Mekene Truedre
Loi e Troa Lapa Mekune Pala Hi La Drai i Iehova
1. Nemene la mekune ka eje the së ngöne lo easë a xötrei atre laka, easenyi hë troa thepe së qa ngöne la itre akötr ne la fene ka ngazo celë?
AME ngöne itre ewekë hne së hna inin panën hnine la Tusi Hmitrötr, hna tro pane hi lo aja i Iehova, ene la troa aparadraisone la fene hnengödrai asë. Ame ngöne la fene cili, paatre hë la itre isi, me ihumuth, me jiin, me nöjei pengöne mec, me akötr me mec. Tro fe ha amelene hmaca la itre atr ka meci hë. Hane petre hi elanyi lai ketre aqane mel ka mingöminge catr! Easenyi catre hë matre traqa pi la itre ewekë cili, kola amamane hnyawa lai hnene lo ijine kola hlepëti hnei Keriso ene lo kola acili nyidrë troa joxu ngöne lo macatre 1914, ngo thatreine pe la lue meke së atr troa öhn; qaane ju hi lai, kola lö hnene la fene ka ngazo e hnine lo hnepe ijine hna hëne ka hape itre drai tixenuë. Ame hë ngöne la kola umuthe la itre drai cili, tro Iehova a apaatren la fene ka ngazo celë me tro sai së kowe lo fene ka hnyipixe hna thingehnaeane hë ekö!
2. Nemene la “drai Iehova”?
2 Kola hëne hnei Tusi Hmitrötr la ijine iapaatreny ka hape, “drai [“Iehova,” MN ].” (2 Peteru 3:10) Celë hi “drai ne elëhni Iehova” kowe la fene hna musinën hnei Satana. (Zefania 2:3) Kola troa nyipune la ijine cili hnene la “ishi ngöne la drai atraqate i Akötesie Kapucatin asë . . . , ëjene qene Heberu Amagedo,” nge e cili hi lo kola troa apaatren la “nöjei joxu e celë fen’ asë.” (Hna Amamane 16:14, 16) Hapeu, kolo kö a amamane hnene la aqane mele i nyipunie ka hape, xecie hnyawa koi epuni laka easenyi catre hë la “drai Iehova” cili?—Zefania 1:14-18; Ieremia 25:33.
3. (a) Eue la ijine troa traqa la drai i Iehova? (b) Pine nemene matre ewekë ka lolo catr, laka thaa hnei Iehova kö hna qaja amaman la “drai memine la haua”?
3 Thaa hnei Tusi Hmitrötre kö hna hamëne la ijine tro Iesu Keriso, lo Atre troa nyi iwanakoime i Iehova, a lepe apën la fene i Satana. Hnei Iesu hna qaja ka hape: “Ngo ame la drai memine la haua cili, te, pëkö ate atein ; tha ’te kö la ite angela e hnengödrai, memine la Nekön, ngo Kakati hmekuje hi.” (Mareko 13:32) Maine paatre trootro pi hi the së la ihnimi koi Iehova, tro hë së lai a uthe trongëne la drai Nyidrë ngöne la itre he së matre troa thele la itre aja ne la ngönetrei. Ngo ame kowe la itre atr, ka tru e kuhu hni angatr la ihnimi koi Iehova, tre angatre lai a nyihlue i Nyidrë ngöne la mele i angatr ka pexej, ngacama thatre ju hë angatr la ijine tro Iehova a apaatren la fene ka ngazo.—Salamo 37:4; 1 Ioane 5:3.
4. Tune kaa lo aqane hmekë së hnei Iesu?
4 Iesu a hmekën la itre atr ka hetre ihnimi koi Iehova ka hape: “Wange kö nyipunie, hmekënejë me thith ; ke tha ’te kö nyipunie la ijin.” (Mareko 13:33-37) Nyidrë a catre xatua së matre thaa tro kö a thapa la mele së ngöne la götrane la ua, hnene la itre nyine xeni me nyine ij maine hnene pena la hna tru menu la hna “kukehnine kowe la mele celë,” nge thëthëhmine pë hë la itre ka nyipi ewekë, ene lo itre nyine pane kuca ngöne la itre ijine enehila.—Luka 21:34-36; Mataio 24:37-42.
