Ini 8
Aqane Melene La Fami Ka Amadrinë Akötresie
Nemene la göhne ne la trahmanyi ngöne la fami? (1)
Tune ka la aqane tro la trahmanyi a ce mele memine la föe i angeic (2)
Nemene la itre hnëqa ne la kem? (3)
Nemene la hnëqa ne la föe hnine la fami? (4)
Nemene la hnei Iehova hna amekötine kowe la itre keme me thin, me kowe la itre nekönatr? (5)
Nemene la mekune la Tusi Hmitrötre göi isalapa me sei hna cil? (6, 7)
1. Tusi Hmitrötre a qaja ka hape, trahmanyi la hene la fami. (1 Korinito 11:3) Tro hmekuje hi la trahmanyi a caa föe. Loi e lue ka faipoipo nyidro ngöne la mus.—1 Timoteo 3:2; Tito 3:1.
2. Loi e tro la trahmanyi a hnime la föe i angeic, tune la aqane hnime angeice la mele me ngönetrei angeic. Tro la trahmanyi a nyihnyawane la föe i angeic, tune la aqane nyihnyawane Iesu la itretre drei i nyidrë. (Efeso 5:25, 28, 29) Thaa tro kö angeice a lepe la föe i angeic, maine akötrë nyiidro. Ngo, loi pe tro angeice a amamane laka, angeice a atrune me metrötrë nyiidro.—Kolose 3:19; 1 Peteru 3:7.
3. Tro la keme a catre huliwa, matre troa thupëne la fami i angeic. Nyipi ewekë tro angeice a hamëne la itre ewekë ka ijije kowe la föe i angeice memine la itre nekö i angeic, ene la xen, me ihetr, me uma. Tro fe la keme a hamëne la itre hna ajane hnene la fami i angeic, ngöne la götrane la ua. (1 Timoteo 5:8) Angeice a cilëmekene la fami ngöne laka, angeice a xatuane la lapa i angeice troa atrehmekunyi Akötresie, memine la itre trepene mekune i Nyidrë.—Deuteronomi 6:4-9; Efeso 6:4.
4. Loi e tro la föe a ketre ixatua ka tru, kowe la fö i angeic. (Genese 2:18) Tro angeice a xatuane la fö i angeice troa inine la itre nekö i nyidro, me haji angaatr. (Ite Edomë 1:8) Iehova a amekötine kowe la föe tro angeice a hetrenyi la ihnim, ngöne la aqane tro angeice a thupëne la fami, laka tro la föe a nyihnyawane la fami i angeice cememine la ihnim. (Ite Edomë 31:10, 15, 26, 27; Tito 2:4, 5) Tro eahlo a metrötrëne hnyawa la fö i eahlo.—Efeso 5:22, 23, 33.
5. Akötresieti a upe fe la itre nekönatr, troa drenge thenge la itre keme me thin. (Efeso 6:1-3) Nyidrëti a ajane tro la itre keme me thine a inin, me hajine la itre nekö i angatr. Nyipi ewekë tro la itre keme me thine a thele ijin, troa ce mele memine la itre nekö i angatre me troa ini angatre la Tusi Hmitrötr, jëne tro angatre lai a hamëne kowe la itre nekönatre la ihnim, memine la itre nyipi mo thatraqane la götrane la ua. (Deuteronomi 11:18, 19; Ite Edomë 22:6, 15) Thaa loi kö tro la itre keme me thine a catrën, maine calogitre ngöne la angatre a hajine la itre nekö i angatr.—Kolose 3:21.
6. Maine hetre hnepe jole ka traqa kowe la lue trefën, ke, loi e tro nyidroti a tupathe troa xötrethenge la eamo qa hnine la Tusi Hmitrötr. Tusi Hmitrötre a upi së troa amamane la ihnimi së, memine fe la tro së a atreine kapa la qeje menu itre xan. (Kolose 3:12-14) Tha Wesiula i Akötresieti kö a upi së troa isa lapa, kösë jëne troa nyinyine la itre hnepe jole ka co ka traqa kowe la lue trefën. Ngo ijije hi tro la föe a mekune troa tro trije la fö i angeice ka (1) xele ma kuca la hnëqa i angeic, ene la troa thupë föe hmunë me itre kuku, (2) ka isi catre pala ha angeic, matre kola neëne wanga traqa pi kowe la ihumuth, maine (3) ka isi me thungi jëne la föe i angeice troa nyihlue i Iehova.—1 Korinito 7:12, 13.
7. Tro la lue trefëne a inyipicikeu. Ame la troa nyi xetë, ke, tria lai qëmeke i Akötresie, me qëmekene la hna faipoipo memin. (Heberu 13:4) Caasi hi la sipu kepine hna amekötine hnei Tusi Hmitrötr, kepine ka aijijëne la lue trefëne troa itriji me ikötresai hmaca, ene la ce meköle trefëne e tröne la faipoipo. (Mataio 19:6-9; Roma 7:2, 3) Iehova a xelene la sei hna cil, e maine kola isalapa la lue trefëne me ikötresai hmaca me ketre atr, ngo pë pe sipu kepine ka ijije qa hnine la Tusi Hmitrötr.—Malaki 2:14-16.
[Iatr ne la götran 16, 17]
Akötresieti a ajane tro la itre keme me thine a inine la itre nekö i angatr, me haji angatr
[Iatr ne la götran 17]
Tro la keme ka tru ihnimin a hamëne kowe la fami i angeice la itre hna ajane ka ijije ngöne la ngönetrei, me ngöne la ua