi Akötesieti jë; ke ate hë huni laka ate ka ngazo nyëne la.”
Thaa lepetrije kö angeice la mekune i angatr, ngo öni angeice pe ka hape: “Maine ate ka ngazo nyidë, te, tha ’te kö ni; ngo casi la ewekë hnenge hna ate, laka, timeke ni ekö, ngo ame hë la te, goe hë ni.”
Nge kola thele hnene la itre Faresaio la itre mekune nyine jele ngazo Iesu, ngöne la aqane anyipicine ne lo timek, angatre a hnyingë angeice ka hape: “Nemene la hnei nyëne hna kuca koi ’ö? Hnei nyëne hna fe tune ka la lue meke i ’ö?”
Angeice a sa koi angatre ka hape: “Ase hë ni lo qaja koi nyipunie, ngo tha denge pe nyipunie; nge ngöne nemene laka, pi denge hmaca nyipunie?” Nge angeice a dredrehnyima me hape: “Pi tro nyipunieti fe a dei nyidë?”
Ame hna elëhni atraqatre la itre Faresaio. Angatre a jele ngazo angeice me hape: “Hmunë pe la ate deng’ ej; ngo itete dei Mose hun. Ate hë huni laka, qa i Akötesie hna ulatine koi Mose; ngo ame eje, te, tha ’te kö huni ate ka ej.”
Ame hna hai la puafala, ketre atr ka ipië, me sa ka hape: “Dei pete hi la ewekë nyine ulaulane laka, tha ’te kö nyipunie la qa i nyidëti ngön, ngo ase hë nyidëti fe la lue mekeng.” Nemene hë la ewekë ka mama qa ngöne lai? Kola mekune hnene la pë ewekë la ketre trepene meköti hna atre hnyawa, ene laka: “Ate hë shë, laka, tha dei ite ka ngazo kö hnei Akötesie; ngo maine hete ka qoue Akötesie, me kuca la aja i nyidë, tro nyidëti a dei angeic. Pa pala kö hna denge ekö, ka hape, hnei kete ate hna fe la lue meke ne la ate hna hnahone ka timek.” Qa ngöne lai: “Maine tha qathei Akötesieti kö nyidë, te tha ’teine kö nyidëti kuca la kete ewekë.”
Thaa ithahnata kö itre Faresaio, pine laka, pëkö nyine tro angatre a qaja. Nge hnene laka, thaa ajane kö angatre troa kapa la nyipici, haawe, angatre a qaqane lo lai timek, me hape: “Hna hnaho hmunë hnine la ngazo, nge tro hmunë a ini hun?” Ame hnei angatre hna helë angeice pi, me upetriji angeice fe qa hnine la sunago.
Atre hë Iesu la ewekë hnei angatre hna kuca, nyidrëti a thele lo atr hnei nyidrëti hna aloine me qaja koi angeice ka hape: “Hape u, lapaune hë eö kowe la Nekö i Akötesie?”
Angeice a hnyinge ka hape: “Joxu, dei nyidëti mate tro ni a lapaune koi nyidë?”
Kola sa hnei Iesu ka hape: “Öhnyi angeice hë hnei eö, nge angeice hi la ate ithahnata me eö.”
Ame hna thili la atr qëmeke i Iesu, me qaja ka hape: “Joxu, ini a lapaun.”
Haawe, Iesu a qaja koi angeice ka hape: “Traqa ha ni e celë fene troa amekötin, mate goe pi la itete tha hane goe; nge tro pena a timeke la itete goe.”
Drenge hë angetre Faresaio lai, ame hnei angatre hna hnyinge ka hape: “Hape u ite timeke fe hë hun?” Maine tro angatre a wangatrehmekune ka hape, itre timeke angatre ngöne la ua, haawe, hetre kepine kö la icilekeu i angatre me Iesu. Celë hi hna qaja koi angatre hnei Iesu, kola hape: “Maine ite timeke nyipunie, maine pëkö ngazo i nyipunieti kö.” Ngo angatre a qaja catrëne ka hape, thaa itre timeke kö angatr, nge thaa nyipi ewekë kö la lai ngöne la ua koi angatr. Celë hi matre Iesu a qaja koi angatre ka hape: “Ngo enehila, nyipunie a qaja ka hape, Itete goe hun. Celë hi mate eje pala kö la ngazo i nyipunie.” Ioane 9:19-41.
▪ Pine nemene matre kola xou hnene la keme me thine ne lo ka timek, ngöne la kola hë nyidroti troa drenge la itre Faresaio, nge nemene la aqane hmeke nyidro ngöne la kola sa la itre hnying?
▪ Nemene la aqane kuca la itre Faresaio matre troa axouene la atr ka goe hë?
▪ Nemene la mekune ka meköti hna hamëne hnene lo timek, matre kola aelëhnine la itre Faresaio?
▪ Pine nemene matre pëkö caa kepine ka aijijëne la itre Faresaio troa icilekeu me Iesu?