5. Thenge la hna qaja hnei Peteru, nemene la ewekë ka troa traqa ngöne la drai i Iehova?
5 Ketre, Peteru mina fe a eamo së troa lapa mekune hnyawa la ijine troa “traqa la drai Iehova, lo ka troa manithe la hnengödrai ame hna ahmun, nge troa cici hnei ideuth la nöjei ewekë.” Ame asë hi la nöjei musi hna acile hnei atr, ene lai hna qaja ka hape “hnengödrai,” tre troa apaatren itre ej, ketre tune mina fe la “fene hnengödrai” memine la “nöjei huliwa ngön’ ej.” Kolo lai a qaja lo itre mekuna ne la fen celë me itre huliwa ne ej ka ngazo, tune la kola tro triji Akötresie matre troa ketre kuci mekun, me pi melën la mele ne kuci ngazo me aja mo. Kola troa nyihnane asë lai hnene la “hnengödrai ka hnyipixe [Baselaia i Akötresie e koho hnengödrai] memine la fene hnengödrai ka hnyipixe [itre atren la fen ka hnyipixe]” nge troa eje ngön la “thina ka meköt.” (2 Peteru 3:10-13) Itre ewekë lai nyine hain nge itre ka troa iasesëkötrë, pine laka tro itre ej a traqa ngöne la ketre drai me ketre hawa thaa hne së kö hna treqen.—Mataio 24:44.
Lapa Hmekëne Jë La Hatren
6. (a) Nemene la aqane eatr ngöne lo hneijine i angetre Iudra, la itre ithanata hna qaja hnei Iesu nyine troa sa lo hnyinge ne la itretre drei nyidrë? (b) Nemene la itre götrane ne lo itre hna qaja hnei Iesu nyine sa la hnying, ka qaja amamane hnyawa lo itre ewekë me itre aqane ujë hna öhne qaane lo macatre 1914?
6 Qa ngöne la aliene la itre ewekë ka traqa ngöne la hneijine së, loi e tro sa atre pengöne hnyawa lo alien lo hatren ka amamane ka hape traqa ha së ngöne la “puatine la [“hneijine,” MN ]” lo hna hape itre drai hnapin. Loi e tro sa atre hnyawa ka hape, ame hë lo ketre götrane ne lo itre hna qaja hnei Iesu (Mataio 24:4-22), lo nyidrë a sa la hnyinge ne la itretre drei nyidrë (xötre 3), tre hna pane eatre hui angetre Iudra ngöne lo macatre 33 uti hë 70 M.K. Nge kola eatre hnyawa lo lai itre hna perofetane cili qaane lo 1914 ijine “hlepëti” Keriso nge “puatine la [“ hneijin,” MN ].” Kola qaja ngöne Mataio 24:23-28 la ewekë ka traqa qaane lo 70 M.K. uti hë la hlepëti Keriso. Ame lo itre ewekë hna cinyihan ngöne Mataio 24:29–25:46, tre itre eje a eatr ngöne la hneijine ne la pun.
7. (a) Pine nemen matre loi e tro sa atreine hnyawa hmekën la aqane trongën la itre ewekë ka traqa ngöne la hneijine së enehila nge ka qajaqaja lo hatren? (b) Sa jë la itre hnying ngöne la pune la paragarafe celë me amamane la aqane eatr la hatren hna perofetan qaane lo 1914.
