Xötrethenge Jë La Aqane Xomihni i Iehova
“Tha hmite kö la Joxu ngöne la hnei nyidëti hna thinge hnaean, . . . ngo nyidëti a xomi hnine ahoeanyi.”—2 PETERU 3:9.
1. Nemene la ahnahna ka sisitria catr, hnei Iehova hna hamën kowe la itre atr?
HNEI Iehova hna hamë së la ketre ewekë, hna thatreine hnene la ketre atr troa hamëne koi së. Ketre ewekë ka sisitria catr nge hna piin, ngo thaa ijiji së kö troa itön’ej maine thapa pena. Ame la ahnahna hnei Nyidrëti hna hamën, ke, mele ka thaa ase palua kö—ene, la ketre mele ka pëkö pun hna troa kapa hnene la ka alanyimu ngöne la paradraiso e celë fen. (Ioane 3:16) Drei la ketre madrine ka tru catr elany! Tro ha paatre fe la itre ewekë ka ahleuhleune la mele ne la itre atr, tune la itre isi, iangazo, pë ewekë, ihumuth, itre sine mec, memine fe la mec. Troa pexej la aqane mele tingetinge me caasi ne la itre atr fene la musi ne la Baselaia i Akötresie ka ihnim. Eje hi lai laka, aja së asë hi troa hane mele hnine la Paradraiso cili!—Isaia 9:6, 7; Hna amamane 21:4, 5.
2. Pine nemen matre thaa canga apaatrene kö Iehova la fene i Satana?
2 Aja i Iehova fe troa acile la Paradraiso e celë fen. Thaa sihngödri kö koi së, pine laka, ka ajane Iehova la lolo memine la meköt. Nyipici laka, Nyidrëti a ajane la lolo me meköt. (Salamo 33:5) Thaa madrine kö Nyidrëti la kola öhne la ketre fen ka ujë trije maine ka icilekeu pena memine la itre trepene meköti Nyidrë; ketre fen ka thipetrije la musi Nyidrë me qanangazone la nöje i Nyidrë. Ngo hetrenyi la itre nyipi kepin ka sewe Nyidrëti troa canga apaatren la fene ka ngazo i Satana. Ame lai itre kepine cili, tre, kola amamane lo hnying thatraqane la loi me ngazo, nge kolo fe hi lai a amamane la nyi Joxu i Nyidrë. Itre kepine lai ka itretrengekeu memine la itre mekune göi thiina ka loi me ka ngazo, nge ka ketr la musi cile i Nyidrë. Ame ngöne la Iehova a wenë la itre mekune cili, Nyidrëti a eëne la ketre thiina ka sisitria catr, ka paatre trootro enehila thene la itre atr ka alanyim, ene la xomihni.
3. (a) Nemene la aliene qene Heleni me qene Heberu, la hnëewekë hna hape, “xomihni” e hnine la Tusi Hmitrötr? (b) Nemene la itre hnying hne së hna troa ce wang?
3 Hetrenyi la ketre hnëewekë e hnine la Tusi Hmitrötr Traduction du monde nouveau hna akönia ujëne hnene la hnëewekë hna hape “atreine itreqe.” Hna majemine ujën hnene la hnëewekë hna hape, “hnim’ ahoean” me “xomihni.” Ame la lue hnëewekë qene Heleni me qene Heberu ka ujën la “xomi hni”, tre, lue eje a qaja la mekune celë, ene la troa hmitre elëhni. Tune kaa la aqane kepe thangane së la xomihni i Iehova? Nemene la ini hne së hna kapa qa ngöne la aqane xomihni memine la aqane xomihniahoeane i Iehova, memine fe la itre hlue i Nyidrë ka mele nyipici? Tune kaa la aqane atre së laka ame la xomihni Iehova, tre, ka pë pun? Tro sa ce wange la mekune celë.
