Xatuane Jë La Itre Ka Timek Matre Tro Angatr a Hane Atre i Iehova

1. Nemene la aqane amamane Iesu la utipine i nyidrë kowe la lue timek?

¹ Itre hnepe drai pe hi matre meci pi Iesu. Ame la Iesu a tro qa Ieriko, lue ka timek ka sue koi Iesu me hape: “Joxue, epi fetesi ho!” Ngacama, Iesu a hnehengazone la itre jol ka troa traqa koi Nyidrë, ngo ame pe, hnei nyidrëti hna pane cil me hëne lai lue timek koi nyidrë me aloine la meci nyidro matre goe hë nyidro. (Mat. 20:29-34) Nemene la aqane tro sa nyitipu Iesu, ngöne la aqane utipine nyidrë la lue timek?

2. (a) Nemene la aqane tro sa cainöje kowe la itre atr ka timek ngöne la gaa tru atr? (b) Nemene la nyine tro sa mekune hnyawa, ngöne la easa xatuane la atr ka timek?

² Loi e Troa Ixatua: Maine tro sa iöhnyi memine la ketre atr ka timek, maine jë ngöne gaa tru atr, pane ibozu jë me angeic me ee angeic. Pine laka, tha hna hane kö metrötrëne la itre timek, maine jë tro angeic a xoue së ngöne la xötrei. Ngo maine tro sa amamane ka hape, easa metrötrë angeic me xatua angeic, tha tro hë angeice lai a xoue easë. Tha tro kö sa thëthëmine ka hape, isapengöne kö la itre ka timek, nge isa aqane tro kö a xatua angatr. Thupene la hnei epuni hna xatua angeic, maine ijij, qaja jë koi angeic ka hape, epuni a inine la Tusi Hmitrötr memine la itre atr. Sipone jë tro epuni a e la ketre xötr e hnine la Tusi Hmitrötr, tune la Salamo 146:8 maine Isaia 35:5, 6. Maine ka atreine angeic e la itre mataitus thatraqai itre timek, hnyingë angeice jë, ka hape, aja i angeice jë kö troa hane hetrenyi la ketre itus thatraqai itre timek, nge troa qejepengöne la Tusi Hmitrötr. Ijije fe tro epuni a qaja koi angeic ka hape, hetrenyi ngöne la sit jw.org. la itre nyine dreng. Maine hetre ordinatöre i angeic, nge ijije hi tro angeic a dreng la itre tane mekun ngöne jw.org, haawe, tro hë angeice lai a madrin la itre itus hna téléchager ngöne RTF (Rich Text Format).—Wange ju la itre mekune hna eköhagen, hna hape, “Ame Ngöne La Kola Xatuane La Ketre Atr Ka Timek . . . ”

3. Nemene la aqane tro sa thele la itre ka timek ngöne la teritoare së?

³ Thele Jë La Ka Timek: Xalaithe hi la itre ka timek hne së hna iöhnyi memine ngöne la easa cainöje ngöne itre hnalapa trootro. Hnene hi laka nango jol koi angatr troa hane ithanata kowe la itre trenyiwa ka traqa koi angatr. Celë hi matre, loi e tro sa catre ‘thele’ angatr matre troa hane cainöj koi angatr. (Mat. 10:11) Hetre sinee huliwa i epuni kö maine sine ce ini epuni pena ka timek? Thele jë troa ithanata me angeic. Maine hetrenyi ngöne la teritoar i epuni la ketre hnaini thatraqane la itre ka timek, hamenë ju la itre xa itus göi itre ka timek matre troa hane xeen e cili. Hetre ka timeke kö e hnine la hnepe lapa i epun? Hetrenyi kö la itre asosiasio ka hamë ixatua kowe la itre ka timek, maine itre hna lapa pena hnei angatr? Qaja jë kowe la hnepe hlapa me kowe la ka ikep hnine la iuma, maine kowe la directör pena, laka, ajane la Itretre Anyipici Iehova troa xatuane la itre ka timek me hamëne la itre itus, maine itre nyine troa dreng pena. Amamane jë koi angeic la hna thingehnaean hnei Tusi hmitrötr elany, la kola troa fe paluane la lue meke ne la itre ka timek. Maine jë troa amamane koi angeic la video qa hnine la sit jw.org hna hape “Sans elle, je serais perdu.” Ej a qaja la mele ne la ketre thupëtresij ka timek ka kapa la ketre Tusi Hmitrötr thatraqane la itre ka timek. Ame la epuni a qaja la kepine la traqa i epun, kolo hi lai a fe gojenyi epuni troa ithanata me angatr, itre ka timek.

4. Nemene la itre ini hne së hna kapa qa ngöne la hna kuca hnei Janet?

⁴ Hnei Janet, ketre trejine föe ka timek, hna pane tro troa wang la ketre hnalapa hna mele ngön hnene la itre ka timek. Hnei eahlo hna ithanata memine la ketre föe hmae. Kola qaja hnei Janet koi eahlo ka hape, “Hnei Iesu hna fe la lue meke ne la itre ka timek, matre troa amamane la ewekë hnei nyidrëti hna troa kuca elany, kowe la itre ka timek asë.” Nyidroti a ce wange ju la Hna Amamane 21:3, 4 nge Janet a qaja la aqane troa eatrëne hnene la Baselaia i Akötresie la hna thingehnaeane cili. Kola drenge hnyawa hnene la föe me qaja ka hape: “Eni petre hi a hane drenge la kola qeje itre timek tune la. Alanyimu la itre atr ka öhne koilo, angatr a mekune ka hape, ame la timeke pi la itre xaa atr, tre hnene laka hetre ewekë hnei angatr hna kuca, maine itre xötrapane i angatre pena.” Hnei Janet hna cinyanyi kowe lai föe me aijijë eahlo troa xome itus ini Tusi Hmitrötr, matre ame hë enehila, nyidroti hë a alua inine la Tusi Hmitrötr ngöne la wiik.

5. Ngacama thatreine kö së troa fe tui Iesu la lue meke ne la itre ka timek, ngo nemene fe la itre manathith hne së hna troa kapa e hne së hna hane hnimi nyudren?

⁵ Eje hi lai laka, thatreine kö së troa fe tui Iesu la lue meke ne la itre ka timek, ngo ijije hi tro sa xatuane la nöjei atr asë hna atimekëne hnene la haze ne la fene celë, memine fe lo lai itre ka timek, matre tro fe angatr a hane trotrohnine la nyipici e hnine la Wesi Ula i Akötresie. (2 Kor. 4:4) Hnei Iesu hna aloine me fe la lue meke ne la lue thupëtresij ezin e Ieriko, pine laka, hnei Iesu hna “hnimi nyido.” (Mat. 20:34) Maine tro sa hane hnime la itre ka timek, tro fe hë së a hane xome la hnëqa ne troa xatuane la itre xan e angatr troa atre Iehova, lo Tretretro së Atre troa fe la lue meke ne la itre ka timek epine palua.