7 Loi e tro pala hi së a atreine hmekën la itre ewekë ka traqa me itre aqane ujë ne la itre atr ka eatrëne lo lai hatren hna thingehnaeane hë. Ixomekeune jë itre ej memine lo itre ewekë hna perofetane hë hnei Tusi Hmitrötr, matre troa wange ka hape ihmeku kö itre ej. Aqane tro fe a acatren la lapaune së, matre thaa luelue kö së troa thuemacane la itre atr laka easenyi catre hë la drai cili. (Isaia 61:1, 2) Pane mekune hnyawa ju së la itre aja cili, nge tro sa ce wange cahu itre hnying ka amamane hnyawa la itre götrane ne la hatren hna hamën ngöne Mataio 24:7 me Luka 21:10, 11.
Tune kaa la aqane eatr qaane lo 1914 la hna perofetan ene laka ‘tro la ketre nöj a cile kowe la ketre nöj, nge tro la ketre baselaia a cile kowe la ketre baselaia’? Nge tune kaa pë hë la itre isi qaane lai macatre cili?
Nemene la ketre meci ka tru ka humuthe la itre atr ka nyimutre ngöne lo macatre 1918, kola sasaithe la etrune la itre atr ka meci ngöne lo lai Pane Isi Ka Tru? Ngacama atreine hë enehila troa nyinyin la itre ka wezipo, ngo nemene pala kö la itre meci ka humuthe la itre atr ka nyimutre?
Ngacama kola kökötr la inamacan ne la atr jëne la Sias enehila, ngo traqa koi ijetre la etrune la itre jiin ka lepe la itre atr ngöne la fen?
Nemene la ka aijijë së troa qaja ka hape, ame la itre thiina hna edromën ngöne la 2 Timoteo 3:1-5, 13, tre thaa ene kö lo itre aqane mele ne la atr ngöne la nöjei ijin, ngo kola mama hnyawa la aqane ngazo catre la aqane mel, ngöne laka kola easenyi catr la pune la itre drai hnapin?
Kola Aisan La Itre Atr
8. (a) Thenge la hna cinyihan ngöne la Mataio 13:24-30, 36-43, nemene la itre xaa ewekë ka qajaqaja la pune la fene celë? (b) Nemene la aliene la ceitune hna hamën hnei Iesu?
8 Hetrenyi pala kö la itre xaa ewekë hna qaja hnei Iesu ka qajaqaja ka hape, traqa ha së kowe la pune la fene celë. Ame la ketre, tre ene la kola thawa ijen la “ite nekö ne la baselaia” memine “ite nekö ne la ate ka ngazo.” Hnei Iesu hna amexeje lai ngöne la nyidrëti a qaja la ketre hna eënyi qitr ngo hna jumi fejane fe ka ngazo hnene la ketre ithupëjia. Ame la “qitre” tre kola qaja la itre Keresiano hna iën. Ame la “zizania” tre ene la itre atr ka sipu qeje angatr ka hape itre Keresiano fe, ngo ame pe tre “itre nekö ne la atre ka ngazo” qa ngöne laka, angatr a qale catr kowe la fen hna musinën hnei Diabolo. Hna thapa triji angatre lai qaathene la “ite nekö ne la baselaia [i Akötresie]” nge kola troa apaatrenyi angatr. (Mataio 13:24-30, 36-43) Hapeu, öhne fe kö nyipunie la kola isa thewe nyidro?
9. (a) Thupene la Pane Isi Ka Tru, nemene la aqane aisane la itre atr ka sipu qaja ka hape itre Keresiano fe angatr? (b) Tune kaa la aqane amamane hnene la itre Keresiano hna iën ka hape itre nyipi hlue ne la Baselaia angatr?