Loi e Troa Ce Wang La Xomihni i Iehova
4. Nemene la hna cinyihane hnei Peteru göne la xomihni i Iehova?
4 Kola qaja la xomihni i Iehova hnei aposetolo Peteru, me cinyihane ka hape: “The tha’te kö la ewekë ka casi celë, ka hape, ame la drai ka casi koi Joxu, te, tune la ca thausane la o macate, nge ame ca thausane la o macate, te, tune la drai ka cas. Tha hmite kö la Joxu ngöne la hnei nyidëti a xomi hnine ahoeanyi nyipunie, tha ajane kö tro kete ate a hnëjin, loi pe tro angat’asëjëihë a ietra.” (2 Peteru 3:8, 9) Luetre cahu lue ini ka troa xatua së troa trotrohnine la xomihni Iehova.
5. Nemene la thangane la aqane goeëne Iehova la traem, ngöne la itre aqane ujë i Nyidrë?
5 Ame la ewekë hnapan, tre, thaa ceitune kö la aqane goeëne së la traeme me Iehova. Pine laka ka mele palua Nyidrë, ame la waan thauzane lao macatre, tre, ceitu me caa drai koi Nyidrë. Thaa hna hnöthi Nyidrëti kö maine uku Nyidrëti pena hnene la traem, nge ketre thaa ka hulihmitre kö Nyidrë. Hetrenyi Iehova la inamacan ka thatrehmekun, nge atre hnyawa hi Nyidrë la ijine ka loi troa enij matre hetre thangane ka loi kowe la itre hlue i Nyidrë, nge Nyidrëti a treqene hnyawa la ijine cili. Ngo, thaa tro kö sa mekune laka thaa Iehova kö a hane kukehnine la itre akötr hnene la itre hlue i Nyidrëti hna melën, qëmekene tro Nyidrëti a traqa. Nyidrëti hi la Joxu ka “nyipi ihnim [nge] ka menyik”, Nyidrëti hi la ihnim. (Luka 1:78; 1 Ioane 4:8) Ijiji Nyidrëti hi troa apaatren epine palua lo ngazo hnei Nyidrëti hna pane nue tune la, nge ka akötrëne la itre atr.—Salamo 37:10.
6. Nemene la ewekë nyine tro sa thupëne troa qaja göi Akötresie, nge pine nemen?
6 Eje hi lai laka, thaa ka hmaloi kö troa lapa treqene la ketre ewekë hne së hna pi ajan. (Ite Edomë 13:12) Celë hi kepine matre, e thaa canga eatrëne kö hnene la ketre atr la itre ewekë hnei angeic hna ahnithe hë, haawe, canga tro hi sa mekune ka hape thaa tro hë angeice lai a eatrëne itre ej. Thaa tro pi kö sa mekune tune lai göi Akötresie! Maine tro sa mekune ka hape, thaa Akötresieti kö a xomihni ngo Nyidrëti pe a hmitr, tre, ngöne la ijine easa itreqe, canga tro hi sa luelu me hace hni, nge easa nango nanazije trootro uti hë la hmulizië së ngöne la götrane la ua. Ketre tro fe ha amenu së hnene lo itre atr hnei Peteru hna hmekë së qa ngön, ene, la itre ka ihnyimasai me ka pë lapaun. Öni angatr: “E ka la hna thingehnaeane ene laka tro nyidëti a traqa? Ke qane lo ijine meköle la ite xötapan, cile huti pala kö la nöjei ewekë asëjëihë qane ngöne la qane la hna xup ‘it’ej.”—2 Peteru 3:4.
7. Nemene la aqane mama la ajane i Iehova tro la itre atr a ietra, ngöne la aqane xomihniahoeanyi Nyidrë?
7 Ame la hnaaluene mekune nyine tro sa xome qa ngöne la itre trenge ewekë i Peteru, tre, ene laka Iehova a xomihni, ke, Nyidrëti a ajane tro nöjei atr asë a ietra. Tro Nyidrëti a apaatren la itre atr ka xele ma saze la itre aqane ujë i angatr ka ngazo. Ngo, thaa Nyidrëti kö a madrine ngöne la kola meci la ketre atr ka kuca la ngazo. Ngo ame la ka amadrinë Nyidrë, tre, ene la kola ietra la itre atr, me bëeke hmaca qa ngöne la itre jë i angatr ka ngazo me thele troa mel. (Ezekiela 33:11) Celë hi matre, Nyidrëti pala hi a xomihni me upe la itre hlue i Nyidrë troa cainöjëne la maca ka loi ngöne la fen asë, matre troa hane mel la itre atr.