9 Thupene la Pane Isi Ka Tru, hna thawa luën la itre atr ka sipu qeje angatr ka hape itre keresiano fe, matre kösë lue gurupe hë: (1) Ame la ketre gurup, tre, kolo itre hene hmi ne la itre hmi ka hane qaja ka hape itre keresiano fe angatr. Ce angatre kö me itre sinatronge i angatr, kola qajaloin lo organizasio hna hape Société des Nations (ame enehila tre Organisation des Nations unies) ngo pë pe tingetinge me caasi e hnin, ke eje kö lo ajan troa isa siejë nöjen. Ame ngöne la ketre götran, tre, (2) kolo itre nyipi Keresiano, thaa hane fe kö angatr semesinen lo itre isi ne lo itre nöj, angatre pe kö a catre fë la huliwa ne la Baselaia i Akötresie hna cilën hnene la Mesia. (Ioane 17:16) Hna amamane hnene la itre nyipi Keresiano cili laka, angatre la itre ka nyihluene hnyawa la Baselaia i Akötresie, ke hnei angatr hna cainöjën la “maca ka loi celë ne la baselaia” e cailo fen asë. (Mataio 24:14) Nemene la thangane la hnei angatr hna cainöj?
10. Nemene la pane thangane la hna cainöjën la Baselaia?
10 Hna pane icasikeun panën la thelen ne la itre Keresiano hna iën hnene la uati hmitrötre i Akötresie, kola qaja lo angetre troa elë hnengödrai eë matre troa ce cile me Keriso ngöne la Baselaia. Ngacama angatre kö a isa mele ngöne la isa nöje i angatr, ngo ame pe tre caasi hë angatr nge hna hnëkë angatr. Easenyi catre hë matre fenesi hnyawa pi pelehatrenyi angatr.—Hna Amamane 7:3, 4.
11. Nemene la huliwa ne icaasinekeun hna kuca enehila, nge nemene la hna perofetane ka eatrëne lai?
11 Thupene lai, hna nyiqaan fene la musi Keriso troa icaasinekeun la “ka ala nyimu atraqat . . . qa ngöne la ite xöte nöj’ asë, me ite tribu, me nöjei ate, me ite qene hlapa.” Ame la itre atren la ka ala nyimu atraqatr, tre angatre hi lo “ite xa mamoe” ka troa mele pe qa ngöne lo “aköt atraqat” matre troa lapan lo fene ka hnyipixe i Akötresie. (Hna Amamane 7:9, 14; Ioane 10:16) Kolo pala hi a cainöjën enehila la Baselaia i Akötresie qëmekene troa nyipune la fen. Kola catr troa ce huliwa hnene la ka ala nyimu atraqatr, ene lo itre xaa mamoe, itre milio la etrun, memine lo thelene hna iën, matre troa tro fë la maca ne Baselaia. Celë hi maca ka sisitria catre lai nyine troa hane dreng hnene la itre atr ne la nöjei nöje asë.
Tune Kaa Jë La Itre Drai Elany?
12. Hapeu tro pala jë kö së a catre cainöj qëmekene troa traqa la drai i Iehova?
12 Kola amamane hnyawa hnene la itre ewekë ka traqa ha laka, easenyi hë la pune lo hna qaja ka hape itre drai hnapin, nge calemi catre hë la drai i Iehova. Ngo hapeu, hetrenyi pala kö la itre xaa hna perofetan ka troa traqa qëmekene la drai atraqatr? Eje hi. Ame la thewe atr kowe la Baselaia tre, thaa fenesi pala kö. Nyimu macatre ne catre la hna icilekeu ngöne la itre xaa götran, ngo ame hë enehila kola elë catre trootro la etrune la itretre dreng. Ngöne mina fe la itre götran ka xele ma drenge la maca ka loi, mama fe hë e cili la ihnimi Iehova qa ngöne laka easë a anyipicin la ëje i Nyidrë. Haawe, catre pi së troa xome la huliwa cili! Iesu a thingehnaeane ka hape, troa traqa elanyi la pun e ase hë umuthe lai huliwa ne cainöj.
13. Thenge la hna qaja ngöne 1 Thesalonika 5:2, 3, nemene la ewekë ka tru ka tro petre kö a traqa, nge nemene la aliene eje elanyi koi së?
13 Hanawang la ketre hna perofetane hnei Tusi Hmitrötr ka nyipi ewekë catr, kola hape: “E qaja hnei angat, ka hape, Tingetingë hë, me lapa xetietë, ene pe canga traqa pi koi angate la hnëjin, tune la aköte sile kowe la föe ka upune ; nge tha tro kö angat’ a utet.” (1 Thesalonika 5:2, 3) Tro kö lai a mama hnyawa elanyi la aqane trongene lai xötrehnëewekë hna hape, “tingeting . . . me lapa xetietë.” Ngo loi pe tro së a trotrohnine hnyawa ka hape, nyipi thatreine kö la itre ka musi e celë fen troa apaatren la itre jol ne la atr. Ame koi itre ka lapa mekune hnyawa pala hi la drai i Iehova, tre, thaa tro kö a amenu angatr hnene lai trenge ewekë cili. Atre hnyawa hi angatr laka, thupene la hna qeje tingetinge me lapa xetietë tre, kolo fe hi a canga traqa pi la hnëjin.
14. Nemene la itre ewekë ka troa traqa ngöne la ijine akötr atraqatr, nge tune kaa la aqane trongene itre ej?
14 Ame lo kola nyiqaan la akötr atraqatr, tro la itre ka mus ne la fen a cile koi Babulona Atraqatr, ene lo itre hmi ka thoi e cailo fen, me apaatren ej. (Mataio 24:21; Hna Amamane 17:15, 16) Thupene jë hi lai, tro la itre nöj a ujë kowe la itre atr ka cilëgöline la musi ka pë sane i Iehova, nge e cili, troa atraqatr la elëhni i Iehova kowe la itre musi ne fen memine la itre ka ce me angatr, nge tro Nyidrëti a apaatrenyi angatr. Celë hi lo pune la akötr atraqatre lai, ene e Amagedo. Thupene lai, kola troa kuië Satana pi me itre demoni i angeic hnine la hnaop, nge thaa tro hmaca kö angatr a ajojezine la itre atr. Haawe, kolo hi lai a nyipune la drai i Iehova, drai ne kola troa adraiën la ëje i Nyidrë.—Ezekiela 38:18, 22, 23; Hna Amamane 19:11–20:3.
15. Pine nemen matre thaa aqane ujë ka inamacane kö la troa mekune ka hape nanyi pala kö la drai i Iehova?
15 Troa traqa la pune la fene celë ngöne la ijine hna sa hnei Akötresie. Thaa tro kö ej a hmitr. (Habakuka 2:3) Mekune hi nyipunieti lo kola apaatren e Ierusalema ngöne lo 70 M.K., thatre una ju kö angetre Iudra, thaa hmeke hmaca kö angatr ke kola mekune ka hape tingetingë hë, nge pë hmaca kö nyine troa xouen. Nge tune kaa lo Babulona ekö? Ketre traone ka catr, pëkö hna xouen, nge hna ekögölithe ej hnene la itre tra etë ka draië catr nge ka isaisa. Ngo thaa cile catre ju kö, caasi hi la jidr ne akeine ej. Haawe, ketre tune mina fe, troa apaatrene tune lai la fene ka ngazo celë elany. Ame ngöne la kola apaatren elanyi la fen, epi troa öhnyi së hnei Akötresie e caas hnine la nyipi hmi i Nyidrë, me lapa mekune hnyawa pala hi la drai i Iehova.
Revizio
• Pine nemen matre nyipi ewekë tro sa lapa mekune hnyawa pala hi la drai i Iehova? Troa kuca tune kaa matre troa atreine lapa fë pala hi la mekune cili?
• Kola ketri së tune kaa hnene la aqane thawa ijen la itre atr enehila?
• Nemene pala kö la ewekë ka troa traqa qëmekene la kola nyiqaan la drai i Iehova? Haawe, nemene la nyine tro sa isa thele troa kuca?
[Iatr ne la götran 180]
Easenyi hë matre nyipune pi hë la itre drai hnapin hnene la kola troa apaatren la fene i Satana