8. Kola mama tune kaa la aqane xomihniahoeanyi Akötresie ngöne la itre aqane ujë i Nyidrë kowe la nöje Isaraela?
8 Mama hnyawa ha ekö lo aqane xomihni i Akötresie, ngöne la itre aqane ujë i Nyidrë koi angetre Isaraela. Nyimutre la itre macatre ne xomihnine Nyidrëti la thaa idrei i angatr. Anyimua upe Nyidrë la itre perofeta i Nyidrë troa xatua angetre Isaraela, me hape: “Ujëjë qa ngöne la nöjei jë i nyipunie ka ngazo, nge thupënejë la ite hna ahnithe me hna amekötine hnenge tune la ite wathebo asë lo hnenge hna ahnithe kowe la ite xötapane i nyipunie, me upe koi nyipunie jëne la ite hluenge ite perofeta.” Hapeu, kapa kö angatr la itre ithuecatr? Ohea, “tha drenge kö” angatr la itre hlue i Iehova. 2 Ite Joxu 17:13,14
9. Kola mama tune kaa la xomihni i Iehova thei Iesu, Hupuna i Nyidrë?
9 Haawe, hnei Iehova hna upe la Hupuna i Nyidrë; thaa mano kö Iesu ithuecatre kowe la itretre Iudra matre troa iloi hmaca me Akötresie. Kola mama hnyawa la xomihni i Iehova thei Iesu. Ngacama atre hnyawa ha Iesu laka easenyi hë troa humuthi nyidrë, ngo hnei nyidrëti hna uti pi Isaraela me hape: “Ierusalema, Ierusalema fe, ate humuthe la nöjei perofeta, me trânyi angate hna upe koi’ö, a nyimu ajane hnenge troa icasikeune la ite nekö i’ö, tune la thine ne ha gutu kola hajuhajume la ite kuku fene lue iape i nyën, te, xele kö nyipunie.” (Mataio 23:37) Ame la itre trengewekë ka lolo celë, tre, thaa hna qaja kö hnene la ketre atre amekötin ka pë ihnim, laka kola troa canga nyithupene kowe la itre atr; ohea, itre trengewekëne pe la ketre sinee ka ihnim nge ka xomihni. Ame la aja i Iesu, a tune mina fe la Tretretro i Nyidrë, tre, ene la troa ietra la nöj me hetre pune ka loi kowe la mele i angatr. Pine laka hnene la itre xan hna drenge la kola hmekë angatr, ene pe mele ju pe kö angatr ngöne lo kola thapa e Ierusalema ngöne lo macatre 70 M.K.—Luka 21:20-22.
10. Tune kaa la aqane kepe thangane së la xomihni i Akötresie?
10 Hapeue la xomihni i Akötresie, thaa ewekë ka sisitria kö lai? Ngacama ala nyium catr la itre atr ka thaa idrei, hnei Iehova hna aijijë së, ce memine la itre xaa atr ka alanyim, troa atre pengöi Nyidrë me xölehuje la mejiune ne mel. Öni Peteru e cinyihane kowe la itre sinee Keresiano, ka hape: “mekuneju nyipunie laka ame la xomi hni ahoeanyi i Joxu shë, te, mele lai”. (2 Peteru 3:15) Hapeu, easë kö a hane olene koi Iehova la hnei Nyidrëti hna xomihni së matre troa fe gojenyi së kowe la mel? Nga easë pala hi la a sipone koi Nyidrë jëne la thith troa xomihni së ngöne la nöjei ijine easa nyihlue i Nyidrë—Mataio 6:12.
11. Nemene la hna upi së troa kuca, qa ngöne laka trotrohnine hnyawa ha së la xomihni i Iehova?
11 E trotrohnine hnyawa ha së la kepine matre Iehova a xomihni, haawe, hmaloi hi tro sa treqene la ijine iamele, nge thaa tro jë kö së a mekune ka hape ka hmitre Nyidrëti troa aejën la itre hnei Nyidrëti hna ahnith. (Ite Teije i Ieremia 3:26) Ame ngöne la easa catre thithi matre troa hlepëti la Baselaia i Nyidrë, xecie hnyawa koi së laka atre hnyawa hi Akötresieti la ijine ka sisitria troa aejën la thithi së. Ketre, easë a catre troa xötrethenge la tulu i Iehova hnene la troa xomihni ngöne la aqane imelekeu së memine la itre trejine me easë, me kowe mina fe lo itre hne së hna cainöje kow. Easë fe, thaa ajane kö së tro la itre xan a mec, ngo easë pe a ajan tro angatr a ietra me ce thawa me easë la mejiune kowe la mele ka thaa ase palua kö.—1 Timoteo 2:3, 4.
Tro Sa Ce Wang La Xomihni Ne La Itre Perofeta
12, 13. Pine nemene matre ijije hi troa hane e Isaia hnine lo itre perofeta ka xomihni, hna qaja ngöne Iakobo 5:10?
12 Maine tro sa mekune hnyawa la xomihni i Iehova, tro ha xatua së troa wanga atrune hnyawa la thiina cili me hane melën ej. Thaa ka hmaloi kö koi së itre atr ka ngazo troa xomihni. Ngo ame pe, tre, ijiji së hi; atreine hi tro sa hane xomi ini qa ngöne la aqane xomihni ne la itre hlue i Iehova ekö. Hna cinyihane hnei Iakobo, atre drei Iesu ka hape: “Ange tejine fe, nyi tupune ju la nöjei perofeta, ange hna ulatine ngöne la atesieti ne la Joxu, ngöne la aköt, me xomi hni.” (Iakobo 5:10) Ka keukawa nge ka ithuecatre troa atre laka, hnene la itre xan hna hane xomihnine fe la itre itupath hne së hna cile kow.
13 Drei la tulu i Isaia perofeta; hnei angeic hna hane xomihni ngöne la hnëqa hna upi angeic troa kuca. Hnei Iehova hna amamane koi angeic ka hape, ka nyipi ewekë catr koi angeic la thiina cili. Öni Iehova e qaja koi angeic: “Trojë, nge qajajë kowe la nöje celë, ka hape, Denge pala hi nyipunie, ngo tha trotrohnine kö ; goeëne pala hi, ngo tha ate hmekune kö ; apipixenyëneju la ite hni ne la nöje celë, nge asimineju la ite lue hnangenyë i angat, nge atineju la ite lue meke i angat, wanga öhne hnene la ite lue meke i angat, me denge hnene la ite hnangenyë i angat, me ate hnene la ite hni angat, me hmaca, ame hna loi angat.” (Isaia 6:9, 10) Ngacama thaa drei angeice kö hnene la itre atr ngöne la 46 lao macatre, ngo hnei Isaia hna catre xomihni me ahnithe la itre ithuemacanyi Iehova! Haawe, tro fe la xomihni a xatua së troa catre ngöne la huliwa ne cainöjëne së la maca ka loi, ngacama troa ala nyimu la itre ka xele ma drei së.
14, 15. Nemene la ka xatua Ieremia troa cile catre qëmekene la itre akötre me hacehni?
14 Ejehi laka, ngöne la huliwa ne cainöj ne la itre perofeta, thaa ixelemawai hmekuje kö, ngo hna akötrë angatre mina fe. Hna othi Ieremia, hna “akalabusi angeic,” me kuië angeic kowe la hnaop. (Ieremia 20:2; 37:15; 38:6) Itre akötre lai ka xulu qaa thene hmaca kö lo itre atr hnei angeice hna ajane troa xatuan. Ngo thaa hnei angeice kö hna akötrëne lai, maine thele pena troa iatëkeun. Qea pi hë la itre macatre ne xomihni angeic.
15 Thaa hna ahumune kö la qe i Ieremia hnene la itre icilekeu me ihnyimasai, ketre tu së fe enehila. Maine jë tro sa nango kucakuca e itre xaa ijin. Hnei Ieremia hna hane hacehni. Angeic a cinyihane ka hape: “Kola iangazo, me kamokamo; nge nyine qaqa ni, me jele ngazo ni la wesi ula i Iehova o drai pala hi. Ame hnenge hna qaja, ka hape, tha tro kö ni a qeje nyidë, me ewekë hmaca ngöne la atesiwa i nyidë.” ’ ” Nemene ju hë la ka traqa? Hnei Ieremia kö hna nuetrije la huliwa ne cainöj? Öni angeic e sisedrëne ka hape: “Loi pe ej’ (la wesi ula i Akötresie) e kuhu hninge kösë eë ka mele hna thinge hnine la ite juneng; nge huliwa ni troa aca tei hni, te, tha’teine kö.” (Ieremia 20:8, 9) Kola mama laka, ame la angeic a semesinene la itre ka hnyimasai angeic, e cili hi lai kola paatre la madrine i angeic. Ngo ame pe la angeic a catre wanga atrune la emingömingöne me enyipiewekën la maca hnei angeic hna tro fë, ene pe madrine hmaca jë hi angeic. Ketre, ce Iehova me Ieremia, “tune la tane ishi ka cat”; Nge hnei Nyidrëti hna hamën la trengecatre koi angeic matre ijiji angeic troa cainöjëne la Wesi Ula i Akötresie cememine la aja atraqatr me trenge catr.—Ieremia 20:11.
16. Tune kaa la aqane tro sa akökötrene pala hi la madrine së troa cainöjëne la maca ka loi?
16 Hane kö Ieremia öhnyi madrine ngöne la huliwa ne cainöje i angeic? Eje hi. Öni angeic koi Iehova: “hna öhne la ite wesi ula i enëtilai, ame hnenge hna xeni it’ej, nge nyine amadine me aciacine la hninge la wesi ula i enëtilai, ke hna ati ëjenge la atesiwa i enëtilai, Iehova Akötesie.” (Ieremia 15:16) Angeic a madrine la elolone la hnëqa, ene la troa nyi trengewekëne la nyipi Akötresie me troa cainöjëne la Wesi Ula i Nyidrë. Easë a ce madrine memine la itre angela, qa ngöne laka, nyimutre catr la itre atr ka kapa la maca ne Baselaia, me ietra, me xome la gojenyi ne tro kowe la mel ka thaa ase palua kö—Luka 15:10.
“Xomihni i Iobu”
17, 18. Tune kaa la aqane xomihniahoeane i Iobu, nge nemene ju hë la thangane koi angeic?
17 Thupene la hna qaja la pengöne la itre perofeta ekö, hna cinyihane hnei Iakobo ka hape: “Dengë hë nyipunie la xomi hni (xomihni ahoeane i) Iobu, nge ate hë la hna nyi pune hnei Joxu.” (Iakobo 5:11) Ame lai hnëewekë cili qene heleni hna hape “xomihniahoean”, tre, ceitune hi la alien’ej memine lo hnëewekë hna qaja hnei Iakobo ngöne lo xötre hnapan, ene, la troa “xomihni”. Hnene la ketre atr ka thele ewekë ngöne la Tusi Hmitrötr hna pane qaja la hnepe eisapengönene la lue hnëewekë cili; öni angeic: “Ame la pane hnëewekë tre, kola qaja la easa xomihnine la ketre atr ka qanangazo së; ame la hnaaluen, tre, kola qaja la aqane catre cile huti së ngöne la ketre itupathi ka tru.”
18 Atraqatre la aqane akötre i Iobu hnene lo itre hulö ka traqa koi angeic. Hna pë manie i angeic, hna meci la itre nekö i angeic, nge hna tithi angeic hnene la ketre meci ka ngazo catr. Hna sili trengathoi angeice pena ha, ka hape, Iehova la ka nyithupene koi angeic. Thaa hnei Iobu kö hna akötre thaup; hnei angeic hna latresi pine la ewekë ka traqa koi angeic uti fe hë la pune qaja angeic ka hape, ka meköti kö angeic hui Akötresie. (Iobu 35:2) Ngo, thaa paatre pi kö la lapaune thei angeic, ketre thaa hnei angeice kö hna triane la mekötr. Thaa hnei angeice kö hna eji Akötresie tune lo aqane amexeje i Satana. (Iobu 1:11, 21) Nemene hë la thangane koi angeic? Tru la hnei Iehova “hna amanathithi Iobu ngöne la pune hune la meken.” (Iobu 42:12) Hnei Iehova hna aloine la meci Iobu, me atrune la itre mo i angeic matre tru catre hë hune ekö, me amanathithine atrunyi angeic, me mele madrine memine la itre atr hnei angeic hna hnim. Qa ngöne la hnei Iobu hna xomihniahoeane me mele nyipici, ene pe trotrohni Iehova hnyawa ha hnei angeic.
19. Nemene la hne së hna inine qa ngöne la aqane xomihni me aqane xomihniahoeane i Iobu?
19 Nemene la ini hne së hna kapa qa ngöne la xomihniahoeanyi Iobu memine la xomihni i angeic? Maine jë troa hane tithi së hnei meci maine itre xaa itupathi pena, tui Iobu. Maine jë thaa trotrohnine hnyawa kö së la kepine matre Iehova a nue troa ketri së hnene la ketre jole maine ketre pena. Ngo loi e troa xecie hnyawa e kuhu itre hni së laka: maine tro sa catre mele nyipici koi Nyidrë, tro hë Nyidrëti a amanathithi së. Tro Iehova a nyi june koi angetre catre thele Nyidrëti hnyawa. (Heberu 11:6) Öni Iesu ka hape: “Ame la ate cile huti uti hë la pune, te, tro ha mel.”—Mataio 10:22; 24:13.
“Tro Ha Traqa La Drai Iehova”
20. Pine nemene matre ka xecie hnyawa koi së laka tro ha traqa la drai Iehova?
20 Ngacama ka xomihni lae Iehova, ngo thaa tro pi kö sa thëthëhmine laka ka meköti mina fe Nyidrë, nge thaa tro pi kö Nyidrëti a nue palua la ngazo. Ka hetre ifegone la xomihni i Nyidrë. Hna cinyihane hnei Peteru ka hape: “thaa hna [hnei akötresie] hnime kö la fene hnengödrai ekö.” Ngacama hna amele Noa me itre sinee i angeic, hna apaatrene la fene ka ngazo celë hnei di. Hnei Iehova fe hna ameköti Sodoma me Gomora, me apaatrene la lue traone cili matre hnatresiji ju pe hi. Celë hi itre iameköti lai hna hamëne “nyine hatene koi angete troa thina ka ngazo hmaca.” Qa ngöne lai, loi e troa xecie koi së laka: “Tro ha traqa la drai Iehova.”—2 Peteru 2:5, 6; 3:10.
21. Tro sa amamane tune kaa la aqane xomihni së memine la aqane xomihniahoeane së, nge nemene la ini hne së hna troa ce wang e wiike ka troa xulu?
21 Celë hi matre, loi e tro sa xötrethenge la xomihni i Iehova, hnene la hna hane xatuane fe la itre xan matre tro angatr a ietra, ene pe troa hane amele angatre fe elany. Loi e tro fe sa hane xötrethenge la tulu ne la itre perofeta, itre ka cainöjëne la maca ka loi cememine la xomihni, ngacama thaa hna kepe angatre kö hnene la itre atr hnei angatr hna cainöje kow. Nge maine tro sa tui Iobu, ene la troa cile huti ngöne la itre itupath, eje hi lai laka, tro hë Iehova a amanathithi së hnyawa. Nyimutre catre la itre kepine tro sa madrine ngöne la huliwa ne cainöje së, pine laka, easa wanga atrehmekune la aqane amanathithine Iehova la nöje i Nyidrë matre troa cainöjën la maca ka loi e cailo fen. Celë hi hne së lai hna troa ce wang ngöne la ini ka troa xulu.
Mekune Hi Nyipunieti Lo Itre Hna Inin?
• Pine nemene matre Iehova a xomihni?
• Nemene ini hne së hna xome qa ngöne la xomihni ne la itre perofeta?
• Tune kaa la aqane xomihniahoeane Iobu, nge nemene la thangane koi angeic?
• Easë a atre tune kaa ka hape hna nyi ifegone la aqane xomihni i Iehova?